CHIIYO 25
Syoma Jehova Chiindi Nukataazikene
‘Ndiliwuside kapati mumoyo.’—1 SAM. 1:15.
LWIIMBO 30 Ngu Taata, ngu Leza Wangu, Mweenzuma
ZITAYIIGWE *
1. Nkamboonzi nitweelede kwiiswiilila nchenjezyo yaJesu?
MUBUPOLOFITA mbwaakaamba buli atala amazuba aakumamanino Jesu wakati: ‘Amulilingule nobeni kutegwa myoyo yanu itabi niilemenwa akaambo . . . kakulibilika azintu zyamubuumi.’ (Lk. 21:34) Nkamboonzi nitweelede kwiiswiilila nchenjezyo eeyi? Nkaambo tuswaana mapenzi akukataazikana kukozyenie ankubaswaana bamwi.
2. Ngaali mapenzi aakataazya bakwesu abachizi ngibalikuswaana?
2 Chimwi chiindi tulakonzya kuswaana mapenzi miingi aapa kuti tukataazikane aachiindi chimwi. Atulange-lange zikozyano zitobela. Umwi Kamboni uutegwa John, * uuchiswa bulwazi bupa kuti muntu amane manguzu, wakakataazikana loko chiindi mukayintu wakwe ngubakakwetene kwaminyaka iili 19 naakamuchija. Mpawo bana bakwe basimbi babili bakaleka kukomba Jehova. Bob amukayintu wakwe Linda bakaswaana mapenzi aasiyene ayaaya. Boonse bakamaninwa mulimu alubo teebakachili kukonzya pe kujana mali yakubbadalila ng’anda njibakali kukkala. Kuyungizya waawo, Linda wakazoochiswa bulwazi bwamoyo abumwi bwakali kupa kuti mubili wakwe utalwani malwazi.
3. Majwi aali muli Bafilipi 4:6, 7 atubuzyaanzi atala aJehova?
3 Tulakonzya kuba aachoonzyo chakuti Mulengi wesu alubo Ndeende wesu siluyando Jehova ulakubona mbutulimvwa chiindi nitukataazikene mumizeezo. Alubo ulayanda kutugwasya nituli mumapenzi. (Bala Bafilipi 4:6, 7.) MuJwi lyaLeza, muli zikozyano zyiingi zitondeezya mbubakalisimya bakombi bakwe mubuyumu-yumu mbubakaswaana. Alubo litondeezya Jehova mbaakabagwasya muzyiimo eezyo ziyumu. Atulange-lange zimwi zikozyano.
ELIYA “WAKALI MUNTU IWAKALI KULIMVWA MBUBONYA MBOTULIMVWA ASWEBO”
4. Mbuyumu-yumuunzi Eliya mbwaakaswaana alubo wakalimvwa biyeni atala aJehova?
4 Eliya wakabelekela Jehova muchiindi chakali chiyumu alubo wakaswaana mapenzi mapati. Mwaami Ahabbu umwi wabaami bamuIsrayeli bakatali kusyomeka, wakakwata Jezebbeli mukayintu wakali kuchita zintu zibi alubo wakali kukomba Bbaala. Kabali babili, bakasumpula bukombi bwaBbaala muIsrayeli akujaya bapolofita baJehova biingi. Pesi Eliya wakachija. Alubo wakafutuka kunzala mpati akaambo kakusyoma Jehova. (1 Bam. 17:2-4, 14-16) Kuyungizya waawo, Eliya wakasyoma Jehova chiindi naakali kukazigwa aabapolofita bakali kukomba Bbaala. Wakasungwaazya maIsrayeli kuti bakombe Jehova. (1 Bam. 18:21-24, 36-38) Eliya wakalibonena Jehova mbaakamukwabilila akumugwasya muchiindi eecho chiyumu.
Jehova wakatuma mungelo kuti akagwasye Eliya kuti asime lubo (Langa fuka 5-6) *
5-6. Kweendelana amajwi aali muli 1 Bami 19:1-4 Eliya wakalimvwa biyeni alubo Jehova wakatondeezya biyeni kuti wakali kumuyanda?
5 Bala 1 Bami 19:1-4. Eliya wakayoowa, chiindi Jezebbeli Mukayintu waMwaami naakali kuyanda kumujaya. Nkinkaako, wakachijila kuBbeerishebba. Wakakataazikana zyakuti “wakalomba kuti afwe.” Nkamboonzi naakalimvwa oobo? Eliya wakali muntu uuli aachibi alubo “wakali muntu iwakali kulimvwa mbubonya mbotulimvwa aswebo.” (Jak. 5:17) Amwi kukataazikana akukatala zyakapa kuti amane manguzu. Amwi Eliya wakali kuyeeya kuti kubeleka changuzu nkwaakachita mukusumpula bukombi bwakasimpe kwakali kwabuyo, taakwe muntu wakachincha pe muIsrayeli akuti nguwe luzutu wakachili kubelekela Jehova. (1 Bam. 18:3, 4, 13; 19:10, 14) Tulakonzya kugamba kuti mupolofita ooyu uusyomeka wakalimvwa munzila iili boobu. Pesi Jehova wakamvwisisisya mbaakali kulimvwa Eliya.
6 Jehova taakamukalalila pe Eliya naakatondeezya mbaakali kulimvwa. Pesi wakamugwasya kuti asime lubo. (1 Bam. 19:5-7) Mukuya kwachiindi, Jehova wakagwasya Eliya kuti achinche mizeezo yakwe kwiinda mukumutondeezya manguzu aakwe aagambya. Alubo Jehova wakamubuzya kuti kwakachili bamwi bantu bali 7 000 muIsrayeli bakatalinakomba Bbaala. (1 Bam. 19:11-18) Jehova wakabelesya zikozyano eezi kuti atondeezye Eliya kuti wakali kumuyanda.
JEHOVA UYOOTUGWASYA BIYENI?
7. Nkuukuli kuumbulizigwa nkutujana kunzila Jehova njaakamugwasyaayo Eliya?
7 Ulikuswaana buyumu-yumu bupa kuti ukataazikane na? Kulawumbulizya kuziba kuti Jehova wakali kumvwisisisya mbaakali kulimvwa Eliya! Kupa kuti tube aachoonzyo chakuti andiswe ulakumvwisisisya kukataazikana kwesu. Ulizizi zintu nzitutakonzyi kuchita alubo ulizizi nzituyeeya ambutulimvwa. (Int. 103:14; 139:3, 4) Kusyoma Jehova mbuuli Eliya, kuyootugwasya kulwana mapenzi aapa kuti tukataazikane.—Int. 55:22.
8. Jehova ukugwasya kuti biyeni ulwane aakukataazikana kwako?
8 Kukataazikana kulakonzya kupa kuti uyeeye kuti chiimo chako tachizoochinchi pe. Kuti waba muchiimo chili boobo, utalubi kuti Jehova ulakugwasya kulwana kukataazikana kwako. Ulakugwasya biyeni? Ukukumbila kuti umubuzye zikukataazya, mpawo ulakusandula. (Int. 5:3; 1 Pet. 5:7) Nkinkaako, komba kuli Jehova kumubuzya zilikukukataazya. Nisimpe kuti takoowambuula anduwe mbuuli mbaakachita kuli Eliya pesi ulabelesya Jwi lyakwe Bbayibbele ambunga yakwe. Makani ngubala muBbayibbele alakonzya kukuumbulizya akukupa bulangilizi. Alubo bakombinyokwe balakonzya kukusungwaazya.—Rom. 15:4; Heb. 10:24, 25.
9. Kujana mweenzinyokwe ngusyoma wakugwasya biyeni?
9 Jehova wakabuzya Eliya kuti ape Elisha mulimu ngwaakali kuchita. Kwiinda mukuchita oobo, Eliya wakaba aamweenzinyina wakali kukonzya kumugwasya naakakataazikene. Munzila iikozyenie, andiswe tulakonzya kuzunda buyumu-yumu butukataazya kuti twabuzya mweenzuma ngutusyoma. (2 Bam. 2:2; Tus. 17:17) Kuti kutakwe muntu ngukonzya kubuzya zintu zikukataazya, komba kuli Jehova kuti akugwasye kujana muKristu uusimide mubukombi uutakugwasye kulwana buyumu-yumu.
10. Zyakachitika kuli Eliya zitugwasya biyeni kuti tube abulangilizi alubo chisyomezyo chili muli Isaya 40:28, 29 chitugwasya biyeni?
10 Jehova wakagwasya Eliya kuti azunde kukataazikana nkwaakali aako akuti azumanane kumubelekela chakusyomeka kwaminyaka myiingi. Zyakachitika kuli Eliya zipa kuti tube abulangilizi. Tulakonzya kuba muzyiimo zipa kuti tukataazikane mumubili amumizeezo. Kuti twasyoma Jehova, uyootupa manguzu ngituyanda kuti tuzumanane kumukomba.—Bala Isaya 40:28, 29.
HANA, DAVIDA “A-ASAFU” BAKALI KUSYOMA JEHOVA
11-13. Nkuukuli kukataazikana nkubakaswaana bakombi baLeza batatu bachiindi?
11 Kuli bamwi bantu baambidwe muBbayibbele bakali kukataazikana. Muchikozyano, Hana wakalisimya nkaambo taakalikwe bana alubo mukwatwanyina wakali kumwaambila majwi aamuchisa. (1 Sam. 1:2, 6) Kukataazikana nkwaakali aako Hana kwakali kuchisa zyakuti wakali kulila akukachilwa kulya.—1 Sam. 1:7, 10.
12 Zimwi ziindi Mwaami Davida wakali kukataazikana. Yeeya atala abuyumu-yumu mbwaakaswaana. Wakali kulipa mulandu akaambo kakubisya nkwaakachita. (Int. 40:12) Mwanaakwe Abbisalomu ngwaakali kuyandisya wakamupapila mpawo wakazoofwa. (2 Sam. 15:13, 14; 18:33) Alubo umwi mweenzinyina waDavida ngwaakali kuyandisya, wakamupapila. (2 Sam. 16:23–17:2; Int. 55:12-14) Nyimbo zyiingi, Davida nzyaakalemba, zitondeezya mbaakali kulimvwa naakakataazikane alusyomo lusimide ndwaakalaalo muli Jehova.—Int. 38:5-10; 94:17-19.
Niinzi chakagwasya sintembawuzyo kuti akombe Jehova kabotelwa lubo? (Langa fuka 13-15) *
13 Mukuya kwachiindi, umwi sintembawuzyo wakatalika kulombozya buumi bwabasizibi. Kulakonzeka kuti wakali waluzubo lwaAsafu muLevi alubo wakali kubeleka “mucikombelo ca Leza cipati.” Sintembawuzyo ooyu wakakataazikana mumoyo, zyakapa kuti atabotelwi akuti atakkutisikani. Alubo taakachili kukkutisikana pe azilongezyo nzyaakali kujana akaambo kakukomba Leza.—Int. 73:2-5, 7, 12-14, 16, 17, 21.
14-15. Twiiyaanzi kuzikozyano zitatu zili muBbayibbele zyabantu bakakumbila Jehova kuti abagwasye?
14 Bakombi baLeza batatu mbitwali kulanga-langa, bakali kusyoma Jehova kuti abagwasye. Bakamubuzya zyakali kubakataazya kwiinda mukukomba kazizwa aansi amoyo. Bakabuzya Jehova kabaangunukide zyoonse zyakali kupa kuti bakataazikane. Alubo teebakaleka pe kwiinka kubusena bwakukombela Jehova.—1 Sam. 1:9, 10; Int. 55:22; 73:17; 122:1.
15 Chaluzyalo, Jehova wakamusandula umwi awumwi. Hana wakaba aaluumuno lwamumizeezo. (1 Sam. 1:18) Davida wakalemba kuti: “Mapenzi aamululami manji, pele Jehova ulamuvwuna mulingawo oonse.” (Int. 34:19) Alubo sintembawuzyo wakalimvwa kuti Jehova ‘wakamujisi jaanza lyakwe lyachilisyo,’ kamuzulwida munzila yaluyando. Wakayimba kuti: “Pele mebo, cilandibotela kuswena kuli Leza. Ndasala Mwami Singuzuzyoonse Jehova kuba mayubilo aangu.” (Int. 73:23, 24, 28) Twiiyaanzi kuzikozyano eezi? Chimwi chiindi tulakonzya kuswaana mapenzi miingi aapa kuti tukataazikane. Pesi tulakonzya kuzunda kuti twayeeyesesya Jehova mbaakabagwasya bamwi, kumusyoma kwiinda mukukomba kuli nguwe akumuswiilila kwiinda mukuchita nzyatubuzya kuti tuchite.—Int. 143:1, 4-8.
SYOMA JEHOVA KUTI UZWIDILILE
Kumasaangunino, muchizi wakali kulyaanzaania pesi zintu zyakazoochincha naakayanduula nzila zyakugwasya bamwi (Langa fuka 16-17)
16-17. (a) Nkamboonzi nituteelede kulyaanzaania aJehova abakombima? (b) Niinzi chikonzya kutugwasya kuti tusime lubo?
16 Zikozyano eezi zitatu zituyiisya chimwi chiiyo chiyandikana chakuti, tatweelede kulyaanzaania aJehova abakombi bakwe. (Tus. 18:1) Nancy, wakakataazikane chiindi mulumaakwe naakamuchija wakati: “Kwamazuba miingi, teendakali kayanda pe kubona muntu naakuti kwaambuula amuntu. Pesi chiindi nindakali kulyaanzaania abamwi mpawo mpundakali kukataazikana loko.” Zintu zyakachincha chiindi Nancy naakayanda kugwasya bamwi bakali kuswaana mapenzi. Wakati: “Ndakali kubaswiilila bamwi nibakali kundibuzya zibakataazya. Ndakabona kuti kugwasya bamwi kwakali kupa kuti nditayeeyesesyi atala amapenzi aangu.”
17 Tulakonzya kusima lubo kwiinda mukunjila miswaangano yambungano. Chiindi nituli kumiswaangano, tupa Jehova mweenya wakuti ‘atugwasye akutuumbulizya.’ (Int. 86:17) Nituli nkuko, ulatusimya kabelesya muuya wakwe uusalala, Jwi lyakwe abakombima. Miswaangano itupa mweenya ‘wakusimisyania kuli umwi awumwi.’ (Rom. 1:11, 12) Muchizi uutegwa Sophia wakati: “Jehova abazyalwama bandigwasya kuti ndilisimye. Chimwi chintu chindigwasya loko, miswaangano yesu. Ndakabona kuti kubeleka changuzu mumulimu wakukambawuka amumbungano kundigwasya kuti ndikonzye kuzunda kukataazikana kwangu.”
18. Jehova utupaanzi chiindi nitukataazikene?
18 Chiindi nitukataazikene, tutalubi kuti Jehova utusyomezya kuti uzookumaninsya kukataazikana kukabe kutamani muchiindi chili kunembo akuti lino utupa malayilile aapa kuti tulwane kukataazikana. Utupa ‘kukanza amanguzu’ kuchitila kuti tuzunde kukataazikana akutaba abulangilizi.—Flp. 2:13.
19. Lugwalo lwaBaroma 8:37-39 lutusyomezyaanzi?
19 Bala Baroma 8:37-39. Mwaapostolo Pawulu wakatubuzya kuti taakwe chintu chikonzya kutwaanzaania kuluyando lwaLeza. Kujana twabagwasya biyeni bakombima balikweezya kuzunda kukataazikana? Chiiyo chitobela chiyootugwasya kubona mbutukonzya kutobelezya chikozyano chaJehova kwiinda mukubeetelela akubagwasya bakombima chiindi nibakataazikene.
LWIIMBO 44 Mupailo Wamuntu Uupengede
^ par 5 Kukataazikana kwachiindi chilamfu kulakonzya kutweetela mapenzi mumubili amumizeezo. Kujana Jehova watugwasya biyeni? Tulalanga-langa Jehova mbaakagwasya Eliya naakakataazikene. Alubo zimwi zikozyano zili muBbayibbele zilatugwasya kubona nzitweelede kuchita kuti Jehova atugwasye nitukataazikene.
^ par 2 Mazina ngitwabelesya muchiiyo eechi akachinchwa.
