1. Tae-i ǃaroma da Jesub di ǃkhâikhomsa ǃoa nî ǃgâ?

ǁÎB KĒBOS ǀuni tsēdi xa hâs ǃnâb ge Jesuba ge mî: ‘ǂAnbasen, î du sadu ǂgaoga tā ǃgomǃgomhe,.  . . tsēkorobe ûib ǂhansendi ǀkha.’ (Luk. 21:34) Nē ǃkhâikhomsa ǃoa da ge nî ǃgâ. Tae-i ǃaroma? Nētsē da ge hoa khoen da ǃkharu ǃnâ ǃgomsina nî hōǃâ.

2. Mâ ǃgomsin hîna ǂâiǂhansendi xa ra ǃaroma henan sada ǃgâsana ra hōǃâ?

² ǀNî ǁaen ai da ge ǂgui ǃkharagagu tsûaǂgao kai da ra ǃgomsina ǀgui ǁaeb ai ra hōǃâ. Sao ra aiǁgaude ǃoa kō re. Johaneb, * di ǀon hâ ǃgâsab ge ǁkhōǁkhōsa ǀaeba ge ūhâ i tsî ǁîb kaikhoes xas tsîna ge xū-e 19 kurigu ǃgame ûib khaoǃgâ. Tsî ra ge ǁîb ǀgam ǀgôara Jehovaba ge ǃoaba ǀû. Bob tsî Linda di ǀon hâ khoe-aogu ra ge ǀnî ǃnôa ǃgomsina gere hōǃâ. ǁÎra ge hoara ǁîra sîsengu tsî oms tsîna ge ǂoaǃnâ. Nē ǃgomsina ra nî hōǃâs aiǃâs ge Lindasa ǂgaoǁōb hîna a ǃgamsi ǁkhāb tsî ǀnî hâ ǁōb hîna ǁîs sorosa ra ǁāǂami tsînas ūhâ di ǀaeǃkhoa-aob xa ge mîbahe.

3. Filipeǁîn 4:6, 7 ǃoagu da tae ǃnoa ǂgomǃgâsiba a ūhâ ǁkhā?

³ ǂGomǃgâ ǁkhā da ge a sada di kuru-aob tsî ǀnamxaǃnâ ǁGûb Jehovab sada ǃgomsina ra ǁnâuǃāsa. Tsîb ge nē ǃgomsin hîna da ra hōǃân ǀkha ra huida ǂgao. (Khomai re Filipeǁîn 4:6, 7.) Elobmîs ge ǂgui aiǁgaude ūhâ hîna ra ǁgaude matin ge Elob khoena tsûaǂgaoba ra ǃaroma ǃgomsina a ǃkharuǃnâ ǀgaub dide. ǁGuiǃās tsîna i ge ra dī matib  ge Jehovaba nē khoena nē ǃgomsin ǀkha a hui ǀgauba. Hā re i da ǀnî aiǁgaude ǃoa kō.

4. Mâ ǃgomsinab Eliaba gere hōǃâ tsî Jehovab xab mati gere tsâ?

⁴ Eliab ge Jehovaba ǃgom ǁaegu ǃnâ gere ǃoaba tsî ǂgui ǃgomsin tsîna gere hōǃâ. Gao-aob Axab ǁnâuǀnamoǃnâ gaob Isreali ǁaeb ǃnâ ge hâ îb ge Isebelsa ǃgame tsî ǁgai ǃoabas Baali dis ǀkha gere aiǃgû. ǁÎ ǀgam ra ge ǃhūba Baali ǃoabas ǀkha ǀoaǀoa tsî ǂgui kēbo-aogu Jehovab digu tsîna ge ǃgam. Eliab ge ǁîra xu ge sâusen. Kai ǃâtsūǀkhāb tsînab ge ge ûi ǃkharu Jehovab aib gere ǂgomaiǂnûi amaga. (1Gao. 17:2-4, 14-16) Eliab ge Jehovab ai gere ǂgomaiǂnûi Baal ǃoaba aogu ǀkhab gere ǃhoas tsîna. ǁÎb ge Israelǁîna gere hōhōǃnâ în Jehovaba ǃoaba. (1Gao. 18:21-24, 36-38) Eliab ge ǂgui ǁgauǁgaude ūhâ matib ge Jehovaba ǁîb ǃgomǁaegu ǃnâ gere huibi ǀgaub dide.

5-6. 1 Gao-aogu 19:1-4 ǃoagub Eliaba mati gere tsâ tsî Jehovaba mati ǀnambib a ǃkhaisa ge ǁgaubi?

⁵ Khomai re 1 Gao-aogu 19:1-4. Eliab ge ega Gao-aos Isebelsa gere ǃao ǃgambis nî dis ge mî o. Ob ge ǁîba Bersebasa ǃoa ge ǃkhoe. ǁÎb ge ǁnātikōse ǂkhabuǂâi tsî ge mî “ti ǀomsa ū” re ti. Tae-e di gere tsâ kaibi? Eliab ge ǀoasa kurusa ge ūhâ tama hâ i tsî “sada khami ī khoe ge i” tsâsigu ǀkha. (Jak. 5:17) ǁÎb ge ǀnîsi kaise ge tsûaǂgao  tsî tsau hâ i. ǀNîsib ge Eliaba gere ǂâi ǁîb ǁgūtsâdi ama ǃoabasa ǃkhambas didi go ǁauxū-i di tsî i xū-e Israeli ǃnâ ǀkhara tama hâ di tsîb ǁîb ǀguiba Eloba ra ǃoabase ǃgau hâ di. (1Gao. 18:3, 4, 13; 19:10, 14) Nē ǂgomǂgomsa ǃoaba-aob di tanisen ǀgaub ge ǀnîsi ra buru kai da. Xaweb ge Jehovaba Eliab tsâsiga gere ǁnâuǃā.

⁶ Jehovab ge Eliaba ge mî ǁgaiǁgai tama hâ i nē tanisen ǀgaub ǃaroma. Xaweb ge Eliaba ge hui îb ǁîb ǀgaiba hō-oa. (1Gao. 19:5-7) Jehovab ge Eliab ǂâiǀgauba ega ge dawa ǁîb ǀgaiba ǁgaubis ǃnâ-ū. Tsîb ge ǁnāpaxū Jehovaba Eliaba ge mîba noxoba gu 7000 khoega Israeli ǃnâ hâsa hîna Baala ǃoaba tama hâ ga. (1Gao. 19:11-18) Nē aiǁgaude mābis ǃnâ-ūb ge Jehovaba Eliaba ǀnambib a ǃkhaisa ge ǁgau.

7. Mâ ǂkhâǃnâsa da Jehovab Eliaba gere hui ǀgauba xu ra hō?

⁷ Tsûaǂgao kai du ra ǃgomsina du ra hōǃâ? Kaise da ge ra gangan mûsa Jehovab Eliab di tsâsiga gere ǁnâuǃāsa. Nēs ge ǂgomǃgâsiba ra mā da ǁîb sada tsâsigu tsî ǃgomsin tsîna ra ǁnâuǃāsa. ǁÎb ge sada di ǃnubusigu, tsâsigu tsî hōǃâ da ra xūn tsîna a ǂan. (Psa. 103:14; 139:3, 4) Eliab di aiǁgausa ǁgae tsî da ga Jehovab ai ǂgomaiǂnûi o, ob ge sada ǃgomsin hîna tsûaǂgaoba ra hauba da na tanis ǀkha nî huida.—Psa. 55:22.

8. Jehovaba mati sada ǃgomsin ǃnâ nî huida?

⁸ Tsûaǂgaob ge a ǂâi kai da ǁkhā sada mâsigu ǀkhara tidesa tsî a ǂkhabuǂâi kai da ǁkhā. Nēs ga sada ǀkha ī o, o da ge nî ǂan Jehovab nî huida ǃkhaisa. Matib nî huida? ǁÎb ge ra ǁkhau da î da sada ǃgomsina ǁîb ǀkha ǀgoragu. Tsî ǁîb ge sada ǂgansa nî ǁnâu-am. (Psa. 5:3; 1Pet. 5:7) Nēs ǃaroma Jehovaba ǃoa ǀgore re sadu ǃgomsin xa. Eliab ǀkhab gere ǃhoa khamib ge sada ǀkha ǃhoa tide xawe ǁîb mîs tsî ǀapeǂhumîs ǃnâ-ū. Elobmîs ǃnâ da ra khomai xūn ge ǂkhâǃnâ tsî aisǀkhāb ǀkha nî kō kai da. Sada ǃgâsan tsîn ge a ǂkhâǃnâ da ǁkhā.—Rom. 15:4; Heb. 10:24, 25.

9. ǂGomǃgâ da ra ǀhōsa-e mati a huida ǁkhā?

⁹ Jehovab ge Eliaba ge mîba îb Elisaba ǀnî sîsengu ǁîb di ga mā. Nēs ǃnâ-ūb ge Jehovaba ǃgâi ǀhōsaba Eliaba ge mā hîna ǂkhabuǂâib ga o, o a huibi ǁkhāba. ǁKhā ǀgaub ai da ga sada ǀhōsana sada ǃgomsin xa mîba o, on ge nî huida sada ǃgomsina tanis ǀkha. (2Gao. 2:2; ǂKhm. 17:17) Sada ǃgomsina da nî ǀgoragu ū ǃgâsa-e da ga ūhâ tama io, o da ge Jehovaba ǃoa a ǀgore ǁkhā îb ǀgaisa Xristeǁî i hîna da sada ǃgomsina a mîba ǁkhā-e māda.

10. Eliab aiǁgausa mati ǃâubasensa ra māda tsî Jesajab 40:28, 29 tawa a xoasa mîmâisa mati nî huida?

¹⁰ Jehovab ge Eliaba ge hui ǁîb ǃgomsiga tanis ǀkha tsîb ge noxoba ǂgui kurina ǂgomǂgomsase ge ǃoababi. Eliab di aiǁgaus ge ǃâubasensa ra māda. Sida tsîn ge ǀnîsi ǂgui tsûaǂgaoga ra hōǃâ hîna sorosises tsî emosioneelses tsîna ra tsâǀkhā da ga. Xawe da ga Jehovab ai ǂgomaiǂnûi o, ob ge ǁîba ǃoabas ǀgaiba nî māda.—Khomai re Jesajab 40:28, 29.

11-13. Tsûaǂgaoba mati ǃnona ǃkharu ge ǁaeb khoen Eloba gere ǃoabana ge tsâǀkhā?

¹¹ ǀNî hâ Elobmîs ǁaeb khoen tsîn ge gere tsûaǂgao. Aiǁgause, Hannas ge kaise  gere tsûaǂgao ǀgôa-es ge hō ǁoa i amaga tsî ǁîs kaikhoeb ǀnî hâ taras xas tsîna ǃgâi tama ǀgaub ǃnâ gere hâ-ūhe. (1Sam. 1:2, 6) Hannas tsûaǂgaob ge ǁîsa kaise ǁgaise gere tsâ kai.—1Sam. 1:7, 10.

¹² ǀNî ǁaegu aib ge Gao-aob Daviba kaise gere tsûaǂgao. ǁÎb gere hōǃâ ǃgomsigu xa ǂâi re. ǁÎb ge ǂgui tsūgu hînab gere ǃaromagu ǃgao gere tsûaǂgao. (Psa. 40:12) ǁÎb ǀnamǀnamsa ǀgôab Absalommi ge ǁîb ǃoagu ge ǁore, ǁîb ǁōba î ge ǃaromas kōse. (2Sam. 15:13, 14; 18:33) Tsî Davib ǀgū ǀhōsan ge ǁîba ge ǀapexū. (2Sam. 16:23–17:2; Psa. 55:12-14) ǂGui psalmdi Davib ge xoadi ge ǁîb tsâsigu tsî ǁîb ǂgomǃgâsib Jehovab ǃnâb ūhâb tsîna ra ǁguiǃā.—Psa. 38:5-10; 94:17-19.

¹³ Egab ge psalmdi xoa-aoba ǂkhabaxa khoen di ûiǀgauga ra suri. ǁÎb ge ǀnîsi Leviǁî Asafi omarisa xu gere hā tsîb ge ǀnîse “tempeli” tawa Eloba gere ǃoabana. Psalmdi xoa-aob ge kaise gere tsûaǂgao tsî nēs ge gere ǂkhîoǃnâ tsî ǂkhabuǂâi kaibi. ǁîb ge Elob ǀkhaegu tsîna ge dîǃnâ tsoatsoa.—Psa. 73:2-5, 7, 12-14, 16, 17, 21.

14-15. Tae-e da ǃnona Elobmîs aiǁgaude xu ra ǁkhāǁkhāsen, Jehovab ai huib ǃgao kōsa?

¹⁴ ǃNona ǃoaba-aon Jehovab din ge Jehovab ai hoaǁae gere ǂgomaiǂnûi. Jehovaba ǃoan ge ǁîn tsûaǂgaob ǃgao gere ǀgore. ǁÎn ge ǁîb ǀkha tae-i ǃaroman ra tsûaǂgaosa gere ǀgoragu. ǁÎn ge Jehovab ǃoaba ǃkhaisa ǃoa gere ī ǀgara.—1Sam. 1:9, 10; Psa. 55:22; 73:17; 122:1.

¹⁵ Jehovab ge ǀkhomxaǂgaosib ǀkha hoana ge hui. Hannas ge sâsiba ge hō. (1Sam. 1:18) Davib ge ge xoa:  “ǂHanu-ai-i ge ǂgui tsūǃōna ra ǃoa, xawe ǃKhūb ge ǁî-e ǁîn hoana xu ra huiǂui.” (Psa. 34:19) Tsî psalmdi xoa-aob ge ega ge mî Jehovab ge “amǀkhāb ǃommi” ǀkha ǃkhōbi tsî ǀnamxaǃnâ ǀgaub ǃnâ gere daoǁgaubi. ǁÎb ge ge xoa: ‘Xawe tita xa, ǃgâiba te a Elob tawa ǀgūse hâsa. Tita ge ǃKhūb, Jehovab ai ra ǂgomaiǂnûi.’ (Psa. 73:23, 24, 28) Tae-e da nē aiǁgaude xu ra ǁkhāǁkhāsen? ǀNî ǁaegu ai da ge ǃgomsina ra hōǃâ hîna ra tsûaǂgao kai dana. Xawe da ge nî hui-e Jehovab ge huida ǀgausa ǂâiǃgâ, ǁîb ai ǀgores ǃnâ-ū ǂgomaiǂnûi tsî da ga ǁîba ǁnâuǀnam o ǁîb ra mî xūna dīs ǃnâ-ū.—Psa. 143:1, 4-8.

16-17. (a) Tae-i ǃaroma da Jehovab tsî ǁîb khoen tsîna xu ūbēsen tide? (b) Mati da ǂkhâǃnâ-e hâse ǁkhawa a tsâ ǁkhā?

¹⁶ ǁNā ǃnona aiǁgaudi ge ǂhâǂhâsa xū-e ra ǁkhāǁkhāda—Jehovab tsî ǁîb ǃoaba-aon tsîna xu da ge tā nî ūbēsen. (ǂKhm. 18:1) Nancy di ǀon hâ ǃgâsas hînab ge ǁîs kaikhoeba ǁîsa a ǁnāxūs ge ra mî: “ǀNî tsēdi ge ge hâ i khoen ǀkha ta ge ǃhoa tamas ka io ǁîna mû ǂgao tama hâ i de. Khoena xu ta gere ūbēsens kōse ta ge ǁgaise gere tsâ.” Xūn ge ge ǀkhara Nancis ge ǀgauga a ôa tsoatsoa o, ǃgomsina  ra hōǃâ ǃgâsana huisa. ǁÎs ge ra mî: “Nau ǃgâsan ǁîn ǃgomsin xa ra ǃhoa hîna ta ge gere ǃgâ. ǁÎn ǃgomsin ai ta ge ti ǂâisa gere ǂnûi o, o ta ge ti ǃgomsin xa ge ǂâi tama hâ i.”

¹⁷ ǀHaode ǁhaoǃnâs ǃnâ-ū da ge ǀgaiba ra hō. ǀHaodi tawa da ga hâ o, o da ge Jehovaba ǃēsa ra mā ‘mâǃgâ tsî ǁkhaeǂgaodasa.’ (Psa. 86:17) ǁNāpab ge ǁîb ǃanu gagab, ǁîb Mîs tsî ǁîb khoen ǃnâ-ū ra ǀgaiǀgaida. ǀHaodi tawa da ge ǃēsa ra hō ‘ǁkhaeǂgaogusa.’ (Rom. 1:11, 12) Sophia di ǀon hâ ǃgâsas ge ge mî: “Jehovab tsî ti ǃgâsan tsîn ge ge huite aiǃgûsa. Sida ǀhaohâb ǀhaodi ge kaise tita ǃgao ge ǂhâǂhâsa i. Mûǂan ta ge ge aoǁnâ sîsenni tsî ti ǀhaohâb ǃnâs tsîna ta ǃgarise ra sîsen khami ta ge ti tsûaǂgaob tsî ǂâiǂhansendi tsîna ǃgâise ra sîsenǂam.”

18. ǂÂiǂhansen da ga ra o, ob Jehovaba tae-e a māda ǁkhā?

¹⁸ Tsûaǂgao hâse da ga tsâ o, o da ge ǂâis ǃnâ nî ūhâ Jehovab ge hānîǁaeb ǃnâ ǀgui tsûaǂgaoba ūbē tide xawe nēsis tsîna nî huida tsûaǂgaob hîna da ra hōǃâb ǀkha. ǁÎb ge “ǂâibasens tsî ǀgaib” tsîna ra māda tsûaǂgaob tsî xū tamase tsâs tsîn di tsâsiga sîsenǂams ǃaroma.—Fil. 2:13.

19. Romeǁîn 8:37-39 sa mâ mîmâisa ra māda?

¹⁹ Khomai re Romeǁîn 8:37-39. Apostel Paulub ge ra mî xū-i ge Elob ǀnamma xu a ūbē da ǁoa di. Mati da sida ǃgâsan hîna ra tsûaǂgaona a hui ǁkhā? Sao ra ǁkhāǁkhāǃâs ge nî ǁgau mati da Jehovaba a ǁgae ǁkhā ǀgausa, ǀkhomxaǂgaosiba ǁgaus tsî sida ǃgâsan hîna ra tsûaǂgaona da mati nî ǂkhâǃnâ ǀgausa tsûaǂgaon ga ǁaeb ai.