1. Киристей дзурдтӕмӕ уӕлӕнгай цӕстӕй кӕсӕн цӕмӕннӕ ес?

ЙЕСО КИРИСТЕ фӕстаг бӕнтти кой ку кодта, уӕд ӕ фӕдбӕлдзӕугутӕн загъта: «Сумах ба уӕхемӕ кӕсетӕ, цӕмӕй уӕ зӕрдитӕ... царди сагъӕстӕй [гъома цардамӕлттӕ кӕнунӕй] ма ӕруӕззау уонцӕ» (Лук. 21:34). Аци дзурдтӕмӕ уӕлӕнгай цӕстӕй кӕсӕн нӕййес. Цӕмӕн? Уомӕн ӕма аци дуйней адӕн ци зиндзийнӕдтӕбӕл исӕмбӕлунцӕ, уонӕй мах дӕр хизт нӕ ан.

2. Еуӕй-еу хуӕртӕ ӕма ӕнсувӕртӕ цӕхуӕн зиндзийнӕдтӕбӕл исӕмбӕлунцӕ?

² Хатгай адӕймагбӕл еу бӕллӕх инней фӕдбӕл ӕрцӕуй. Ӕркӕсӕн дууӕ хабаремӕ. Еу ӕнсувӕр Джон * сӕйуй, рассеянный склероз ке хонунцӕ, уӕхӕн незӕй. 19 анзи ке хӕццӕ фӕццардӕй, еци бийнойнаг ӕй ниууагъта. Уой фӕсте ба ӕ дууӕ кизги дӕр Йеговӕн нӕбал лӕггадӕ кодтонцӕ. Еу бийнонтӕ ба, Боб ӕма Линдӕ, ӕндӕрхузи зиндзийнӕдтӕбӕл исӕмбалдӕнцӕ. Фиццаг сӕ куст фесафтонцӕ, уой фӕсте ба – сӕ цӕрӕн бунат дӕр. Уомӕй уӕлдай ма Линдӕмӕ разиндтӕй, рамӕлунӕй ин тӕссаг кӕмӕй адтӕй, уӕхӕн зӕрди нез. Удта ма имӕ иссирдтонцӕ, ӕ иммунитет ин ка ихалдта, уӕхӕн нез дӕр.

3. Филиппӕгтӕмӕ 4:6, 7 ци финст ес, уомӕ гӕсгӕ нӕ бон федарӕй ӕууӕндун цӕбӕл ӕй?

³ Нӕ бон ӕй федарӕй ӕууӕндун, не Сфӕлдесӕг Фидӕ Йеговӕ ке уинуй, ци тухститӕ ӕвзарӕн, уони, ӕма нӕмӕ е ’нхуси къох ӕрбадарунмӕ цӕттӕ ӕй. (Бакӕсӕ Филиппӕгтӕмӕ 4:6, 7.) Йегови лӕггадгӕнгутӕ цӕхуӕн зиндзийнӕдтӕбӕл ӕмбалдӕнцӕ ӕма син куд ӕнхус кодта,  уой туххӕй Библий берӕ хабӕрттӕ финст ес. Ӕркӕсӕн си цалдӕремӕ.

4. Илийа цӕхуӕн зиндзийнӕдтӕбӕл исӕмбалдӕй ӕма ин ци банхус кодта?

⁴ Илийа Йеговӕн зин рӕстӕгути лӕггадӕ кодта ӕма уӕззау фӕлварӕнтӕбӕл ӕмбалдӕй. Израили паддзах Ахав Йеговӕн нӕ лӕггадӕ кодта, удта ӕрхудта Йезавели. Е ба адтӕй, Ваалӕн ка кувта, уӕхӕн цъамар ӕма хийнӕйдзаг силгоймаг. Уони туххӕй ӕгас Израил дӕр Ваалӕн ковун райдӕдта, Йегови пахампартӕй ба берети рамардтонцӕ. Фал Илийа фӕййервазтӕй. Йегови фӕрци ибӕл стонг ӕнзтӕ дӕр райевгъудӕнцӕ (1 Пад. 17:2–4, 14–16). Уомӕй уӕлдай ма ӕ зӕрдӕ Йеговӕбӕл ке дардта, уой фӕрци Ваали пахампарти ӕма ин ка кувта, уони нихмӕ фӕллӕудтӕй. Илийа архайдта, цӕмӕй израилӕгти Йеговӕмӕ раздахтайдӕ (1 Пад. 18:21–24, 36–38). Еци зин рӕстӕгути Йегови ӕнхус ӕхебӕл еу ӕма дууӕ хатти нӕ бавзурста.

5, 6. 1 Паддзӕхти 19:1–4 ци финст ес, уомӕ гӕсгӕ Илийа куд бацӕй ӕма ин Йеговӕ куд бавдиста, ке ӕй уарзуй, уой?

⁵ Бакӕсӕ 1 Паддзӕхти 19:1–4. Фал ӕй Йезавел марунвӕндӕ ку искодта, уӕд Илийа фӕттарстӕй ӕма Вирсавимӕ фӕллигъдӕй. Еци рӕстӕг гъе уотӕ тухст адтӕй, ӕма ӕхецӕн мӕлӕт дӕр агурдта. Цӕмӕн? Уомӕн ӕма е дӕр «мах хузӕн адӕймаг адтӕй» (Иак. 5:17). Ка ’й зонуй имӕ фур тухст ӕма фур фӕлладӕй цӕрун дӕр нӕбал цудӕй.  Ӕвӕдзи имӕ уотӕ кастӕй, ӕма ӕ хъиамӕттӕ фӕдздзӕгъӕли ’нцӕ ӕма Израили хуарзӕрдӕмӕ неци ӕййивта ӕма уомӕй ӕндӕр Йеговӕн некебал лӕггадӕ кӕнуй (1 Пад. 18:3, 4, 13; 19:10, 14). Ӕвӕдзи нӕмӕ дессаг кӕсуй, Илийай рамӕлун цӕмӕн фӕндадтӕй, е. Фал ӕй Йеговӕ хуарз лӕдӕрдтӕй.

⁶ Йеговӕ ӕ лӕггадгӕнӕгӕн уайдзӕф нӕ бакодта, фал ӕй бафедар кодта (1 Пад. 19:5–7). Уой фӕсте Йеговӕ Илийайӕн е ’нӕкӕрон хъаурӕ бавдиста ӕма ин фӕлмӕнӕй ӕ зундахаст раййевунмӕ банхус кодта. Йеговӕ ин загъта, Израили ма Ваалӕн ка нӕ бакувта, уонӕй 7 000 адӕймаги ке байзадӕй (1 Пад. 19:11–18). Уотемӕй ин Йеговӕ бавдиста, ке ӕй уарзуй, уой.

7. Йеговӕ Илийайӕн куд банхус кодта, е нӕ куд федар кӕнуй?

⁷ Ка ’й зонуй, дӕуӕн дӕр нур ӕнцон нӕй. Кӕд уотӕ ’й, уӕд расагъӕс кӕнӕ, Йеговӕ Илийай куд лӕдӕрдтӕй ӕма ин куд банхус кодта, уобӕл. Уотемӕй бафедар уодзӕнӕ ӕма ’й зондзӕнӕ, Йеговӕ дин дӕ тухститӕ ке лӕдӕруй, уой. Е ӕй зонуй, нӕ бон ци ӕй ӕма ци нӕй, уой. Сауӕнгӕ ма нин уинуй нӕ сагъӕстӕ ӕма, цӕбӕл тухсӕн, уой дӕр (Пс. 103:14; 139:3, 4). Мах дӕр Илийай хузӕн нӕ зӕрдӕ Йеговӕбӕл ку дарӕн, уӕд нин банхус кӕндзӕй, зиндзийнӕдти рӕстӕг нӕмӕ хъауритӕ ку нӕбал байзайа, уӕд (Пс. 55:22).

8. Йеговӕ нин тухст рӕстӕги куд ӕнхус кӕндзӕй?

⁸ Адӕймаг тухст уавӕри ку фӕууй, уӕд царди хуарзӕй нецибал фӕууинуй. Фал гъӕуама ма иронх кӕнӕн, Йегови бон нин банхус кӕнун ке ӕй, уой. Кутемӕй? Е нӕ разӕнгард кӕнуй, цӕмӕй ин дзорӕн, цидӕриддӕр нӕ тухсун кӕнуй, уой ӕма нин нӕ кувдтитӕбӕл алкӕддӕр дзуапп раттуй (Пс. 5:3; 1 Пет. 5:7). Мадта Йеговӕн арӕхдӕр дзорӕ, ци дӕ тухсун кӕнуй, уой. Ке зӕгъун ӕй гъӕуй, Йеговӕ нӕ хӕццӕ, Илийай хӕццӕ куд радзурдта, уотӕ нӕ радзордзӕй. Фал нӕ хӕццӕ дзордзӕй ӕ Дзурд Библий ӕма ӕ организаций фӕрци. Библий ци хабӕрттӕ фӕккӕсӕн, етӕ нӕ бафедар кӕнунцӕ ӕма нин нифс раттунцӕ. Уомӕй уӕлдай ма нӕ ӕмбурди хуӕртӕ ӕма ӕнсувӕртӕ дӕр бафедар кӕнунцӕ (Ром. 15:4; Дзиуит. 10:24, 25).

9. Хуарз ӕмбали бон бафедар кӕнун куд ӕй?

⁹ Йеговӕ Илийайӕн загъта, цӕмӕй ӕ ихӕстӕ Елисеййи къохи бакодтайдӕ. Уотемӕй ин фӕззиндтӕй, зин рӕстӕги ӕй ка бафедар кодтайдӕ, уӕхӕн ӕмбал. Мах дӕр цӕбӕл тухсӕн, уой не ’мбалӕн ку радзорӕн, уӕд нӕмӕ фулдӕр хъауритӕ фӕззиндзӕй (2 Пад. 2:2; Ӕмб. 17:17). Фал дӕ рази уӕхӕн адӕймаг ку нӕ уа, уӕдта? Йеговӕй корӕ, цӕмӕй дӕ фарсмӕ балӕууа, ка дӕ бафедар кӕна, уӕхӕн фӕлтӕрдгун киристон.

10. Илийай хабар нин цӕхуӕн нифс дӕттуй? Исай 40:28, 29 ци зӕрдӕвӕрд финст ес, е нин куд банхус кӕндзӕй?

¹⁰ Йеговӕ Илийайӕн ӕ зинтӕ исфӕразунмӕ ке банхус кодта, уой фӕрци ма ин берӕ ӕнзти дӕргъи еузӕрдонӕй фӕллӕггадӕ кодта. Еци хабар нин нӕ нифс федар кӕнуй. Адӕймаг естӕбӕл хъӕбӕр ку фӕттухсуй, уӕд имӕ хъауритӕ нӕбал байзайуй ӕма ӕ нифс дӕр басӕттуй. Фал Йеговӕбӕл нӕ зӕрдӕ ку дарӕн уӕд нин хъауритӕ ратдзӕй, цӕмӕй ин идарддӕр лӕггадӕ кӕнун нӕ бон уа. (Бакӕсӕ Исаййи 40:28, 29.)

11–13. Рагидзаманти Хуцауи лӕггадгӕнгутӕй ӕртӕ цӕбӕл маст кодтонцӕ ӕма е сӕ цардбӕл куд бӕрӕг кодта?

¹¹ Библий ма ке туххӕй финст ес, еци еузӕрдон  лӕггадгӕнгутӕ дӕр аллихузи зинтӕ ӕвзурстонцӕ. Зӕгъӕн, Аннӕ хъӕбӕр маст кодта, сувӕллӕнттӕ ин ке не ’нтӕстӕй, уой туххӕй. Уӕди рӕстӕги ба е ходуйнаг адтӕй. Уомӕй уӕлдай ма ӕй ӕ лӕги дуккаг уосӕ дӕр уой туххӕй мӕстӕймарӕ кодта (1 Сам. 1:2, 6). Аннӕн е уотӕ зин адтӕй, ӕма ӕ цӕстисугӕй ӕхе ӕхснадта ӕма хуӕргӕ дӕр неци кодта (1 Сам. 1:7, 10).

¹² Паддзах Давид дӕр хатгай хъӕбӕр тухст уавӕри уидӕ. Расагъӕс кӕнӕ, ци рӕдудтитӕ искодта, уой туххӕй ӕй ӕ цӕсгон куд хуардтайдӕ (Пс. 40:12). Ӕ хъазар фурт Авессалом ба ӕ нихмӕ адӕни исистун кодта, уой фӕсте ба фӕммардӕй (2 Сам. 15:13, 14; 18:33). Уомӕй уӕлдай ма ӕй ӕ хуарз ӕмбал дӕр рауӕйӕ кодта (2 Сам. 16:23–17:2; Пс. 55:12–14). Давид ӕ тухст сагъӕстӕ, удта ӕ зӕрдӕ Йеговӕбӕл куд дардта, уой берӕ псаломти ниффинста (Пс. 38:5–10; 94:17–19).

¹³ Еу псаломзаргӕнӕг ба фудгӕнӕг адӕни цардмӕ хицӕ кӕнун райдӕдта. Е, ӕвӕдзи, адтӕй, Хуцауи устур ковӕндони ка лӕггадӕ кодта, еци левит, Асафи байзӕддаг. Ӕ зӕрдӕ ӕппундӕр нецӕмӕйбал рохс кодта, сауӕнгӕ ма, Хуцауӕн лӕггадӕ кӕнун ци арфӕдзийнӕдтӕ хӕссуй, уонӕй дӕр (Пс. 73:2–5, 7, 12–14, 16, 17, 21).

14, 15. Ци ӕртӕ хабаремӕ ӕркастан, уонӕй цӕбӕл ахур кӕнӕн?

¹⁴ Аци ӕртӕ лӕггадгӕнӕги сӕ зӕрдӕ Йеговӕбӕл дардтонцӕ ӕма имӕ зӕрдибунӕй кувтонцӕ. Етӕ ин ӕргом дзурдтонцӕ, уотӕ зин син цӕмӕн ӕй, уой, удта Йегови ковӕндонӕмӕ ӕдзох цудӕнцӕ (1 Сам. 1:9, 10; Пс. 55:22; 73:17; 122:1).

¹⁵ Йеговӕ си алкӕбӕлдӕр батухстӕй.  Аннӕ маст нӕбал кодта (1 Сам. 1:18). Давид финста: «Берӕ мӕститӕ ес рӕстгӕнӕгӕн, фал ӕй Йеговӕ се ’гасемӕйдӕр фӕййервӕзун кӕнуй» (Пс. 34:19). Псаломзаргӕнӕгӕн ба Йеговӕ фӕлмӕнӕй унаффӕ ку равардта, уӕд уӕхӕн дзурдтӕ ниффинста: «Ду мин хуӕцис мӕ рахес къохбӕл». Уой фӕсте ба уотӕ дӕр финста: «Мӕнӕн ба хуарз ӕй Хуцаумӕ хӕстӕг кӕнун. Ӕз мӕхе бакодтон Дуйнедарӕг Хуцау Йегови иуазӕг» (Пс. 73:23, 24, 28). Аци хабӕрттӕй цӕбӕл ахур кӕнӕн? Нӕ царди зин рӕстӕгутӕ дӕр уодзӕй. Фал Йеговӕ иннетӕн куд ӕнхус кодта, уобӕл ку сагъӕс кӕнӕн, ку имӕ ковӕн ӕма, ци дзоруй, уой ку ӕнхӕст кӕнӕн, уӕд еци зин рӕстӕгутӕ исфӕраздзиан (Пс. 143:1, 4–8).

16, 17. а) Иннетӕй нехе еуварс кӕнун цӕмӕннӕ гъӕуй? б) Хъауритӕ нӕмӕ цӕй фӕрци фӕззиндзӕй?

¹⁶ Ци ӕртӕ хабаремӕ ӕркастан, уонӕй ма еу ӕхсидзгӕ гъуддагбӕл ахур кӕнӕн: Йеговӕ ӕма ӕ адӕнӕй еуварс кӕнун нӕ гъӕуй (Ӕмб. 18:1). Ненси хъӕбӕр маст бавзурста, ӕ лӕг ӕй ку ниууагъта, уӕд. «Берӕ рӕстӕг мӕмӕ уинун дӕр неке цудӕй, удта мӕ дзорун дӕр неке хӕццӕ фӕндадтӕй,– зӕгъуй Ненси.– Фал мӕхе иннетӕй куд фулдӕр  еуварс кодтон, уотӕ никки хъӕбӕрдӕр ӕнкъард кодтон». Ненсийӕн дзӕвгарӕ фенцондӕр ӕй, иннетӕн сӕ зиндзийнӕдти ӕнхус кӕнун ку райдӕдта, уӕд. Е зӕгъуй: «Сӕ тухститӕ мин ку дзориуонцӕ, уӕд сӕмӕ лӕмбунӕг байгъосинӕ. Ӕма ’й балӕдӕрдтӕн, иннетӕбӕл ку фӕттухсун, уӕд мӕхе зиндзийнӕдтӕбӕл уотӕ хъӕбӕр ке нӕбал фӕссагъӕс кӕнун».

¹⁷ Уомӕй уӕлдай ма нӕмӕ нӕуӕг хъауритӕ фӕззиннуй нӕ фембӕлдти фӕрци дӕр. Ӕмбурдмӕ ку ’рбацӕуӕн, уӕд Йеговӕн уӕлдай хатт фадуат раттӕн, цӕмӕй нин банхус кӕна ӕма нӕ бафедар кӕна (Пс. 86:17). Ӕмбурди нӕ бафедар кӕнуй ӕ сугъдӕг хъаури, Библий ӕма ӕ лӕггадгӕнгути фӕрци. Удта ма си кӕрӕдзей дӕр бафедар кӕнӕн (Ром. 1:11, 12). Еу хуӕрӕ Софийӕ зӕгъуй: «Алцидӕр исфӕразунмӕ мин банхус кодта Йеговӕ, удта нӕ хуӕртӕ ӕма не ’нсувӕртӕ. Уомӕн мин устур ӕнхус фӕцӕнцӕ нӕ фембӕлдтӕ. Еу гъуддаг балӕдӕрдтӕн: игъосун кӕнуни ӕма ӕмбурди гъуддӕгти куд фулдӕр фӕййархайун, уотӕ мин ӕнцондӕр фӕууй тухст сагъӕсти хӕццӕ тох кӕнун».

18. Нифссаст ку фӕууӕн, уӕд нин Йеговӕ куд фенхус кӕнуй?

¹⁸ Тухст уавӕри ку уай, уӕд дӕ зӕрдӕбӕл дарӕ: Йеговӕ нӕ федӕни нӕ зиндзийнӕдтӕй ӕнӕмӕнгӕй исуӕгъдӕ кӕндзӕй, фал нӕ абони дӕр ӕнӕ ӕнхусӕй нӕ уадзуй. Йеговӕ нин хъауритӕ дӕтдзӕй, цӕмӕй нӕ нӕ зиндзийнӕдти хӕццӕ тох кӕнун «фӕндгӕ дӕр кӕна ӕма архайгӕ дӕр кӕнӕн» (Фил. 2:13).

19. Ромӕгтӕмӕ 8:37–39 финст дзурдтӕ нин цӕхуӕн нифс дӕттунцӕ?

¹⁹ Бакӕсӕ Ромӕгтӕмӕ 8:37–39. Апостол Павел куд финста, уомӕ гӕсгӕ нӕ Хуцауи уарзтӕй «неци рахецӕн кӕндзӕй». Фал зиндзийнӕдтӕ ка ӕвзаруй, еци хуӕрӕ кенӕ ӕнсувӕри ба нӕ бон куд ӕй бафедар кӕнун? Иннӕ статьяй базондзиан, нӕ бон куд ӕй Йегови фӕнзун ӕма, зин уавӕри ка ӕй, уони федар кӕнун.