1. Porque necesita kita pone atencion con el aviso de Jesus?

SI Jesus ya habla acerca na ultimo maga dia: “Bicia embuenamente para gendeh hay queda duro el de ustedes maga corazon na maga . . . lingasa de este vida.” (Luc. 21:34) Necesita kita pone atencion con ese aviso. Porque? Cay todo kita ahora ta experiencia semejante maga problema que ta enfrenta el otro.

2. Cosa maga problema ta enfrenta el diaton maga hermano y hermana?

² Tiene vez, junto ta llega el maga problema. Considera el siguiente ejemplo. Un hermano si John, * quien tiene enfermedad de multiple sclerosis, ya queda bien triste cuando ya deja con ele el de suyu mujer despues de 19 año sila de casao. Despues, el de suyu dos anak mujer ya descanza sirvi con Jehova. Otro tambien el problema de Bob y Linda que man maridable. Igual sila nuay mas trabajo y ya cambia sila na mas diutay casa cay nuay mas sila bastante sen. Mas ya omenta el diila problema cuando si Linda ya tiene enfermedad na corazon que puede resulta na muerte y otro pa enfermedad que ta afecta con el de suyu immune system.

3. Asegun na Filipo 4:6, 7, na cosa kita puede asigura?

³ Puede kita asigura que el diaton Creador y amable Tata, si Jehova, ta entende si cosa kita ta sinti si ta experiencia kita stress. Y quierre le ayuda kanaton enfrenta con ese. (Le con el Filipo 4:6, 7.) El Palabra del Dios ta contene manada ejemplo del maga probanza que ya puede aguanta el maga siervo  del Dios. Ta habla tambien este si paquemodo si Jehova ya ayuda kanila. Considera kita con el cuanto de ese maga ejemplo.

4. Cosa maga probanza ya enfrenta si Elias y cosa le ya sinti que ya hace si Jehova durante ese maga tiempo?

⁴ Si Elias ya sirvi con Jehova durante na dificil tiempo y ya enfrenta maga grabe probanza. Si Rey Ajab, uno de maga gendeh fiel rey na Israel, ya casa con Jesabel que ta adora con Baal. Sila dos ya anima con el entero nacion que adora con Baal y ya mata manada profeta de Jehova. Pero, ya puede escapa si Elias. Y nuay le muri na hambre cay ya confia le con Jehova. (1 Rey 17:2-4, 14-16) Omento pa, ya confia si Elias con Jehova cuando ya confronta le con el maga profeta y maga gente quien ta adora con Baal. Y ya anima le con el maga Israelita que sirvi con Jehova. (1 Rey 18:21-24, 36-38) Si Elias tiene manada evidencia que si Jehova ta suporta con ele durante ese maga tiempo.

5-6. Base na 1 Rey 19:1-4, cosa ya sinti si Elias y paquemodo si Jehova ya dale mira que ta ama le con Elias?

⁵ Le con el 1 Rey 19:1-4. Pero, ya tiene miedo si Elias cuando si Reyna Jesabel ya amenaza mata con ele. Poreso, ya escapa le para na Beer-sheba. Ya queda le bien maluya y “ya pidi que muri ya era le.” Porque le ya puede sinti ansina? Si Elias “un gente igual lang canaton” que tiene tambien sentido. (Sant. 5:17) Siguro, lleno le de stress y bien cansao. Posible ya pensa si Elias que no vale nada el de suyu esfuerzo para na verdadero adoranza, que nuay hace cambio el maga Israelita y solo siempre le ta  sirvi con Jehova. (1 Rey 18:3, 4, 13; 19:10, 14) Posible gendeh kita ta expecta con el reaccion de este fiel profeta. Pero ya entende si Jehova si cosa ta sinti si Elias.

⁶ Nuay regaña si Jehova con Elias cuando ya habla le si cosa de suyu sentido. Sino, ya ayuda le para bira el fuerza de Elias. (1 Rey 19:5-7) Despues, ya dale mira si Jehova el de suyu poder para corecta con el pensamiento de Elias. Si Jehova ya habla tambien con Elias que tiene pa 7,000 Israelita el nuay adora con Baal. (1 Rey 19:11-18) Por medio de ese maga ejemplo, ya dale mira si Jehova que ta ama Le con Elias.

7. Cosa asiguranza kita tiene na manera si paquemodo ya ayuda si Jehova con Elias?

⁷ Ta enfrenta ba tu grabe problema? Ta dale gayot kanaton comforta cay sabe kita que ya entende si Jehova con el sentido de Elias! Ta dale este kanaton asiguranza que ta entende tambien le el diaton sentido. Sabe le el diaton limitacion y gane maskin el cosa kita ta pensa y ta sinti. (Sal. 103:14; 139:3, 4) Si confia kita con Jehova igual con Elias, hay ayuda Le kanaton enfrenta con el maga problema que ta causa stress.​—Sal. 55:22.

8. Paquemodo si Jehova ayuda si ta enfrenta tu stress?

⁸ El stress puede contigo manda pensa negativo para queda tu maluya. Si sucede se, acorda que si Jehova hay ayuda contigo enfrenta con ese. Paquemodo le ayuda contigo? Ta invita le contigo que habla con ele el de tuyu maga problema y cosa tu ta sinti. Y contesta le con el de tuyu rezo. (Sal. 5:3; 1 Ped. 5:7) Poreso, pirmi reza con Jehova acerca na de tuyu maga problema. Gendeh le contigo directa man cuento igual na cosa le ya hace con Elias, pero converza le contigo por medio na de suyu Palabra y na de suyu organizacion. El maga istoria que puede tu le na Biblia puede dale comforta y esperanza contigo. Puede tambien anima contigo el de tuyu maga hermano y hermana na congregacion.​—Rom. 15:4; Heb. 10:24, 25.

9. Paquemodo el un amigo puede ayuda kanaton?

⁹ Cuando ya habla si Jehova con Elias que dale el de suyu cuanto trabajo con Eliseo, ya dale Le con Elias un buen amigo quien ya ayuda con ele cuando ya sinti le maluya. Na igual manera, si habla kita con el diaton amigo si cosa kita ta sinti, puede le ayuda kanaton. (2 Rey 2:2; Prov. 17:17) Si ta sinti tu que nuay tu con quien puede man cuento acerca na cosa tu ta sinti, reza con Jehova que ayuda contigo puede incuntra mature Cristiano quien puede dale animo contigo.

10. Paquemodo el experiencia de Elias dale kanaton esperanza y paquemodo el promesa na Isaias 40:28, 29 ayuda kanaton?

¹⁰ Ya ayuda si Jehova con Elias para enfrenta con el de suyu problema y fiel puede sirvi por largo tiempo. El experiencia de Elias ta dale kanaton esperanza. Posible, hay experiencia kita grabe stress que puede hace luya kanaton na fisical y na emocion. Pero, si confia kita con Jehova, dale le kanaton el fuerza que necesita para puede kita continua sirvi con ele.​—Le con el Isaias 40:28, 29.

11-13. Paquemodo el stress ya afecta con el tres siervo del Dios de antes?

¹¹ El otro maga caracter na Biblia ya enfrenta tambien grabe stress. Por ejemplo, tiene huya si Ana cay no puede le tiene anak y pirmi con ele ta gangguia el otro mujer del de suyu marido. (1 Sam. 1:2, 6) Ya hace este bien triste con Ana poreso pirmi le ta llura y nuay gana come.—1 Sam. 1:7, 10.

 ¹² Ya enfrenta tambien grabe stress si Rey David. Pensa si cosa probanza le ya enfrenta. Yan conciencia le por causa na manada kamali le ya hace. (Sal. 40:12) El de suyu anak, si Absalom, yan rebelde con ele que ya resulta na muerte de este. (2 Sam. 15:13, 14; 18:33) Y ya traiciona con David el un amigo que bien cerca con ele. (2 Sam. 16:23–17:2; Sal. 55:12-14) Puede mira na manada salmo de David el de suyu sentido y confianza con Jehova.​—Sal. 38:5-10; 94:17-19.

¹³ El un salmista ya principia envidia con el clase de vida que tiene el maga mal gente. Posible, descendiente le del un Levita que si Asaf y ya sirvi na “sagrao santuario del Dios.” Este salmista ya sufri na emocion poreso gendeh le alegre y contento. Gane, ya principia le pensa que gendeh bastante el maga bendicion si ta sirvi con Dios.​—Sal. 73:2-5, 7, 12-14, 16, 17, 21.

14-15. Cosa kita ya aprende na tres ejemplo na Biblia acerca si paquemodo sila ya pidi ayuda con Jehova?

¹⁴ El tres siervo de Jehova ya confia con ele para na ayuda. Ya reza sila con Jehova acerca na diila maga lingasa. Ya habla sila con ele si porque ya sinti sila grabe stress. Y ya continua sila anda na lugar de adoranza.​—1 Sam. 1:9, 10; Sal. 55:22; 73:17; 122:1.

¹⁵ Con compasion ya ayuda si Jehova kanila. Si Ana ya tiene paz na pensamiento. (1 Sam. 1:18) Si David ya escribi: “Manada el dificultad del un recto pero si Jehova ta salva con ele na este todo.” (Sal. 34:19) Y despues, el salmista ya sinti que si Jehova ‘ya agarra con el de suyu derecha mano’ y ya guia con ele por medio na de suyu consejo. Ele ya canta: “Bueno para conmigo que queda cerca con Dios. Ya hace yo con el Soberano Señor Jehova el de mio refugio.” (Sal. 73:23, 24, 28) Cosa kita ya aprende na ese maga ejemplo?  Tiene vez, hay enfrenta kita maga grabe problema que causa kanaton stress. Pero puede kita enfrenta con ese si medita kita si paquemodo si Jehova ya ayuda con otro, confia con ele por medio de rezo y hace si cosa le kanaton ta manda.​—Sal. 143:1, 4-8.

16-17. (a) Porque gendeh kita debe separta con Jehova y con el de suyu maga siervo? (b) Paquemodo kita tiene fuerza otravez?

¹⁶ El tres ejemplo ta enseña kanaton otro importante leccion—gendeh kita debe separta con Jehova y con el de suyu maga siervo. (Prov. 18:1) Si Nancy, quien ya experiencia grabe stress cuando ya deja con ele el de suyu marido, ya habla: “Tiene maga dia que no quierre yo mira o man cuento maskin con quien. Pero si solo-solo yo, mas ta queda yo triste.” Pero ya cambia el situacion cuando ya busca manera si Nancy para ayuda con otro quien ta experiencia maga problema. Ele ya habla: “Ta oi yo si ta habla el otro si cosa el diila problema. Ya puede yo nota que si tan focus yo kanila y na diila problema, gendeh yo tanto ta puede pensa con el de mio situacion.”

¹⁷ Puede kita otravez tiene fuerza por medio  de atendida na maga miting. Si talli kita na maga miting, ta dale kita otro oportunidad con Jehova para ‘ayuda y dale comforta’ kanaton. (Sal. 86:17) Na miting, ta hace le fuerte kanaton por medio na de suyu sagrao espiritu, de suyu Palabra y de suyu maga siervo. El maga miting ta dale kanaton oportunidad para “dale animo con uno y otro.” (Rom. 1:11, 12, El Nuevo Testamento) Un hermana, si Sophia, ya habla: “Si Jehova y el diaton maga hermano y hermana ya ayuda conmigo para aguanta. Bien importante conmigo el diaton miting. Ya puede yo mira que si activo yo na ministerio y na congregacion, mas ta puede yo enfrenta con el de mio stress y lingasa.”

18. Si maluya kita, cosa kanaton ta dale si Jehova?

¹⁸ Si maluya kita, acorda que si Jehova nuay lang promete que quita con el stress na futuro sino ya promete tambien le que ayuda kanaton enfrenta con ese ahora. Ta dale le kanaton “el voluntad y el fuerza” para gendeh mas kita sinti maluya y perde esperanza.​—Fil. 2:13.

19. Cosa asiguranza kanaton ta dale el Roma 8:37-39?

¹⁹ Le con el Roma 8:37-39. Si apostol Pablo ya dale kanaton asiguranza que nuay maskin cosa el puede kanaton separta na amor del Dios. Paquemodo kita puede ayuda con el diaton maga hermano y hermana quien ta experiencia stress? Na siguiente articulo, hay discuti kita si paquemodo kita puede imita con el compasion de Jehova y suporta con el diaton maga hermano y hermana si tiene sila problema.