1. Hikwalaho ka yini hi fanele hi yingisa xitsundzuxo xa Yesu?

EKA vuprofeta bya Yesu bya masiku yo hetelela u te: “Tivoneleni leswaku timbilu ta n’wina ti nga tshuki ti tshikileriwa . . . hi ku vilela hi vutomi, kutani hi xitshuketa siku rero ri mi wela hi xihatla.” (Luka 21:34) Hi fanele hi yingisa xitsundzuxo xo tano. Hikwalaho ka yini? Hikuva hinkwerhu hi ni swiphiqo leswi vanhu hinkwavo va nga na swona.

2. Hi swihi swiphiqo leswi tshikileleka leswi vamakwerhu van’wana va nga na swona?

² Mikarhi yin’wana hi nga ha va ni swiphiqo swo tala hi nkarhi wun’we. Xiya swikombiso leswi landzelaka. Mbhoni leyi vuriwaka John, * loyi a nga ni vuvabyi lebyi lamataka miri (multiple sclerosis) u twe ku vava ngopfu loko a tshikiwa hi nsati wakwe endzhaku ka malembe ya 19 va tekanile. Kutani vana va yena vambirhi va vanhwanyana va tshike ku tirhela Yehovha. Bob ni nsati wakwe Linda va weriwe hi swiphiqo leswi nga faniki ni swa John. Hinkwavo ka vona va heleriwe hi ntirho kutani va nga ha swi koti ku hakelela yindlu ya vona. Swiphiqo swa vona swi ye swi nyanya loko Linda a khomiwa hi vuvabyi bya mbilu ni vuvabyi lebyi hlaselaka masocha ya miri.

3. Hi ku ya hi Vafilipiya 4:6, 7 i yini leswi hi nga tiyisekaka ha swona?

³ Hi nga tiyiseka leswaku Muvumbi wa hina tlhelo Tata wa hina wa rirhandzu Yehovha, wa yi twisisa ndlela leyi hi titwaka ha yona loko hi tshikilelekile. U lava ku hi pfuna loko hi ri ni swiphiqo. (Hlaya Vafilipiya 4:6, 7.) Rito ra Xikwembu ri ni marungula yo tala lama hlamuselaka swiphiqo leswi malandza ya  Yehovha ma swi tiyiseleke. Ri tlhela ri hi byela ndlela leyi Yehovha a ma pfuneke ha yona eka swiphiqo swo tano. A hi kambisiseni swikombiso swi nga ri swingani.

4. Hi swihi swiphiqo leswi Eliya a veke na swona, naswona u titwe njhani hi Yehovha?

⁴ Eliya u tirhele Yehovha emikarhini yo tika naswona u ve ni swiphiqo leswikulu. Hosi Akabu i un’wana wa tihosi leti a ti nga tshembekanga eIsrayele, u tekane na Yezabele wo homboloka loyi a ri mugandzeri wa Bali. Hi vumbirhi bya vona va tate tiko hinkwaro hi vugandzeri bya Bali naswona va dlaye vaprofeta vo tala va Yehovha. Eliya u kote ku baleka. Ku tlula kwalaho, ku titshega hi Yehovha swi n’wi ponisile hi mikarhi ya ndlala. (1 Tih. 17:2-4, 14-16) Ku engetela kwalaho, Eliya u titshenge hi Yehovha loko a kanetiwa hi vaprofeta ni vagandzeri va Bali. U khutaze Vaisrayele ku tirhela Yehovha. (1 Tih. 18:21-24, 36-38) Eliya u swi vonile leswaku Yehovha a a n’wi seketela emikarhini yoleyo yo tika.

5-6. Hi ku ya hi 1 Tihosi 19:1-4, Eliya a titwa njhani naswona Yehovha u swi kombise njhani leswaku wa n’wi rhandza?

⁵ Hlaya 1 Tihosi 19:1-4. Eliya u teriwe hi ku chava loko a twa leswaku Hosi ya xisati Yezabele a lava ku n’wi dlaya. U balekele eBera-xeba. A a ri ni gome lerova a “kombela leswaku moya-xiviri wakwe wu fa.” I yini lexi endleke a titwa hi ndlela yoleyo? Eliya a nga hetisekanga “a ri munhu la nga ni mintlhaveko yo fana ni ya hina.” (Yak. 5:17) Kumbexana a  titwa a tshikileleke ngopfu naswona a karhele ngopfu. Swi tikomba onge Eliya u vone ku tikarhata kakwe a kondletela vugandzeri bya ntiyiso ku ri nyuku wa mbyana, a vona onge a ku antswi nchumu eIsrayele naswona hi yena ntsena loyi a gandzela Yehovha. (1 Tih. 18:3, 4, 13; 19:10, 14) Ndlela leyi muprofeta loyi wo tshembeka a titweke ha yona yi nga hi hlamarisa. Kambe Yehovha a yi twisisa ndlela leyi muprofeta loyi a a titwa ha yona.

⁶ Yehovha a nga n’wi hlundzukelanga Eliya hikwalaho ka leswi a phofuleke ndlela leyi a a titwa ha yona. Ematshan’wini ya sweswo, u n’wi pfunile leswaku a va ni matimba. (1 Tih. 19:5-7) Endzhakunyana, Yehovha u lulamise miehleketo ya Eliya hi musa hi ku n’wi komba matimba ya Yena lama hlamarisaka. Yehovha u byele Eliya leswaku a ka ha ri ni 7 000 wa vagandzeri vakwe eIsrayele lava nga n’wi gandzelangiki Bali. (1 Tih. 19:11-18) Hi ndlela yoleyo Yehovha u kombe Eliya leswaku Wa n’wi rhandza.

7. Ndlela leyi Yehovha a pfuneke Eliya ha yona yi hi tiyisekisa yini?

⁷ Xana u ni swiphiqo leswi ku tshikilelaka? Swa chavelela ku tiva leswaku Yehovha a yi twisisa ndlela leyi Eliya a titwa ha yona! Swi hi tiyisekisa leswaku wa yi twisisa ndlela leyi hi titwaka ha yona loko hi ri emaxangwini. Wa swi tiva leswi hi tsandzekaka ku swi endla naswona wa swi tiva leswi hi swi ehleketaka ni ndlela leyi hi titwaka ha yona. (Ps. 103:14; 139:3, 4) Loko hi titshega hi Yehovha ku fana na Eliya, u ta hi pfuna hi tiyisela swiphiqo leswi hi tshikilelaka.—Ps. 55:22.

8. Yehovha u ta ku pfunisa ku yini loko u tshikilelekile?

⁸ Loko u tshikilelekile u nga ha ehleketa leswaku swiphiqo swa wena a swi nge pfuki swi herile naswona sweswo swi nga ku heta matimba. Loko u titwa hi ndlela yoleyo, tsundzuka leswaku Yehovha u ta ku pfuna. U ta ku pfuna hi ndlela yihi? Wa ku rhamba leswaku u lahlela ku vilela hinkwako eka yena. Naswona u ta hlamula swirilo swa wena swo kombela ku pfuniwa. (Ps. 5:3; 1 Pet. 5:7) Kutani tivisa Yehovha swiphiqo swa wena hi xikhongelo. A nge vulavuli na wena hi ku kongoma hilaha a endleke ha kona eka Eliya kambe u ta ku pfuna hi ku tirhisa Rito ra yena ku nga Bibele, ni hi ku tirhisa nhlengeletano yakwe. Rungula leri nga eBibeleni ri nga ku chavelela ri tlhela ri ku nyika ntshembo. Nakambe vamakwerhu va nga ku chavelela.—Rhom. 15:4; Hev. 10:24, 25.

9. Xana munghana a nga hi pfuna njhani?

⁹ Yehovha u byele Eliya leswaku a avela Elixa ntirho wun’wana wa yena, hi ku endla tano Yehovha a a nyika Eliya munghana loyi a a ta n’wi pfuna loko a titwa a hela matimba. Hikwalaho, loko hi tiphofula eka munghana, hi ta titwa hi antswa. (2 Tih. 2:2; Swiv. 17:17) Loko u vona onge a ku na munhu loyi u nga tiphofulaka eka yena, kombela Yehovha a ku pfuna u kuma Mukreste la wupfeke loyi a nga ta ku chavelela.

10. Rungula ra Eliya ri hi nyika ntshembo hi ndlela yihi, naswona xitshembiso lexi nga eka Esaya 40:28, 29 xi nga hi pfuna njhani?

¹⁰ Yehovha u pfune Eliya leswaku a tshika ku vilela naswona u tirhele Yehovha hi ku tshembeka malembe yo tala. Rungula ra Eliya ri hi nyika ntshembo. Mikarhi yin’wana hi nga ha tshikileleka lerova hi sala hi lo lakahla, hi nga ha tivi ta hina. Kambe loko hi tshemba Yehovha u ta hi nyika matimba yo ya emahlweni hi n’wi tirhela.—Hlaya Esaya 40:28, 29.

11-13. Malandza manharhu ya Xikwembu ya le nkarhini lowu hundzeke ma titwe njhani loko ma tshikilelekile?

¹¹ Vanhu van’wana va le Bibeleni va tshame va va ni swiphiqo leswikulu. Hi xikombiso, Hana u tiyisele  ku va mhika ni ku hlekuriwa hi nkatikulobye loyi a ri ni vana. (1 Sam. 1:2, 6) Ntshikilelo wa Hana wu n’wi vangele gome, a rila a tlhela a nga swi tsakeli ni swakudya.—1 Sam. 1:7, 10.

¹² Mikarhi yin’wana, Hosi Davhida a titwa a tshikilelekile swinene. Ehleketa hi swiphiqo leswi a swi n’wi tshikilela. A kingindziwa hi ripfalo hikwalaho ka swihoxo swo tala leswi a swi endleke. (Ps. 40:12) N’wana wa yena Absalomu u pfukele mfumo wa tata wakwe naswona eku heteleleni Absalomu u dlayiwile. (2 Sam. 15:13, 14; 18:33) Davhida u xengiwe hi munghana wa yena lonkulu. (2 Sam. 16:23–17:2; Ps. 55:12-14) Tipisalema to tala leti Davhida a ti tsaleke ti hlamusela gome leri a a ri na rona ni ndlela leyi a tshemba Yehovha ha yona.—Ps. 38:5-10; 94:17-19.

¹³ Mupisalema un’wana u sungule ku navela vutomi bya vanhu vo homboloka. Swi nga endleka a ri wa rixaka ra Asafa lowa Mulevhi, naswona a tirha “evukwetsimelweni lebyikulu bya Xikwembu.” Mupisalema loyi, a a tshikilelekile naswona sweswo a swi n’wi tsona ntsako. U sungule ku vona onge mikateko leyi Xikwembu a xi n’wi nyika yona a yi enelanga.—Ps. 73:2-5, 7, 12-14, 16, 17, 21.

14-15. Hi dyondza yini eka swikombiso leswinharhu mayelana ni ku titshega hi Yehovha?

¹⁴ Malandza wolawo manharhu a ma titshega hi Yehovha. Ma lahlele ku vilela hinkwako ka wona eka yena hi xikhongelo. A ma nga chavi ku n’wi byela leswi a swi endla ma titwa ma tshikilelekile. A ma tshikanga ku gandzela Yehovha endlwini yakwe.—1 Sam. 1:9, 10; Ps. 55:22; 73:17; 122:1.

¹⁵ Yehovha u hlamule xikhongelo xa un’wana ni un’wana wa vona hi musa. Hana u kume ku rhula ka miehleketo. (1 Sam. 1:18) Davhida u tsale a ku: “Makhombo ya lowo lulama ma tele,  kambe Yehovha wa n’wi kutsula eka wona hinkwawo.” (Ps. 34:19) Kasi mupisalema u titwe onge Yehovha u n’wi “khome hi voko ra [yena] ra xinene” naswona a n’wi tsundzuxa hi rirhandzu. U yimbelele a ku: “Ku tshinela eka Xikwembu i swinene eka mina. Ndzi veke vutumbelo bya mina eka Yehovha, Hosi leyi Lawulaka.” (Ps. 73:23, 24, 28) Hi dyondza yini eka swikombiso leswi? Mikarhi yin’wana hi nga ha ti kuma hi ri ni swiphiqo leswi nga hi vangelaka ntshikilelo. Kambe hi nga swi kota ku swi hlula loko hi anakanyisisa hi ndlela leyi Yehovha a va pfuneke ha yona van’wana, loko hi titshega hi xikhongelo ni ku n’wi yingisa hi endla leswi a hi lerisaka swona.—Ps. 143:1, 4-8.

16-17. (a) Hikwalaho ka yini hi nga fanelanga hi tihambanisa na Yehovha swin’we ni vanhu vakwe? (b) Hi nga ma kuma njhani matimba ya ku tiyisela?

¹⁶ Swikombiso leswinharhu swi hi dyondzisa dyondzo yin’wana ya nkoka—a hi fanelanga hi tihambanisa na Yehovha ni vanhu vakwe. (Swiv. 18:1) Nancy, loyi a tshikilelekile endzhaku ka loko a tshikiwe hi nuna u te: “Ku ni masiku yo tala lawa a ndzi titwa ndzi nga lavi ku vona munhu hambi ku ri ku vulavula. Kambe loko ndzi tihambanisa ni vanhu a ndzi va ni gome lerikulu.” Swilo swi sungule ku cinca loko Nancy a sungula ku lava tindlela to pfuna vanhu  lava a va ri na swiphiqo. U ri: “Ndzi rhiya ndleve loko van’wana va ndzi byela swiphiqo swa vona. Ndzi xiye leswaku loko ndzi va twela vusiwana a ndza ha vileli ngopfu hi swiphiqo swa mina.”

¹⁷ Hi nga kuma matimba loko hi ya emihlanganweni ya Vukreste. Loko hi ri emihlanganweni ya Vukreste Yehovha u ta kota ku hi ‘pfuna a tlhela a hi chavelela.’ (Ps. 86:17) Loko hi ri kwalaho wa hi tiyisa hi ku tirhisa moya lowo kwetsima, Rito rakwe ni vanhu vakwe. Emihlanganweni ha “khutazana.” (Rhom. 1:11, 12) Makwerhu wa xisati loyi a vuriwaka Sophia u ri: “Rirhandzu leri Yehovha ni vamakwerhu va ndzi kombisaka rona ri endla leswaku ndzi kota ku tiyisela. Xa nkoka eka mina i ku ya emihlanganweni. Loko ndzi ya ensin’wini ni le mihlanganweni nkarhi hinkwawo ndzi kota ku tiyisela ntshikilelo.

18. Loko hi titwa hi hele matimba Yehovha u ta hi nyika yini?

¹⁸ Loko hi hele matimba, a hi tsundzukeni leswaku Yehovha u ta hi pfuna naswona u tshembisa ku herisa swilo hinkwaswo leswi hi vangelaka ntshikilelo enkarhini lowu taka. U hi nyika “matimba” leswaku hi lwisana ni ntshikilelo niloko hi hele matimba hi nga ha ri na ntshembo.—Filp. 2:13.

19. Hi xihi xitshembiso lexi hi xi kumaka eka Varhoma 8:37-39?

¹⁹ Hlaya Varhoma 8:37-39. Muapostola Pawulo u hi tshembisa leswaku a xi kona lexi nga hi hambanisaka ni rirhandzu ra Xikwembu. Hi nga va pfuna njhani vamakwerhu lava tshikilelekeke? Xihloko lexi landzelaka xi ta hlamusela ndlela leyi hi nga tekelelaka Yehovha ha yona hi ku tiyisa vamakwerhu loko va tshikilelekile.