1. Wetin mek wi nid fɔ lisin to Jizɔs in wɔnin?

WE Jizɔs bin de tɔk bɔt di las dez, i bin se: “Una tek tɛm mek una nɔ put ɔl una at pan tumɔs . . . wɔri wɔri.” (Lyuk 21:​34, NW) Wetin mek wi nid fɔ lisin to da wɔnin de? Na bikɔs wisɛf kin gɛt di sem kayn prɔblɛm dɛn we ɔda pipul dɛn kin gɛt.

2. Us prɔblɛm dɛn wi brɔda ɛn sista dɛn gɛt we de rili mɔna dɛn?

² Sɔntɛnde, wi kin gɛt difrɛn difrɛn tin dɛn we de strɛs wi di sem tɛm. Tink bɔt dɛn ɛgzampul dɛn ya. Wan brɔda we nem Jɔn, * bin gɛt wan sik we dɛn kɔl multiple sclerosis. I bin rili fil bad we in wɛf lɛf am afta 19 ia we dɛn dɔn mared. Dɔn in tu galpikin dɛn bin lɛf fɔ sav Jiova. Wan maredman we nem Bɔb ɛn in wɛf Linda dɛn yon prɔblɛm dɛn bin difrɛn frɔm Jɔn. Dɛn ɔl tu bin lɔs dɛn wok so dɛn bin nid fɔ muf kɔmɔt na di os usay dɛn bin de fɔ go de na wan smɔl os. Apat frɔm dɛn prɔblɛm dɛn de, dɛn kam fɔ no se Linda gɛt wan sik we bin de ambɔg in at ɛn i go mek i day, ɛn i bin gɛt wan ɔda sik bak we de mek i nɔ izi fɔ mek in bɔdi ebul fɔ fɛt ɛni sik.

3. Wetin Lɛta Fɔ Filipay 4:​6, 7 tɛl wi bɔt Jiova?

³ Wi shɔ se Jiova we mek wi ɛn we na di Papa we lɛk wi, ɔndastand aw wi kin fil we wi strɛs. Ɛn i want fɔ ɛp wi fɔ bia wit di prɔblɛm dɛn we de mit wi. (Rid Lɛta Fɔ Filipay 4:​6, 7.) Gɔd in Wɔd gɛt bɔku ɛgzampul dɛn we tɔk bɔt di prɔblɛm dɛn we in savant dɛn trade bin bia. I tɔk bak bɔt aw Jiova bin ɛp dɛn fɔ bia dɛn prɔblɛm dɛn  de. Lɛ wi tɔk bɔt sɔm pan dɛn ɛgzampul dɛn de.

4. Us prɔblɛm dɛn bin mit Ilayja? Aw i bin fil bɔt Jiova?

⁴ Ilayja bin de sav Jiova di tɛm we tin bin tranga, ɛn i bin de gɛt bɔku prɔblɛm dɛn. Kiŋ Eab we na bin wan pan di bad kiŋ dɛn we rul Izrɛl, bin mared wan wikɛd uman we nem Jezibɛl we bin de wɔship Beal. Dɛn ɔl tu bin de mek bɔku pipul dɛn wɔship Beal ɛn dɛn bin kil bɔku pan Jiova in prɔfɛt dɛn. Ilayja bin manej rɔnawe. Ɛn i bin abop pan Jiova bak di tɛm we bad bad angri bin de na di kɔntri. (1 Kiŋ 17:​2-4, 14-16) Apat frɔm dat, Ilayja bin abop pan Jiova di tɛm we i bin chalenj Beal in prɔfɛt dɛn ɛn di wan dɛn we bin de wɔship Beal. I bin tɛl di Izrɛlayt dɛn fɔ sav Jiova. (1 Kiŋ 18:​21-24, 36-38) Ilayja bin si bɔku tin dɛn we mek i gɛt kɔnfidɛns fɔ se Jiova bin de sɔpɔt am di tɛm dɛn we i bin gɛt tin dɛn we bin de mɔna am.

5-6. Frɔm wetin de na Fɔs Kiŋ 19:​1-4, aw Ilayja bin fil? Aw Jiova bin sho se i lɛk am?

⁵ Rid Fɔs Kiŋ 19:​1-4. Ilayja bin fred we Kwin Jezibɛl trɛtin fɔ kil am, so i rɔnawe go na Biashiba. In at bin rili pwɛl so i pre fɔ “lɛ [i] day wantɛm.” Wetin mek i bin fil da we de? “Ilayja na bin mɔtalman lɛkɛ wisɛf,” i nɔ bin pafɛkt. (Jems 5:​17) Sɔntɛm i bin taya bikɔs i bin gɛt bɔku  strɛs. I go bi se Ilayja bin dɔn de tink se ɔl di wok we i bin de wok fɔ mek pipul dɛn wɔship Jiova di rayt we na fɔ natin, ɛn sɔntɛm i bin fil bak se na in wan stil de sav Jiova. (1 Kiŋ 18:​3, 4, 13; 19:​10, 14) Sɔntɛm wi go sɔprayz fɔ no se dis fetful prɔfɛt bin fil da we de. Bɔt Jiova bin ɔndastand aw Ilayja de fil.

⁶ Jiova nɔ bin vɛks pan Ilayja we i tɔk bɔt aw i de fil. Bifo dat, i bin ɛp Ilayja fɔ gɛt trɛnk bak. (1 Kiŋ 19:​5-7) Leta, Jiova bin tek tɛm kɔrɛkt di we aw Ilayja de tink bay we i bin sho am In pawa. Jiova bin tɛl am se i stil gɛt 7,000 pipul dɛn na Izrɛl we nɔ gri fɔ wɔship Beal. (1 Kiŋ 19:​11-18) We Jiova bin yuz dɛn ɛgzampul dɛn ya i bin sho Ilayja se i lɛk am.

7. We Jiova bin ɛp Ilayja, aw dat de ɛnkɔrej wi?

⁷ Yu gɛt prɔblɛm we de mɔna yu? We wi no se Jiova bin ɔndastand aw Ilayja bin de fil dat de rili ɛnkɔrej wi! I de mek wi biliv tranga wan se Jiova ɔndastand di we aw wi de fil we prɔblɛm mit wi. Jiova no wetin wi ebul fɔ du ɛn wetin wi nɔ ebul fɔ du, ɛn i ivin no wetin wi de tink bɔt ɛn aw wi de fil. (Sam 103:​14; 139:​3, 4) If wi falamakata Ilayja fɔ abop pan Jiova, i go ɛp wi fɔ bia wit di prɔblɛm dɛn we de mek wi strɛs.—Sam 55:​22.

8. Aw Jiova go ɛp yu we yu gɛt strɛs?

⁸ Strɛs kin mek wi tink se wi prɔblɛm nɔ go ɛva dɔn ɛn dat kin mek wi at pwɛl. We dat apin, mɛmba se Jiova go ɛp yu fɔ bia wit di tin we de mɔna yu. Aw i go ɛp yu? Jiova want mek yu tɛl am bɔt yu prɔblɛm dɛn ɛn aw yu de fil. Ɛn i go ansa we yu pre to am fɔ ɛp yu. (Sam 5:​3; 1 Pit. 5:​7) So pre to Jiova ɔltɛm bɔt yu prɔblɛm dɛn. Na tru se i nɔ go tɔk dayrɛkt wan to yu lɛk aw i bin de tɔk to Ilayja, bɔt i go yuz in Wɔd, di Baybul, ɛn in ɔganayzeshɔn fɔ tɔk to yu. Di stori dɛn we yu de rid na di Baybul de mek yu gɛt kɔrej ɛn op. Dɔn bak, yu brɔda ɛn sista dɛn go ɛnkɔrej yu.—Rom 15:​4; Ibru 10:​24, 25.

9. Aw yu tayt padi go ɛp yu?

⁹ Jiova bin tɛl Ilayja fɔ gi sɔm wok dɛn to Ilaysha. We Jiova bin du dat, i bin gi Ilayja gud padi we go ɛp am fɔ bia di tin we bin de mek in at pwɛl. Semweso, we wi tɔk to wi tayt padi bɔt aw wi de fil, i go ɛp wi fɔ bia wit di we aw wi de fil. (2 Kiŋ 2:​2; Prɔv. 17:​17) If yu fil se yu nɔ gɛt pɔsin we yu go tɛl yu bɛlɛwɔd, pre to Jiova mek i ɛp yu fɔ fɛn wan machɔ Kristian we go ɛnkɔrej yu.

10. Aw di tin dɛn we bin apin to Ilayja de gi wi op? Aw di prɔmis we de na Ayzaya 40:​28, 29 de ɛp wi?

¹⁰ Jiova bin ɛp Ilayja fɔ bia wit di tin dɛn we bin de strɛs am ɛn kɔntinyu fɔ sav am fetful wan fɔ lɔng tɛm. Di tin dɛn we bin apin to Ilayja de gi wi op. Sɔntɛnde, wi kin gɛt tumɔs strɛs we kin ambɔg wi wɛlbɔdi ɛn di we aw wi de fil. Bɔt if wi abop pan Jiova, i go gi wi di pawa we wi nid fɔ kɔntinyu fɔ sav am.—Rid Ayzaya 40:​28, 29.

11-13. Aw strɛs bin ambɔg tri pan Gɔd in savant dɛn we bin de trade?

¹¹ Ɔda pipul dɛn de bak we di Baybul tɔk bɔt we bin gɛt tin dɛn we bin de rili mɔna dɛn. Fɔ ɛgzampul, Ana in at bin rili pwɛl bikɔs i bin de shem we i nɔ gɛt pikin, ɛn in met bin de provok am bad  bad wan. (1 Sam. 1:​2, 6) Di strɛs bin mek Ana in at rili pwɛl, i bin de kray, ɛn i nɔ bin de fil fɔ it.—1 Sam. 1:​7, 10.

¹² Sɔntɛnde, Kiŋ Devid bin de gɛt tin we bin de rili strɛs am. Tink bɔt di prɔblɛm dɛn we bin mit am. I bin de fil bad fɔ di bɔku mistek dɛn we i bin dɔn mek. (Sam 40:​12) In bɔypikin we i bin lɛk we nem Absalɔm bin chalenj am, ɛn dat bin mek Absalɔm day. (2 Sam. 15:​13, 14; 18:​33) Wan pan Devid in tayt padi dɛn bin tɔn in bak pan am. (2 Sam. 16:​23–17:​2; Sam 55:​12-14) Bɔku pan di sam dɛn we Devid bin rayt, i bin tɔk bɔt aw in at bin rili pwɛl ɛn aw i bin abop pan Jiova wit ɔl in at.—Sam 38:​5-10; 94:​17-19.

¹³ Leta, wan pan di man dɛn we rayt di Sam buk bin bigin fɔ jɛlɔs di we aw di wikɛd pipul dɛn bin de liv. I go bi se na wan Livayt we nem Esaf ɛn we bin de wok na “PAPA GƆD in os” in famili layn i kɔmɔt. Dis man we bin rayt sɔm pat pan di Sam buk bin gɛt tin we de mɔna am we mek in at pwɛl, ɛn i nɔ bin satisfay wit wetin i bin gɛt. I bin ivin bigin tink se di blɛsin dɛn we Gɔd de gi am nɔ du fɔ am.—Sam 73:​2-5, 7, 12-14, 16, 17, 21.

14-15. Wetin wi lan frɔm di tri ɛgzampul dɛn na di Baybul bɔt aw wi fɔ tɔn to Jiova fɔ ɛp?

¹⁴ Di tri pipul dɛn we wi jɔs dɔn tɔk bɔt bin abop pan Jiova fɔ ɛp dɛn. Dɛn bin pre to am bɔt di tin dɛn we de mɔna dɛn. Dɛn nɔ bin fred fɔ tɛl am bɔt di tin dɛn we bin de mɔna dɛn. Ɛn dɛn bin kɔntinyu fɔ go na di say we dɛn bin de wɔship Jiova.—1 Sam. 1:​9, 10; Sam 55:​22; 73:​17; 122:​1.

 ¹⁵ Jiova bin lisin to dɛn ɔl wan bay wan ɛn sho se i bisin bɔt dɛn. Ana bin gɛt kolat. (1 Sam. 1:​18) Devid bin rayt se: “Pɔsin we de fala PAPA GƆD kin gɛt bɔku waala, bɔt na so PAPA GƆD [“Jiova,” NW] de pul in ed pan dɛn ɔl.” (Sam 34:​19) Wan pan di man dɛn we rayt di Sam buk bin rayt se Jiova nɔ de “fɔgɛt” am, i de gayd am wit gud advays. I bin siŋ se: “Bɔt fɔ mi yon say, i fayn fɔ de nia PAPA GƆD. A dɔn de nia PAPA GƆD [“Jiova,” NW] we na mi PAPA GƆD, fɔ de kɔba mi.” (Sam 73:​23, 24, 28) Wetin wi lan frɔm dɛn ɛgzampul dɛn ya? Sɔm tɛm dɛn de, wi kin gɛt siriɔs prɔblɛm dɛn we kin strɛs wi. Bɔt wi go ebul fɔ bia if wi tink gud gud wan bɔt aw Jiova dɔn ɛp ɔda pipul dɛn, abop pan am bay we wi de pre to am, ɛn obe am bay we wi de du wetin i tɛl wi fɔ du.—Sam 143:​1, 4-8.

16-17. (a) Wetin mek wi nɔ fɔ kɔmɔt nia Jiova ɛn wi brɔda dɛn? (b) Wetin go ɛp wi fɔ gɛt trɛnk bak?

¹⁶ Dɛn tri ɛgzampul dɛn ya tich wi ɔda impɔtant lɛsin fɔ se wi nɔ fɔ kɔmɔt nia Jiova ɛn in pipul dɛn. (Prɔv. 18:​1) Nansi  we bin rili strɛs we in man bin lɛf am, bin tɔk se: “Bɔku tɛm dɛn bin de we a nɔ bin want fɔ si ɔ tɔk to ɛnibɔdi. Bɔt di mɔ a bin de kɔmɔt nia pipul dɛn, na di mɔ mi at bin de pwɛl.” Tin bin chenj we Nansi bin luk fɔ we dɛn fɔ ɛp ɔda pipul dɛn we gɛt prɔblɛm. I se: “A bin de lisin we ɔda pipul dɛn de ɛksplen dɛn prɔblɛm dɛn. A notis se a bin de fil sɔri fɔ dɛn, dat bin de mek a nɔ bin de pe tumɔs atɛnshɔn pan misɛf ɛn mi prɔblɛm dɛn.”

¹⁷ We wi de atɛnd Kristian mitin dɛn, dat de ɛp wi fɔ gɛt trɛnk. We wi de na di mitin dɛn, wi de gi Jiova mɔ chans fɔ mek i “ɛp” ɛn “koks” wi. (Sam 86:​17) Na di mitin dɛn, Jiova de yuz in oli spirit, in Wɔd, ɛn in pipul dɛn fɔ gi wi trɛnk. Dɔn, di mitin dɛn de gi wi chans fɔ “ɛp” ɛn ɛnkɔrej wisɛf. (Rom 1:​11, 12) Wan sista we nem Sofia bin se: “Na Jiova ɛn mi brɔda dɛn dɔn ɛp mi fɔ bia. Di tin we impɔtant fɔ mi pas ɔl na wi Kristian mitin dɛn. A dɔn kam fɔ no se di mɔ we a de prich ɛn spɛn tɛm wit mi kɔngrigeshɔn, na di mɔ a de ebul fɔ bia wit mi strɛs ɛn wɔri.”

18. If wi at pwɛl, wetin Jiova go du fɔ wi?

¹⁸ We wi at pwɛl, lɛ wi mɛmba ɔltɛm se Jiova nɔ jɔs prɔmis wi se tumara bambay i go pul ɔl di tin dɛn we de mek wi strɛs, bɔt i de ɛp wi fɔ bia wit dɛn rayt naw. I de mek “wi want . . . ɛn . . . ebul” fɔ du sɔntin we go mek wi at nɔ pwɛl ɛn fil se wi nɔ gɛt op.—Fil. 2:​13.

19. Us kɔnfidɛns Lɛta Fɔ Rom 8:​37-39 gi wi?

¹⁹ Rid Lɛta Fɔ Rom 8:​37-39. Apɔsul Pɔl gi wi kɔnfidɛns se natin nɔ de we go mek wi nɔ ɛnjɔy di lɔv we Gɔd gɛt fɔ wi. Aw wi go ɛp wi brɔda ɛn sista dɛn we de tray fɔ bia wit tin dɛn we de mɔna dɛn? Di nɛks atikul go tɔk bɔt aw wi go falamakata Jiova bay we wi de sho sɔri-at ɛn sɔpɔt wi brɔda ɛn sista dɛn we gɛt strɛs.