1. ?From wanem yumi mas lesin long woning blong Jisas?

LONG profet tok we Jisas i talem long saed blong ol las dei, hem i se: “Yufala i mas lukaot gud se . . . wari from ol samting blong laef [i] no mekem tingting blong yufala i kam slak olgeta.” (Luk 21:34) Yumi mas lesin long woning ya. ?From wanem? From we long laef blong yumi naoia, yumi stap fesem ol semfala problem olsem ol narafala man.

2. ?Wanem sam problem we ol brata mo sista oli fesem?

² Samtaem yumi save harem nogud long plante problem wantaem. Tingbaot wan Witnes we nem blong hem Jon. * Hem i gat wan strong sik (multiple sclerosis), mo antap long hemia, hem i harem nogud tumas taem waef blong hem i lego hem, afta we tufala i bin mared blong 19 yia. Mo tufala gel blong hem tu i lego Jehova. Bob mo waef blong hem Linda, tufala i fesem ol narafala problem. Tufala i lusum wok blong tufala, mekem se tufala i no moa save stap long haos we tufala i stap pem. Antap long hemia, Linda i faenemaot se hem i gat wan sik blong hat we hem i save ded from, mo ol joen blong hem tu oli soa.

3. ?Filipae 4:6, 7 i soemaot wanem long saed blong Jehova?

³ Yumi save se Papa blong yumi Jehova, we i wokem yumi mo i lavem yumi, i kasem save long filing blong yumi taem yumi fesem ol problem olsem, mo hem i wantem givhan. (Ridim Filipae 4:6, 7.) Baebol i tokbaot plante man blong God bifo, we oli stanap strong taem oli harem nogud long ol defdefren problem. Mo tu, Baebol i eksplenem olsem wanem  Jehova i givhan long olgeta. Bambae yumi tokbaot sam long olgeta.

4. ?Wanem ol hadtaem we Elaeja i fesem, mo wanem tingting we hem i gat long Jehova?

⁴ Elaeja i mekem wok blong Jehova long wan taem we i had, mo hem i fesem plante bigfala problem. King Ehab blong Isrel i no obei long Jehova, mo i maredem Jesebel we i stap wosipim giaman god ya Bal. Tufala i mekem se wosip blong Bal i kam fulap long kantri ya, mo tufala i kilim i ded plante profet blong Jehova. Be Elaeja i faenem rod blong ronwe. Mo tu, i gat wan hadtaem we i no moa gat kakae, be Elaeja i stap laef from we hem i lukluk i go long Jehova. (1 King 17:2-4, 14-16) Mo tu, Elaeja i dipen long Jehova taem hem i agensem ol profet blong Bal mo ol narafala we oli wosipim Bal. Hem i talem long ol man Isrel se oli mas wosipim Jehova nomo. (1 King 18:21-24, 36-38) Elaeja i luk se Jehova i mekem plante samting blong protektem mo givhan long hem long ol hadtaem ya.

5-6. Folem 1 King 19:1-4, ?wanem filing blong Elaeja? ?Olsem wanem Jehova i soemaot se hem i lavem Elaeja?

⁵ Ridim 1 King 19:1-4. Elaeja i fraet taem Kwin Jesebel i talem se bambae i kilim hem i ded. Ale, hem i ronwe i go long Bereseba. Tingting blong hem i foldaon, mo hem i talem se: “Sipos mi mi ded nomo, bambae i moa gud.” ?From wanem hem i harem nogud olsem? Elaeja i no stret olgeta, hem i “wan man we i gat filing olsem yumi.” (Jem. 5:17) Elaeja i harem nogud tumas mo ating hem i taed. Maet hem i ting se ol hadwok blong hem blong  leftemap tru wosip i blong nating nomo, i no gat wan samting we i kamgud long Isrel, mo hem wan nomo i stap gohed blong wosipim Jehova. (1 King 18:3, 4, 13; 19:10, 14) Maet yu sapraes we wan gudfala profet blong Jehova i gat ol filing olsem. Be Jehova i kasem save long filing blong Elaeja.

⁶ Taem Elaeja i talemaot ol filing blong hem, Jehova i no tok strong long hem, be i givhan long hem blong i kam strong bakegen. (1 King 19:5-7) Biaen, Jehova i soemaot bigfala paoa blong hem, blong stretem tingting blong Elaeja long kaen fasin. Mo Jehova i talem long hem se i gat 7,000 man yet long Isrel we oli no bodaon long Bal. (1 King 19:11-18) Ol samting ya we Jehova i mekem, oli soemaot se hem i lavem Elaeja.

7. ?Olsem wanem samting we Jehova i mekem long Elaeja, i save leftemap tingting blong yu?

⁷ ?Olsem wanem? ?Yu stap fesem wan hadtaem we i mekem yu yu harem nogud? !Jehova i kasem save long filing blong Elaeja! Hemia i soemaot se hem i kasem save long yu tu, taem yu harem nogud. Hem i save ol samting we yu no naf blong mekem, mo hem i save ol tingting mo filing blong yu. (Sam 103:14; 139:3, 4) Olsem Elaeja, yu mas lukluk i go long Jehova. Nao bambae hem i givhan long yu blong yu stanap strong, taem yu fesem ol problem we oli mekem yu yu harem nogud.—Sam 55:22.

8. ?Jehova bambae i givhan olsem wanem taem yu harem nogud?

⁸ Taem yu harem nogud, maet yu ting se ol trabol i no save kamgud, nao tingting blong yu i foldaon. Sipos i olsem, tingbaot se Jehova i save givhan long yu. ?Olsem wanem hem i givhan? Bambae hem i harem krae blong yu. taem yu talemaot ol wari blong yu long hem. (Sam 5:3; 1 Pita 5:7) Taswe yu mas prea oltaem long Jehova blong tokbaot ol problem blong yu. Bambae hem i no toktok stret long yu olsem hem i mekem long Elaeja. Be bambae hem i yusum Baebol mo ogenaesesen blong hem. Ol stori we yu ridim long Baebol oli save leftemap tingting mo givim hop. Mo tu, ol brata mo sista bambae oli leftemap tingting blong yu.—Rom 15:4; Hib. 10:24, 25.

9. ?Olsem wanem wan gudfala fren i save givhan long yu?

⁹ Jehova i talem long Elaeja blong i givim sam wok blong hem long Elisa. Hemia i mekem se Elaeja i gat wan gudfala fren we i save leftemap tingting blong hem taem hem i harem nogud. Long sem fasin, taem yu talemaot ol wari blong yu long wan gudfala fren, hem i save givhan long yu blong yu harem gud bakegen. (2 King 2:2; Prov. 17:17) Sipos yu harem se yu no gat wan fren we yu save talemaot ol wari blong yu long hem, askem long Jehova blong i givhan long yu blong faenem wan we i bigman long ol Kristin fasin, blong leftemap tingting blong yu.

10. ?Olsem wanem stori blong Elaeja i save leftemap tingting blong yumi? ?Aesea 40:28, 29 i givhan long yumi olsem wanem?

¹⁰ Jehova i givhan long Elaeja blong i harem gud bakegen, nao Elaeja i gohed plante yia blong mekem wok blong Jehova. Stori blong Elaeja i save leftemap tingting blong yumi. Samtaem yumi wari tumas, nao yumi kam taed mo yumi harem nogud. Be sipos yumi lukluk i go long Jehova, hem i save givim paoa we yumi nidim blong gohed long wok blong hem.—Ridim Aesea 40:28, 29.

11-13. Tokbaot trifala long Baebol we oli harem nogud.

¹¹ I gat sam narafala long Baebol we olgeta tu oli harem nogud tumas. Wan long olgeta,  hemia Hana. Hana i sem from we hem i no save gat pikinini, mo tu, narafala waef blong man blong hem i stap jikim hem oltaem. (1 Saml. 1:2, 6) Hana i harem nogud tumas, i krae oltaem, mo i no moa wantem kakae.—1 Saml. 1:7, 10.

¹² Samtaem King Deved tu i harem nogud tumas. Tingbaot ol trabol we hem i fesem. Hem i sem from ol mastik we hem i mekem. (Sam 40:12) Boe blong hem Absalom i agensem hem, mo biaen Absalom i ded. (2 Saml. 15:13, 14; 18:33) Mo tu, wan gudfala fren i putum Deved long han blong ol enemi blong hem. (2 Saml. 16:23–17:2; Sam 55:12-14) Plante Sam we Deved i raetem oli soemaot olsem wanem hem i harem nogud, mo oli soemaot tu se hem i trastem Jehova fulwan.—Sam 38:5-10; 94:17-19.

¹³ Biaen, wan man blong raetem Ol Sam i stap luk ol gudfala samting long laef blong ol rabis man, nao i wantem se laef blong hem i olsem. Maet hem i kamaot long laen blong Livaet ya Asaf, mo i wok long ‘haos blong God.’ Tingting blong man ya i foldaon, hem i no moa glad, mo i wari. Mo tu, hem i no moa tinghae long ol blesing we hem i kasem long wok blong God.—Sam 73:2-5, 7, 12-14, 16, 17, 21.

14-15. ?Yumi lanem wanem long trifala ya we oli lukluk i go long Jehova?

¹⁴ Trifala ya we yumi jes tokbaot, oli lukluk i go long Jehova blong i givhan long olgeta. Oli prea blong talemaot ol wari blong olgeta long Jehova. Oli talemaot klia from wanem oli harem nogud tumas. Mo oli stap go oltaem long haos wosip blong Jehova.—1 Saml. 1:9, 10; Sam 55:22; 73:17; 122:1.

¹⁵ Jehova i sore mo i givhan long trifala. Long saed blong Hana, hem i putum pis long tingting blong hem. (1 Saml. 1:18) Deved i  raetem se: “Man we i stret i save harem nogud long plante trabol, be Hae God i save tekemaot hem long olgeta trabol ya.” (Sam 34:19) Mo man we i raetem Ol Sam i harem se Jehova i ‘stap holem han blong hem,’ mo i givim advaes long kaen fasin blong lidim hem. Hem i singsing se: “Hae God, yu yu God blong mi, mo yu yu Masta blong mi. . . Taem we mi mi kam stap klosap long yu, mi harem se i gud tumas long mi. Yu yu sefples blong mi.” (Sam 73:23, 24, 28) ?Yumi lanem wanem? Samtaem, yumi gat plante bigfala problem we oli mekem yumi harem nogud tumas. Be yumi save stanap strong sipos yumi prea, yumi tingbaot olsem wanem Jehova i givhan long ol man ya, mo yumi mekem samting we hem i askem.—Sam 143:1, 4-8.

16-17. (1) ?From wanem yumi no mas seraot long Jehova mo ol man blong hem? (2) ?Olsem wanem yumi save kam strong bakegen?

¹⁶ Eksampol blong trifala ya i tijim yumi long wan narafala impoten lesen: Yumi no mas seraot long Jehova mo ol man blong hem. (Prov. 18:1) Nansi, we i harem nogud tumas taem hasban blong hem i lego hem, i talem se: “Plante taem mi no wantem luk o toktok long wan man. Be taem mi stap mi wan olsem, mi harem nogud moa.” Samting ya i jenis taem  Nansi i stat blong givhan long ol narafala we oli gat problem. Hem i se: “Mi lesin taem oli eksplenem trabol blong olgeta. Mi makem se taem mi traehad blong kasem save long filing blong olgeta, mi no tingting tumas long problem blong mi.”

¹⁷ Sipos yumi go long ol miting blong kongregesen, yumi save kasem paoa bakegen. Taem yumi stap long miting, i gat plante janis blong Jehova ‘i givhan mo i leftemap tingting blong yumi.’ (Sam 86:17) Long miting, hem i yusum tabu spirit, Baebol, mo ol man blong hem, blong mekem yumi strong. Mo tu, yumi haremgud, from we ‘bilif blong ol narafala i leftemap tingting blong yumi, olsem we bilif blong yumi i leftemap tingting blong olgeta.’ (Rom 1:11, 12) Wan sista we nem blong hem Sofia, i talem se: “Jehova wetem ol brata mo sista oli mekem se mi stanap strong. Ol miting oli impoten tumas. Mi luk se taem mi joen fulwan long wok blong prij mo long kongregesen, mi mi naf blong stanap strong mo winim ol wari.”

18. ?Sipos tingting blong yumi i foldaon, Jehova i save mekem wanem?

¹⁸ Taem tingting i foldaon, i gud yumi tingbaot ol promes blong Jehova blong tekemaot ol problem blong olwe. Be i no hemia nomo. Yumi mas tingbaot tu se hem i save givhan long yumi naoia, taem yumi harem nogud. Hem i save ‘mekem yumi glad blong obei long hem, mo givim paoa long yumi’ blong winim tingting we i foldaon mo filing ya se i no gat hop.—Fil. 2:13.

19. ?Olsem wanem Rom 8:37-39 i mekem tingting blong yumi i strong?

¹⁹ Ridim Rom 8:37-39. Aposol Pol i mekem tingting blong yumi i strong se i no gat wan samting we i save tekemaot yumi long lav blong God. ?Olsem wanem yumi save givhan long ol brata mo sista we oli stap harem nogud tumas? Nekis stadi bambae i tokbaot olsem wanem yumi save folem fasin blong Jehova, mo soemaot sore long ol brata mo sista we oli harem nogud.