1. Ntakhara heeni ninnaphwanela owiriyana olopola wa Yesu?

MU YOOLOHERYA awe ntakhara mahiku ookuchula, Yesu aaloca: “Phoole, mwiivareryeke wi murima anyu ohuukhuwe ni olyavo, ohapaliwa nari sooweiha sa okumi yoola, wi nihiku nenlo nihoophwanyeeni mootutusha.” (Luka 21:34) Hiyaano ninnachuna wiiwelela olopola yoola. Ntakhara heeni? Mu mahiku ahu, hiyo nnahaala ovilela ni mikhalelo soolikana soosoosiha murima seiyo muchu ti muchu onahooleleiye.

2. Makacamiho taani oosoosiha murima anna ni arokora ahu ahoolenlaaya?

² Ikwaha ikina, nnahaala ohoolela makacamiho oosoosiha murima mu elukuluku emohamoha. Muthokororye sootakiherya sinacharela. Namoona onichaniwa Yohani, * yoowo onahooseya ni ereca ya mmuupuweloni, aahitepa osooseya murima mwaariye amanle omuhiya yene emalihe iyaakha khumi nathanu nasese mu othela waya. Voocharela anamwane awe aasithiyana eeli yaahihiya omurumeela Yehova. Mutheli mmoha Bob ni mwaariye Linda awo yaahihoolela makacamiho a mikhalelo soohiyanahiyana ompwaha Yohani. Ooweeli yaahiyeleela miteko saya, nave voocharela yaahiyeleela empaaya. Mu waaceererya va makacamiho yaala, Linta aahiphwanyeya ni ereca yawoopiha ya murima yeeyo yaahaala omweeriha oyeleela ekumi, nave ereca ekina yaahipacerya onanariha mukhalelo yoowo onamwaakiha muchu ohivoloweliwa ni ireca.

3. Mwawiiwanana ni Filipi 4:6, 7, tiheeni nnaphwanelaahu ororomela?

³ Nnaphwanela ororomela wi Mpatusa ni Tiithi ahu oosivela, Yehova, onniiwexexa mukhalelo osooseya murima onanivolowelaaya. Nave owo onachuna onikhaviherya ovilela ni makacamiho yaawo nnahoolelaahu. (Mwaalakhanye Filipi 4:6, 7.)  Masu a Muluku aakhalano sootakiherya sincipale seiho sinathariha makacamiho yaawo alapeli awe avilenlaaya. Masu awotho annathariha mukhalelo Yehova aakhavihenryeiye alapeli awe ovootha mikhalelo seiho soosoosiha murima. Hankooni nthokororye sootakiherya savakhaani.

4. Makacamiho taani Eliya aahoolenleiye, nave oone hai vooloca sa Yehova?

⁴ Eliya aamurumeela Yehova mu elukuluku yookacamiha nave aahihoolela makacamiho matokotoko. Mwene Akape, mmoha a mamwene oohiroromeleya mu miyaha sa Aisarayeli, aahimuthela Yesapeli, mulapeli a Pala oonanara murima. Oopiili yaahisareiha malapelo a Pala mu Isarayeli moothemwene nave yaawiipha alipa a miririmu ancipale a Yehova. Nyenya Eliya aahiwerya okophola. Owo aahivuluwa mu etala yawoopiha moorweela wa omuroromela Yehova. (1 Mam. 17:2-4, 14-16) Mwawaaceererya, Eliya aahimuroromela Yehova elukuluku aavanyihanneiye ni alipa a miririmu ni alapeli a Pala. Owo aahaaceenyerya Aisarayeli omulapelaka Yehova. (1 Mam. 18:21-24, 36-38) Eliya aahikhalano yawooniherya etokweene yawi Yehova aanamukhaviherya variyari va elukuluku yeele yoosoosiha murima.

5-6. Mwawiiwanana ni 1 Mamwene 19:1-4, Eliya oona hai, nave ti mwawiihai Yehova aamoonihenryeiye Eliya wi aanamusivela?

⁵ Mwaalakhanye 1 Mamwene 19:1-4. Nyenya, Eliya aahikhala awoova vaavaa Mwene amwaamuthiyana Yesapeli aachuneiye omwiipha. Mwa yeeyo Eliya aahichawela mmuceche  wiichaniwa Peresepa. Owo aahikhala awuukhuwaxa ophiyerya wi “anaveka wi aakhwile.” Tiheeni yaamweerinhe ochuna okhwa? Eliya aari muchu oohiphaameya “muchu ntoko yeehu.” (Tiy. 5:17) Akhweya owo aahitepa wiiniwa murima nthowa na osooseya murima ni wuukhuwa. Enooneya wi Eliya uupuwela wi wiilipiserya wawe okhaviherya malapelo aweela hiwaarino mphurelo, wi haavovo Muisarayeli aamukhaviherya, nave wi aari Eliya meekheiye pahiru yoowo aatitelela omurumeela Yehova. (1 Mam. 18:3, 4, 13; 19:10, 14) Ninnatikhiniheya ni mukhalelo mulipa a miririmu ola oororomeleya aakhanleiye. Nyenya Yehova aahiiwexexa moonelo wa Eliya.

⁶ Yehova haamuthorinhe Eliya nthowa na okumiherya vaate moonelo awe. Ohiya yeeyo, Yehova aahimukhaviherya Eliya ophwanya ikuru wanaawiili. (1 Mam. 19:5-7) Ohoolo waya, mooreera murima Yehova aahookolola muupuwelo wa Eliya moorweela wa omooniherya owerya wawe woopwahasa. Voocharela Yehova aamuleela wi nlelo aahikhalano Aisarayeli 7.000 yaawo yaakhonce omulapela Pala. (1 Mam. 19:11-18) Mmukhalelo wawooneya, Yehova aahimooniherya Eliya wi owo aanamusivela vancipale.

7. Nihakararyo taani nnaphwanyaahu mmukhalelo Yehova aamukhavihenryeiye Eliya?

⁷ Apwanne munnahoolela mukhalelo woosoosiha murima? Ennatepa onihakararya osuwela wi Yehova aahiiwexexa moonelo wa Eliya! Ela ennanikurunusa murima osuwela wi Yehova onniiwexexatho wuukhuwa wahu. Owo onnasuwela okotakota wahu, nave onnasuwela muupuwelo ni moonelo ahu. (Sal. 103:14; 139:3, 4) Wakhala wi noomutakiherya Eliya moorweela wa omuroromela Yehova, owo onahaala onikhaviherya ovilela ni makacamiho yaawo ananeeriha okhala awuukhuwa.—Sal. 55:22.

8. Yehova oni ookhaviheryeeni hai ovilela ni osooseya wanyu murima?

⁸ Osooseya murima onanweerihaani wuupuwela moohiphwanelela, ni oweerihaani okhala ooceecheya. Wakhala wi ela yoheereya, muupuwele wi Yehova onahaala wookhaviheryaani ovootha osooseya murima. Oni ookhaviheryeeni hai? Owo onnoowopani omuleela sawuukhula sanyu. Nave owo onahaala waakhula okhuwela wanyu ntakhara nikhaviheryo. (Sal. 5:3; 1 Ped. 5:7) Mwawiihiiha mvekele wa Yehova moohihiyererya vooloca sa makacamiho anyu. Yehova hani aloce mooluluwanya ni nyuwaano hiiha ntoko enreiye ni Eliya, nyenya owo onahaala oloca ni nyuwaano moorweela wa Masu awe, Piipiliya, nave ni marehereryo awe. Miyaha seiho munaalakhanyaanyu Mpiipiliyani inamoohakararyaani ni woovahaani ewehereryo. Navetho, anna ni arokora anyu anamoolipihaani.—Aro. 15:4; Ahe. 10:24, 25.

9. Nthamwene eeparipari ani anikhaviherye hai?

⁹ Vaavaa Yehova aamulenleiye Eliya wi amvahe mirici mikina Eliseu, Owo aahimvahererya nthamwene awe oochuneyaxa, yoowo moohikhwa minikwa aamukhavihenrye ovilela ni osooseya wawe murima. Mmukhalelo woolikana, vaavaa nnamuroromelaahu nthamwene eeparipari, owo onahaala onikhaviherya ovilela ni sawuukhula sahu. (2 Mam. 2:2; Masi. 17:17) Wakhala wi munoona wi haavovo muchu munamuroromelaanyu, mvekele wa Yehova wi mumphwanye Mukristu awiichwelavo yoowo onahaala woovahaani nikhaviheryo mu sawuukhula sanyu.

10. Mmukhalelo taani yaweereya ya Eliya enanivahaaya ewehereryo, nave yoororomeliha enaphwanyeya mu Isaiya 40:28, 29 enanikhaviherya hai?

¹⁰ Yehova aahimukhaviherya Eliya ovilela ni osooseya murima nave amurumeela moororomeleya mu iyaakha sincipale. Yaweereya ya Eliya ennanivaha ewehereryo. Ikwaha  ikina nnamusooseya murima vatokovene ophiyerya okutuphuwa omwiilini ni mmuupuweloni. Nyenya, wakhala wi ninnamuroromela Yehova, owo onahaala onivaha owerya yoowo nnachunaahu wi ntitelele omurumeela yoowo.—Mwaalakhanye Yesaya 40:28, 29.

11-13. Osooseya murima waavolowenle hai alapeli araru a Muluku mu elukuluku yakhalai?

¹¹ Achu akina yaawo analociwa Mpiipiliyani yaahitepa osooseya murima. Ntoko yootakiherya, Ana aahisooseya murima vaavaa ahaaweryeiye oyara navetho vaavaa namwaaceiwaawe aamulamwiheiye nthowa na ohikhalano anamwane. (1 Sam. 1:2, 6) Osooseya murima woopwahererya wa Ana waahimweeriha okhala awuukhuwa ophiyerya wi aaninla nave haachuna olya.—1 Sam. 1:7, 10.

¹² Mu ilukuluku ikina, Mwene Tavite aahuukhuwa nthowa na osooseya murima. Nkuupuwelani vooloca sa makacamiho yaawo owo aahoolenleiye. Aahitepa okhala oothanana nthowa na soocheka sincipale owo aapankeiye. (Sal. 40:12) Mwanawe oosiveliwa Apusalamu aahimmwareela yoowo, nave ohoolo waya Apusalamu aahikhwa. (2 Sam. 15:13, 14; 18:33) Nave nthamwene mmoha awaacameleya a Tavite aahimutumiha yoowo. (2 Sam. 16:23–17:2; Sal. 55:12-14) A salumu ancipale yaawo Tavite aarempeiye annooniherya moonelo awe wa wuukhuwa navetho omuroromela wawe Yehova moomalela.—Sal. 38:5-10; 94:17-19

¹³ Ohoolo waya mulipa masalumu aahipacerya waakhalela nrima amutakhali. Owo aari a muyareriwo wa Muleevi iichaniwa Asafe, nave owo aarumeela “mu nipuro naweela na Muluku.” Mulipa masalumu ola aahihooseya ni wuukhuwa mmuupuweloni, emweerihaka okhala oohihakalala ni ooceecheya. Ophiyerya  wi aahipacerya okhwa minikwa mareeliho yaawo anarweela mu omurumeela Yehova.—Sal. 73:2-5, 7, 12-14, 16,17, 21.

14-15. Tiheeni nnahuseryaahu wa sootakiherya chaaru sa Mpiipiliyani vooloca sa omuroromela Yehova ntakhara nikhaviheryo?

¹⁴ Alapeli a Yehova oororomeleya ooraaru yaawo aromoliwe yaahimuroromela Yehova wi aakhaviherye. Awo yaahimuleela Yehova sawuukhula saya moorweela mu nivekelo nookhumela vathi va murima. Awo yaahiloca mootaphuwa ni yoowo vooloca sa mathowa yaawo yaaweeriha okhala oosooseya murima. Nave yaahititelela oya o nipuro na omulapelawo Yehova.—1 Sam. 1:9, 10; Sal. 55:22; 73:17; 122:1.

¹⁵ Mwa niphwanya Yehova aahimwaakhula mmoha ti mmoha a yaawo. Ana aahiphwanya murecele wa mmuupuweloni. (1 Sam. 1:18) Tavite oorepa: “Masooso a awookololowa murima annaaca, nto apwiya [Yehova] annamwaakiha mwa oothene yaawo.” (Sal. 34:19) Nave mulipa a masalumu ohoolo waya aahoona wi Yehova ‘aamphara ni ntata nawe noolopwana,’ amuhoolelaka yoowo ni ikano soosivela. Owo aahiipa: “Nto miyo, onnakireerela omwaacamela Muluku. Kinaweera Apwiya, Apwiya mwene aka ni voochawelavo vaka.” (Sal. 73:23, 24, 28) Tiheeni nnahuseryaahu orweela wa sootakiherya seiha? Mu ilukuluku ikina, nnahaala orukureryiwa ni makacamiho yaawo anahaala onitannyerya osooseya murima. Nyenya nnanwerya ovilela moorweela wa wuupuwelela mukhalelo  Yehova aakhavihenryeiye akina, ororomela mwa yoowo mu nivekelo, ni omwiiwelela moorweela wa weerano yeeyo owo onanivekeiye opaka.—Sal. 143:1, 4-8.

16-17. (1) Ntakhara heeni hannaphwanela wiivalaanya? (2) Nni niphwanye hai ikuru?

¹⁶ Sootakiherya seiha chaaru sinnanihusiha echu yoochuneyaxa—hannaphwanela wiivalaanya wa Yehova ni achu awe. (Masi. 18:1) Nancy yoowo aahoolenle osooseya murima otokotoko vaavaa iyawe aamuhin’yeiye ooloca: “Yaahikhalavo mahiku mancipale kahaachunaaka omoona naari oloca ni muchu vyakala. Mwa yeeyo, waaca wa elukuluku kiivalaanyaaka wa akina, kaanakhala a wuukhuwa.” Ichu saahitorokeya vaavaa amvyeiye mikhalelo sa waakhaviherya akina yaawo yaahoolela makacamiho. Owo ooloca: “Kaanawiriyana vaavaa akina yaalocaaya sawuukhula saya. Kaahoona wi elukuluku kaakhalaaka a niphwanya wa yaawo, kaanavukula wiithananela.”

¹⁷ Nnanwerya ophwanya ikuru moorweela wa ophwanyeya mmithukumano sahu sa muloko. Vaavaa nnakhalaahu mmithukumano, ninnamvaha Yehova elukuluku wi ‘anikhaviherye ni onihakararya.’ (Sal. 86:17) Mmithukumano seiyo Yehova onnanilipiha ni munepa awe waweela, Masu awe, ni achu awe. Mithukumano sinnanivaha ekari ya ohakalala wi “nlipihane.” (Aro. 1:11, 12) Murokora yoowo oniichaniwa Sofiya ooloca: “Yehova ni onnaahu weelapo yoothene, annakikhaviherya ovilela ni makacamiho aka. Echu yoochuneyaxa wa miyo saari mithukumano sahu sa muloko. Kohoona wi vaavaa kaayaaka mmuteko woolaleerya ni muloko aka, kaanawerya ovilela ni osooseya murima ni woova waka.”

18. Wakhala wi nooceecheya, tiheeni Yehova onahaaleiye onivaha?

¹⁸ Elukuluku nnakhalaahu ooceecheya, nnaphwanela wuupuwelaka wi tahi wi Yehova onaniroromeliha woopowa wa muhoolo pahiru, nyenya onnaniroromeliha tho wi onamunivaha nikhaviheryo wi nivilele ni osooseya murima hiihaano. Owo ‘onnanivaha nchuno ni owerya’ wi nivoothe moonelo wooceecheya ni woohikhalano ewehereryo.—Fil. 2:13.

19. Yoororomeliha taani Aroma 8:37-39 onanivaheiye?

¹⁹ Mwaalakhanye Aroma 8:37-39. Murummwa Paulo onnanceenyerya wi hiyaavovo eni enimwalanye ni osivela wa Muluku. Nni naakhaviherye hai anna ni arokorahu yaawo anahoolela osooseya murima? Mwaha onacharela onahaala othokororya mukhalelo nnahaalaahu omutakiherya Yehova mu wooniherya niphwanya ni waakhaviherya anna ni arokora ahu elukuluku anakhalaaya oosooseya murima.