1. Dahaka dainai Iesu ena sisiba baita badinaia na namo?

IESU ese dina gabedia e perovetalaia neganai, eto: “Nahuamui ba toho, . . . tanobada ena lalo-haguhi ḡaudia ese lalomui bae hametaudia na garina.” (Luka 21:34) Namona na una sisiba baita badinaia. Dahaka dainai? Hari ina negai, ita ese ta davarimu hekwakwanaidia na ma haida ese danu e davarimu.

2. Eda tadikaka bona taihu haida ese e davarimu hekwakwanaidia be dahaka?

² Nega haida hekwakwanai haida na murina murina e varamu. Mani ini haheitalai haida aita lalo. Witnes tauna ta ladana John, * ena gorere na multiple sclerosis * bona edia headava laḡanidia 19 murinai adavana ese e rakatania neganai, e lalometau bada herea. Bena natuna kekenidia rarua ese Iehova e rakatania. Headava taudia, Bob bona Linda edia hekwakwanai be ma idau. Raruosi edia moni ḡaukara amo e hadokodia bona edia ruma e rakatania. Dia una mo, Linda na dokta ese e hamaoroa kudouna na mai gorerena bona baine mase diba, bona gorere ma ta ese ena immune system na e hadikaia.

3. Filipi 4:6, 7 ese dahaka e hadibadamu?

³ Namona na baita diba momokani ta lalometaumu neganai, Ihavarada Tauna bona Tamada lalokauna, Iehova, ese eda hemami na e lalopararalaiamu. Bona e uramu baine duruda eda hekwakwanai baita hanaidia. (Filipi 4:6, 7 ba duahi.) Dirava ena hesiai taudia ese e davari hekwakwanaidia na Baibul ese e herevalai. Bona e hadibadamu  Iehova ese idia be ede e durudia toma bae haheauka totona. Mani unu sivarai haida aita herevalai.

4. Elia be dahaka hekwakwanai e davari, bona ena hemami be ede bamona Iehova enai?

⁴ Elia na nega aukadia lalodiai Iehova e hesiai heniava bona hekwakwanai badadia haida e davari. Israel edia king dikana ta, Ahaba, ese Baal e tomadiho heniava hahinena ta, Iesebel, e adavaia. Idia ese Baal itomadiho henina karana e goadalaiava bona Iehova ena peroveta taudia momo e aladia. To Elia na e heau. Bona doe negana ai ia na Iehova enai e tabekau dainai e mauri. (1 Ha. 17:2-4, 14-16) Danu, Elia ese Baal ena peroveta taudia bona Baal e tomadiho heniava taudia e hereva henidia neganai, ia na Iehova enai e tabekau. Elia ese Israel taudia e haḡanidia Iehova bae hesiai henia. (1 Ha. 18:21-24, 36-38) Unu nega aukadia lalodiai Elia na e diba momokani Iehova na ia e duruava.

5-6. 1 Hanua Pavapavadia 19:1-4 ai Elia ena hemami be ede bamona, bona Iehova be edena dalai e hahedinaraia ia na Elia e lalokau henia?

⁵ 1 Hanua Pavapavadia 19:1-4 ba duahi. Elia na e gari badina Kwin Iesebel na e urava ia baine alaia. Una dainai Bere-sieba e heau lao. E lalometau bada herea dainai, “e noinoi baine mase.” Dahaka dainai e ura baine mase? Elia na dia ḡoevadae, bona ia na “taunimanima mo, ita bamoda.” (Iak. 5:17) Reana  e lalometau dainai ena goada na e ore. Elia na reana e laloava, tomadiho ḡoevana iduruna totona e karaiava ḡaukarana na asi anina, badina Israel taudia na se kamonaiva, bona ia mo sibona Iehova e hesiai heniava. (1 Ha. 18:3, 4, 13; 19:10, 14) Reana una abidadama peroveta tauna ena kara dainai baita daradaramu. To, Iehova ese ena hemami na e lalopararalaia.

⁶ Elia ese ena hemami e gwauraia hedinarai neganai Iehova ese se gwau henia. To e durua baine goada lou totona. (1 Ha. 19:5-7) Gabeai, Iehova ese ena siahu amo Elia e durua ena lalohadai baine hamaoromaoroa. Bena Iehova ese e hamaoroa Israel ai taunimanima 7,000 na Baal asie toma henia dihomu. (1 Ha. 19:11-18) Iehova ese dala idauidau ai e hahedinaraia ia na Elia e lalokau henia.

7. Iehova ese Elia e durua dalana ese ita be ede e hagoadada tomamu?

⁷ Oi be hekwakwanai ta o haheaukalaiamu? Iehova ese Elia ena hemami e lalopararalaia karana ese ita na e hagoadadamu, badina ta dibamu ia ese eda lalometau danu e lalopararalaimu. Danu eda goada hetoana, eda lalohadai bona hemami na mai dibana. (Sal. 103:14; 139:3, 4) Bema Elia heḡereḡerena Iehova enai baita tabekaumu, ia ese be durudamu eda lalometau baita haheaukalaimu.​—Sal. 55:22.

8. Edena dalai Iehova ese baine durumu emu lalometau ba haheaukalaia?

⁸ O lalometaumu dainai, bo laloamu emu hekwakwanai na asi ihanamona bona bo lalomanokamu. Bema una baine vara, ba helalotao, Iehova ese baine durumu diba ba haheauka totona. Edena dala ai baine durumu? Ia na e uramu emu lalohekwarahi na enai ba gwaurai. Bona ia ese emu noinoi baine haerelaia. (Sal. 5:3; 1 Pet. 5:7) Una dainai, Iehova enai emu hekwakwanai ba herevalai. Ia ese oi na dia Elia e hereva henia heḡereḡerena be hereva henimumu, to iena Hereva, Baibul, bona iena orea amo be hereva henimumu. Baibul ai o duahimu sivaraidia ese tauhalo bona helaro bae henimu diba. Danu, tadikaka bona taihu ese bae hagoadamu diba.​—Roma 15:4; Heb. 10:24, 25.

9. Tura namona ta ese ita be ede baine duruda toma?

⁹ Iehova ese Elia e hamaoroa iena ḡaukara haida na Elisaia baine henia neganai, Ia ese Elia na tura namona ta e henia, unu amo ia baine durua ena lalometau baine haheaukalai. Una heḡereḡerena, turada namona ta enai eda lalometau baita herevalaimu neganai, ia ese be durudamu baita haheauka totona. (2 Ha. 2:2; Her. 17:17) Bema o mamiamu ba hereva henia tauna ta na lasi, Iehova ba noia baine durumu unu amo oi baine hagoadamu diba lo Kristen tauna ta ba davaria totona.

10. Elia ena sivarai ese dahaka e hadibadamu, bona edena dalai Isaia 40:28, 29 ai e gwauraia gwauhamatana ese e durudamu?

¹⁰ Iehova ese Elia e durua ena lalometau e haheaukalaia bona laḡani momo lalodiai ia e hesiai henia. Elia ena sivarai ese e hadibadamu ita danu baita haheauka diba. Nega haida ḡau momo ta lalometaulaimu dainai, eda goada na e oremu bona ta lalomanokamu. To, bema Iehova enai baita tabekaumu, ia ese goada be henidamu baita hesiai henia noho totona.​—Isaia 40:28, 29 ba duahi.

11-13. Dirava ena hesiai taudia tatoi e lalometau neganai dahaka e vara?

¹¹ Baibul ese e herevalaidia taudia ma haida danu e lalometau. Heḡereḡere, Hana na e lalometau bada herea badina ia na gabani bona hahine iharuana ese e kirikirilaiava. (1 Sam. 1:2, 6) Una dainai, nega momo e taiva bona se anianiva.​—1 Sam. 1:7, 10.

¹² Nega haida, King David lalona na e metau hereava. Mani e davari hekwakwanaidia aita lalo. Ena kerere gunadia momo e lalova dainai e lalohisihisiva. (Sal. 40:12) Natuna lalokauna Absalom ese e gwau-edeede henia, bona Absalom na gabeai e hamasea. (2 Sam. 15:13, 14; 18:33) Danu, David na turana namona ta ese taona e tore. (2 Sam. 16:23–17:2; Sal. 55:12-14) David ese e tore salamo herevadia momo ai, iena lalometau herevadia bona Iehova e abidadama henia karana e herevalaia.​—Sal. 38:5-10; 94:17-19.

¹³ Salamo e torea tauna ta na kara dika taudia edia mauri dalana dainai e mama. Reana ia na Levi tauna Asaf ena bese amo, bona “Dirava ena gabu helaḡana” ai e ḡaukarava. Ia na e lalometau bada dainai se moaleva. Danu e laloava Dirava ihesiai henina ai e abiva hahenamodia na dia heḡereḡere.​—Sal. 73:2-5, 7, 12-14, 16, 17, 21.

14-15. Baibul ese e herevalaidia taudia tatoi na Iehova ena heduru ai e tabekau, unu amo dahaka ta dibamu?

¹⁴ Iehova ena hesiai taudia tatoi, tame herevalaidia taudia, na Iehova ena heduru ai e tabekau. Edia lalohekwarahi iboudiai na Iehova e hamaorolaia. Edia lalohekwarahi badidia danu e gwaurai  hedinarai. Bona hanaihanai Iehova itomadiho henina gabuna e laova.​—1 Sam. 1:9, 10; Sal. 55:22; 73:17; 122:1.

¹⁵ Iehova na mai hebogahisina ida edia ḡuriḡuri e haerelai. Ia ese Hana na lalomaino e henia. (1 Sam. 1:18) David na eto: “Kara maoromaoro tauna ena hisihisi na momo, a Iehova ese iboudiai lalodia amo e hamauriamu.” (Sal. 34:19) Bona salamo e torea tauna na e mamia Iehova ese ‘imana idibana e dogoa tao,’ bona sisiba namodia amo e hakaua. Ena ane ai ini e gwau toma: “Dirava badibadinai na nohomu be namo; Ḡaubada Iehova na egu roho-mauri gabuna ai vada na halaoa.” (Sal. 73:23, 24, 28) Edia sivarai amo dahaka ta dibamu? Nega haida, baita davarimu hekwakwanai badadia ese laloda be hametaumu. To bema Iehova ese haida e durudia daladia baita lalo dobumu, ḡuriḡuri amo enai baita tabekaumu, bona ena ura baita badinaiamu, baita haheauka dibamu.​—Sal. 143:1, 4-8.

16-17. (a) Dahaka dainai Dirava bona ena hesiai taudia amo basita daudau? (b) Edena dala ai goada baita abi lou diba?

¹⁶ Baibul ese e herevalaidia taudia tatoi amo mai anina bada ḡauna ma ta e hadibadamu ​—siboda basita noho to Iehova bona ena taunimanima baita bamodia. (Her. 18:1) Nancy na adavana ese e rakatania neganai, e lalometau bada herea, bona ini e gwau toma: “Nega momo lau na asina urava ta baina itaia eiava baina hereva henia. To, sibogu na nohova neganai egu lalohisihisi na e badava.” Nancy na dala e tahu mai edia hekwakwanai taudia haida e durudia neganai, e moale. E gwaumu: “Edia hekwakwanai e herevalaiva neganai na hakalava. Edia metau na lalopararalaiva bona na durudiava neganai egu hisihisi na na lalodia boiova.”

¹⁷ Kongrigeisin heboudia ilao henidia karana amo goada baita abi lou diba. Hebou ai, ita na ta uramu Iehova ese baine duruda bona tauhalo baine henida. (Sal. 86:17) Unuseniai Ia ese ena lauma helaḡa, ena Hereva, bona ena taunimanima amo e hagoadadamu. Iseda hebou ai ta ta “baita hahealo heheni” diba. (Roma 1:11, 12) Taihu ta ladana Sophia na e gwaumu: “Iehova bona tadikaka oreana ese lau na e durugu baina haheauka. Lau e durugu bada ḡauna na kongrigeisin heboudia. Danu, na laloparara haroro bona hebou ai na bisimu neganai, egu lalometau na baina haheaukalai diba.”

18. Ta lalomanokamu neganai Iehova ese dahaka baine henida diba?

¹⁸ Ta lalomanokamu neganai, baita helalotao, Iehova na e gwauhamata e hametaudamu ḡaudia na nega vaira ai baine kokidia vaitani, to dia una mo, hari danu e uramu baine duruda baita haheauka. Ia ese “ura namodia bona goada” e henidamu eda lalomanoka bona lalohisihisi baita haheaukalai totona.​—Fili. 2:13, NWT.

19. Roma 8:37-39 ese dahaka e herevalaia?

¹⁹ Roma 8:37-39 ba duahi. Aposetolo Paulo ese e hadibadamu, ḡau ta o tau ta ese ita na Dirava ena lalokau amo basine bibida oho diba. E lalometaumu tadikakadia bona taihudia be ede baita durudia toma? Stadi gabena ai, baita itaiamu edena dala ai Iehova heḡereḡerena, baita hebogahisi bona eda tadikaka taihu e lalometaumu neganai baita durudia.