1. Pamodi ki nu meste obi ku avizu di Jizus?

NA SE profesia sobri ténpu di fin, Jizus fla: ‘Nhos toma kuidadu pa nhos korason nunka ka fika preokupadu dimás ku preokupasons di vida’. (Luc. 21:34) Nu meste obi ku kel avizu li. Pamodi? Pamodi gósi, nu sta ta pasa pa kes mésmu tipu di prubléma ki tudu algen ta pasa pa es.

2. Ki prublémas gravi nos irmons ta pasa pa es?

² Alvês, nu ta pasa pa txeu prubléma un tras di kel otu, ki ta dexa-nu txeu dizanimadu. Odja alguns izénplu. Un Tistimunha di Jeová ki txoma John, * ta sufri di un duénsa gravi. El fika txeu dizanimadu kantu se mudjer bandona-l dipôs di 19 anu kazadu. Dipôs se dôs fidju-fémia para di sirbi Jeová. Un kazal ki txoma Bob ku Linda, pasa pa prublémas diferenti di kes ki John pasa pa es. Es tudu dôs perde ses trabadju i dipôs es perde ses kaza. Pa piora ses situason, Linda atxadu ku un duénsa na korason ki podia mataba el i tanbê el panha un otu duénsa ki kaba ku diféza di se korpu.

3. Di akordu ku Filipenses 4:6, 7 di kuzê ki nu pode ten sertéza?

³ Nu pode ten sertéza ma Jeová ki é nos Kriador i nos Pai ki ta ama-nu txeu, ta ntende modi ki nu ta xinti óras ki nu ta sta txeu dizanimadu. I el krê djuda-nu lida ku kes prubléma ki nu ta pasa pa es. (Lé Filipenses 4:6, 7.) Bíblia ten txeu izénplu di stórias di sérvus di Jeová ki pasa pa txeu prubléma. Tanbê, el ta splika modi ki Jeová djuda-s  lida ku kes situason. Nu ben odja alguns izénplu.

4. Ki prublémas Elias pasa pa es, i kuzê ki el xinti pa Jeová?

⁴ Elias sirbi Jeová na un ténpu difísil i el pasa pa txeu prubléma. Rei Akabi, ki éra un di kes rei di Israel na kel ténpu, ka ta adoraba Jeová. El kaza ku Jizabel, ki ta adoraba Baal. Es dôs insentiva tudu nason di Israel pa adora Baal i es mata txeu proféta di Jeová. Elias konsigi skapa. I pamodi el kúnfia na Jeová, el skapa tanbê di un fómi kruel. (1 Reis 17:2-4, 14-16 ) Tanbê Elias kúnfia na Jeová kantu el fika kóntra kes proféta i adoradoris di Baal. El insentiva kes israelita pa sirbi Jeová. (1 Reis 18:21-24, 36-38 ) Elias dja odjaba modi ki Jeová protejeba el i djudaba el duránti kes ténpu difísil.

5-6. Di akordu ku 1 Reis 19:1-4, modi ki Elias xinti i modi ki Jeová mostra ma inda el ta amaba el?

⁵ Lé 1 Reis 19:1-4. Elias fika ku medu, kantu Rainha Jizabel fla ma el ta mataba el. Nton, el fuji pa sidadi di Berseba. El fika txeu dizanimadu ki ‘el pidi móre.’ Pamodi ki el xinti si? Elias éra un ómi inperfetu, ‘un ómi ku sentimentus sima di nos’. (Tia. 5:17) Talvês el staba txeu dizanimadu i kansadu. Ta parseba ma Elias ta pensaba ma tudu sforsu ki el faze pa insentiva kes algen pa adora Jeová ka sirbi pa nada. Pa el, situason na Israel  kontinua kel mê i éra sô el ki inda ta sirbiba Jeová. (1 Reis 18:3, 4, 13; 19:10, 14 ) Nu pode fika spantadu ku manera ki es proféta fiel reaji. Má Jeová ntende kuzê ki Elias staba ta xinti.

⁶ Jeová ka fika xatiadu ku Elias, pamodi el mostra kuzê ki el staba ta xinti. Envês di kel-li, Jeová djuda-l ganha forsa. (1 Reis 19:5-7 ) Dipôs, ku bondadi el djuda Elias koriji se manera di pensa i el mostra-l se grandi puder. Jeová fla-l ma inda tinha 7 mil algen na Israel ki nega adora Baal. (1 Reis 19:11-18 ) Jeová faze tudu kel-li pa el mostra ma inda el ta amaba Elias.

7. Pa manera ki Jeová djuda Elias, ki sertéza nu pode ten?

⁷ Bu sta ta lida ku un situason ki sta dexa-u dizanimadu? Nu ta xinti konsoladu di sabe ma Jeová ntende kuzê ki Elias staba ta xinti! Kel-li ta da-nu sertéza ma el tanbê el ta ntende nos prublémas. Jeová sabe kuzê ki nu ta pode i kuzê ki nu ka ta pode faze. I ti el sabe kuzê ki nu sta pensa i ki nu sta xinti. (Sal. 103:14; 139:3, 4) Si nu kúnfia na Jeová, sima Elias faze, el ta djuda-nu lida ku prublémas ki ta pô-nu txeu dizanimadu. — Sal. 55:22.

8. Modi ki Jeová ta djuda-u óras ki bu sta txeu preokupadu?

⁸ Txeu preokupason pode pô-u ta pensa ma bu situason nunka ka ta muda, i bu pode xinti dizanimadu. Si kel-la sta kontise ku bo, ka bu skese ma Jeová ta djuda-u lida ku preokupason. Modi ki el pode djuda-u? El ta konvida-u pa bu fla-l bus prublémas i modi ki bu sta ta xinti. I el ta responde-u óras ki bu pidi-l ajuda. (Sal. 5:3; 1 Ped. 5:7) Pur isu, pâpia sénpri ku Jeová sobri bus prubléma. El ka ta ba pâpia ku bo di mésmu manera ki el faze ku Elias, má el ta uza se Palavra, ki é Bíblia, i se organizason pa el pâpia ku bo. Na Bíblia, bu ta atxa stórias ki pode konsola-u i da-u speransa. Tanbê bus irmon i irmans na kongregason pode da-u koraji. — Rom. 15:4; Heb. 10:24, 25.

9. Modi ki un amigu di kunfiansa pode djuda-nu?

⁹ Jeová tanbê fla Elias pa el da Elizeu algun párti di trabadju. Kel-li éra un manera di Jeová da Elias un bon amigu ki podia djudaba el óras ki el xintiba txeu dizanimadu. Di mésmu manera, óras ki nu ta fla un amigu di kunfiansa sobri nos sentimentus, el pode djuda-nu lida midjór ku nos preokupasons. (2 Reis 2:2; Pro. 17:17) Si bu atxa ma bu ka ten ningen pa bu konta bus prubléma, faze orason pa Jeová ta pidi-l pa el djuda-u atxa un algen ku más spiriénsa ki pode da-u koraji.

10. Modi ki spiriénsa di Elias ta da-nu speransa ki nu meste pa nu aguenta firmi, i modi ki promésa ki sta na Isaías 40:28, 29 pode djuda-nu?

¹⁰ Jeová djuda Elias lida ku se preokupason i el djuda-l kontinua ta sirbi-l pa txeu ténpu. Kuza ki kontise ku Elias ta da-nu speransa. Alvês nu pode pasa pa momentus difísil ki ta tra-nu tudu forsa i nu ta xinti dizanimadu. Má, si nu kúnfia na Jeová, el ta da-nu forsa ki nu meste pa nu kontinua ta sirbi-l. — Lé Isaías 40:28, 29.

11-13. Modi ki prublémas i txeu preokupason prujudika três sérvu di Jeová na ténpu antigu?

¹¹ Otus sérvu di Jeová na ténpu antigu pasa pa momentus ki dexa-s txeu  dizanimadu. Pur izénplu, Ana ta xintiba txeu vergónha pamodi el ka ta tinha fidju. I pa piora situason, el tinha ki aguentaba trósa ku maldadi di un otu mudjer di se maridu. (1 Sam. 1:2, 6) Ana tinha txeu prubléma ki el ta fikaba tristi, el ta txoraba i ti el perde vontadi di kume. — 1 Sam. 1:7, 10.

¹² Tanbê, Rei Davidi pasa pa momentus di txeu preokupason. Pensa na prublémas ki el pasa pa el. Davidi ta xintiba konsénsia pizadu pamodi kes pekadu ki el faze. (Sal. 40:12) Se fidju Absalon fika kóntra el i dipôs el matadu. (2 Sam. 15:13, 14; 18:33) I un di kes midjór amigu di Davidi trai-l. (2 Sam. 16:23–17:2; Sal. 55:12-14) Txeu di kes salmo ki Davidi skrebe ta mostra ma el staba txeu dizanimadu, má tanbê el tinha txeu kunfiansa na Jeová. — Sal. 38:5-10; 94:17-19.

¹³ Dipôs, un skritor di salmo kumesa ta xinti invéja di manera ki kes algen mau ta viveba. Talvês el éra un levita di família di Azafi, i el sirbi na ‘grandiozu santuáriu di Deus’. Kel skritor di salmo pasa pa txeu preokupason, i kel-la pô-l ta fika tristi i el perde se alegria. Ti el kumesa ta atxa ma ka bale péna sirbi Deus. — Sal. 73:2-5, 7, 12-14, 16, 17, 21.

14-15. Kuzê ki nu ta prende di kes três izénplu di Bíblia sobri modi ki nu ta pidi ajuda di Jeová?

¹⁴ Kes três sérvu di Jeová ki dja nu pâpia di es, kúnfia na se ajuda. Es faze orason pa Jeová i es fla-l sobri ses preokupason. Es abri ses korason i es mostra-l pamodi ki es staba txeu dizanimadu. I es kontinua ta bai pa lugar di adorason di Jeová. — 1 Sam. 1:9, 10; Sal. 55:22; 73:17; 122:1.

 ¹⁵ Jeová mostra konpaxon pa kada un di es i el djuda-s na kuza ki es mesteba. Ana xinti pas déntu di el. (1 Sam. 1:18) Davidi skrebe: ‘Difikuldadis di algen justu é txeu, má Jeová ta libra-l di tudu es.’ (Sal. 34:19) I más tardi, kel skritor di salmo xinti ma Jeová ‘pega-l na se mô direita’ i el gia-l ku amor pa el sigi se konsedjus. El kanta: ‘Pa mi, é bon faze amizadi ku Deus. N faze di Jeová, kel Sinhor Más Grandi, nha lugar di proteson’. (Sal. 73:23, 24, 28) Kuzê ki nu ta prende di kes izénplu li? Alvês nu pode pasa pa prublémas gravi ki ta pô-nu ta xinti txeu dizanimadu. Má, nu pode lida ku kes prubléma si nu pensa na modi ki Jeová djuda otus, si nu pâpia ku el na orason i si nu faze kuzê ki el ta pidi-nu. — Sal. 143:1, 4-8.

16-17. (a) Pamodi ki nu ka debe sipara di Jeová i di se povu? (b) Modi ki nu pode torna ganha forsa?

¹⁶ Kes três izénplu li ta inxina-nu otu lison inportanti: Nu ka debe sipara di Jeová i di se povu. (Pro. 18:1) Un irman ki txoma Nancy, fika txeu dizanimadu kantu se maridu bandona-l. El fla: “Ta tinha txeu dia ki N ka ta krê odjaba ningen nen pâpia ku ningen. Pur isu, kantu más N fika mi sô, más tristi N ta xintiba.”  Má kuzas muda kantu Nancy djobe manera di djuda otus algen ki staba ta pasa pa prublémas. El fla: “N repara ma óras ki N ta konsentraba na obi i djuda kes ki sta pasaba pa prublémas N ta konsentraba ménus na nha kabésa i na nhas prubléma.”

¹⁷ Nu pode torna ganha forsa óras ki nu ta sta na runions. Óras ki nu ta sta la, nu ta da Jeová más oportunidadi di el ‘djuda-nu i konsola-nu’. (Sal. 86:17) Na runions, Jeová ta da-nu forsa através di se spritu santu, di se Palavra Bíblia i di se povu. Tanbê nu ta ten oportunidadi di nu ‘nkoraja kunpanheru’. (Rom. 1:11, 12) Un irman ki txoma Sufia fla: “Jeová i nhas irmon é ki ta djuda-m aguenta firmi. I kuza más inportanti pa mi éra nos runion. N diskubri ma óras ki N ta baba sénpri pa pregason i runions, N ta xintiba más forsa pa N lida ku nhas preokupason.”

18. Si nu xinti dizanimadu, kuzê ki Jeová pode da-nu?

¹⁸ Óras ki nu ta xinti dizanimadu, nu debe lenbra ma Jeová ta promete ma na futuru el ta kaba ku tudu nos preokupasons. Tanbê el ta da-nu ajuda pa nu lida ku kes preokupason ki nu sta pasa gósi. El ta da-nu ‘dizeju ku forsa’ pa nu konsigi lida ku susésu óras ki nu ta xinti dizanimadu i sen speransa. — Fil. 2:13.

19. Ki promésa nu ta atxa na Romanos 8:37-39 ?

¹⁹ Lé Romanos 8:37-39. Apóstlu Polu promete-nu ma nada ka ta pode sipara-nu di amor di Deus. Modi ki nu pode djuda nos irmons ku irmans ki sta txeu dizanimadu? Na kel otu studu nu sta ben odja modi ki nu pode imita Jeová na mostra-s konpaxon i apoia-s óras ki es sta txeu dizanimadu i sen speransa.