1. Ke ka baka la’ng re swanetše go theetša temošo yeo Jesu a ilego a e nea?

BOPOROFETENG bjo Jesu a ilego a bo bolela bja mabapi le mehla ya bofelo o itše: “Itlhokomeleng gore dipelo tša lena di se ke tša imelwa ke . . . dipelaelo tša bophelo.” (Luka 21:34) Re swanetše go theetša temošo yeo. Ka baka la’ng? Ka gobane gona bjale re welwa ke mathata ao a welago batho ka moka.

2. Bana ba babo rena le dikgaetšedi ba lebeletšane le mathata afe a magolo?

² Ka dinako tše dingwe re welwa ke mathata a mantši ka nako e tee. Ela hloko mehlala e latelago. Ngwanabo rena yo a bitšwago John, * yo a bego a swerwe ke bolwetši bjo šoro bjo bo gobatšago mokokotlo le bjoko bjoo bo bitšwago multiple sclerosis, o ile a kwa bohloko kudu ge mosadi wa gagwe a mo tlogela ka morago ga ge ba na le mengwaga e 19 ba nyalane. Ke moka barwedi ba gagwe ba babedi ba ile ba tlogela go hlankela Jehofa. Banyalani ba bangwe e lego Bob le Linda le bona ba ile ba welwa ke mathata ka go latelana. Bobedi bja bona ba ile ba lahlegelwa ke mošomo gomme ka morago ba swanelwa ke go tšwa ntlong yeo ba bego ba dula go yona. Go oketša moo, Linda o ile a swarwa ke bolwetši bja pelo bjo šoro kudu, gotee le bolwetši bjo kotsi bjo bo gobatšago mašole a mmele.

3. Go ya ka Bafilipi 4:6, 7, ke’ng seo re ka kgodišegago ka sona?

³ Re ka kgodišega gore Mmopi wa rena le Tatago rena yo a re ratago e lego Jehofa, o a kwešiša ge re gateletšegile. Le gona o nyaka go re thuša go lebeletšana le mathata ao a re welago. (Bala Bafilipi 4:6, 7.) Ka Beibeleng go na le mehlala e mentši  ya bahlanka ba Modimo bao ba ilego ba welwa ke mathata. Le gona Beibele e re botša kamoo Jehofa a ilego a ba thuša go lebeletšana le ona. A re boleleng ka mehlala e sego kae.

4. Eliya o ile a lebeletšana le mathata afe, gona o ile a thušwa ke’ng?

⁴ Eliya o hlanketše Jehofa dinakong tše thata kudu, gomme a lebeletšana le mathata a magolo. Kgoši Ahaba, e lego yo mongwe wa dikgoši tšeo di bego di sa botege tša Isiraele, o ile a nyala Isebele yo mobe, yoo a bego a rapela Baali. Bobedi bja bona ba ile ba dira gore setšhaba se rapele Baali, e bile ba bolaya baporofeta ba bantši ba Jehofa. Eliya yena o ile a kgona go tšhaba. Le gona ka ge a be a ithekga ka Jehofa, o ile a phologa tlala e kgolo yeo e bego e wele nageng yeo. (1 Dikg. 17:2-4, 14-16) Go oketša moo, Eliya o ile a ithekga ka Jehofa nakong ya ge a be a bolela le baporofeta ba maaka le batho bao ba bego ba rapela Baali. O ile a kgothaletša Baisiraele gore ba hlankele Jehofa. (1 Dikg. 18:21-24, 36-38) Eliya o be a bone kamoo Jehofa a ilego a mo thuša ka gona dinakong tšeo tše thata.

5-6. Go ya ka Dikgoši tša Pele 19:1-4, Eliya o ile a ikwa bjang, gona Jehofa o ile a bontšha bjang gore o a mo rata?

⁵ Bala 1 Dikgoši 19:1-4. Le ge Eliya a be a bone kamoo Jehofa a ilego a mo thekga ka gona, o ile a tšhoga kudu ge Mohumagadi Isebele a be a nyaka go mmolaya. Ka gona o ile a  tšhabela Beresheba. O ile a gateletšega kudu moo a ilego a kgopela Jehofa gore a hwe. Ke’ng seo se ilego sa dira gore a ikwe ka tsela yeo? Eliya o be a se a phethagala. O be a na le ‘maikwelo a swanago le a rena.’ (Jak. 5:17) Mohlomongwe o ile a ikwa a gateletšegile kudu, e bile a lapile. Eliya o be a nagana gore maiteko a gagwe a go thuša batho gore ba hlankele Jehofa e be e le a lefeela. O be a bona eka ga go na diphetogo Isiraeleng, le gore ke yena feela a bego a hlankela Jehofa. (1 Dikg. 18:3, 4, 13; 19:10, 14) Re ka makatšwa ke go kwa gore moporofeta yo o ile a ikwa ka tsela ye. Eupša Jehofa yena o be a kwešiša kamoo Eliya a bego a ikwa ka gona.

⁶ Jehofa ga se a ka a galefela Eliya ge a be a mmotša kamoo a ikwago ka gona. Go e na le moo, o ile a mo kgothatša. (1 Dikg. 19:5-7) Ka morago, Jehofa o ile a phošolla Eliya ka botho ka go mmontšha matla a gagwe. Ke moka Jehofa o ile a botša Eliya gore o be a sa na le batho ba gagwe ba 7 000 nageng yeo bao ba gannego go rapela Baali. (1 Dikg. 19:11-18) Ka go nea Eliya mehlala ye, Jehofa o ile a bontšha gore o a mo rata.

7. Go tseba kamoo Jehofa a ilego a thuša Eliya ka gona go re kgothatša bjang?

⁷ Na o gateletšegile? Ruri go a kgothatša go tseba gore Jehofa o be a kwešiša kamoo Eliya a bego a ikwa ka gona! Seo se re kgonthišetša gore le rena o kwešiša kamoo re ikwago ka gona. O tseba dilo tšeo re ka kgonago go di dira le tšeo re ka se kgonego go di dira, e bile o tseba dilo tšeo re di naganago le kamoo re ikwago ka gona. (Ps. 103:14; 139:3, 4) Ge e ba re ka ekiša Eliya gomme ra ithekga ka Jehofa, yena o tla re thuša ge re na le mathata ao a re dirago gore re gateletšege.—Ps. 55:22.

8. Jehofa o tla go thuša bjang go lebeletšana le kgateletšego?

⁸ Kgateletšego e ka go dira gore o se nagane gabotse, gomme wa ikwa o nolegile moko. Ge e ba o ikwa ka tsela yeo, o se ke wa lebala gore Jehofa o tla go thuša go lebeletšana le kgateletšego. O tla go thuša bjang? O go kgothaletša gore o mmotše mathata a gago le kamoo o ikwago ka gona, gomme o tla go imolla. (Ps. 5:3; 1 Pet. 5:7) Ka gona rapela Jehofa gantši gomme o mmotše ka mathata a gago. A ka se bolele le wena ka go lebanya go etša ge a ile a bolela le Eliya, eupša o tla diriša Lentšu la gagwe e lego Beibele le mokgatlo wa gagwe. Dipego tša batho ba ka Beibeleng di ka go kgothatša le go go nea kholofelo. Le gona bana beno le dikgaetšedi ba ka go kgothatša.—Baroma 15:4; Baheb. 10:24, 25.

9. Mogwera yo o mmotago a ka go thuša bjang?

⁹ Ge Jehofa a be a laela Eliya gore a nee Elisha o mongwe wa mošomo wa gagwe, o ile a mo nyakela mogwera yo a bego a tla mo thuša ge a be a imetšwe. Ka mo go swanago, ge e ba le rena re botša mogwera wa rena yo re mmotago kamoo re ikwago ka gona, a ka re thuša ge re imetšwe. (2 Dikg. 2:2; Die. 17:17) Ge e ba o bona eka ga go na motho yo o ka bolelago le yena ka mathata a gago, rapela Jehofa gore a go thuše go hwetša Mokriste yo a godilego moyeng yo a ka go kgothatšago.

10. Phihlelo ya Eliya e re kgothatša bjang, gona kholofetšo yeo e lego go Jesaya 40:28, 29 e ka re thuša bjang?

¹⁰ Jehofa o ile a thuša Eliya go lebeletšana le kgateletšego gotee le go mo hlankela ka potego ka mengwaga e mentši. Seo se ilego sa diragalela Eliya se a re kgothatša. Ka dinako tše dingwe re ka gateletšega kudu moo re ka ikwago re imetšwe maikwelong e bile re lapile kudu. Eupša ge e ba re ka ithekga ka Jehofa, o tla re nea matla ao re a hlokago gore re tšwele pele re mo hlankela.—Bala Jesaya 40:28, 29.

11-13. Hanna, Kgoši Dafida le setlogolo sa Asafa ba ile ba kgongwa bjang ke kgateletšego?

¹¹ Go na le batho ba bangwe ba ka Beibeleng bao le bona ba ilego ba lebeletšana le kgateletšego e kgolo. Ka mohlala, Hanna o ile a gateletšega kudu ka ge a be a se na bana, gomme mosadi wa bobedi wa monna wa gagwe a be a mo kwera o šoro. (1 Sam. 1:2, 6) Hanna o be a gateletšegile kudu moo a bego a dulela go lla e bile o be a sa nyake le go ja.—1 Sam. 1:7, 10.

¹² Ka dinako tše dingwe Kgoši Dafida o ile a gateletšega kudu. Nagana ka mathata ao a ilego a lebeletšana le ona. O ile a ikwa a le molato kudu ka baka la diphošo tše dintši kudu tšeo a ilego a di dira. (Ps. 40:12) Morwa wa gagwe yo a bego a mo rata kudu e lego Abesalomo o ile a mo hlanogela, gomme mafelelong a bolawa. (2 Sam. 15:13, 14; 18:33) Le gona yo mongwe wa bagwera ba ga gwe ba bagolo o ile a mo hlanogela. (2 Sam. 16:23–17:2; Ps. 55:12-14) Dipsalme tše dintši tšeo Dafida a di ngwadilego di hlalosa kamoo a bego a ikwa ka gona ge a be a gateletšegile gotee le kamoo a bego a bota Jehofa ka gona.—Ps. 38:5-10; 94:17-19.

¹³ Ka morago mopsalme yo mongwe o ile a thoma go duma kamoo batho ba babe ba bego ba phela ka gona. Go ka direga gore e be e le setlogolo sa Asafa wa Molefi seo se bego se hlankela “sekgethweng se sekgethwa sa Modimo.” Mopsalme yo o ile a gateletšega kudu moo a ilego a se sa thaba le go kgotsofala. Le gona o ile a thoma go nagana gore Modimo ga a mo šegofatše ka mo go lekanego.—Ps. 73:2-5, 7, 12-14, 16, 17, 21.

14-15. Re ithuta’ng mehlaleng e meraro ya ka Beibeleng mabapi le go kgopela thušo go Jehofa?

¹⁴ Bahlanka ba Jehofa ba bararo bao re sa tšwago go bolela ka bona ba ile ba ithekga ka  Jehofa gore a ba thuše. Ba ile ba mo rapela gomme ba mmotša dilo tšeo di bego di ba tshwenya. Ba ile ba bolela le yena ba sa tšhabe selo mabapi le dilo tšeo di bego di ba dira gore ba gateletšege. Le gona ba ile ba tšwela pele ba eya tempeleng go yo rapela.—1 Sam. 1:9, 10; Ps. 55:22; 73:17; 122:1.

¹⁵ Jehofa o ile a ba kwela bohloko gomme a ba araba ka moka ga bona. Hanna o ile a ba le khutšo ya monagano. (1 Sam. 1:18) Dafida o ile a ngwala gore: “Mathata a moloki ke a mantši, eupša Jehofa o mo hlakodiša go ona ka moka.” (Ps. 34:19) Le gona mopsalme yoo e bego e le setlogolo sa Asafa ka morago o ile a lemoga gore Jehofa o be a “swere seatla sa [gagwe] sa le letona,” a mo hlahla ka tsela e lerato. O opetše ka gore: “Ge e le nna ke kgahlwa ke go batamela Modimo. Ke tšhabetše go Mmuši Morena Jehofa.” (Ps. 73:23, 24, 28) Re ithuta’ng mehlaleng ye? Ka dinako tše dingwe re tlo imelwa ke mathata ao a tla dirago gore re gateletšege. Eupša re ka kgona go lebeletšana le mathata ao ge e ba re ka naganišiša kamoo Jehofa a ilego a thuša ba bangwe, ge e ba re ithekga ka yena ka thapelo gotee le go dira seo a re laelago gore re se dire.—Ps. 143:1, 4-8.

16-17. (a) Ke ka baka la’ng re se ra sa swanela go ikarola? (b) Ke’ng seo se ka re matlafatšago?

¹⁶ Mehlala e meraro yeo re boletšego ka yona e re ruta thuto e nngwe e bohlokwa. E re ruta  gore ga se ra swanela go ikarola go Jehofa le go batho ba gagwe. (Die. 18:1) Nancy yoo a ilego a gateletšega kudu ka morago ga gore monna wa gagwe a mo tlogele o re: “Go na le matšatši a mantši moo ke bego ke sa nyake go bona motho goba go bolela le motho. Eupša ke ile ka lemoga gore ge ke be ke ikarola ke be ke nyama le go feta.” Maemo a ile a fetoga ge Nancy a be a thoma go nyaka ditsela tša kamoo a ka thušago bao ba nago le mathata. O re: “Ke ile ka theetša ge batho ba be ba ntlhalosetša mathata a bona. Ke ile ka lemoga gore ge ke kwela batho ba bangwe bohloko, ga ke na nako ya go nagana ka mathata a ka.”

¹⁷ Re ka matlafatšwa ke go ya dibokeng. Ge re le dibokeng re nea Jehofa sebaka sa gore a re ‘thuše le go re homotša.’ (Ps. 86:17) Ge re le moo o re matlafatša ka moya wa gagwe o mokgethwa, ka Lentšu la gagwe le ka go diriša batho ba gagwe. Ge re le dibokeng re kgona go ‘kgothatšana.’ (Baroma 1:11, 12) Kgaetšedi Sophia o itše: “Jehofa le bana bešo le dikgaetšedi ba ile ba nthuša go kgotlelela. Diboka di be di le bohlokwa kudu go nna. Ke ile ka lemoga gore ge ke fetša nako e ntši ke le tšhemong le go dira dilo tša moya, ke kgona go lebeletšana le kgateletšego.”

18. Jehofa o re nea’ng ge re ikwa re gateletšegile?

¹⁸ Ge o ikwa o gateletšegile, gopola gore Jehofa o holofetša gore nakong e tlago o tla go imolla kgateletšegong ka mo go feletšego. E bile le gona bjale o tla go thuša go lebeletšana le kgateletšego. O re nea “kganyogo le matla” a go fenya kgateletšego le go ikwa re hloka kholofelo.—Bafil. 2:13.

19. Baroma 8:37-39 e re kgonthišetša’ng?

¹⁹ Bala Baroma 8:37-39. Moapostola Paulo o re kgonthišetša gore ga go na seo se ka re aroganyago le lerato la Modimo. Re ka thuša bjang bana babo rena le dikgaetšedi bao ba gateletšegilego? Sehlogo seo se latelago se tla re thuša go ekiša Jehofa ka go kwela bohloko bana babo rena le dikgaetšedi bao ba gateletšegilego le go ba thekga.