1. Kungani kufanele sisilalele secwayiso saJesu?

ESIPHROFETHWENI lesimayelana nemalanga ekugcina, Jesu watsi: “Ticapheleni kute tinhlitiyo tenu tingasindvwa . . . tinkhatsato tekuphila.” (Luk. 21:34) Kufanele sisilalele lesecwayiso. Leni? Ngobe sibhekana netinkinga letinyenti njengabo bonkhe bantfu.

2. Ngutiphi tinkinga letimatima bazalwane betfu lababhekana nato?

² Ngalesinye sikhatsi singahle sibe netinkinga letinyenti letisicindzetelako. Nasi sibonelo. Umzalwane John * lonesifo lesihlasela umgogodla nemitsambo yebucopho lokutsiwa yi-multiple sclerosis, weva buhlungu kakhulu ngesikhatsi umkakhe amshiya ngemuva kweminyaka lengu-19 bashadile. Emadvodzakati akhe lamabili abese ayayekela kukhonta Jehova. Bob nemkakhe Linda baba netinkinga letehlukile kutaJohn. Baphelelwa ngumsebenti futsi balahlekelwa likhaya labo. Ngetulu kwaletinkinga, dokotela watjela Linda kutsi bekanesifo senhlitiyo kanye nesifo lesibulala emasotja emtimba.

3. Ngekusho kwaFiliphi 4:6, 7, yini lesiciniseka ngayo?

³ Siyaciniseka kutsi uMdali longuBabe wetfu lositsandzako Jehova uyayicondza indlela lesitiva ngayo nasinetinkinga futsi ufuna kusisita sikhone kubhekana nato. (Fundza Filiphi 4:6, 7.) LiVi laNkulunkulu linetibonelo letinyenti letichaza tinkinga tinceku taJehova letatibeketelela. Liphindze lichaze kutsi Jehova watisita njani takhona kubhekana netimo leticindzetelako. Ase sihlolisise tibonelo letimbalwa.

4. Ngutiphi tinkinga Elija labhekana nato, futsi wativa njani ngaJehova?

⁴ Elija wakhonta Jehova ngetikhatsi letimatima futsi wabhekana netinkinga letinyenti. INkhosi Ahabi beyingulenye yemakhosi aka-Israyeli lebekangaketsembeki, yashada naJezebeli lobekenta tintfo letimbi futsi akhonta Bhali. Bobabili benta kukhontwa kwaBhali kwandza esiveni sema-Israyeli futsi babulala baphrofethi baJehova labanyenti. Elija wakhona kubaleka futsi waphindze wasindza endlaleni lenkhulu ngobe beketsembele kuJehova. (1 Khos. 17:2-4, 14-16) Ngetulu kwaloko, Elija wetsembela kuJehova ngesikhatsi aphikiswa baphrofethi kanye nebantfu lebebakhonta Bhali. Wakhutsata ema-Israyeli kutsi akhonte Jehova. (1 Khos. 18:21-24, 36-38) Elija wabona kahle kutsi Jehova bekamsekela nakabhekene netikhatsi letimatima.

5-6. Ngekusho kwembhalo wa-1 Emakhosi 19:1-4, Elija wativa njani, futsi Jehova wakhombisa njani kutsi bekamtsandza?

⁵ Fundza 1 Emakhosi 19:1-4. Elija wesaba ngesikhatsi iNdlovukazi Jezebeli ifuna kumbulala, ngako wabaleka waya eBherisheba. Wacindzeteleka kakhulu waze ‘wathandazela kutsi asale afa.’ Yini leyamenta wafisa kufa? Elija bekayindvodza lebeyinesono futsi “abengumuntfu lonemiva lefana neyetfu.” (Jak. 5:17) Kungenteka bekacindzeteleke kakhulu futsi akhatsele. Mhlawumbe Elija wacabanga kutsi imetamo yakhe yekusita bantfu bakhonte Nkulunkulu beyilite ngenca yekutsi kuso sonkhe sive sema-Israyeli bekunguye kuphela lobekakhonta Jehova. (1 Khos. 18:3, 4, 13; 19: 10, 14) Kungenteka ikumangalise indlela lomphrofethi lowetsembekile labetiva ngayo, kodvwa Jehova bekayicondza.

⁶ Jehova akazange amtsetsise Elija ngekuveta indlela labetiva ngayo. Kunaloko, wamsita ngekutsi amnikete emandla. (1 Khos. 19:5-7) Ngekuhamba kwesikhatsi, Jehova wamkhombisa emandla akhe lamakhulu kute amsite alungise indlela labecabanga ngayo. Jehova watsi bekusenebantfu labangu-7 000 labebangakavumi kukhonta Bhali ka-Israyeli. (1 Khos. 19:11-18) Jehova wamkhombisa ngetindlela letinyenti Elija kutsi bekamtsandza.

7. Indlela Jehova lasita ngayo Elija isicinisekisa ngani?

⁷ Sikhona yini simo lesicindzetelako lobhekene naso? Kusidvudvuta kakhulu kwati kutsi Jehova wayicondza indlela Elija labetiva ngayo! Kuyasicinisekisa kutsi uyaticondza tinkinga lesibhekana nato. Uyakwati lesingeke sikhone kukwenta, indlela lesicabanga ngayo kanye nendlela lesitiva ngayo. (Hla. 103:14; 139:3, 4) Nangabe silingisa Elija ngekutsi setsembele kuJehova, utasisita sikhone kubhekana netinkinga letisenta sicindzeteleke.—Hla. 55:22.

8. Jehova utakusita njani ukhone kubhekana netinkinga?

⁸ Kukhatsateka kungasenta sicabange kutsi timo ngeke tize tibe ncono futsi kungasicedza emandla. Nangabe ucindzetelekile, khumbula kutsi Jehova utakusita ukhone kubhekana nako. Utakusita njani? Ukuncusa kutsi umtjele tinkinga takho kanye nendlela lotiva ngayo futsi utakusita. (Hla. 5:3; 1 Phet. 5:7) Ngako-ke thantaza njalo kuJehova umtjele tinkinga takho. Ngeke akhulume nawe ngalokucondzile njengobe enta ku-Elija, kodvwa utawusebentisa liVi lakhe liBhayibheli kanye nenhlangano yakhe. Tibonelo lesifundza ngato eBhayibhelini tingakudvudvuta futsi tikunikete litsemba. Bazalwane nabodzadze nabo bangakukhutsata.—Rom. 15:4; Heb. 10:24, 25.

9. Umngani lometsembako angakusita njani?

⁹ Jehova watjela Elija kutsi anikete Elisha leminye yemisebenti lebekayenta futsi wamnika umngani lokahle lobekatamcinisa nakanetinkinga letimcedza emandla. Ngendlela lefanako, nangabe sitjela bangani betfu indlela lesitiva ngayo, batasisita sikhone kubhekana netimo leticindzetelako. (2 Khos. 2:2; Taga 17:17) Nangabe ubona ngatsi kute umuntfu longamtjela tinkinga takho kanye nendlela lotiva ngayo, thantaza kuJehova umcele akusite utfole umKhristu lovutsiwe longakhona kukukhutsata.

10. Lokwenteka ku-Elija kusiniketa njani litsemba, futsi setsembiso lesiku-Isaya 40:28, 29 singasisita njani?

¹⁰ Jehova wasita Elija kutsi akhone kubhekana netinkinga futsi wamkhonta ngekwetsembeka iminyaka leminyenti. Lokwenteka ku-Elija kusiniketa litsemba. Ngalesinye sikhatsi singahle sibhekane netinkinga letimatima letingasenta sitive sikhatsele futsi sicindzetelekile. Kodvwa nangabe setsembela kuJehova utasipha emandla lesiwadzingako kute sikhone kuchubeka simkhonta.—Fundza Isaya 40:28, 29.

11-13. Tinceku taNkulunkulu tasendvulo letintsatfu tativa njani ngesikhatsi ticindzetelekile?

¹¹ Labanye bantfu lokukhulunywa ngabo eBhayibhelini nabo babhekana netinkinga. Nasi sibonelo, Hana wacindzeteleka kakhulu ngenca yelihlazo lekungabatfoli bantfwana futsi zakwabo bekahlekisa ngaye  kabuhlungu. (1 Sam. 1:2, 6) Hana wacindzeteleka kakhulu futsi weva buhlungu kangangekutsi wakhala waze wangakhoni ngisho nekudla.—1 Sam. 1:7, 10.

¹² Ngalesinye sikhatsi, iNkhosi Davide yacindzeteleka kakhulu. Cabanga ngetinkinga leyabhekana nato. Yatisola kakhulu ngenca yemaphutsa lamanyenti leyawenta. (Hla. 40:12) Indvodzana yakhe Absalomu labeyitsandza yamvukela futsi ekugcineni yabulawa. (2 Sam. 15:13, 14; 18:33) Lomunye webangani baDavide akazange etsembeke kuye. (2 Sam. 16:23–17:2; Hla. 55:12-14) Tihlabelelo letinyenti Davide latibhala tichaza indlela labetiva ngayo nakacindzetelekile kanye nekwetsembela kwakhe ngalokuphelele kuJehova.—Hla. 38:5-10; 94:17-19.

¹³ Ngekuhamba kwesikhatsi lomunye umhlabeleli wacala kuba nemona ngendlela bantfu lababi lebebaphumelela ngayo ekuphileni. Kungenteka kutsi bekasitukulwane sa-Asafa futsi angumLevi akhonta endlini lengcwele yaNkulunkulu. Lomhlabeleli wacindzeteleka kakhulu futsi wangajabuli. Waze wacala kungabata tibusiso letitfolakala ngekukhonta Jehova.—Hla. 73:2-5, 7, 12-14, 16, 17, 21.

14-15. Letibonelo letintsatfu letiseBhayibhelini tisifundzisani mayelana nekufuna lusito kuJehova?

¹⁴ Letinceku taJehova letintsatfu lesisandza kufundza ngato betetsembele kuJehova. Tathantaza kuJehova tamtjela ngetinkinga lebetibhekene nato. Takhuluma ngekukhuleka tatjela Jehova ngetintfo lebetitenta ticindzeteleke, futsi tachubeka tiya endlini yaJehova.—1 Sam. 1:9, 10; Hla. 55:22; 73:17; 122:1.

¹⁵ Jehova wativela tinceku takhe futsi watisita. Hana wajabula. (1 Sam. 1:18) Davide  wabhala: “Lolungile uhlala ajingwe tinhlupheko letinyenti, kodvwa Simakadze umkhulula kuto tonkhe.” (Hla. 34:19) Ngekuhamba kwesikhatsi umhlabeli wabona kutsi Jehova ‘bekambambe ngesandla [sakhe] sekudla,’ amcondzisa ngekumeluleka ngelutsandvo. Wahlabela: “Kodvwa mine kungilungele kusondzela kuNkulunkulu, Simakadze, iNkhosi, ngimente waba siphephelo sami.” (Hla. 73:23, 24, 28) Lokwenteka kuDavide kusifundzisani? Ngalesinye sikhatsi sitawubhekana netinkinga letimatima letitawusenta sicindzeteleke. Kodvwa singakhona kubhekana nato nangabe sizindla ngendlela Jehova lasita ngayo labanye, sithantaze kuye, futsi sente loko lakufunako.—Hla. 143:1, 4-8.

16-17. (a) Kungani kungakafaneli sitehlukanise naJehova kanye nebazalwane betfu? (b) Yini lengasisita kutsi siphindze sitfole emandla?

¹⁶ Letibonelo letintsatfu tiphindze tisifundzise nasi sifundvo lesibalulekile—kufanele singatikhweshisi kuJehova kanye nakubantfu bakhe. (Taga 18:1) Nancy wacindzeteleka kakhulu ngesikhatsi ashiywa ngumyeni wakhe, utsi: “Kwaphela emalangeni lamanyenti ngingafuni kubona bantfu nobe kubakhulumisa. Nangitehlukanisa  kakhulu nebantfu bengitiva ngicindzeteleke kakhulu.” Kepha simo saba ncono ngesikhatsi Nancy afuna tindlela tekusita labanye labanetinkinga. Utsi: “Bengibalalelisisa labanye nabangichazela tinkinga tabo. Ngabona kutsi nangabe ngibavela kakhulu labanye angicabangi kakhulu ngetinkinga tami.”

¹⁷ Kuba khona njalo emihlanganweni yelibandla kungasisita kutsi siphindze sitfole emandla. Nangabe sisemhlanganweni, siba nematfuba lamanyenti ekutsi Jehova ‘asisite futsi asidvudvute.’ (Hla. 86:17) Jehova usicinisa asebentisa umoya wakhe longcwele, liVi lakhe, kanye nebantfu bakhe. Imihlangano isiniketa litfuba lekutsi “sikhutsatane.” (Rom. 1:11, 12) Dzadze lobitwa ngekutsi nguSophia watsi: “Jehova kanye nebazalwane bami bangisitile kutsi ngicinisele, futsi imihlangano yelibandla beyibaluleke kakhulu kimi. Ngibonile kutsi nangicitsa sikhatsi lesinyenti ensimini kanye nasebandleni, ngiyakhona kubhekana nekucindzeteleka kanye nekukhatsateka.”

18. Yini Jehova langasiniketa yona nangabe sicindzetelekile?

¹⁸ Nangabe sicindzetelekile, kufanele sikhumbule kutsi Jehova akagcini nje ngekusetsembisa kutsi utawucedza tonkhe tinkinga tetfu kodvwa uphindze asisite sikhone kubhekana nato nyalo. Usiniketa “sifiso nemandla” ekuncoba kucindzeteleka kanye nekuphelelwa litsemba.—Fil. 2:13.

19. UmBhalo waRoma 8:37-39 usicinisekisa ngani?

¹⁹ Fundza Roma 8:37-39. Umphostoli Pawula usicinisekisa ngekutsi kute lokungasehlukanisa nelutsandvo lwaNkulunkulu. Singabasita njani bazalwane betfu nabodzadze lababeketelela timo letibacindzetelako? Esihlokweni lesilandzelako sitawufundza kabanti ngekutsi singamlingisa njani Jehova sibavele labanye futsi sisekele bazalwane betfu nabacindzetelekile.