1. ¿Imanirtaq Jesuspa consëjunta cäsukunantsik?

USHAKË junaqkunapaq parlarninmi Jesusqa kënö nirqan: “Cuidakuyë [...] kawënikikunachö imëkapaq yarpachakïkunawan shonqïkikuna ni imëpis mana nitipakashqa kanampaq” (Lüc. 21:34). ¿Imanirtaq tsë consëjuta cäsukunantsik? Porqui Jehoväpa sirweqninkunapis llapan nunakunanöllam problëmakunapa y sufrimientukunapa pasantsik.

2. ¿Ima problëmakunapataq cristiänu mayintsikkuna pasayarqan?

² Höraqa mëtsika problëmakunapa pasarninmi alläpa llakikuntsik. Rikärishun wakin cristiänu mayintsikkuna imapa pasayanqanta. Wawqi Johnmi * esclerosis multiple nishqan qeshyawan qeshyan. Y 19 watapa casädu këkäyaptinmi warmin dejarïkur ëwakurqan, tsëmi alläpa sufrirqan. Tsëpitanam ishkan warmi wamrankuna Jehoväta sirwita dejariyarqan. Bob jutiyoq wawqi y warmin Lindanam, imëka problëmakunapa pasayarqan. Ishkankunam trabäjunnaq quedariyarqan, tsëmi täräyanqan wayichö quedakïta puëdiyarqannatsu. Jina shonqunchö grävi qeshyawan kanqanta y tullu nanëwan kanqantam doctorkuna Lindata niyarqan.

3. Filipensis 4:6, 7 textu ninqannö, ¿imapitataq següru këkänantsik?

³ Segürum kanantsik kuyakoq Teytantsik Jehoväqa, mana allikunapa pasanqantsik höra imanö sientikunqantsikta entiendinqanta y yanapamënintsikta munanqanta (leyi Filipensis 4:6, 7). Jina Bibliachömi tarintsik Diospa unë sirweqninkunapis imëka problëmakunapa pasashqa kayanqanta y Dios imanö yanapashqa kanqanta.

4. ¿Ima problëmakunapataq Elïas pasarqan y imanötaq Jehoväman confiakunqan yanaparqan?

⁴ Elïasqa alläpa mana alli tiempuchömi Jehoväta sirwirqan y imëkakunapam pasarqan. Israelpa reynin Acabqa, Baalta adoraq mana alli warmiwanmi casakurqan. Acabwan warmin Jezabelmi entëru nacionchö nunakuna Baalta adorayänampaq, mandakuyarqan y Jehoväpa profëtankunatapis wanutsiyarqanmi, peru Elïasqa escaparmi ewkurqan. Jina mallaqë kanqan tiempupis Jehoväman confiakurmi wanurqantsu (1 Rey. 17:2-4, 14-16). Jina Jehoväman confiakurninmi Baalta sirweqkunapa contran churakarqan, y israelïtakunatam animarqan Jehoväta yapë sirwiyänampaq (1 Rey. 18:21-24, 36-38). Tsë mana alli tiempukunachö Jehovä yanapanqantam Elïasqa rikarqan.

5, 6. 1 Rëyes 19:1-4 textu ninqannö, ¿imanötaq Elïas sientikurqan y imanötaq Jehovä yanaparqan?

⁵ (Leyi 1 Rëyes 19:1-4 *). Reyna Jezabel  wanutsita munaptinmi Elïasqa alläpa mantsakarqan. Tsëmi Beer-Sëba markayaq escapar ëwakurqan, y alläpa llakikurmi wanukïtapis munarqan. ¿Imanirtaq tsënö sientikurqan? Porqui “noqantsiknö sentimientuyoq nunam karqan” (Sant. 5:17). Jina alläpa yarpachakïyoq y alläpa utishqa karninchi Elïasqa tsënö sientikurqan. Jinamampis Diosta sirwiyänampaq israelïtakunata yanapanqan imapaqpis mana sirwishqa kanqantachi pensarqan, porqui israelïtakunaqa manam cambiayarqantsu y japallanlla Jehoväta sirwïkanqantam pensarqan (1 Rey. 18:3, 4, 13; 19:10, 14). Elïas imanö sientikunqantaqa itsa noqantsikqa entiendishuntsu, peru Jehoväqa entiendirqanmi.

⁶ Elïas imanö sientikunqanta willaptinqa Jehoväqa manam piñaparqantsu, tsëpa rantinqa yanaparqanmi (1 Rey. 19:5-7). Y tsëpitanam, kuyëllapa imanö pensanqanta correginampaq puëdeq këninta rikätsirqan. Jinamampis japallan mana kanqantam nirqan, porqui 7.000 israelïtakunam Baalta adorayarqantsu (1 Rey. 19:11-18). Tsënömi Elïasta Jehovä alläpa kuyanqanta rikätsirqan.

7. Elïasta Jehovä imanö yanapanqanman pensanqantsikqa, ¿imanötaq yanapamantsik?

⁷ ¿Problëmakunapaku noqantsikpis pasëkantsik? Elïas imanö sientikunqanta Jehovä entiendinqanmi yanapamäshun. Jinamampis imanir yarpachakunqantsikkunatam entiendin, y rurëta puëdinqantsikkunata y mana puëdinqantsikkunatam musyan (Sal. 103:14; 139:3, 4). Elïasnö Jehoväpa yanapakïninta ashirqa, problëmantsikkunaman alläpa mana yarpachakunapaqmi yanapamäshun (Sal. 55:22).

8. ¿Imanötaq Jehovä yanapamantsik problëmakunapa pasashqa?

⁸ Alläpa yarpachakïyoq karninqa, problëmantsikkuna imëpis mana alliyänampaq kaqtam pensashun y tsëqa qelanäratsimashwanmi. Tsë pasamashqaqa Jehovä yanapamänapaq kaqmanmi yarpänantsik. ¿Imataq yanapamäshun? Yarpachakïnintsikkunata pëta willanapaqmi nimantsik y yanapamänapaq kaqtam änimantsik (Sal. 5:3; 1 Pëd. 5:7). Tsëmi problëmantsikkunapita imëpis parlapäshun. Elïastanö kikin mana parlapämashqapis, Palabran Bibliawan y markanwanmi Jehoväqa parlapämantsik. Tsëmi Palabran Bibliachö unë sirweqninkunapita leyinqantsikqa alläpa yanapamantsik y problëmantsikkuna alliyänampaq kaqmanmi confiakuntsik. Jinamampis cristiänu mayintsikkunam shoqamantsik (Rom. 15:4; Heb. 10:24, 25).

9. ¿Imanötaq juk alli amïguntsik yanapamënintsikta puëdin?

⁹ Jehoväqa Elïastam nirqan rurëninkunachö Eliseu yanapanampaq kaqta. Tsënöpa llakishqa kanqan hörakuna yanapanampaq. Tsënöllam mana allikunapa pasanqantsik hörakuna juk alli amïguntsik yanapamäshun (2 Rey. 2:2; Prov. 17:17). Y problëmantsikkunata pitapis willanapaq mana kanqanta pensarqa, Jehoväta mañakushun juk poqu cristiänuta tarinapaq, tsënöpa wananqantsik höra yanapamänapaq.

10. (1) Elïasta pasanqankunaqa, ¿imanötaq yanapamantsik? (2) Isaïas 40:28, 29 textuchö Jehovä änimanqantsikqa, ¿imanötaq yanapamantsik?

¹⁰ Jehovämi Elïasta yanaparqan alläpa mana yarpachakunampaq, tsënöpa atska watakunapa sirwirnin sïguinampaq. Elïasta pasanqankunaqa shamoq tiempuchö imëkapis alliyänampaq kaqman confiakunapaqmi yanapamantsik. Itsa höraqa imëka problëmakunapa pasarnin alläpa yarpachakïyoq karnin utishqa sientikushun. Peru Jehoväman confiakushqaqa, pëmi  sirwirnin sïguinapaq yanapamäshun (leyi Isaïas 40:28, 29 *).

11-13. Diospa kiman sirweqninkunaqa, ¿imakunapataq pasayarqan?

¹¹ Jina Bibliachöqa tarintsikmi unë tiempuchö Diospa wakin sirweqninkunapis alläpa llakikïpa pasayanqanta. Jukqa Änam karqan, pëqa wamrayoq këta mana puëdirmi penqakïkunapa pasarqan, y Elcanäpa juk kaq warmimpis alläpa burlakurmi sufritseq (1 Sam. 1:2, 6). Tsëmi alläpa llakishqa karnin mikïtapis munarqantsu (1 Sam. 1:7, 10).

¹² Rey Davidpis alläpa sufrimientukunapam pasarqan. Y jutsakunata ruranqampitam alläpa llakikurqan (Sal. 40:12). Kuyanqan tsurin Absalonpis contranmi churakarqan y tsërëkurmi tiempuwanqa Absalonta wanuratsiyarqan (2 Sam. 15:13, 14; 18:33). Jinamampis mas confiakunqan amïgunmi traicionarirqan (2 Sam. 16:23–17:2; Sal. 55:12-14). Tsëmi escribinqan salmuskunachöqa alläpa llakishqa sientikunqanta rikantsik, jina Jehoväman llapan shonqunwan confiakunqantapis escribirqanmi (Sal. 38:5-10; 94:17-19).

¹³ Jina Salmus libruta escribeq nunapis alläpa llakishqam sientikurqan. Pëqa Jerusalen templuchömi Diosta sirweq, y itsa Asafpa kastampita karqan. Pëqa rikaq mana alli nunakuna alli kawakoqtam, tsëmi pëkunanö këta munar alläpa llakikoq. Jinamampis Diosta sirwinqampita  chaskinqan bendicionkunatam mana kaqpaqna churar qallëkurqan (Sal. 73:2-5, 7, 12-14, 16, 17, 21).

14, 15. ¿Imatataq yachakuntsik unë sirweqninkunata Jehovä yanapanqampita?

¹⁴ Diospa tsë kiman sirweqninkunaqa, yanapanampaqmi Jehoväman mañakuyarqan y imanö sientikuyanqantam willayarqan. Y Diosta adorayänan wayimanmi ëwar sïguiyarqan (1 Sam. 1:9, 10; Sal. 55:22; 73:17; 122:1).

¹⁵ Kuyakoq Teytantsik Jehoväqa sirweqninkunata yanaparqanmi. Änaqa yamë këtam tarirqan (1 Sam. 1:18). Davidnam kënö nirqan: “Alli nunakunataqa imëka mana allikunam pasan, peru tsë llapampitaqa Jehovämi libran” (Sal. 34:19). Salmus libruta qellqaq nunapis nirqan, derëcha makinwan Jehovä tsararëkanqanta y consëjunkunawan pushëkanqantam. Jina kënöpis nirqanmi: “Noqapaqqa Diospa amïgun këqa alläpa allim. Ciëluchö y Patsachö Autoridäyoq Jehovämi imëkapitapis tsapämaqnï” (Sal. 73:23, 24, 28). Tsënöllam noqantsiktapis problëmakunapa pasarnin llakikushqaqa unë sirweqninkunata yanapanqannölla Jehoväqa yanapamäshun. Peru tsëpaqqa mañakunantsikmi y llapan nimanqantsikkunatam cäsukunantsik (Sal. 143:1, 4-8).

16, 17. (1) ¿Imanirtaq Jehoväpita y markampita imëpis rakikäkurinantsiktsu? (2) Problëmakunapa pasashqapis, ¿imataq yanapamäshun alleq tsarakunapaq?

¹⁶ Jina Diospa unë sirweqninkunapitaqa yachakuntsik Jehoväpita y markampita mana rakikäkurinapaqmi (Prov. 18:1). Nancy jutiyoq panintsikmi alläpa sufrirqan nunan jaqirïkur ëwakuptin. Kënömi cuentakun: “Atska junaqkunapam pitapis rikëta ni parlapëta munarqätsu. Peru tsëqa masmi llakitsimarqan”. Kë panintsikqa problëmakunapa pasëkaqkunatam yanapar qallëkurqan, tsëqa mas allina sientikunampaqmi yanaparqan. Y kënömi nin: “Imanö sientikuyanqanta cuentayämaptinmi shumaq wiyaq kä y problëmankunaman mas pensanqämi yanapamarqan kikïman y problëmäkunaman alläpa manana yarparänäpaq”.

¹⁷ Jina reunionkunaman ëwanqantsikpis mas kallpayoq kanapaqmi yanapamäshun. Porqui reunionkunaman ëwarqa Jehoväpa yanapakïnintam chaskintsik (Sal. 86:17). Tsëchöqa santu espïritunwan, Palabran Bibliawan y sirweqninkunawanmi yanapamantsik. Y juknintsik juknintsikpis yanapanakïta puëdintsikmi (Rom. 1:11, 12). Sofïa jutiyoq paninam kënö willakun: “Mana allikunapa pasarpis Jehoväwan cristiänu mayintsikkunaqa alli tsarakunäpaqmi yanapayämashqa. Noqapaqqa reunionkunaman ëwëmi imapitapis mas precisan. Jinamampis cuentatam qokurqö Diospita mas yachatsikurnin y congregacionchö mas yanapakurninqa mana allikunapa pasanqä hörakuna alläpa mana yarpachakunäpaq yanapamanqanta”.

18. ¿Imanötaq Jehoväqa llakinashqa sientikunqantsik höra yanapamantsik?

¹⁸ Llakinashqa sientikunqantsik hörakuna yarpäshun Jehovä yanapamänapaq kaqman, y shamoq tiempuchöpis llapan sufrimientuntsikkunatam ushakätsinqa. Jinamampis valortam qomantsik mana allikunapa pasashqa alli tsarakunapaq (Filip. 2:13).

19. Romänus 8:37-39 textuqa, ¿imatataq änimantsik?

¹⁹ (Leyi Romänus 8:37-39). Diospa kuyakïnimpita imapis rakimënintsikta mana puëdinqantam apostol Pabluqa nirqan. Problëmakunapa pasëkaq cristiänu mayintsikkunataqa, ¿imanötaq yanapashwan? Qateqnin kaq yachatsikïchömi yachakushun ankupäkoq kanapaq y Jehovä munanqannö cristiänu mayintsikkunata yanapanapaq kaqta.