1. Taano ta kaipuhan tang magdangog sa patanid ni Jesus?

SA SAIYANG propesiya mapadapit sa huring mga aldaw, sinabi ni Jesus: “Mag-ingat kamo na an saindong puso dai nuarin man mapagabatan nin . . . mga kahaditan sa buhay”—mga kahaditan sa pagbuhay o mga kahaditan sa pang-aroaldaw na buhay. (Luc. 21:34) Kaipuhan niyatong magdangog sa patanid na iyan. Taano? Huling napapaatubang kita ngunyan sa nakaka-stress na mga problema na naeeksperyensiyahan man kan gabos.

2. Anong nakaka-stress na mga problema an napapaatubang sa satong mga tugang?

² Kun minsan, napapaatubang kita sa sabay-sabay na nakaka-stress na mga problema. Isipon an minasunod na halimbawa. Grabe an pagkamundo kan Saksing si John, * na may hilang na multiple sclerosis, kan bayaan siya kan saiyang agom pagkatapos nin 19 taon nindang pag-ibanan. Dangan binayaan kan duwa niyang aking babayi si Jehova. Iba man an nagin mga problema kan mag-agom na si Bob asin Linda. Pareho sindang nawaran nin trabaho, dangan kinaipuhan nindang maghali sa saindang harong. Tapos si Linda na-diagnose na may hilang sa puso na puwede niyang ikagadan, dangan may saro pang hilang na nagpuon na rauton an saiyang immune system.

3. Sigun sa Filipos 4:6, 7, sa ano kita makakasigurado?

³ Makakasigurado kita na nasasabutan kan satong Kaglalang asin mamumuton na Ama, si Jehova, an namamatian ta pag nai-stress kita. Asin gusto niya kitang tabangan na maatubang an satong mga problema. (Basahon an Filipos 4:6, 7.) Dakul kitang mababasa sa Tataramon nin Diyos na mga eksperyensiya kan saiyang mga lingkod  dapit sa mga problemang inagihan ninda. Mababasa man diyan kun paano sinda tinabangan ni Jehova na maatubang an nakaka-stress na mga sitwasyon na idto. Pag-ulayan ta an pirang halimbawa.

4. Anong mga kadipisilan an napaatubang ki Elias, asin ano an namatian niya mapadapit ki Jehova?

⁴ Naglingkod si Elias ki Jehova sa masakit na mga panahon asin napaatubang sa grabeng mga kadipisilan. Si Hading Ahab, na saro sa mga bakong maimbod na hadi sa kasaysayan nin Israel, nagin agom an maraot na si Jezebel na sarong parasamba ni Baal. Magkaibanan nindang pinalakop sa Israel an pagsamba ki Baal asin ginadan an dakul sa mga propeta ni Jehova. Nakadulag si Elias. Paagi sa pagsarig ki Jehova, nagdanay man siyang buhay kan magkaigwa nin grabeng tiggutom. (1 Ha. 17:2-4, 14-16) Nanarig man si Elias ki Jehova kan kumprontaron niya an mga propeta asin mga parasamba ki Baal. Dinagka niya an mga Israelita na maglingkod ki Jehova. (1 Ha. 18:21-24, 36-38) Dakul an ebidensiya ni Elias na sinusuportaran siya ni Jehova sa masakit na mga panahon na idto.

5-6. Sigun sa 1 Hade 19:1-4, ano an namatian ni Elias, asin paano ipinahiling ni Jehova na namumutan niya si Elias?

⁵ Basahon an 1 Hade 19:1-4. Alagad, natakot si Elias kan maghuma si Reyna Jezebel na gagadanon siya. Kaya nagdulag siya pa-Beer-sheba. Sa grabeng pangluluya nin buot, ‘nagmawot siyang magadan.’ Taano ta nakamati siya nin arog kaiyan? Si Elias bakong perpekto, “tawo man na an mga pagmati kapareho niyato.” (Sant. 5:17) Posibleng nakamati siya nin grabeng stress asin  kapagalan. Minalataw na garo baga naisip ni Elias na sayang sana an mga paghihinguwa niyang suportaran an dalisay na pagsamba, na mayong positibong pagbabago sa Israel, asin na siya na sana an naglilingkod ki Jehova. (1 Ha. 18:3, 4, 13; 19:10, 14) Tibaad mabigla kita sa namatian kan maimbod na propetang ini. Pero nasabutan ni Jehova an namatian ni Elias.

⁶ Dai inanggutan ni Jehova si Elias sa pagpahayag kaini kan saiyang mga namamatian. Imbes, tinabangan niya si Elias na makabawi nin kusog. (1 Ha. 19:5-7) Pag-abot nin panahon, mabuot na itinanos ni Jehova an kaisipan ni Elias paagi sa pagpahiling kan Saiyang makangingirhat na kapangyarihan. Dangan sinabi ni Jehova na igwa pang 7,000 katawo sa Israel na nagsayumang magsamba ki Baal. (1 Ha. 19:11-18) Sa praktikal na mga paagi, ipinahiling ni Jehova ki Elias na namumutan niya ini.

7. Ano an inaasigurar sa sato kan paagi nin pagtabang ni Jehova ki Elias?

⁷ May inaatubang ka daw na nakaka-stress na sitwasyon? Nakakaranga nanggad na maaraman na nasabutan ni Jehova an pagmati ni Elias! Inaasigurar kita kaiyan na nasasabutan man niya an inaagihan tang mga kadipisilan. Aram niya an satong mga limitasyon, asin aram niya maski an satong mga iniisip asin namamatian. (Sal. 103:14; 139:3, 4) Kun aarugon ta si Elias paagi sa pagsarig ki Jehova, tatabangan niya kita na maatubang an mga problemang nagpapa-stress sa sato.—Sal. 55:22.

8. Paano ka tatabangan ni Jehova na atubangon an stress?

⁸ Huli sa stress, puwede kang magin negatibo kaya pangluluyahan ka nin buot. Kun mangyari iyan, girumdumon na tatabangan ka ni Jehova na atubangon an stress. Paano ka niya tatabangan? Dinadagka ka niyang sabihon sa saiya an saimong mga ikinakahadit. Asin sisimbagon niya an paghagad mo nin tabang. (Sal. 5:3; 1 Ped. 5:7) Kaya parating mamibi ki Jehova dapit sa saimong mga problema. Dai siya direktang masimbag sa saimo arog kan ginibo niya ki Elias, pero makikipag-ulay siya sa saimo paagi sa saiyang Tataramon, an Bibliya, asin paagi sa saiyang organisasyon. An mga halimbawa na nababasa mo sa Bibliya makakaranga sa saimo asin matao sa saimo nin paglaom. Asin mapapakusog ka man kan saimong mga kapagtubod.—Roma 15:4; Heb. 10:24, 25.

9. Paano makakatabang sa sato an sarong pinagtitiwalaan na amigo?

⁹ Paagi sa pagsabi ki Elias na magdelegar nin responsabilidad ki Eliseo, tinawan ni Jehova si Elias nin sarong kinakaipuhan na marhay na kaiba-iba na siguradong makakatabang sa saiya pag pinangluluyahan siya nin buot. Kun sinasabi man niyato an satong mga namamatian sa sarong pinagtitiwalaan na amigo, matatabangan niya kitang makayanan an negatibong mga emosyon. (2 Ha. 2:2; Tal. 17:17) Kun mayo kang masabihan kan saimong mga ikinakahadit, mamibi ki Jehova na tabangan kang makahanap nin maygurang na tugang na makakapakusog sa saimo.

10. Paano an eksperyensiya ni Elias nagtatao sa sato nin paglaom, asin paano kita matatabangan kan panuga na nasa Isaias 40:28, 29?

¹⁰ Tinabangan ni Jehova si Elias na maatubang an stress asin maimbod na makapaglingkod sa dakul na taon. Nagtatao sa sato nin paglaom an eksperyensiya ni Elias. Kun minsan, tibaad makaeksperyensiya kita nin grabeng stress na nakakapaluyang marhay sa satong hawak asin emosyon. Alagad kun mananarig kita ki Jehova, tatawan niya kita kan kinakaipuhan na kusog tanganing padagos na makapaglingkod sa saiya.—Basahon an Isaias 40:28, 29.

11-13. Ano an epekto nin stress sa tulong mga lingkod nin Diyos kan suanoy?

¹¹ May iba pang karakter sa Bibliya na napaatubang man sa grabeng stress. Halimbawa, tinagalan  ni Hana an kasusupgan huli sa pagigin mayong aki pati na an daing hirak na pagtuya-tuya kan karibal niyang agom. (1 Sam. 1:2, 6) Huli sa grabeng stress, namundong marhay si Hana kaya nagparahibi siya asin nawaran nin ganang magkakan.—1 Sam. 1:7, 10.

¹² May mga panahon na nakamati man si Hading David nin grabeng stress. Isipa an inatubang niyang mga kadipisilan. Nakonsiyensiya siyang marhay sa mga sala niyang nagibo. (Sal. 40:12) Nagrebelde sa saiya an namumutan niyang aking si Absalom, na nagresulta sa pagkagadan kaini. (2 Sam. 15:13, 14; 18:33) Asin trinaydor siya kan saro sa mga pinakadayupot niyang amigo. (2 Sam. 16:23–17:2; Sal. 55:12-14) Mababasa sa dakul na mga salmong isinurat ni David an mapadapit sa saiyang pangluluya nin buot pati na an saiyang dai matatanyog na pagtitiwala ki Jehova.—Sal. 38:5-10; 94:17-19.

¹³ May sarong salmista na nagpuon na maara sa istilo nin pamumuhay kan mga maraot. Posibleng gikan siya kan Levitang si Asaf, asin naglingkod siya sa “banal na santuwaryo nin Diyos.” Nakamati an salmistang ini nin stress kaya nawara an saiyang kaugmahan asin pagkakontento. Nagpuon na ngani siyang magduwa-duwa kun baga igo na an mga bendisyon sa paglilingkod sa Diyos.—Sal. 73:2-5, 7, 12-14, 16, 17, 21, NW.

14-15. Ano an manunudan ta sa tulong halimbawa sa Bibliya dapit sa pagdulok ki Jehova para sa tabang?

¹⁴ Nanarig ki Jehova an tulo niyang lingkod na nasambitan pa sana. Sinabi ninda ki Jehova an saindang mga kahaditan paagi sa udok na pamibi. Dai sinda nag-alangan na sabihon sa saiya kun taano ta nai-stress sindang marhay. Asin padagos sindang nagduman sa lugar nin pagsamba ki Jehova.—1 Sam. 1:9, 10; Sal. 55:22; 73:17; 122:1.

¹⁵ May pagmalasakit na sinimbag ni Jehova an lambang saro sa sainda. Nagkaigwa nin katuninungan nin isip si Hana. (1 Sam. 1:18) Isinurat ni David: “An saro na matanos dakul an kasakitan, pero iliniligtas siya ni Jehova sa gabos  na iyan.” (Sal. 34:19, NW) Asin pag-abot nin panahon, namatian kan salmista na ‘kinaputan ni Jehova an saiyang tuong kamot,’ asin giniyahan siya paagi sa mamumuton na sadol. Nag-awit siya: “Para sa sakuya, an pagrani sa Diyos marahay sa sako. An Soberanong Kagurangnan na Jehova an ginibo kong pailihan ko.” (Sal. 73:23, 24, 28, NW) Ano an manunudan ta sa mga halimbawang ini? May mga panahon na mapapaatubang kita sa magagabat na problema na makaka-stress sa sato. Pero makakayanan niyato iyan kun huhurop-hurupon ta kun paano tinabangan ni Jehova an iba, kun mananarig kita sa saiya paagi sa pamibi, asin kun masunod kita sa saiya paagi sa paggibo kan ano man na ipinapagibo niya sa sato.—Sal. 143:1, 4-8.   

16-17. (a) Taano ta dai niyato dapat isuway an satong sadiri? (b) Paano kita makakabawi nin kusog?

¹⁶ Itinutukdo sa sato kan tulong halimbawang iyan an saro pang mahalagang leksiyon—dai ta dapat isuway an satong sadiri ki Jehova asin sa saiyang mga lingkod. (Tal. 18:1) Si Nancy, na nakaeksperyensiya nin grabeng stress kan bayaan siya kan saiyang agom, nagsabi: “Dakul na aldaw na habo kong may mahiling o makaulay. Pero mantang mas isinusuway ko an sadiri ko, mas nagigin mamundo ako.” Nagbago an pagmati ni Nancy kan naghanap siya nin mga paagi na tabangan an iba na may inaatubang na problema. Sinabi niya: “Nagdadangog ako mantang ipinapaliwanag  kan iba an saindang mga kasakitan. Narisa ko na mantang mas may empatiya ako sainda, nalilikayan kong magparapokus sa mga problema ko.”

¹⁷ Makakabawi kita nin kusog paagi sa pag-atender sa mga pagtiripon. Pag yaon kita diyan, tinatawan ta si Jehova nin urog na oportunidad na magin satong ‘paratabang asin paratao nin karangahan.’ (Sal. 86:17, NW) Sa mga pagtiripon, pinapakusog niya kita paagi kan saiyang banal na espiritu, saiyang Tataramon, asin kan saiyang mga lingkod. An mga pagtiripon nagtatao sa sato nin oportunidad na ‘mapakusog an satong sadiri paagi kan pagtubod kan mga tugang asin mapakusog ta man sinda paagi kan satuyang pagtubod.’ (Roma 1:11, 12) An sister na si Sophia nagsabi: “Si Jehova asin an satong kasararuan nin magturugang an dahilan kaya padagos akong nakakatagal. An pinakamahalaga sako iyo an satong mga pagtiripon kan kongregasyon. Nahiling ko na mantang urog akong nakikikabtang sa ministeryo asin sa kongregasyon, mas nakakayanan ko an stress asin kahaditan.”

18. Kun pinangluluyahan kita nin buot, ano an maitatao sa sato ni Jehova?

¹⁸ Pag pinangluluyahan nin buot, girumdumon niyato na dai lang nanunuga si Jehova na sa maabot na panahon permanente niyang hahalion an satong mga ikinakahadit, kundi andam man siyang tabangan kita ngunyan na atubangon an stress. Tinatawan niya kita “kan pagmawot saka kan kakayahan” tanganing mapangganahan an pangluluya nin buot asin kawaran nin paglaom.—Fil. 2:13.

19. Anong asigurasyon an itinatao sa sato kan Roma 8:37-39?

¹⁹ Basahon an Roma 8:37-39. Inaasigurar kita ni apostol Pablo na mayo nin ano man na bagay an makakayang isuway kita sa pagkamuot nin Diyos. Paano ta matatabangan an satong mga tugang na napapaatubang sa stress? Sisiyasaton sa masunod na artikulo kun paano ta maaarog si Jehova paagi sa pagpahiling nin malasakit asin suporta sa satong mga tugang pag nakakamati sinda nin stress.