1. Ngera uchul me ngkmal kired lolengesenges er a omengelechel el ledillii a Jesus?

NGAR sel ulochel a Jesus el kirel a uriul sils, e ngdilu el kmo: “Mkekerengemiu me a rengmiu lak di bo mechesang er a betok el . . . sebekreng er a klengar.” (Lk. 21:34, BT) Me ngkmal kired lolengesenges er tia el omengelechel. E ngera uchul? E le chelecha el taem e kede dirrek el mo chelebangel a osisiu el ringelel a uldasu el di uaike el lechelebangel a rokui el chad.

2. Ngera el meringel el mondai a lechuarm er ngii a rudam me a rudos er kid?

² A lebebil er a taem e kede mo chuarm a betok el meringel el mondai er a osisiu el taem. Ka molatk aika el tekoi el dilubech. A John * el ta er a Sioning el chuarm er a secher el multiple sclerosis, a dirrek el kmal mlo mekngit a rengul er a taem el bechil el mla mo 19 el rak, a chilitii e merael. E a uriul e a reteru el ngelekel redil a mlo diak losiou er a Jehovah. Me a ta el obekel el Bob me a Linda a dirrek el mlo chelebangel a kakerous el ongarm. Te di diul mlo diak a urerir, e dirrek el mlo diak a blirir. E dirrek el mlo er ngii a lmuut el bebil er a mondai er tir, a Linda a mlo smecher er a rektel a chaidirengul el mle sebechel mo uchul a kodellel, e a lmuut el ta er a rakt a dirrek el ulemuchel el mengitechut er a immune system er ngii.

3. A doltirakl er a Filipi 4:6, 7, e ngsebechel mo ulterekokl a rengud el kirel a ngerang?

³ Ngsebechel mo ulterekokl a rengud el kmo ngika el Ulemeob e betik a rengul el Demad el Jehovah, a kmal ungil medengei sel bo lechuarm a uldesued. Ngdirrek el kmal soal ngosukid el outekangel a mondai el dechelebangel. (Monguiu er a Filipi 4:6, 7.) Ngar a chelsel a Tekingel a Dios e ngmesaod el kirel a betok el ringel el blo lecharm er ngii a rechedal. Ngdirrek el mesaod a rolel e a Jehovah a ngilsuterir a rechedal el mo outekangel aike el meringel el mondai er tir. Me bo dosaod a bebil er ngii.

4. Ngera el omelsemai a blo lecharm er ngii a Elias? E mlo uangera uldesuel el bedul a Jehovah?

⁴ A Elias a milsiou er a Jehovah er a meringel el taem e dirrek el mlo chuarm er a betok el mondai. A King Ahab, el ta er a mekngit el king el ngar a reksi er a beluu er a Israel, a mlo bechil a Jesebel el ngii a milengull er a Baal. Me tir el terung a milekekii a beluu er a omengull el Baal, e dirrek el ulemekoad er a rebetok el profet er a Jehovah. Engdi a Elias a mlo sebechel chemiis er tir. Ngdirrek ngii el Elias a silobel er a taem er a kemtimt, e le ngii el mle ultuil er a ngelsuil a Jehovah. (1 Ki. 17:2-4, 14-16) Me a lmuut el tang, a Elias a mle ultuil er a Jehovah er sel taem er a lolsemai er tirke el profet me a remengull er a Baal. Ngmilengelechel er a rechad er a Israel me bo losiou er a Jehovah. (1 Ki. 18:21-24, 36-38) Me ngmla er ngii a betok el olechotel el kmo a Jehovah a ullengeseu er a Elias er a chelsel aike el mle meringel el taem er a klengar er ngii.

5-6. A doltirakl er a 1 King 19:1-4, e ngmle uangera uldesuel a Elias? E milekera Jehovah e ochotii el kmo ngmle betik a rengul er ngii?

⁵ Monguiu er a 1 King 19:1-4. Me nguaisei engdi a Elias a mlo medakt er sel taem el Kuin Jesebel a mlo soal lomekoad er ngii. Me ngchiliis el mora Beerseba. Ngkmal mlo mechitechut a rengul me ng “uluureng me le mad.” Ngera rirellii el mo omdasu el uaisei? A Elias a “di mle chad el ua ikid,” el diak lecherrungel. (Jak. 5:17) Me nglocha kmal mlo meringel a uldesuel, e dirrek el mlo mechitechut a bedengel. Ngdirrek el locha mlo omdasu el kmo a meringel el urerel el millisiich er a mera el omengull a dimlak a ultutelel, e dimlak a ngera el leketmeklii er a beluu er a Israel, e di mlo ngii el tang a medechel el milsiou er a Jehovah. (1 Ki. 18:3, 4, 13; 19:10, 14) Me kede  locha mo mechas a rengud er a omerellel ngika el blak a rengul el profet. Engdi a Jehovah a mle ungil medengei a ringelel a uldesuel a Elias.

⁶ A Jehovah a dimlak loungeroel er a Elias er sera louchais er Ngii er aike el ngar a uldesuel. Ngbai ngilsuir a Elias me ngliluut el mo mesisiich. (1 Ki. 19:5-7) E a uriul e a Jehovah a uluusbech er a klou el klisichel e mlo ungil sumecheklii a uldesuel a Elias. E dirrek el silodii el mo er ngii el kmo te dirk ngar ngii a 7,000 el obengkel el ngar a Israel el dimlak lekengei el mo mengull er a Baal. (1 Ki. 19:11-18) Me ngokiu aika el tekoi e a Jehovah a ulechotii el mora Elias el kmo Ngkmal betik a rengul er ngii.

7. Ngera el omelisiich a denguu er sel rolel e a Jehovah a ngilsuir a Elias?

⁷ Me kau, ke chuarm er a meringel el uldesuem? Ngkmal mengelaod a rengud sel dodengei el kmo a Jehovah a kmal mle ungil medengei a ringelel a uldesuel a Elias! Ngdirrek el mengelaod er kid sel dodengei el kmo Ngii a dirrek el medengei a ringel el decharm er ngii. Ngungil medengei aike el sebeched me aike el diak lsebeched, e dirrek el medengei a uldesued me aike el domelechesiu. (Psa. 103:14; 139:3, 4) Me a lsekum kede mo oukerebai er a Elias el mo ultuil er a Jehovah, e ngmo ngosukid el outekangel a mondai er kid el ngii a uchul a ringelel a uldesued.​—Psa. 55:22.

8. Ngmekera Jehovah e ngosukau loutekangel a ringelel a uldesuem?

⁸ A ringelel a uldasu a sebechel rullau el mo mekngit a uldesuem, e dirrek el choitechetur a rengum. Me a lsekum ke mo omdasu el uaisei, e lak mobes el kmo a Jehovah a mo ngosukau loutekangel er tia el ringelel a uldesuem. Ngmekera lolengeseu er kau? Ngkmal soal sel mouchais aike el meringel er a uldesuem el mo er ngii. Ngdirrek el mo onger er a ongtim el kirel a ngelsuil. (Psa. 5:3; 1 Pe. 5:7) Me bo blechoel meluluuch louchais a mondai er kau er a Jehovah. Ngdiak bo longedecheduch er kau el ua sera longedecheduch er a Elias, e ngbai oeak a Tekingel e ngmengedecheduch er kau, e dirrek lokiu a cheldebechelel. Me aike el cheldecheduch el monguiu er a Biblia a sebechel mengelaod er kau e dirrek el meskau a omelatk. A rudam me a rudos er kau a dirrek el sebechir el melisiich er kau.​—Rom 15:4; Heb. 10:24, 25.

9. Ngmekera e sebechel a doumerang er ngii el sechelid el ngosukid?

⁹ Sel taem el Jehovah a dilu er a Elias me loterekokl a bebil er a ngerachel el mora Elisa, e ngulekiu tiaikid el rolel e a Jehovah a milsa Elias a ungil sechelil el sebechel ngosuir loutekangel a ringelel a uldesuel. Me ngdi osisiu, sel douchais er a resechelid er a ringelel a uldesued, e ngmo sebechel ngosukid loltekau er a mondai er kid. (2 Ki. 2:2; Osi. 17:17) Engdi a lsekum ke omdasu el kmo ngdiak a chad el sebechem louchais a mondai er kau el mo er ngii, e moluluuch el mora Jehovah me lengesukau el mo metik er a mesisiich a klaumerang er ngii el Kristiano el sebechel mo melisiich er kau.

10. Ngmekera tekoi el dilubech el mora Elias e meskid a omelatk? E mekera telbiil el medung er a Isaia 40:28, 29 e ngosukid?

¹⁰ A Jehovah a ngilsuir a Elias el mo outekangel a ringelel a uldesuel e dirrek el melemolem el blak a rengul mesiou er Ngii el betok el rak. Me a tekoi el dilubech el mora Elias a meskid a omelatk. Kede locha mo chelebangel a meringel blekeradel el sebechel choitechetur a bedenged me a rengud. Me nguaisei, engdi a lsekum kede mo ultuil er a Jehovah, e ngmo meskid a klisiched el sebeched lousbech er ngii e melemolem el mesiou er ngii.​—Monguiu er a Isaia 40:28, 29.

11-13. Ngmilekerang a meringel luldasu e omekcharm er a retedei el mesiungel a Dios er a irechar?

¹¹ Ngmla er ngii a lmuut el bebil er a rechad el ngar a Biblia el mlo chuarm er a meringel luldasu. El ua Hana, el mle kirel loutekangel er a mondai  er ngii el mle kebai el dil, me a dirrek el otuub er ngike el ta er a bechil a Elkana. (1 Sa. 1:2, 6) Me a meringel luldesuel a Hana a rirellii el kmal mlo mekngit a rengul me ngdi lmangel e mlo chetil lomengur.​—1 Sa. 1:7, 10.

¹² A lebebil er a taem, e a King David a kmal mlo chuarm a uldesuel. Ka di molatk a ringel el blo lechelebangel. Ngkmal mlo ouuchel er a rengul el kirel a betok el cheleuid el tekoi el lurruul. (Psa. 40:12) E a betik er a rengul el ngelekel el Absalom a mlo omtok er ngii, e tiang a mlo uchul a kodellel ngii el Absalom. (2 Sa. 15:13, 14; 18:33) E a ta er a kmal kmeed el sechelil ngii el David a milengeblad er ngii. (2 Sa. 16:23–17:2; Psa. 55:12-14) Me a betok el chelitakl el lulluches a David el ngar a psalm a ouchais el kirel a chelitechetul a rengul me a dirrek el sel mesisiich el klaumerang er ngii er a Jehovah.​—Psa. 38:5-10; 94:17-19.

¹³ A uriul e a ta er a milluches er a psalm a mlo mechechei er a blekerdelel a klengar er tirke el mekngit el chad. Ngikang a locha chedal a telungalek er a Levait el ngklel a Asaf el milsiou el ngar a “Templo” er a Dios. Ngikang a mlo chuarm a uldesuel, e tiang a mlo uchul e ngmlo diak ledeu a rengul er aike el ngar ngii er ngii. Ngdirrek el mlo diak loba omereng el saul el kirel aike el klengeltengat el lengilai e le ngii el milsiou er a Dios.​—Psa. 73:2-5, 7, 12-14, 16, 17, 21.

14-15. Ngera kede mla suub er tirka el tedei el chad el kirel a debo er a Jehovah el kirel a ngeso?

¹⁴ Tirka el tedei el mesiungel a Jehovah el dulsaod er tir, a rokui el mle ultuil er a Jehovah el kirel a ngeso. Te uluuchais er Ngii er aike el meringel er a uldesuir lokiu a nglunguuch. Te di mle bleketakl louchais er ngii er aike el uchul me ngmle meringel a uldesuir. Te dirrek el millemolem el merael el mora blil a omengull el mora Jehovah.​—1 Sa. 1:9, 10; Psa. 55:22; 73:17; 122:1. 

¹⁵ Nguleak a klechubechub er a Jehovah e ngulenger a nglunguchir tirka el tedei el chad. A  Hana a mlo budech a uldesuel. (1 Sa. 1:18) E a David a milluches el kmo: “A ungil chad a chuarm er a betok el chelebuul, e ngdi RUBAK osebelii er ngii el rokui.” (Psa. 34:19) E ngike el ta er a milluches er a psalm a mlo mtebengii er a uriul el kmo a Jehovah a ‘orreked er a chimal’ e omekrael er ngii loba bltikerreng. Me ngmilengitakl el kmo: “Ngdi kuk le ngak e ng bai ungil a dekeed er a Dios! Ak metik er osebechakl el ngar a Rubak el Dios.” (Psa. 73:23, 24, 28) Me ngera kede suub er aika el tekoi? A lebebil er a taem e ngkmal mo meringel a mondai er kid el sebechel mo uchul a ringelel a uldesued. Engdi ngsebeched loutekangel a lsekum kede mo melebedebek a rolel e a Jehovah a mla ngosuterir a rebebil, e mo ultuil er ngii lokiu a nglunguuch, e dirrek el mo olengesenges er ngii lokiu sel doruul aike el tekoi el soal a doruul.​—Psa. 143:1, 4-8.

16-17. (a) Ngera uchul me ngkmal diak lekired el meleakl er kid er a rechad? (b) Ngmekera e sebeched el lmuut el mo mesisiich?

¹⁶ A kerebai er tirka el tedei el chad a osisecheklid er a lmuut el ta er a klou a ultutelel tekoi el kmo ngdiak el kired el mengeroid er kid er a Jehovah me a rechedal. (Osi. 18:1) A Nancy el kmal mlo chuarm a uldesuel er sel taem el bechil a chilitii a kmo: “Ngkmal mle betok el taem el diak el soak lomes er a rechad me a lechub e kungedecheduch er tir. Engdi ak mlo mtebengii el kmo a cherengel  a taem el kuleakl er ngak er a rechad, e ngmengal mo mekngit a renguk.” Tia el blekeradel a mlengodech er sel taem el Nancy a mlo osiik a rolel e olengeseu er a rebebil el chuarm er a mondai er tir. Me ngdilu el kmo: “Ak mle kerekikl lorrenges er tir sel losaod a mondai er tir. Seikid e ak mlo mtebengii el kmo ak mo chubteterir, e mo diak di kulatk er a chelebulek.”

¹⁷ Ngsebeched el lmuut el mo mesisiich lokiu sel debo er aike el miting er kid. Sel dengar aika el miting, e kede msa techellel a Jehovah me ngmo ‘ngelsuid e choloded.’ (Psa. 86:17) Ngar aika el miting e ngmelisiich er kid lokiu a chedaol reng er Ngii me a Tekingel me a dirrek el rechedal. Aika el miting a meskid a techelled el mo oldeu a rengud e “dul kasisiich.” (Rom 1:11, 12, BT) A odos er kid el Sophia a kmo: “A Jehovah me tia el klodam er kid a uchul me ak melemolem el mesisiich. Aika el miting er kid a kmal meklou a ultutelel er ngak. Ak mla metik el kmo sel bo kblechoel el teloi er a odingel obliil me a ongdibel, e ngmo diak el meringel a uldesuek e lesebek a renguk er a mondai er ngak.”

18. Ngera sebechel a Jehovah el meskid sel bo lemechitechut a rengud?

¹⁸ Me sel taem el bo lemechitechut a rengud, e lak dobes el kmo a Jehovah a diak di letibir el mo okngemed a rokui el ringelel a uldasu, e ngdirrek el kongei el ngosukid loutekangel a ringelel a uldesued er chelecha el taem. Ngii ngike el rullid el mo ‘soad e sebeched’ loutekangel a chelitechetul a rengud, e dirrek el mo er ngii a omeltked.​—Fil. 2:13.

19. Ngar a Rom 8:37-39, e ngmeskid a ngera el telbiil?

¹⁹ Monguiu er a Rom 8:37-39. A apostol el Paulus a oterekokl a rengud el kmo ngdiak a ngii di el tekoi el sebechel ngoikid el choridid er a bltikerreng er a Dios. Me ngmekera e mo sebeched el ngosuterir a rudam me a rudos er kid el tir a melasem outekangel a ringelel a uldesuir? A ongingil el suobel a mo mesaod er a rolel e ngsebeched loukerebai er a Jehovah lokiu sel dolecholt er a klechubechub, e dirrek el dolengeseu er a rudam me a rudos er kid er sel taem el lemeringel a uldesuir.