DISOLO YA KULONGUKA 25
Tula Ntima na Yehowa na Ntangu ya Mpasi
“Mono . . . ke kudiyangisa mingi.”—1 SAM. 1:15.
NKUNGA 30 Tata, Nzambi, mpi Nduku
MAMBU YINA DISOLO YAI KE TUBILA *
1. Sambu na nki beto fwete tula dikebi na lukebisu ya Yezu?
NTANGU Yezu tubilaka bilumbu ya nsuka, yandi tubaka nde: “Beno keba sambu bantima na beno kukuma ve ata fioti kizitu . . . na basusi ya luzingu.” (Luka 21:34) Beto fwete tula dikebi na lukebisu yai. Sambu na nki? Sambu beto yonso ta kutana ti bampasi.
2. Inki bampasi bampangi ke kutana ti yo?
2 Bantangu ya nkaka, beto lenda kutana ti bampasi mingi na mbala mosi. Beto tadila bambandu yai. John, * kele Mbangi ya Yehowa mpi ke belaka maladi ya ntu, yandi kudiyangisaka diaka mingi ntangu nkento na yandi yambulaka yandi na nima ya bamvula 19 ya makwela. Na nima bana na yandi zole ya bankento yambulaka kusadila Yehowa. Mpangi Bob ti nkento na yandi Linda kutanaka mpi ti bampasi mingi. Bo katulaka bo zole na kisalu mpi bo vandaka diaka ve ti mbongo ya kufutila nzo. Diaka, Linda kumaka kubela maladi ya ntima mpi bamaladi ya nkaka.
3. Mutindu Bafilipi 4:6, 7 ke monisa yo, nki kivuvu beto fwete vanda na yo?
3 Beto lenda ndima nde Yehowa Ngangi mpi Tata na beto ya zola ke bakisaka bampasi yina beto ke kutanaka ti yo. Yandi ke sadisaka beto na kununga bampasi na beto. (Tanga Bafilipi 4:6, 7.) Ndinga ya Nzambi ke tubila bansadi na yandi mingi yina kutanaka ti bampasi mpi mutindu yandi sadisaka bo na bampasi yango. Bika beto tubila bankaka na kati na bo.
ELIYA, “MUNTU TI MAWI BONSO YA BETO”
4. Inki bampasi Eliya kutanaka ti yo mpi nki mutindu yandi tadilaka Yehowa?
4 Eliya sadilaka Yehowa na nsungi ya mpasi mpi yandi kutanaka ti bampasi mingi. Ahabi, ntotila mosi ya mbi ya Izraele kwelaka Yezabele yina vandaka kusambila Baale. Bo zole fulusaka insi ti lusambu ya Baale mpi fwaka baprofete mingi ya Yehowa. Kansi, Eliya gulukaka. Yandi gulukaka mpi na nzala ya ngolo sambu yandi tulaka ntima na Yehowa. (1 Bant. 17:2-4, 14-16) Diaka, Eliya tudilaka Yehowa ntima ntangu yandi nwanisaka baprofete mpi bantu yina vandaka kusambila Baale. Yandi siamisaka bantu ya Izraele na kusambila Yehowa. (1 Bant. 18:21-24, 36-38) Eliya vandaka ti banzikisa mingi yina ndimisaka yandi nde Yehowa sadisaka yandi na bampasi na yandi yonso.
Yehowa tindaka wanzio sambu na kupesa diaka Eliya kikesa (Tala baparagrafe 5-6) *
5-6. Na kutadila 1 Bantotila 19:1-4 Eliya kudiwaka nki mutindu mpi nki Yehowa salaka sambu na kumonisa nde yandi ke zolaka Eliya?
5 Tanga 1 Bantotila 19:1-4. Ata mpidina, Eliya waka boma ntangu ntotila-nkento Yezabele zolaka kufwa yandi. Yo yina yandi tinaka na Bere-sheba. Yandi kudiyangisaka mingi yo yina “yandi lombaka nde yandi fwa.” Sambu na nki Eliya kudiyangisaka mutindu yina? Sambu Eliya vandaka muntu ya kukonda kukuka “ti mawi bonso ya beto.” (Yak. 5:17) Ziku Eliya tulaka basusi mingi mpi yo lembisaka yandi ngolo. Mbala ya nkaka Eliya yindulaka nde bikesa yonso yina yandi salaka sambu na kusiamisa lusambu ya kieleka vandaka mpamba mpi ata muntu mosi ve na Izraele sobaka; yandi yindulaka mpi nde yandi mpamba landaka kusambila Yehowa. (1 Bant. 18:3, 4, 13; 19:10, 14) Beto lenda yituka mutindu profete yai ya kwikama waka boma kansi Yehowa bakisaka mawi na yandi.
6 Yehowa nganinaka ve Eliya sambu na mambu yina yandi tubaka. Kansi Yehowa pesaka yandi diaka kikesa. (1 Bant. 19:5-7) Yehowa sungikaka mabanza ya Eliya na mawete yonso mpi monisaka Eliya ngolo na yandi ya nene. Na nima, Yehowa songaka Eliya nde kele ti bantu 7000 na Izraele yina sambilaka ve Baale. (1 Bant. 19:11-18) Yehowa monisaka pwelele nde yandi ke zolaka Eliya.
MUTINDU YEHOWA KE SADISAKA BETO
7. Lusadisu yina Yehowa pesaka Eliya ke ndimisa beto nki?
7 Keti nge ke kutana ti diambu ya mpasi? Kuzaba nde Yehowa bakisaka mawi ya Eliya ke pesa beto kikesa mpenza! Yo ke ndimisa beto nde yandi ke bakisaka mpi mawi na beto ntangu beto ke kutanaka ti bampasi. Yandi ke zabaka bandilu na beto, nkutu yandi ke zabaka mabanza mpi mawi na beto. (Nk. 103:14; 139:3, 4) Kana beto tudila Yehowa ntima bonso Eliya, yandi ta sadisa beto na kununga mambu yina ke yangisa beto.—Nk. 55:22.
8. Inki mutindu Yehowa ta sadisa nge?
8 Basusi lenda pusa nge na kuyindula nde luzingu na nge ta toma ve mpi yo lenda lembisa nge. Kana yo kumina nge, yibuka nde Yehowa ta sadisa nge. Inki mutindu yandi ta sala yo? Yandi ke lomba nge na kuzabisa yandi mambu ya ke yangisa nge. Ebuna, yandi ta pesa mvutu na bidilu na nge. (Nk. 5:3; 1 Pie. 5:7) Samba Yehowa mbala na mbala sambu na diambu yango. Yandi ta solula ve ti nge mutindu yandi solulaka ti Eliya kansi yandi ta sala yo na nzila ya Biblia, Ndinga na yandi mpi ya dibundu na yandi. Masolo ya nge ke tanga na Biblia lenda pesa nge kikesa mpi kivuvu. Diaka, bampangi lenda pesa nge kikesa.—Bar. 15:4; Baeb. 10:24, 25.
9. Inki mutindu nduku ya mbote lenda sadisa nge?
9 Ntangu Yehowa songaka Eliya na kupesa Elisha mikumba ya nkaka, Yehowa pesaka yandi nduku yina sadisaka yandi mingi mpi ziku nduku yai vandaka kulembika yandi na basusi na yandi. Mutindu mosi, kana beto ke zabisa nduku mosi ya ntima mambu na beto, yandi lenda lembika beto na basusi na beto. (2 Bant. 2:2; Bing. 17:17) Kana nge kele ve ti nduku ya mbote yina nge lenda zabisa mambu na nge, samba Yehowa na kusadisa nge na kuzwa mpangi mosi ya kuyela na kimpeve yina ta sadisa nge.
10. Inki mutindu mbandu ya Eliya ke pesa beto kivuvu mpi nki mutindu lusilu yina kele na Yezaya 40:28, 29 lenda sadisa beto?
10 Yehowa sadisaka Eliya na bampasi na yandi, mpi Eliya sadilaka Yehowa na kwikama bamvula mingi. Mambu yai ke pesa beto kivuvu. Beto lenda kutana ti bampasi yina lenda bebisa nitu mpi mabanza na beto. Ata mpidina, kana beto ke tudila Yehowa ntima yandi ta pesa beto ngolo sambu beto landa kusadila yandi.—Tanga Yezaya 40:28, 29.
ANA, DAVIDI MPI “ASAFI” TUDILAKA YEHOWA NTIMA
11-13. Inki mambu ya mpasi bansadi tatu ya Yehowa kutanaka na yo?
11 Bantu ya nkaka yina Biblia ke tubila kutanaka mpi ti bampasi ya ngolo. Bantu vandaka kuvweza Ana sambu yandi vandaka kubuta ve mpi mbanda na yandi vandaka kusosila yandi mingi. (1 Sam. 1:2, 6) Mambu yai vandaka kuyangisa Ana mingi yo yina yandi vandaka kudila mpi vandaka kubuya kudia.—1 Sam. 1:7, 10.
12 Bantangu ya nkaka, ntotila Davidi kutanaka ti bampasi. Yandi vandaka kudiyangisa sambu na bifu mingi yina yandi salaka. (Nk. 40:12) Absalomi, mwana yina yandi zolaka mingi kolamaka na yandi, yo yina bo fwaka Absalomi. (2 Sam. 15:13, 14; 18:33) Diaka, nduku ya Davidi mosi ya ngolo yekulaka yandi. (2 Sam. 16:23–17:2; Nk. 55:12-14) Bankunga mingi yina Davidi sonikaka ke monisa mawa yina yandi vandaka na yo mpi kivuvu na yandi ya ngolo na Yehowa.—Nk. 38:5-10; 94:17-19.
Inki sadisaka muyimbi-bankunga na kusadila diaka Yehowa na kiese? (Tala baparagrafe 13-15) *
13 Muyimbi-bankunga mosi kumaka kulula luzingu ya bantu ya mbi. Ziku yandi vandaka na dibuta ya Asafi yina vandaka Mulevi mpi yandi vandaka kusala na “kisika ya santu ya nene ya Nzambi.” Muyimbi-bankunga yai kumaka ti basusi mingi mpi kiese na yandi manaka. Yandi kumaka nkutu kumona mpamba balusakumunu yina yandi lendaka kubaka na kusadila Nzambi.—Nk. 73:2-5, 7, 12-14, 16, 17, 21.
14-15. Bambandu yai tatu ke longa beto nki na yina me tala kulomba Yehowa lusadisu?
14 Bansadi tatu ya Yehowa ya beto me tubila tulaka ntima nde Yehowa ta sadisa bo. Bo bondilaka kibeni Yehowa mpi zabisaka yandi bampasi na bo. Na masonga yonso, bo zabisaka Yehowa mambu yina vandaka kuyangisa bo. Diaka, bo landaka kuvukana ti bampangi sambu na kusambila Yehowa.—1 Sam. 1:9, 10; Nk. 55:22; 73:17; 122:1.
15 Yehowa wilaka bo mawa mpi pesaka mvutu na bisambu na bo. Ana kumaka diaka ti ngemba ya mabanza. (1 Sam. 1:18) Davidi sonikaka nde: “Muntu ya lunungu ke kutanaka ti bampasi mingi, kansi Yehowa ke gulusaka yandi na bampasi yina yonso.” (Nk. 34:19) Na nima, Davidi monaka nde Yehowa “me simba diboko na [yandi] ya kitata” mpi ke twadisa yandi na nsadisa ya bandongisila ya zola. Yandi tubaka diaka nde: “Sambu na mono, kupusana pene-pene ya Nzambi kele mbote. Mono me kumisa Yehowa Mfumu ya Kuluta Nene kitininu na mono.” (Nk. 73:23, 24, 28) Bambandu yai ke longa beto nki? Bantangu ya nkaka, beto lenda kutana ti bampasi yina lenda natila beto basusi. Kansi beto lenda nunga kana beto yindula mingi mutindu Yehowa me sadisaka bantu ya nkaka to kana beto samba yandi mpi kusala mambu yina yandi ke lomba beto.—Nk. 143:1, 4-8.
TUDILA YEHOWA NTIMA MPI NUNGA
Ntete, mpangi-nkento mosi kudivandilaka, kansi luzingu na yandi kumaka mbote ntangu yandi kumaka kusadisa bantu ya nkaka (Tala baparagrafe 16-17)
16-17. (a) Sambu na nki beto fwete kangama ntangu yonso ti bampangi? (b) Inki mutindu beto lenda baka diaka kikesa?
16 Bambandu yai tatu ke longa beto dilongi ya nkaka ya mfunu nde beto fwete kangama ntangu yonso ti Yehowa mpi bampangi na beto. (Bing. 18:1) Mpangi Nancy yina vandaka ti basusi mingi ntangu bakala na yandi yambulaka yandi ke tuba nde: “Bilumbu ya nkaka mono vandaka kuzola ve kumona to kusolula ti bantu. Kansi, yo vandaka kupesa mono mawa.” Mambu sobaka ntangu Nancy yantikaka kusadisa bantu yina vandaka kukutana ti bampasi. Yandi ke tuba nde: “Mono vandaka kuwidikila ntangu bantu ya nkaka vandaka kutuba bampasi na bo. Mono bakisaka nde ntangu mono vandaka kuditula na kisika ya bantu ya nkaka, basusi na mono vandaka kumana.”
17 Kukwenda na balukutakanu ke pesaka beto diaka kikesa. Na balukutakanu, beto ke pesaka diaka Yehowa dibaku ya kusadisa mpi ya kulembika beto. (Nk. 86:17) Kuna, yandi ke pesaka beto ngolo na nzila ya mpeve santu, ya Ndinga na yandi mpi ya bansadi na yandi. Balukutakanu ke pesaka beto dibaku ya ‘kupesana kikesa.’ (Bar. 1:11, 12) Mpangi-nkento Sophia ke tuba nde: “Yehowa ti bampangi ke sadisaka mono na bampasi na mono. Balukutakanu kele mfunu mingi sambu na mono. Mono me bakisaka nde kudipesa mingi na kusamuna mpi na mambu ya dibundu ke lembikaka basusi na mono.”
18. Kana beto ke kudiyangisa, nki Yehowa lenda pesa beto?
18 Kana beto ke kudiyangisa, beto fwete vila ve nde Yehowa ke sila beto luzingu ya kiese na bilumbu ke kwisa ata mpidina, yandi ke sadisaka beto mpi ntangu beto ke kutanaka ti bampasi. Yandi ke pesaka beto mpusa ti “ngolo” ya kununga mambu yina ke yangisa beto mpi mambu yina ke katulaka beto kivuvu.—Bafil. 2:13.
19. Inki kivuvu Baroma 8:37-39 ke pesa beto?
19 Tanga Baroma 8:37-39. Ntumwa Polo ke ndimisa beto nde kima mosi ve lenda kabula beto ti zola ya Nzambi. Inki mutindu beto lenda sadisa bampangi yina ke kutana ti bampasi? Disolo yina ke landa ta tubila mutindu beto lenda landa mbandu ya Yehowa ya kuwila bantu mawa mpi kusadisa bo ntangu bo ke kudiyangisa.
NKUNGA 44 Kisambu ya Nsukami
^ par. 5 Kudiyangisa ntangu ya nda lenda bebisa nitu mpi mabanza na beto. Inki mutindu Yehowa ke sadisaka beto? Beto ta longuka mutindu Yehowa sadisaka Eliya ntangu yandi vandaka kudiyangisa. Bambandu ya nkaka yina kele na Biblia ta monisa mutindu beto lenda lomba Yehowa lusadisu ntangu diambu mosi ke yangisa beto.
^ par. 2 Beto me soba bazina na disolo yai.
