25-زەرتتەۋ ماقالاسى
كۇيزەلىستى ەحوبامەن بىرگە ەڭسەرىڭىز
«سارىۋايىم جۇرەكتى كۇيزەلتەدى» (ناق. س. 12:25).
30-ٵن ەحوبا، قۇدايىمسىڭ، ادال دوسىم
اڭداتپا *
1. يسانىڭ ەسكەرتۋىنە نەلىكتەن دەن قويۋىمىز كەرەك؟
سوڭعى كۇندەر جايىندا پايعامبارلىق ايتقان سوڭ يسا: «وزدەرىڭە ساق بولىڭدار! ..كۇندەلىكتى تۇرمىس ۋايىمى جۇرەكتەرىڭدى جاۋلاپ الماسىن»،— دەدى (لۇقا 21:34). بۇل ەسكەرتۋگە دەن قويعانىمىز وتە ماڭىزدى. ويتكەنى جۇرتتىڭ باسىنا ٴتۇسىپ جاتقان قيىندىقتارعا ٴبىز دە كەزىگىپ ٴجۇرمىز.
2. باۋىرلاستار قانداي قيىندىقتارعا كەزىگۋدە؟
2 قۇتىڭدى قاشىرىپ، جان ازابىنا تۇسىرەتىن قيىندىقتار كەيدە ٷستى-ۇستىنە كەلۋى مۇمكىن. مىسالى، دجون * ەسىمدى كۋاگەردى الايىق. ونى 19 جىل وتاسقان جۇبايى تاستاپ كەتەدى. ونسىز دا شاشىراندى سكلەروزبەن اۋىراتىن دجونعا بۇل قاتتى سوققى بولىپ ٴتيدى. بۇدان كەيىن ونىڭ ەكى قىزى ەحوباعا قىزمەت ەتۋدى دوعاردى. بوب پەن ليندا دەگەن ەرلى-زايىپتى وزگەشە جاعدايعا تاپ بولدى. ەكەۋى دە جۇمىسسىز، كەيىن ٴتىپتى ٷيسىز قالدى. ارتىنشا ليندانىڭ ايىقپاس جۇرەك اۋرۋى مەن ارتريتتىڭ اۋىر تۇرىنە شالدىققانى ايقىن بولدى.
3. فىلىپىلىكتەرگە 4:6، 7 گە ساي، ٴبىز نە نارسەگە سەنىمدىمىز؟
3 كۇيزەلىستىڭ جانىمىزعا قانداي جارا سالاتىنىن جاراتۋشىمىز، قامقور اكەمىز ەحوبا جاقسى تۇسىنەدى. ول كۇيزەلىستى ەڭسەرە الۋىمىز ٷشىن بىزگە كومەكتەسكىسى كەلەدى (فىلىپىلىكتەرگە 4:6، 7 وقىڭىز). جازبالاردا ومىرلەرىندە كوپ قيىندىق كورگەن قۇداي قىزمەتشىلەرىنىڭ مىسالدارى بار. وندا ەحوبانىڭ ولارعا قالاي قول ۇشىن بەرگەنى دە باياندالادى. قازىر سولاردىڭ بىرنەشەۋىن قاراستىرايىق.
«بىزدىكىندەي سەزىمى بار» پايعامبار
4. ٸلياس قانداي قيىندىقتارعا كەزىكتى؟ ول ەحوبانىڭ تاراپىنان نە سەزىندى؟
4 ٸلياس پايعامبار الاساپىران كەزەڭدە ٶمىر سۇرگەن ٵرى اۋىر قيىندىقتارعا كەزىككەن. جولدان تايعان احاب پاتشا باعالعا تابىناتىن ەزابەل دەگەن زۇلىم ايەلگە ۇيلەنەدى. ەكەۋى ەلدى جالعان عيباداتقا بەلشەسىنەن باتىرىپ، ەحوبانىڭ كوپتەگەن پايعامبارىن ولتىرەدى. ٴبىراق ٸلياس ولاردىڭ قولىنان قاشىپ قۇتىلادى. ول ەحوباعا ارقا سۇيەي وتىرىپ، قاھارلى اشتىق كەزەڭىنەن دە امان قالادى (پات. 1-ج. 17:2—4، 14—16). ٸلياس باعالدىڭ قىزمەتشىلەرىمەن، پايعامبارلارىمەن بەتپە-بەت كەلگەندە دە ەحوباعا سەنىم ارتتى. ول يسرايلدىكتەردى ەحوباعا بەت بۇرۋعا شاقىردى (پات. 1-ج. 18:21—24، 36—38). ومىرىنىڭ سول ٴبىر قيلى شاقتارىندا ٸلياس ەحوبانىڭ كومەگىن تالاي رەت سەزىندى.
ەحوبا ٸلياسقا پەرىشتەسىن جىبەرىپ، كۇش جيناۋعا كومەكتەستى (5، 6-ابزاستى قاراڭىز) *
5، 6. پاتشالار 1-جازبا 19:1—4 تارماقتاردى ەسكەرسەك، ٸلياس قانداي سەزىمدەردى باستان وتكەرگەن؟ ەحوبا ٸلياستى جاقسى كورەتىنىن قالاي كورسەتتى؟
5 پاتشالار 1-جازبا 19:1—4 وقىڭىز. ەزابەل پاتشايىم قوقان-لوقى كورسەتكەندە، ٸلياس قاتتى قورقىپ، بەر-شەباعا قاراي قاشىپ كەتەدى. تۇڭىلگەنى سونشا — وزىنە ٶلىم تىلەيدى. ونىڭ ومىردەن وسىنشالىق باز كەشكەنى قالاي؟ «ٸلياس پايعامبار بىزدىكىندەي سەزىمى بار» كەمەلسىز ادام بولعان (جاق. 5:17). ول قاتتى شارشاپ، سترەستەن ابدەن قاجىسا كەرەك. «تازا عيباداتتى وركەندەتەمىن دەگەن بار ەڭبەگىم دالاعا كەتتى، يسرايلدىكتەر ەش تۇزەلمەدى، ەحوباعا قىزمەت ەتەتىندەردەن جالعىز مەن-اق قالدىم» دەپ تە ۋايىمداسا كەرەك (پات. 1-ج. 18:3، 4، 13؛ 19:10، 14). سەنىمىن سەرىك ەتكەن ادال پايعامباردىڭ وسىنداي كۇي كەشكەنى ٴبىزدى تاڭعالدىرار، ٴبىراق ەحوبا ونىڭ سەزىمدەرىن جاقسى ٴتۇسىندى.
6 ىشىندەگىسىن اقتارىپ سالعان پايعامبارىن ەحوبا ەش جازعىرمادى. قايتا، وعان كۇش جيناپ، الدەنىپ الۋعا كومەكتەستى (پات. 1-ج. 19:5—7). سوسىن قۇدىرەتىن پاش ەتىپ، جۇمساق تۇردە ونىڭ ويىن تۇزەتتى. سونداي-اق يسرايلدە باعالعا تابىنباعان ٵلى 7000 ادام بار ەكەنىن ايتتى (پات. 1-ج. 19:11—18). ەحوبا ٸلياستى جاقسى كورەتىنىن وسىنداي جولدارمەن كورسەتتى.
ەحوبانىڭ بۇگىنگى كومەگى
7. ەحوبانىڭ ٸلياسقا كومەكتەسكەنىنەن نە بىلەمىز؟
7 كۇيزەلىسكە دۋشار ەتكىزەتىن جاعدايلار سىزدە دە بار شىعار. ەحوبا كەزىندە ٸلياستىڭ سەزىمدەرىن تۇسىنگەنى جانىمىزعا جىلۋ بەرەدى. جان ازابىنا تۇسكەنىمىزدە، ەحوبا ٴبىزدى دە جاقسى تۇسىنەدى. ول شاما-شارقىمىزدى، نە ويلاپ، نە سەزىنەتىنىمىزدى بىلەدى (ٴزاب. 103:14؛ 139:3، 4). ەحوباعا ٸلياس سياقتى سەنىم ارتساق، ول بىزگە سترەسپەن كۇرەسۋگە كومەك بەرەدى (ٴزاب. 55:22).
8. ەحوبا سىزگە سترەسپەن كۇرەسۋگە قالاي كومەكتەسەدى؟
8 سترەسس سانامىزدى بۇرىس ويلارعا بۇرىپ، ەڭسەمىزدى ەزەتىن شىعار. مۇندايدا ەحوبانىڭ كومەگىنە جۇگىنىڭىز. ول سىزگە قالاي كومەكتەسەدى؟ ەحوبا بار ۋايىمىڭىزدى وعان ايتىپ، شەر تارقاتۋعا شاقىرادى. زار جىلاپ كومەككە شاقىرعانىڭىزدا جاۋاپ بەرەدى (ٴزاب. 5:3؛ پەت. 1-ح. 5:7). سوندىقتان مازاڭىزدى العان جايتتار تۋرالى دۇعا ايتۋدى دوعارماڭىز. ەحوبا ىلياسپەن سويلەسكەندەي سويلەسپەسە دە، سىزگە ٴسوزى ارقىلى جانە ۇيىمى ارقىلى ٴتىل قاتادى. قالاي دەيسىز عوي؟ كيەلى كىتاپتان وقىعان تارماقتار جانىڭىزعا جۇبانىش بەرىپ، ٷمىت سيلايدى. ال باۋىرلاستار سىزگە تىرەۋ بولىپ، قولداۋ كورسەتەدى (ريم. 15:4؛ ەۆر. 10:24، 25).
9. ادال دوسىمىز بىزگە قالاي كومەكتەسەدى؟
9 ەحوبا ٸلياسقا مىندەتىن ەلىشەگە تاپسىرۋدى ايتقاندا، ونى قامقور دوسپەن قامتاماسىز ەتتى. ٸلياس قامىققاندا، ەلىشە ونىڭ جانىنان تابىلىپ، دەمەۋ بولعانىندا كۇمان جوق. سول سياقتى ادال دوسىمىزعا ىشىمىزدەگى شەرىمىزدى تارقاتساق، ول ىڭقىل-كۇرسىنىسىمىزدەن جەڭىلدەۋگە كومەكتەسەدى (پات. 2-ج. 2:2؛ ناق. س. 17:17). مۇنداي دوسىڭىز بولماسا، ەحوباعا دۇعا ەتىپ، دەمەۋ بولاتىن تولىسقان ٴماسىحشىنى تابۋعا كومەكتەسۋىن سۇراڭىز.
10. ٸلياستىڭ باستان وتكەرگەنى بىزگە قانداي ٷمىت بەرەدى؟ يشايا 40:28،29 داعى ۋادە بىزگە قالاي كومەكتەسەدى؟
10 ەحوبا ٸلياسقا كۇيزەلىستى ەڭسەرۋگە جانە جىلدار بويى ادالدىق ساقتاۋعا كومەكتەستى. ٸلياستىڭ مىسالى بىزگە دە ٷمىت بەرەدى. ٴبىز فيزيكالىق جانە ەموسيالىق كۇشىمىزدى تاۋىساتىن اۋىر قيىندىقتاردان ٶتۋىمىز مۇمكىن. ٴبىراق سونداي كەزدەرى ەحوباعا سەنىم ارتساق، ول بىزگە ٵرى قاراي دا قىزمەت ەتە بەرۋگە قاجەتتى قۋات دارىتادى (يشايا 40:28، 29 وقىڭىز).
ەحوباعا سەنىم ارتقان ٷش جان
11—13. جانكۇيزەلىسى قۇدايدىڭ ەجەلدەگى ٷش قىزمەتشىسىن قانداي كۇيگە ٴتۇسىردى؟
11 كيەلى كىتاپتا اۋىر كۇيزەلىسكە شالدىققان باسقا ادامدار تۋرالى دا ايتىلادى. مىسالى، حاننا «بەدەۋ» دەگەن جاماناتتان قاتتى جاپا شەككەن. بۇل ازداي، كۇندەسى جىعىلعانعا جۇدىرىق بولىپ ونى مازاق ەتەتىن (سام. 1-ج. 1:2، 6). حاننانىڭ جانى قينالعانى سونشا — ەتەگى جاسقا تولىپ، ٴنار تاتپايتىن (سام. 1-ج. 1:7، 10).
12 داۋىت پاتشانىڭ دا سارىۋايىمنان سارعايعان كەزدەرى بولعان. ونىڭ باسىنان وتكەرگەن قيىنشىلىقتارى جايلى ويلاپ كورىڭىزشى. ومىردە كوپ قاتەلىك جىبەرگەندىكتەن، ونى ار-ۇياتى مازالاپ، ەڭسەسىن باسقان (ٴزاب. 40:12). بۇعان قوسا، سۇيىكتى ۇلى ابەسسالوم وعان قارسى شىعىپ، اقىرىندا قازا بولدى (سام. 2-ج. 15:13، 14؛ 18:33). سونداي-اق ەڭ جاقىن دوستارىنىڭ ٴبىرى ونى ساتىپ كەتتى (سام. 2-ج. 16:23—17:2؛ ٴزاب. 55:12—14). ٴداۋىت ٶزىنىڭ جارالى سەزىمدەرىن، سونداي-اق ەحوباعا دەگەن مىزعىماس سەنىمىن كوپ جىرمەن جەتكىزدى (ٴزاب. 38:5—10؛ 94:17—19).
ٴزابۇر جىرشىسى كوزقاراسىن قالاي تۇزەدى؟ (13—15 ابزاستاردى قاراڭىز) *
13 ال ٴبىر ٴزابۇر جىرشىسى زۇلىم ادامداردىڭ ومىرىنە قىزىعا قاراي باستايدى. ول لەۋىلىك اساپتىڭ ۇرپاعى بولسا كەرەك. بۇل جىرشى «قۇدايدىڭ ايبىندى عيباداتحاناسىندا» قىزمەت ەتكەن. ول بىردە قاتتى كۇيزەلىپ، ومىرىنە نارازى بولىپ، ٶزىن باقىتسىز سەزىنەدى. ٴتىپتى قۇدايدىڭ بەرىپ جاتقان باتالارىنا دا كوڭىلى تولمايدى (ٴزاب. 73:2—5، 7، 12—14، 16، 17، 21).
14، 15. ەحوبادان كومەك سۇراعان ٷش ادامنان نە ۇيرەنەمىز؟
14 وسى ادال ادامداردىڭ ۇشەۋى دە ەحوبانىڭ كومەگىنە جۇگىنگەن. ولار جان-تاندەرىمەن دۇعا ايتىپ، ۋايىمدارىن قۇدايعا ارتقان. كۇيزەلىپ جۇرگەندەرىنىڭ سەبەبىن ەمىن-ەركىن جەتكىزگەن. سونداي-اق ەحوباعا عيبادات ەتەتىن ورىنعا بارىپ، وعان سيىنۋدى دوعارماعان (سام. 1-ج. 1:9، 10؛ ٴزاب. 55:22؛ 73:17؛ 122:1).
15 ەحوبا وسى قىزمەتشىلەرىنە جاناشىرلىقپەن جاۋاپ بەردى. حاننا جانتىنىشتىعىنا يە بولدى (سام. 1-ج. 1:18). ٴداۋىت بولسا: «ٵدىل جان قيىندىققا كوپ كەزىگەدى، ٴبىراق ەحوبا سونىڭ بارىنەن ازات ەتەدى»،— دەپ جىرلادى (ٴزابۇر 34:19). ال ٴزابۇر جىرشىسىن ەحوبا سۇيىسپەنشىلىكپەن تۇزەتىپ، «وڭ قولىنان ۇستاپ جەتەلەدى». ول: «قۇدايعا جاقىن بولعانىم قانداي يگى!.. مەن الەمنىڭ ٵمىرشىسى ەحوبانى پانالادىم»،— دەپ جىرلادى (ٴزاب. 73:23، 24، 28). بۇدان نە ۇيرەنەمىز؟ كەيدە ٴبىز دە قيىندىقتان ەڭسەمىزدى كوتەرە الماي، سترەسكە تۇسەمىز. ٴبىراق ەحوبا قىزمەتشىلەرىنە قالاي كومەكتەسكەنى جايىندا ويلانساق، وعان دۇعا ايتىپ ارقا سۇيەسەك جانە ونىڭ ەركىن ٵرى قاراي دا ورىنداي بەرسەك، كۇيزەلىستى جەڭە الامىز (ٴزاب. 143:1، 4—8).
ەحوباعا سەنىم ارتىپ، جەڭىسكە جەتىڭىز!
العاشىندا ايەل باۋىرلاسىمىز وقشاۋلانىپ ٴجۇردى، ٴبىراق وزگەلەرگە كوڭىل بولە باستاعاندا، جاعدايى وڭالدى (16، 17-ابزاستى قاراڭىز)
16، 17. ا) وزگەلەردەن نەگە وقشاۋلانباۋىمىز كەرەك؟ ٵ) كۇش-قۋاتتى قايدان الساق بولادى؟
16 جوعارىدا ايتىلعان قۇدايدىڭ ٷش قىزمەتشىسىنەن ٴبىر ماڭىزدى ساباق الامىز: ٴبىز ەحوبا مەن ونىڭ حالقىنان بولەكتەنبەۋىمىز كەرەك (ناق. س. 18:1). كۇيەۋى تاستاپ كەتىپ، جان ازابىن تارتقان نەنسي بىلاي دەيدى: «ٴبىرتالاي ۋاقىت ەشكىمدى كورگىم دە، سويلەسكىم دە كەلمەدى. ٴبىراق وقشاۋلانعان سايىن قايعى-مۇڭعا باتا بەردىم». قينالىپ جۇرگەن وزگە ادامدارعا كومەكتەسۋدىڭ جولىن ىزدەي باستاعاندا، نەنسيدىڭ جاعدايى وڭالا ٴتۇستى. «قيىنشىلىقتارى جايىندا ايتىپ جاتقاندا، مەن ولاردى مۇقيات تىڭدادىم. وزگەگە كوبىرەك جاناشىرلىق تانىتقان سايىن، ٶزىمدى ازىراق ايايتىن بولدىم»،— دەيدى نەنسي.
17 قاۋىم كەزدەسۋلەرى بىزگە كۇش بەرىپ، بويىمىزعا قۋات بىتىرەدى. ول جەردە ٴبىز ەحوباعا «كومەكشىمىز ٵرى جۇباتۋشىمىز» بولۋعا مۇمكىندىك بەرەمىز (ٴزاب. 86:17). كەزدەسۋلەردە ەحوبا ٴبىزدى كيەلى رۋحى، ٴسوزى جانە حالقى ارقىلى قولداپ-قۋاتتايدى. وندا ٴبىز «ٶزارا جىگەرلەنەمىز» (ريم. 1:11، 12). سوفيا ەسىمدى باۋىرلاسىمىز بىلاي دەيدى: «ەحوبا مەن باۋىرلاستاردىڭ ارقاسىندا قۇلاماي بەرىك تۇردىم. اسىرەسە قاۋىم كەزدەسۋلەرىمىز كوپ كومەگىن تيگىزدى. ٴبىر بايقاعانىم، قىزمەت پەن قاۋىمدا كوپ ەڭبەكتەنسەم، ۋايىممەن جانە سترەسپەن جاقسىراق كۇرەسەدى ەكەنمىن».
18. تۇڭىلگەن كەزىمىزدە ەحوبا قالاي كومەكتەسەدى؟
18 جىگەرىمىز قۇم بولعاندا مىنانى ۇمىتپايىق: ەحوبا بولاشاقتا ۋايىم مەن سترەستەن تولىق ارىلتۋدى ۋادە ەتەدى. ٴتىپتى قازىردىڭ وزىندە ولاردى ەڭسەرۋگە كومەكتەسەدى. ٴتۇڭىلۋ مەن ۇمىتسىزدىك سەزىمدەرىن جەڭۋىمىز ٷشىن، ول بويىمىزدا «ىقىلاس وياتىپ، كۇش بەرەدى» (ٴفىلىپ. 2:13).
19. ريمدىكتەرگە 8:37—39 تارماقتاردا قانداي ۋادە جازىلعان؟
19 ريمدىكتەرگە 8:37—39 وقىڭىز. ەلشى پاۋىل قۇدايدىڭ سۇيىسپەنشىلىگىنەن ٴبىزدى ەش نارسە ايىرا المايتىنىن سەنىممەن ايتقان. ال كۇيزەلىسپەن كۇرەسىپ جۇرگەن باۋىرلاستارعا قالاي كومەكتەسە الامىز؟ كەلەسى ماقالادا باۋىرلاستارعا ەحوبا سياقتى جاناشىرلىق تانىتىپ، قولداۋ كورسەتۋدىڭ جولدارىن قاراستىرامىز.
44-ٵن جانى كۇيزەلگەننىڭ دۇعاسى
^ 5-ابزاس شەكتەن تىس نە سوزىلمالى سترەستىڭ ادامعا فيزيكالىق جانە ەموسيالىق زيانى كوپ. مۇندايدا ەحوبا بىزگە قالاي كومەكتەسەدى؟ مۇنى ٸلياس پايعامباردىڭ مىسالىنان كورەمىز. سونداي-اق باسقا دا كيەلى كىتاپ كەيىپكەرلەرىنىڭ ۇلگىسىن قاراستىرا وتىرىپ، جانىمىز كۇيزەلگەندە ەحوبانىڭ كومەگىن الۋ ٷشىن نە ىستەۋ كەرەكتىگىن بىلەمىز.
^ 2-ابزاس بۇل ماقالاداعى ەسىمدەر وزگەرتىلگەن.
^ 53-ابزاس سۋرەت سيپاتتاماسى: ەحوبانىڭ پەرىشتەسى ٸلياستى اقىرىن عانا وياتىپ، نان مەن سۋ بەردى.
^ 55-ابزاس سۋرەت سيپاتتاماسى: ٴزابۇر جىرشىسى، اساپتىڭ ۇرپاعى بولسا كەرەك، جىر جازىپ، لەۋىلىك باۋىرلارىمەن بىرگە ٵن شىرقاپ وتىر.
