1. ¿Jamüshii woonooinjanaka sümaa tü nümakat Jesuu?

WANAA sümaa nüküjain Jesuu süchiki tü alatajatkat sülüʼütpa süpüla sajaʼttajatüin kasa süpüshuaʼa, nüküjain eejüinjatüin waaʼin suulia süshapataain waaʼin saaʼu tü weküinjatkat (Luc. 21:34). ¿Jamüshii woonooinjanaka sümaa tü nümakat Jesuu? Shia süka wattain saalii tü kasa mojusü alatakat wamüin jee müliain waaʼin maʼaka saaʼin wayuu maʼleekalia.

2. ¿Kasa müliaa neʼraka waneinnua wawalayuu?

² Eesü pachiiruaale tü kasa shapaakalü atuma waaʼin. Anuu tü alatakat nümüin chi wawalakai Jhon, * ayuuishi nia sutuma wanee ayuulii esclerosis múltiple münüsü. Mojusü maʼin naaʼin, süpütüin nia tü nuʼwayuusekat, mayaainjeʼe 19 juya nia sümaa. Süchikijee tia ooʼulaasü suulia anoujaa piamasü nüchonnii. Anuu tü alatakat nümüin chi wawalakai Bob sümaa Linda, tü nuʼwayuusekat. Ajaʼlajaasü aʼyatawaa napüleerua jee asütünüsü nepia saaʼu nojuyaala. Antüna anainrü wanee ayuulii outasiroʼu sünain saaʼin Linda. Antünataa anainrü wanee ayuulii sünainya artritis münüsü.

3. ¿Kasa watüjaaka aaʼu nüchiki Jeʼwaa saashin Filipos 4:6, 7?

³ Watüjaa aaʼu alin nümüin Jeʼwaa tü wamülialakat, jama Washin nia jee Nukumajalain waya. Nükaalinjeena waya Jeʼwaa süpüla jutatüin waaʼin soʼunnaa tü alatakat wamüin (paashajeʼera Filipos 4:6, 7). Ashajünüsü suluʼu tü Wiwüliakat  süchiki tü müliaa neʼrakat na aʼyataashiikana nümüin Jeʼwaa otta tü naaʼinrakat napüleerua. Wekirajaa süchiki tü alatakat namüin noʼutku naya wayuukana.

4. (1) ¿Kasa alataka soʼu niʼyataain Elías nümüin Jeʼwaa? (2) ¿Kasa nütüjaaka aaʼu Elías nüchiki Jeʼwaa?

⁴ Wainma kasa mojusü alataka soʼu niʼyataain Elías nümüin Jeʼwaa otta eesü tü alatakat nümüin. Chi aluwataakai saaʼu Israel soʼu tia, nia Acab, nuʼwayuusesü Jezabel, wanee wayuu mojulaasü jee suʼwaajüin Baal. Nanoujirüin na wayuukana nünain Baal jee wainma na nünüikimaajanakana Jeʼwaa noʼutakana aaʼin. Nnojoipejeʼe outuin Elías natuma, isashi noulia. Wanaa sümaa alin maʼin tü jamükat, nnojoishi outuin Elías süka niʼitaain naaʼin nünain Jeʼwaa (1 Rey. 17:2-4, 14-16). Wanaa sümaa eejiraain nia namaa na nünüikimaajanakana Baal jee namaa na aʼwaajakana Baal, achuntushi nia nümüin Jeʼwaa otta nütütüleʼerüin naaʼin na israeliitakana süpüla naʼyataain nümüin Jeʼwaa (1 Rey. 18:21-24, 36-38). Nütüjaa aaʼu Elías naaʼinmajünüin jee nükaalinjünüin nutuma Jeʼwaa soʼunnaa tü müliaa niʼrakat.

5, 6. (1) Saashin 1 Reyes 19:1-4, ¿jamüsü naaʼin Elías wanaa sümaa nuʼutuneein aaʼin? (2) ¿Kasa naaʼinraka Jeʼwaa süpüla niiʼiyatüin alin Elías nüpüla?

⁵ (Paashajeʼera 1 Reyes 19:1-4). Mmotshi Elías wanaa sümaa nuʼutuneein aaʼin sutuma Jezabel. Makalaka nuʼunuin suluʼumüin tü mmakat Beer-seba. Mojusü maʼin naaʼin, müsüjeseʼe nuchuntuin nümüin Jeʼwaa outairee. ¿Jamüsüche makaʼa nünüiki? Shia süka  niʼrüin müliaa maʼaka waaʼin wayakana (Sant. 5:17). Eesüjaʼa maʼalainre naaʼin sutuma shapaain naaʼin jee mapüsain nia. Amüla neʼe tü naaʼinrakat süpüla nuʼwaajünüinjachin Jeʼwaa naaʼinruʼu. Ayatüsia mojuin nakuwaʼipa na israeliitakana jee niaʼala neʼe aʼyataaka nümüin Jeʼwaa saaʼin nümüin (1 Rey. 18:3, 4, 13; 19:10, 14). Eesüjaʼa ponule waaʼin jamüin makaʼa nünüiki Elías, nütüjaapejeʼe aaʼu Jeʼwaa jamüin makaʼa nünüiki.

⁶ Nnojoishi aʼülüjain Jeʼwaa nümüin Elías sükajee nüküjain nümüin tü suluʼukat naaʼin. Nükatsüinrüin naaʼin (1 Rey. 19:5-7). Süchikijee tia, niiʼiyatüin Jeʼwaa nüpülain nümüin Elías süpüla nunouteʼerüinjatüin tü jülüjakat naaʼin. Jee müsia, nüküjain Jeʼwaa nümüin eeyüliinya 7.000 israeliita nnojoliikana aʼwaajüin Baal (1 Rey. 19:11-18). Sükajee tia niiʼiyatüin Jeʼwaa nümüin Elías alin nia nüpüla.

7. ¿Jamüsü sütütülaaka waaʼin sutuma tü naaʼinrakat Jeʼwaa nüpüleerua Elías?

⁷ ¿Eesüche tü kasa shapaakalü atuma waaʼin maaʼulu? Atütülaasü waaʼin sünainjee niyaawatüin Jeʼwaa saaʼu tü suluʼukat naaʼin Elías. Niyaawateeria Jeʼwaa saaʼu tü shapaakalü atuma waaʼin. Nütüjaa aaʼu tü kasa isakat wachiki, tü kasa jülüjakat waaʼin otta jamüin waaʼin sutuma wanee kasa (Sal. 103:14; 139:3, 4). Wachuntule kaalinwaa nümüin Jeʼwaa maʼaka naaʼinrüin shia Elías, nükatchinreerü waaʼin soʼunnaa tü alatakat wamüin (Sal. 55:22).

8. ¿Kasa naaʼinreetka Jeʼwaa wapüleerua?

⁸ Eesü süntajaale kasa mojusü wekiiruʼu otta mojule waaʼin sutuma shapaain waaʼin. Sülatüle wamüin tia, nükaalinjeena waya Jeʼwaa. ¿Kasa naaʼinreetka wapüleerua? Asouteechi nia shiʼipajee tü wachuntakat nümüin müleka waküjale nümüin süpüshuaʼa tü kasa shapaakalü atuma waaʼin (Sal. 5:3; 1 Ped. 5:7). Waküjainjatü nümüin Jeʼwaa süchiki tü kasa mojusü alatakat wamüin. Mayaapejeʼe nnojoleechin yootuin nia wamaa maʼaka yootuin nia nümaa Elías, asouteechi nia wamüin sükajee tü sümakat tü Wiwüliakat otta sükajee tü nupueulosekat. Amülialaajeerü waaʼin otta watüjaajeerü aaʼu weʼreenain kasa anasü sutuma tü sümakat tü Wiwüliakat. Jee müsia, nakatsüinreerü waaʼin na wawalayuukana (Roma 15:4; Heb. 10:24, 25).

9. ¿Kasa nükaalinjeenaka anain waya wanee waʼaleewain?

⁹ «Anashi paapüle süpüshi tü piʼyataainkat nümüin Eliseo», müshi Jeʼwaa nümüin Elías. Aneekünüshi Eliseo nutuma Jeʼwaa süpüla naʼaleewainjachin nia Elías. Wanaa sümaa mojuin naaʼin Elías, atütüleʼennüsü naaʼin nutuma Eliseo. Akaʼaya wayakana, eere wanee waʼaleewain, nütütüleʼereerü waaʼin soʼu weʼrüin müliaa (2 Rey. 2:2; Prov. 17:17). ¿Jama nnojoire wanee waʼaleewain anakai süpüla waküjain amüin tü alatakat wamüin? Wachunta kaalinwaa nümüin Jeʼwaa süpüla aleewain waya nümaa wanee wayuu laülaakai aaʼin sünain anoujaa jee atütüleʼereechika waaʼin soʼu weʼrüin müliaa.

10. (1) ¿Jamüsü sütütülaaka waaʼin sutuma nukuwaʼipa Elías? (2) ¿Kasa sükaalinjaka anain waya tü sümakat Isaías 40:28, 29?

¹⁰ Akaalinjünüshi Elías nutuma Jeʼwaa süpüla ayatüinjachin nia sünain aʼyatawaa nümüin jee süpüla nnojoluinjatüin yüülain naaʼin sutuma shapaain naaʼin. Atütülaasü waaʼin sutuma tü nukuwaʼipakat Elías. Eeshiijaʼa mapüsale waya jee mojule waaʼin sutuma shapaain waaʼin. Katchinjeetpejeʼe waaʼin süpüla waʼyataain nümüin Jeʼwaa müleka weʼitaale waaʼin nünain (paashajeʼera Isaías 40:28, 29).

11-13. ¿Kasa alataka sümüin Ana, nümüin David otta nümüin wanee wayuu ashajakai salmo?

¹¹ Aküjünüsü suluʼu tü Wiwüliakat nachiki waneinnua wayuu müliakana maʼin aaʼin. Jamüsüjaʼa Ana, eʼrüsü japülii sünainjee maralüin shia jee meeʼerapalasü shia sutuma tü shipiamüinkat (1 Sam. 1:2, 6). Aʼyalajawaisü shia jee eesü nnojorüle saaʼin sünain ekaa sutuma mojuin maʼin saaʼin (1 Sam. 1:7, 10).

¹² Akaʼaya David, chi aluwataaikai, wainma tü kasa mojusü alatakat nümüin. Wekirajaa sünain süpüshi tia. Mojusü maʼin naaʼin sutuma tü kasa mojusü naaʼinrakat (Sal. 40:12). Absalón, chi nüchonkai, eʼrüshi wayumüin nümüin jee outaka nia mapa (2 Sam. 15:13, 14; 18:33). Emeejünüshi David nutuma wanee naʼaleewain (2 Sam. 16:23–17:2; Sal. 55:12-14). Suluʼu süpüshi tü salmo nüshajakat David, nüküjain mojuin maʼin naaʼin, niʼitaapejeʼe naaʼin nünain Jeʼwaa (Sal. 38:5-10; 94:17-19).

¹³ Süchikijee tia, eeshi wanee wayuu ashajakai salmo, eeshijaʼa nuuʼuliwoʼule nia Asaf, aʼyataashi suluʼu tü aʼwaajüleekat Maleiwa. Achunjasü naaʼin saaʼu nakuwaʼipa na mojulaashiikana, makalaka mojushaatain maʼin naaʼin. Nümülaja aaʼinrü tü kasa naapakat Jeʼwaa namüin na aʼyataashiikana nümüin (Sal. 73:2-5, 7, 12-14, 16, 17, 21).

14, 15. ¿Kasa watüjaka sünainjee nakuwaʼipa na apünüinshiikana aʼyataalii nümüin Jeʼwaa?

¹⁴ Naya apünüinshiikana wayuu, achuntushii kaalinwaa nümüin Jeʼwaa. Naküjain nümüin süpüshuaʼa tü suluʼukat naaʼin. Naküjain nümüin Jeʼwaa jamüin mojuka maʼin naaʼin otta nnojoishii naya makatüin suulia oʼunaa eere nuʼwaajünüin Jeʼwaa (1 Sam. 1:9, 10; Sal. 55:22; 73:17; 122:1).

 ¹⁵ Asoutushi Maleiwa namüin napüshuaʼa naya wayuukana. Nnojoluitpa shapaain saaʼin Ana (1 Sam. 1:18). Anuu nünüiki David: «Wainma tü kasa mojusü alatakat nümüin wanee wayuu anamia, nükaalinjapejeʼe nia Jeʼwaa» (Sal. 34:19). Chi wayuu ashajakai salmo, müshi najattünakai aaʼin nutuma Jeʼwaa jee nüchiaain nia süka anaka akuwaʼipa. Anuu nünüiki: «Kamalainsü tamüin arütkawaa nünainmüin Maleiwa. Nia teʼitaaka anain taaʼin Jeʼwaa chi Senyot Laülaakai saaʼu kasa süpüshuaʼa» (Sal. 73:23, 24, 28). ¿Kasa watüjaka sünainjee tia? Eesü shapaale waaʼin sutuma tü kasa mojusü alatakat wamüin. Jutateetpejeʼe waaʼin wasakireʼerüle suluʼu waaʼin süchiki tü naaʼinrakat Jeʼwaa napüleerua na waneinnua, woʼuraajüle otta woonoole sümaa tü nümakat wamüin (Sal. 143:1, 4-8).

16, 17. (1) ¿Jamüshii nnojoliinjanaka wakayalaain? (2) ¿Kasa waaʼinrüinjatka süpüla sükatsüinraain waaʼin?

¹⁶ Eesü wanee kasayaa watüjaka sünainjee nakuwaʼipa naya wayuu nükaalinjakana Jeʼwaa. Nnojoishii waya akayalaainjanain nuulia Jeʼwaa jee noulia na wawalayuukana (Prov. 18:1). Anuu tü alatakat sümüin Nancy. Müliasü maʼin saaʼin wanaa sümaa suuʼulaanüin nutuma  chi suʼwayuusekai. Anuu sünüiki: «Nnojotsü taaʼin sünain aashajawaa sümaa wayuu. Mojupejeʼe maʼin taaʼin sutuma tamüiwaʼain taya». Jutatüsü saaʼin sutuma sükaalinjain na alatakana amüin kasa mojusü. Anuu sooʼomüin sünüiki: «Jülüjasü maʼin taaʼin tü namakat wanaa sümaa naküjain tü alatakat namüin. Nnojotsü jülüjain taaʼin tü alatakat tamüin sutuma shiain jülüjain taaʼin takaalinjain naya».

¹⁷ Akatsüinraajeerü waaʼin woʼunule sünain tü outkajawaakat. Müle shia watuma nükaalinjeena jee nümüliajeerü waaʼin Jeʼwaa (Sal. 86:17). Woʼunule sünain tü outkajawaakat, nükatsüinrüin waaʼin Jeʼwaa nükajee chi naaʼinkai, sükajee tü Wiwüliakat jee nakajee na wawalayuukana. Jee müsia, eesü süpüla wakatsüinrüin naaʼin na waneinnua jee nakatsüinrüin waaʼinya (Roma 1:11, 12). Anuu sünüiki wanee wawala Sofía sünülia: «Nükaalinjain taya Jeʼwaa otta na wawalayuukana süpüla eejiraain taya sümaa tü alatakat tamüin. Nnojotsü makatüin taya suulia tü outkajawaakat. Nnojotsü shapaain taaʼin jee jülüjain taaʼin tü alatakat tamüin sutuma taküjain maʼin pütchi otta takaalinjain na wawalayuukana suluʼu tü outkajaaleekat».

18. ¿Kasa naaʼinreetka Jeʼwaa wapüleerua wanaa sümaa mojuin waaʼin?

¹⁸ Wanaa sümaa mojuin maʼin waaʼin, soteesü waaʼin nüsünneʼereerüin Jeʼwaa mapeena tü müliaakat otta nükaalinjeenain waya maaʼulu. ¿Kasa naaʼinreetka wapüleerua? Nükaalinjeena waya Jeʼwaa süpüla nnojoluinjatüin waapüin waaʼin sünain tü mojuukalü aaʼin otta süpüla katchinjatüin waaʼin soʼunnaa shapaain waaʼin (Filip. 2:13, TNM).

19. ¿Kasa süküjaka wamüin Roma 8:37-39?

¹⁹ (Paashajeʼera Roma 8:37-39). Nüküjain chi aluwataaushikai Pablo nnojoleerüin eein wanee kasa akayaleʼeraka waya nuulia Maleiwa. ¿Kasa waaʼinrüinjatka süpüla wakaalinjain na wawalayuu alatakana amüin kasa mojusü? Sünain tü wane ekirajaayakat, wekirajaajeerü anain tü waaʼinrüinjatkat süpüla wamülialüin naaʼin otta wakaalinjain naya maʼaka naaʼinrüin shia Jeʼwaa.