STUDY ARTICLE 25
Depend lo Jehovah Taem Iumi Stress
“Mi . . . barava kasem bigfala stress.”—1 SAM. 1:15, NW.
SONG 30 Dadi, God, and Fren Bilong Mi
WANEM IUMI BAE STORYIM *
1. Why nao iumi mas lisin lo warning blo Jesus?
LO PROFESI blo Jesus abaotem olketa last day, hem sei iumi mas ‘lukluk gud long iumiseleva nogud wei for wari abaotem olketa samting wea iumi needim long laef’ hem mekem iumi wikdaon. (Luke 21:34) Iumi need for lisin lo datfala warning. Why nao olsem? Bikos distaem, iumi evriwan mas deal witim olketa sem kaen problem wea savve mekem man stress.
2. Wanem nao olketa problem wea kosim stress for samfala brata and sista blo iumi?
2 Samfala taem iumi mas deal witim tu-thri problem lo semtaem. Tingim tufala example hia. Wanfala brata wea nem blo John, * hem safa from wanfala big sik wea affectim full body blo hem, and tu, hem barava sorre tumas bikos waef blo hem wea tufala marit for 19 year lusim hem. And then, tufala gele blo hem stop for worshipim Jehovah. Nara example, hem Bob and Linda, wea feisim olketa nara kaen problem. Tufala evriwan no garem waka, and from tufala no garem selen, tufala no garem ples for stap. And then lo semtaem, olketa doctor talem Linda hao hem garem sik lo heart wea maet savve kosim hem for dae, and tu wanfala nara sik start for spoelem immune system lo body blo hem.
3. Olsem Philippi 4:6, 7 storyim, wanem nao iumi sure lo hem?
3 Iumi sure Jehovah, God wea wakem iumi and wea lovem iumi, hem minim hao stress savve affectim iumi. And hem laek for helpem iumi for deal witim olketa challenge wea iumi feisim. (Readim Philippi 4:6, 7.) Bible garem staka example wea storyim olketa challenge wea pipol blo hem feisim. Bible showimaot hao Jehovah savve helpem olketa for deal witim olketa problem wea savve kosim stress. Iumi bae storyim tu-thri example.
ELIJAH—“HEM MAN WEA OLSEM IUMI NOMOA”
4. Olketa wanem kaen challenge nao Elijah feisim, and wanem nao tingting blo hem abaotem Jehovah?
4 Lo taem wea Elijah worshipim Jehovah, laef hem no isi and hem feisim olketa bigfala challenge. King Ahab hem wanfala lo olketa king wea no faithful and hem maritim Jezebel wea hem wanfala nogud woman wea worshipim Baal. Tufala mekhae lo worship blo Baal lo full nation and killim dae staka profet blo Jehovah. Bat lo datfala taem, Elijah hem stap sef. And lo taem blo bigfala hangre, Jehovah lukaftarem Elijah bikos Elijah depend lo hem. (Fas Kings 17:2-4, 14-16) And tu, taem Elijah mas feisim olketa profet and pipol wea worshipim Baal, hem depend lo Jehovah. Hem no hol bak for talem olketa Israelite for mas worshipim Jehovah. (Fas Kings 18:21-24, 36-38) Elijah lukim finis staka pruv wea showimaot Jehovah sapotim hem taem hem feisim olketa hard taem hia.
Jehovah sendem wanfala angel for helpem Elijah for kamap strong moa (Paragraf 5-6 storyim diswan) *
5-6. Olsem Fas Kings 19:1-4 storyim, wanem nao feeling blo Elijah, and wanem nao Jehovah duim for showimaot hem lovem Elijah?
5 Readim Fas Kings 19:1-4. Bat, taem Queen Jezebel laek for killim hem dae, Elijah barava fraet nao. So hem ranawe go lo Beer-sheba. From hem feel nogud tumas gogo hem sei, ‘Hemi moabeta fo mi dae nomoa.’ Wanem nao mekem hem feel olsem? Elijah hem no perfect, “hem man wea olsem iumi nomoa.” (Jas. 5:17) Maet hem barava stress and hem taed tumas. Luk olsem Elijah start for tingse waka wea hem duim for helpem pipol for worshipim Jehovah hem iusles. And hem tingse no eniting change nomoa lo Israel, and hem tingse hemseleva nomoa gohed worshipim Jehovah. (Fas Kings 18:3, 4, 13; 19:10, 14) Iumi maet sapraes lo hao disfala faithful profet hem feel olsem. Bat Jehovah minim feeling blo Elijah.
6 Jehovah no kros lo Elijah taem hem talemaot feeling blo hem. Bat, hem helpem Elijah for kamap strong moa. (Fas Kings 19:5-7) Jehovah helpem Elijah lo kaenfala wei for changem tingting blo hem taem hem showim hem bigfala paoa wea hem garem. And tu, Jehovah talem Elijah hao 7,000 pipol blo hem stap yet lo Israel wea no laek for worshipim Baal. (Fas Kings 19:11-18) Taem Jehovah duim olsem, datwan helpem Elijah for luksavve Jehovah lovem hem.
HAO JEHOVAH BAE HELPEM IUMI
7. Hao nao wei wea Jehovah helpem Elijah hem encouragem iumi?
7 Waswe, iu tu feisim samfala problem lo laef wea mekem iu stress? Taem iumi savve Jehovah minim feeling blo Elijah, datwan barava comfortim iumi. Datwan mekem iumi trustim hao Jehovah minim tu hao iumi feel taem iumi kasem hard taem. Hem savve wanem iumi fit for duim and no fit for duim, and hem savve tu lo olketa samting wea iumi tingting abaotem and feeling blo iumi. (Sams 103:14; 139:3, 4) Sapos iumi followim example blo Elijah for depend lo Jehovah, hem bae helpem iumi for deal witim olketa problem wea mekem iumi stress.—Sams 55:22.
8. Hao nao Jehovah bae helpem iu for deal witim stress?
8 Stress savve mekem iu ting olsem evri samting hem nating gud nomoa, and from datwan bae iu feel wikdaon. Sapos iu feel olsem, no forgetim hao Jehovah bae helpem iu for deal witim datwan. Hao nao Jehovah bae helpem iu? Hem laekem iu for storyim olketa problem and wari blo iu lo hem. And taem iu askem hem, bae hem helpem iu. (Sams 5:3; 1 Pet. 5:7) So prea lo Jehovah evritaem abaotem olketa problem blo iu. Hem tru, bae hem no story stret kam lo iu olsem hem duim lo Elijah, bat hem story lo iu thru lo Bible and organization blo hem. Olketa story wea iu savve readim lo Bible savve comfortim iu and givim iu hope. Olketa brata and sista blo iu tu savve encouragem iu.—Rome 15:4; Heb. 10:24, 25.
9. Lo wanem wei nao maet wanfala fren wea iumi trustim savve helpem iumi?
9 Taem Jehovah talem Elijah for givim samfala waka blo hem for Elisha, datwan barava helpem Elijah bikos Elisha kamap gudfala fren wea helpem hem for deal witim olketa hevi blo hem. Lo sem wei tu, taem iumi story witim wanfala gudfala fren wea iumi trustim, bae hem savve helpem iumi for deal witim olketa hevi blo iumi. (Mektu Kings 2:2; Provebs 17:17) Sapos iu feel olsem iu no garem eniwan wea iu trustim for story lo hem, prea lo Jehovah for helpem iu for faendem wanfala mature brata or sista wea savve encouragem iu.
10. Hao nao story blo Elijah savve givim iumi hope, and hao nao disfala promis blo Jehovah lo Aesaea 40:28, 29 savve helpem iumi?
10 Jehovah helpem Elijah for deal witim stress wea hem kasem and datwan helpem hem for gohed faithful for staka year. Story blo Elijah givim iumi hope. Samfala taem, maet iumi barava stress and datwan kosim body and feeling blo iumi for barava taed. Nomata olsem, sapos iumi depend lo Jehovah, hem bae givim iumi strong wea iumi needim for gohed worshipim hem.—Readim Aesaea 40:28, 29.
HANNAH, DAVID, AND WANFALA MAN WEA RAETEM PSALM DEPEND LO JEHOVAH
11-13. Hao nao stress hem affectim thrifala wea worshipim Jehovah lo bifor?
11 Bible storyim tu samfala narawan wea deal witim stress. Wanfala example hem Hannah. Hem garem bigfala stress. Hannah barava feel nogud bikos pipol ting daonem hem from hem no savve garem pikinini, and nara waef blo hasband blo hem savve barava tok spoelem hem. (Fas Samuel 1:2, 6) Stress wea kasem Hannah mekem hem barava sorre tumas, so hem gohed for krae nomoa and no savve kaikai.—Fas Samuel 1:7, 10.
12 Samfala taem, King David tu feisim bigfala stress. Tingim samfala challenge wea hem mas deal witim. Hem savve barava feel guilty bikos lo staka mistek wea hem duim. (Sams 40:12) Absalom, son wea hem lovem tumas, againstim hem, and from datwan Absalom hem dae. (Mektu Samuel 15:13, 14; 18:33) And wanfala lo olketa best fren blo hem tu againstim hem. (Mektu Samuel 16:23–17:2; Sams 55:12-14) Staka psalm wea David raetem storyim hao hem barava feel wikdaon, and hao hem barava trustim Jehovah and no letem eni samting for spoelem datwan.—Sams 38:5-10; 94:17-19.
Wanem nao helpem disfala man wea raetem psalm for garem stretfala tingting moa? (Paragraf 13-15 storyim diswan) *
13 Wanfala lo olketa man wea raetem psalm, hem start for jealous lo laef blo olketa nogud pipol. Luk olsem hem kam from famili blo datfala Levite, Asaph, and hem serve lo ples blo Jehovah for worship. Disfala man for raetem psalm hem stress bikos hem no hapi and no satisfae lo laef wea hem garem. Hem start for daotem olketa blessing wea man savve kasem from wei for worshipim Jehovah.—Sams 73:2-5, 7, 12-14, 16, 17, 21.
14-15. Wanem nao iumi lanem from thrifala example hia abaotem wei for depend lo Jehovah?
14 Thrifala wea worshipim Jehovah wea iumi just storyim, evriwan depend lo Jehovah for helpem olketa. Olketa prea lo Jehovah abaotem olketa hevi and wari blo olketa. Olketa storyim reason why olketa stress tumas. And olketa gohed for go lo ples for worshipim Jehovah.—Fas Samuel 1:9, 10; Sams 55:22; 73:17; 122:1.
15 Jehovah ansarem prea blo each wan lo olketa hia lo kaenfala wei. Hannah kasem peace lo mind. (Fas Samuel 1:18) David raet olsem: “Man wea hemi stret maet hemi safa lo plande trabol, bat [Jehovah] hemi sevem hem from olketa trabol ya.” (Sams 34:19) And man wea raetem psalm hem sei, hem olsem Jehovah holem raet hand blo hem and leadim hem witim olketa advaes blo hem. Hem sing olsem: “Hemi barava gud tumas long mi fo stap kolsap long yu God. Lod [Jehovah], yu nao yu Masta blong mi an sefples blong mi.” (Sams 73:23, 24, 28) Wanem nao iumi lanem from olketa example hia? Samfala taem olketa problem wea kasem iumi hem mekem iumi garem bigfala hevi and datwan kosim stress. Bat iumi savve deal witim datwan, sapos iumi ting raonem wanem Jehovah duim finis for olketa narawan, prea and depend lo hem, and obeyim wanem hem talem iumi for duim.—Sams 143:1, 4-8.
DEPEND LO JEHOVAH AND BAE IU WIN
Firstaem, wanfala sista feel olsem hem laek for stap seleva nomoa, bat hem changem datfala tingting taem hem duim samting for helpem olketa narawan (Paragraf 16-17 storyim diswan)
16-17. (a) Why nao iumi mas no separatem iumiseleva from Jehovah and pipol blo hem? (b) Wanem nao savve helpem iumi for kasem strong moa?
16 Thrifala example hia teachim iumi nara important samting, hem nao for iumi no separatem iumiseleva from Jehovah and pipol blo hem. (Provebs 18:1) Nancy, wea barava stress taem hasband blo hem lusim hem, hem sei: “Gogo staka taem mi no laek for lukim eniwan or story lo eniwan. Bat, taem mi spendem staka taem seleva datwan mekem mi for sorre go moa.” Then taem Nancy hem trae for helpem olketa narawan wea kasem problem, datwan barava helpem hem for change. Hem sei: “Mi lisin taem olketa narawan storyim olketa problem blo olketa. Taem olsem, mi tingim olketa and problem wea olketa garem, and mi no tingim tumas olketa hard taem wea mi kasem.”
17 Iumi savve kamap strong moa taem iumi go lo olketa meeting. Olketa meeting hem nara chance for Jehovah helpem and comfortim iumi. (Sams 86:17) Lo olketa meeting, Jehovah savve strongim iumi thru lo holy spirit, Bible, and pipol blo hem. Olketa meeting givim iumi chance for enjoyim wei for strongim each other. (Rome 1:11, 12) Wanfala sista wea nem blo hem Sophia sei: “Jehovah and organization blo hem nao helpem mi for no givap. Olketa meeting hem barava important samting lo mi. Taem mi spendem staka taem lo ministry and kongregeson, datwan helpem mi for deal witim stress and wari wea mi kasem.”
18. Sapos iumi feel wikdaon, wanem nao Jehovah bae duim for iumi?
18 Taem iumi feel wikdaon, tingim hao Jehovah promisim dat lo niu world bae hem finisim stress for olowe, and tu, hem promis for helpem iumi for deal witim stress distaem. Hem bae givim iumi strong for mekem iumi winim feeling for wikdaon and wei for no garem hope.—Phil. 2:13.
19. Wanem promis nao stap lo Rome 8:37-39?
19 Readim Rome 8:37-39. Aposol Paul promisim hao no eni samting savve stopem iumi for kasem love blo God. Hao nao iumi savve helpem olketa brata and sista blo iumi wea gohed traem best for deal witim stress? Lo nextfala study bae iumi storyim hao iumi savve followim example blo Jehovah for showimaot iumi tingim narawan and hao for sapotim olketa brata and sista taem olketa kasem stress.
SONG 44 Prayer Bilong Man wea Wikdaon
^ par. 5 Taem man stress tumas or hem stress for longfala taem, datwan savve kosim problem lo feeling and body. Hao nao Jehovah savve helpem iumi? Bae iumi storyim hao Jehovah helpem Elijah for deal witim stress wea kasem hem. Iumi bae lane abaotem tu olketa nara example lo Bible lo hao for depend lo Jehovah taem iumi kasem stress.
^ par. 2 Lo disfala article, mifala changem samfala nem.
