1. Tanbasá ita tenke rona ba Jesus nia avizu?

IHA Jesus nia profesia kona-ba loron ikus, nia hatete: “Kuidadu didiʼak imi-nia an bá, atu nuneʼe imi-nia laran la todan tanba . . . hanoin resin kona-ba moris neʼe.” (Lc 21:34) Ita tenke rona ba avizu neʼe. Tanbasá? Hanesan ema barak, agora daudaun ita mós hasoru problema neʼebé halo ita estrese.

2. Problema saida deʼit mak ita-nia irmaun-irmán sira hasoru?

² Dala ruma, ita hasoru problema barak iha tempu hanesan. Haree toʼok ezemplu sira tuirmai. Testemuña ida naran John, * neʼebé moras todan, sente triste tebes kuandu ninia feen neʼebé kaben ho nia ba tinan 19 ona, soe hela nia. Tuirmai ninia oan-feto naʼin-rua mós la serbí tan Jeová. Feen-laʼen ida naran Bob no Linda hasoru problema seluk fali. Sira lakon serbisu, no mós tenke muda uma tanba labele selu. Liután neʼe, doutór hatete katak Linda iha moras-fuan no ida-neʼe perigu ba ninia moris. Nia mós iha moras seluk tan neʼebé aat tebes.

3. Filipe 4:6, 7, hatete saida kona-ba Jeová?

³ Ita bele fiar katak Jeová, Ita-nia Kriadór no Aman neʼebé nakonu ho domin, komprende ita-nia sentimentu bainhira ita estrese. Nia hakarak ajuda ita atu tahan hasoru problema sira. (Lee Filipe 4:6, 7.) Iha ezemplu barak iha Bíblia kona-ba fiar-naʼin sira neʼebé hasoru susar oioin. Bíblia mós esplika kona-ba oinsá Jeová ajuda sira atu  tahan hasoru situasaun neʼebé halo sira estrese. Mai ita koʼalia kona-ba ezemplu balu.

4. Susar saida deʼit mak Elias hasoru, no nia sente oinsá kona-ba Jeová?

⁴ Elias serbí Jeová durante tempu susar no nia hasoru susar barak. Liurai Acab iha Izraél la laran-metin ba Maromak no nia kaben ho feto laran-aat ida naran Jezabel neʼebé adora Baal. Sira naʼin-rua halo nakonu rai neʼe ho adorasaun ba Baal no oho Jeová nia profeta barak. Maibé Elias konsege halai. Bainhira mosu rai-hamlaha boot, nia nafatin moris tanba nia sadere ba Jeová. (1 Reis 17:2-4, 14-16) Elias mós sadere ba Jeová bainhira nia kontra povu no profeta sira neʼebé adora Baal. Nia anima ema Izraél atu adora Jeová. (1 Reis 18:21-24, 36-38) Elias haree rasik oinsá Jeová apoia nia dala barak durante tempu susar.

5-6. Tuir 1 Reis 19:1-4, Elias sente oinsá? Oinsá mak Jeová hatudu ninia domin ba Elias?

⁵ Lee 1 Reis 19:1-4. Elias sai taʼuk bainhira Liurai-feto Jezabel jura atu oho nia. Elias halai toʼo área Beer-Seba. Nia sai laran-kraik toʼo “nia husu atu mate deʼit”. Saida mak halo nia sente hanesan neʼe? Elias laʼós ema perfeitu, nia “iha sentimentu hanesan ita”. (Tgo 5:17) Karik nia sente hanesan neʼe tanba nia estrese no sente kole loos. Karik Elias hanoin katak ninia hakaʼas an atu ajuda povu adora Jeová mak saugati deʼit, la iha ema ida  mak serbí Jeová, só nia deʼit. (1 Reis 18:3, 4, 13; 19:10, 14) Karik ita hakfodak ho Elias nia sentimentu neʼe. Maski nuneʼe, Jeová komprende Elias nia sentimentu.

⁶ Jeová la sai hirus ba Elias tanba fó sai ona ninia sentimentu. Maibé nia ajuda Elias atu hetan fali forsa. (1 Reis 19:5-7) Jeová mós ho laran-diʼak hadiʼa Elias nia hanoin liuhusi hatudu sai ninia forsa. Tuirmai, Jeová fó sai ba Elias katak sei iha ema naʼin-7.000 iha Izraél neʼebé lakohi adora Baal. (1 Reis 19:11-18) Hodi fó sai buat sira-neʼe, Jeová hatudu ninia domin ba Elias.

7. Oinsá Jeová nia dalan atu ajuda Elias, fó konfiansa ba ita?

⁷ Ita mós hasoru daudaun situasaun neʼebé lori estrese ka lae? Ita sente kmaan tebes atu hatene katak Jeová komprende Elias nia sentimentu. Neʼe halo ita iha konfiansa katak Jeová mós komprende ita-nia laran-susar bainhira ita hasoru problema. Nia hatene buat neʼebé ita bele halo no labele halo, nia mós hatene ita-nia sentimentu no hanoin. (Sal 103:14; 139:3, 4) Se ita banati-tuir Elias hodi sadere ba Jeová, nia sei ajuda ita tahan hasoru problema sira neʼebé lori estrese.​—Sal 55:22.

8. Oinsá mak Jeová sei ajuda ita atu tahan hasoru estrese?

⁸ Estrese bele halo ita hanoin negativu no sente laran-kraik. Se ida-neʼe akontese, hanoin-hetan katak Jeová sei ajuda ita atu tahan hasoru estrese. Oinsá mak Jeová bele ajuda Ita? Nia konvida Ita atu fó sai Ita-nia problema no Ita-nia sentimentu. Nia sei hatán Ita-nia orasaun. (Sal 5:3; 1 Ped 5:7) Tan neʼe, halo orasaun beibeik ba Jeová kona-ba Ita-nia problema. Maromak sei la koʼalia ba Ita hanesan nia halo ba Elias, maibé nia sei koʼalia ba Ita liuhusi ninia Liafuan, Bíblia, no mós ninia organizasaun. Ezemplu sira iha Bíblia bele fó kmaan no esperansa ba Ita. Ita-nia irmaun-irmán sira mós bele anima Ita.​—Rom 15:4; Ebr 10:24, 25.

9. Oinsá mak belun ida neʼebé ita tau fiar bele ajuda ita?

⁹ Jeová haruka Elias atu fahe serbisu ba Eliseu. Hodi halo nuneʼe, Jeová fó ba Elias belun diʼak ida neʼebé bele ajuda nia tahan hasoru sentimentu laran-kraik. Hanesan neʼe mós, bainhira ita fó sai ita-nia sentimentu ba ita-nia belun ida, nia bele ajuda ita atu tahan hasoru ita-nia estrese. (2 Reis 2:2; Prov 17:17) Se Ita hanoin katak Ita labele fahe Ita-nia sentimentu ba ema ruma, halo orasaun ba Jeová atu ajuda Ita buka ema Kristaun maduru ida neʼebé bele anima Ita.

10. Oinsá mak Elias nia esperiénsia fó ita esperansa? Oinsá mak promesa neʼebé hakerek iha Isaias 40:28, 29 ajuda ita?

¹⁰ Jeová ajuda Elias atu tahan hasoru estrese no serbí ho laran-metin ba tinan barak. Elias nia esperiénsia fó ita esperansa. Dala ruma, ita sente estrese toʼo ita-nia isin no hanoin sai kole tebes. Maski nuneʼe, se ita sadere ba Jeová, nia sei fó mai ita forsa atu kontinua serbí nia.​—Lee Isaias 40:28, 29.

11-13. Estrese fó impaktu saida ba Maromak nia atan naʼin-tolu iha tempu antigu?

¹¹ Fiar-naʼin seluk mós hasoru situasaun susar neʼebé halo sira estrese boot. Porezemplu, Ana sente moe tanba labele iha oan no ninia laʼen nia feen-kiʼik goza no  hatún nia. (1 Sam 1:2, 6) Buat sira-neʼe halo Ana estrese tebes toʼo nia tanis no lakohi han.​—1 Sam 1:7, 10.

¹² Dala ruma, Liurai David mós sente estrese tebes. Hanoin toʼok kona-ba susar sira neʼebé nia hasoru. Ninia konxiénsia fó sala ba nia tanba sala barak neʼebé nia halo ona. (Sal 40:12) Ninia oan-mane Absalão kontra nia, no ikusmai ema oho Absalão. (2 Sam 15:13, 14; 18:33) No David nia belun ida kontra hasoru nia. (2 Sam 16:23–17:2; Sal 55:12-14) Iha salmo balu neʼebé David hakerek, nia fó sai ninia laran-kraik no mós ninia fiar neʼebé metin ba Jeová.​—Sal 38:5-10; 94:17-19.

¹³ Hakerek-naʼin ida ba livru Salmo sente laran-moras ba ema aat sira-nia moris. Karik nia mak ema Levi ida husi Asaf nia jerasaun no nia serbí iha “Maromak nia fatin sagradu neʼebé kmanek”. Hakerek-naʼin neʼe sente estrese tebes toʼo halo nia la sente kontente tan. Nia mós komesa hanoin katak Jeová la fó bensaun ba nia.​—Sal 73:2-5, 7, 12-14, 16, 17, 21.

14-15. Ita bele aprende saida husi ema naʼin-tolu nia ezemplu kona-ba buka Jeová nia ajuda?

¹⁴ Maromak nia atan naʼin-tolu neʼe buka Jeová nia ajuda. Sira halo orasaun ba Jeová kona-ba sira-nia laran-taridu. Sira koʼalia nakloke kona-ba tanbasá sira sente estrese tebes. No sira kontinua bá fatin adorasaun atu adora Jeová.​—1 Sam 1:9, 10; Sal 55:22; 73:17; 122:1.

¹⁵ Jeová hatán sira-nia orasaun ho laran-sadiʼa. Ikusmai Ana bele sente dame iha laran. (1 Sam 1:18) David hakerek: “Ema laran-loos hetan susar barak,  maibé Jeová salva nia husi susar sira-neʼe hotu.” (Sal 34:19) No hakerek-naʼin ida ba livru Salmo sente katak Jeová “kaer metin [ninia] liman-loos”, no dirije nia ho domin. Nia kanta: “Kona-ba haʼu, atu hakbesik ba Maromak mak diʼak mai haʼu. Haʼu halo ona Jeová, Naʼi Ukun-Naʼin Boot Liu, nuʼudar haʼu-nia fatin protesaun.” (Sal 73:23, 24, 28) Ita aprende saida husi sira-nia ezemplu? Dala ruma, ita bele hasoru problema neʼebé halo ita estrese. Maibé ita bele tahan se ita hanoin kleʼan kona-ba oinsá Jeová ajuda ona ema seluk, sadere ba nia liuhusi orasaun no halo tuir nia hodi halo buat neʼebé nia hakarak ita atu halo.​—Sal 143:1, 4-8.

16-17. (a) Tanbasá mak ita labele hadook an husi Jeová no ninia povu? (b) Oinsá mak ita bele hetan fali kbiit?

¹⁶ Ezemplu sira-neʼe hanorin ita lisaun importante seluk, katak ita labele hadook an husi Jeová no ninia povu. (Prov 18:1) Nancy neʼebé sente estrese tebes bainhira ninia laʼen husik hela nia, hatete: “Ba tempu kleur, haʼu lakohi hasoru no koʼalia ba ema ruma. Maibé  kuandu haʼu hadook an husi ema, haʼu sai triste liután.” Maibé Nancy nia situasaun troka bainhira nia buka dalan atu ajuda ema seluk neʼebé hasoru problema. Nia hatete: “Haʼu rona didiʼak bainhira ema esplika sira-nia problema. Bainhira haʼu tau fokus ba sira no sira-nia problema, neʼe ajuda haʼu atu la fokus demais ba haʼu-nia an no haʼu-nia problema.”

¹⁷ Ita bele hetan fali kbiit liuhusi tuir reuniaun Kristaun sira. Bainhira ita tuir reuniaun, ita fó Jeová oportunidade atu sai ita-nia “ajuda-naʼin” no fó kmaan ba ita. (Sal 86:17) Liuhusi reuniaun, nia hametin ita hodi uza ninia espíritu santu, ninia Liafuan no ninia povu. Reuniaun fó ita oportunidade atu “anima no hametin malu”. (Rom 1:11, 12) Irmán ida naran Sophia hatete: “Jeová no irmaun-irmán sira ajuda haʼu atu tahan. Reuniaun mak importante tebes mai haʼu. Haʼu aprende katak se haʼu envolve an liután iha kongregasaun no serbisu haklaken, haʼu sente fasil liu atu tahan hasoru haʼu-nia estrese no laran-taridu.”

18. Se ita sente laran-kraik, saida mak Jeová bele fó ba ita?

¹⁸ Bainhira ita sente laran-kraik, mai ita hanoin-hetan Jeová nia promesa katak nia sei halakon problema hotu iha futuru no mós ajuda ita atu tahan hasoru estrese ohin loron. Nia sei fó ba ita “hakarak no kbiit” atu tahan sentimentu laran-kraik no mós lakon esperansa.​—Flp 2:13.

19. Roma 8:37-39 fó promesa saida ba ita?

¹⁹ Lee Roma 8:37-39. Apóstolu Paulo fó ita konfiansa katak la iha buat ida mak bele haketak ita husi Maromak nia domin. Oinsá mak ita bele ajuda irmaun-irmán sira neʼebé hakaʼas an atu tahan hasoru estrese? Lisaun tuirmai sei koʼalia kona-ba oinsá mak ita bele banati-tuir Jeová hodi hatudu laran-sadiʼa no apoia irmaun-irmán sira bainhira sira estrese.