1. No te aha mea faufaa ia haapao i te faaararaa a Iesu?

 I TEIE mau mahana hopea, ua rau te tupuraa fifi e te ahoaho ta te taata e faaruru ra. Mea faufaa roa ïa ia haapao i teie faaararaa a Iesu: “A haapao maitai râ ia outou iho ia ore to outou aau ia teimaha . . . i te haapeapearaa o te oraraa.”—Luka 21:34.

2. Eaha te mau fifi i farereihia e te tahi mau taeae e tuahine?

² E nehenehe te mau fifi e tupu i te hoê â taime. Ua roohia John * i te hoê maˈi ino rahi e ua hepohepo atoa a faarue ai ta ˈna vahine ia ˈna i muri aˈe 19 matahiti faaipoiporaa. I muri iho, ua faaea ta ˈna na tamahine e piti i te tavini ia Iehova. Area Bob raua Linda, ua ere ïa i ta raua ohipa e i muri mai, i to raua fare. Ua ite-atoa-hia e maˈi mafatu to Linda e ua ino te ravea parururaa o to ˈna tino, e nehenehe oia e pohe taue noa.

3. Eaha te parau papu e faaitehia ra i roto i te Philipi 4:6, 7?

³ O Iehova to tatou Atua poiete e Metua î i te here. Ua papu ia tatou te hinaaro ra oia e tauturu mai a hepohepo ai tatou. (A taio i te Philipi 4:6, 7.) E rave rahi aamu Bibilia o te faaite ra eaha te fifi ta te mau tavini o te Atua i faaruru. Te faataa atoa mai ra te mau Papai eaha te tauturu ta Iehova i horoa ˈtu a hepohepo ai ratou. E hiˈo anaˈe te tahi o tera mau aamu.

4. Eaha te mau fifi ta Elia i faaruru e eaha to ˈna manaˈo no nia ia Iehova?

⁴ Ua tavini Elia ia Iehova i te hoê tau fifi e te ahoaho mau. Ua faaipoipo te arii taiva o Ahaba ia Iezebela, te hoê vahine ino o tei haamori ia Baala. Na raua i haaparare i te haamoriraa hape i Iseraela e i haapohe atoa i ta Iehova mau peropheta. Ua ora mai râ Elia e ua aupuru-atoa-hia oia i te tau oˈe maoti te tauturu a Iehova. (Arii 1, 17:2-4, 14-16) I mua i te mau peropheta e feia haamori a Baala, ua tiaturi papu Elia ia Iehova e ua faaitoito atoa i te mau Iseraela ia tavini i te Atua mau. (Arii 1, 18:21-24, 36-38) I roto i te mau tupuraa fifi e te ahoaho, ua ite mau Elia i te rima puai o Iehova!

5-6. Ia au i Te mau arii 1, 19:1-4, eaha te huru o Elia e mea nafea Iehova i te haapapuraa mea here na ˈna ia Elia?

⁵ A taio i Te mau arii 1, 19:1-4. I te imiraa Iezebela i te haapohe ia Elia, ua mǎtaˈu te peropheta! Ua hepohepo roa oia e “ani atura i te pohe.” No te aha Elia i na reira ˈi? “E taata mau â hoi Elia mai ia tatou atoa te huru.” (Iak. 5:17) Peneiaˈe, ua ahoaho e ua rohirohi roa oia. E au ra e ua manaˈo Elia mea faufaa ore ta ˈna i rave no te haamoriraa mau, aita to Iseraela i taui e o ˈna anaˈe te tavini ra ia Iehova. (Arii 1, 18: 3, 4, 13; 19:10, 14) E maere paha tatou i te huru o Elia, ua taa râ ia Iehova ua teimaha to ˈna aau.

⁶ A haamahora ˈi Elia i to ˈna aau, aita Iehova i tamaˈi atu, ua faaitoito râ ia ˈna. (Arii 1, 19:5-7) I muri mai, ua faatitiaifaro mǎrû noa Iehova i te feruriraa o Elia. Mea nafea? Ua faaite Iehova e puai faahiahia mau to ˈna e te toe nei 7 000 taata i Iseraela tei ore i haamori ia Baala. (Arii 1, 19:11-18) Na roto i ta ˈna huru raveraa, ua haapapu Iehova ia Elia e peropheta herehia o ˈna e te Atua.

7. Eaha te haapiiraa e huti mai i ta Iehova raveraa no te tauturu ia Elia?

⁷ Mea mahanahana mau ia ite ua taa ia Iehova i te huru o Elia. Ua ite atoa Iehova eaha te maraa ia tatou e eaha to roto i to tatou feruriraa e aau. (Sal. 103:14; 139:3, 4) Mai ia Elia, e tiaturi anaˈe ia Iehova, e na ˈna e tauturu ia tatou.—Sal. 55:22.

8. E nafea Iehova e tauturu mai ai ia hepohepo tatou?

⁸ E nehenehe te manaˈo tano ore e hiti mai ia hepohepo tatou. I tera taime, e haamanaˈo anaˈe ia Iehova. Te titau mai ra o ˈna ia huri i to tatou ahoaho i nia ia ˈna, eita roa hoi oia e haafaufaa ore i ta tatou mau taparuparuraa. (Sal. 5:3; Pet. 1, 5:7) I mua i te fifi, e pure tamau anaˈe ia Iehova. Eita oia e pahono mai mai ta ˈna i rave no Elia, e faaroo râ tatou i to ˈna reo maoti ta ˈna Parau e ta ˈna faanahonahoraa. E nehenehe te mau aamu Bibilia e tamahanahana e e tauturu mai ia faaoromai tamau. E fanaˈo atoa tatou i te faaitoitoraa a te mau taeae e tuahine.—Roma 15:4; Heb. 10:24, 25.

9. E nafea te hoa papu e tauturu mai ai?

⁹ I to ˈna parauraa ia faatoroa ia Elisaia, ua horoa ˈtu Iehova i te hoê hoa no te faaitoito ia Elia. Ia teimaha to tatou aau, e nehenehe atoa te hoê hoa papu e tauturu mai. (Arii 2, 2:2; Mas. 17:17) E aita anaˈe e taata no te faaroo ia tatou, e pure anaˈe ia Iehova no te ite mai i te hoê Kerisetiano feruriraa paari o te horoa mai i te faaitoitoraa.

10. E nafea te aamu o Elia e tauturu mai ai ia faaoromai e eaha te faaitoitoraa e matara mai ra i roto i te Isaia 40:28, 29?

¹⁰ Ua tauturu Iehova ia Elia ia faaoromai tamau e ia tavini ia ˈna ma te taiva ore e rave rahi matahiti. Eita anei tatou e itoitohia i te aamu o Elia? E faaruru paha tatou e rave rau tupuraa ahoaho o te haaparuparu i to tatou tino e aau. Ia tiaturi râ tatou ia Iehova, e horoa mai oia i te puai e hinaarohia no te tamau i te tavini ia ˈna.—A taio i te Isaia 40:28, 29.

11-13. A faataa na mai te aha te huru o na tavini e toru a hepohepo ai ratou.

¹¹ Ua hepohepo rahi atoa te tahi mau tavini a te Atua. O Hana te hoê o ratou. Ua faaoromai oia i te haama no te oreraa e noaa ta ˈna tamarii e oia atoa i te faaooo rahi a te tahi atu vahine a ta ˈna tane. (Sam. 1, 1:2, 6) Ua hepohepo roa to Hana aau e aita ˈtura i amu faahou i te maa.—Sam. 1, 1:7, 10.

 ¹² I te hoê taime ua hepohepo atoa te arii Davida. E feruri anaˈe i to ˈna mau fifi. Ua teimaha oia no te rahi o ta ˈna mau hara. (Sal. 40:12) Ua patoi Abasaloma, ta ˈna tamaiti here, i ta ˈna faatereraa e ua pohe ihora i muri iho. (Sam. 2, 15:13, 14; 18:33) Ua taiva atoa hoê o to ˈna mau hoa rahi ia ˈna. (Sam. 2, 16:23–17:2; Sal. 55:12-14) Te faataa ra e rave rahi salamo i to ˈna mau manaˈo hepohepo e to ˈna tiaturi aueue ore ia Iehova.—Sal. 38:5-10; 94:17-19.

¹³ Te vai atoa ra te hiˈoraa o te hoê papai salamo tei feii, aore ra faahinaaro, i te oraraa o te feia ino. E huaai paha oia na Asapha, te hoê ati Levi tei tavini na i te sekene. No te hepohepo, aita taua papai salamo i oaoa faahou, ua mauruuru ore râ. Ua tae roa oia i te manaˈo eita e hoona ia tavini i te Atua.—Sal. 73:2-5, 7, 12-14, 16, 17, 21.

14-15. Eaha te haapiiraa e huti mai i te aamu o na tavini e toru?

¹⁴ Ua tiaturi Hana, Davida e te papai salamo ia Iehova. Na roto i te pure, ua huri ratou i to ratou ahoaho i nia ia Iehova. Ua faataa atoa ia ˈna i te tumu e hepohepo ai ratou. Aita atoa na tavini e toru i faaea i te haere i te vahi haamoriraa a Iehova.—Sam. 1, 1:9, 10; Sal. 55:22; 73:17; 122:1.

¹⁵ Ua aroha hamani maitai Iehova i te tavini tataitahi. Ua horoa oia i te hau o te feruriraa ia Hana. (Sam. 1, 1:18) Ua faaora ia Davida i to ˈna mau ati atoa. (Sal. 34:19) Ua aratai i te papai salamo  maoti ta ˈna mau aˈoraa î i te here. Teie ta te papai salamo i himene: “E mea maitai . . . ia ˈu ia haafatata ˈtu i te Atua: ua tiaturi au i te Fatu ra ia Iehova.” (Sal. 73:23, 24, 28) Eaha te haapiiraa e huti mai? I te tahi taime, e hepohepo tatou no te mau fifi. E nafea râ ia faaoromai tamau? E feruri maite anaˈe mea nafea Iehova i te tautururaa i ta ˈna mau tavini i tahito. E pure anaˈe ia ˈna ma te faaroo aueue ore e e haapao anaˈe i ta ˈna e faaue mai ra ia rave.—Sal. 143:1, 4-8.

16-17. (a) No te aha eiaha tatou ia faaea o tatou anaˈe? (b) E nafea e noaa faahou mai ai te itoito?

¹⁶ Teie te tahi atu haapiiraa e huti mai i na aamu e toru: Eiaha tatou ia faataa ê ia tatou ia Iehova e i to ˈna nunaa. (Mas. 18:1) Te parau ra te tuahine Nancy tei faaruehia e ta ˈna tane: “E rave rahi mahana, aita vau i hinaaro e farerei e e paraparau i te taata. Rahi atu â vau i te faaea o vau anaˈe, rahi atu â vau i te hepohepo.” Ua taui te  huru o Nancy i to ˈna tautururaa ia vetahi ê. Te na ô ra oia: “E faaroo vau ia faataa mai ratou ta ratou e faaruru ra. E aroha roa vau ia ratou e eita vau e haapao faahou i to ˈu mau fifi.”

¹⁷ E noaa faahou mai te itoito i te mau putuputuraa Kerisetiano. I reira tatou e vaiiho ai ia Iehova ia “tauturu” e ia “haamahanahana” ia tatou maoti to ˈna varua moˈa, ta ˈna Parau e to ˈna nunaa. (Sal. 86:17) E oaoa atoa tatou i te faaitoito te tahi i te tahi. (Roma 1:11, 12) Te faataa ra te tuahine Sophia: “Na Iehova e to tatou fetii taeae e tauturu mai ra ia faaoromai tamau. Mea faufaa roa no ˈu te mau putuputuraa. Ia pinepine au i te poro e te amuimui i te mau taeae e tuahine o ta ˈu amuiraa, e faaea vau i te hepohepo e te haapeapea.”

18. Ia hepohepo tatou, eaha ta Iehova e nehenehe e tuu mai i roto ia tatou?

¹⁸ Ia hepohepo tatou, e haamanaˈo anaˈe ua ineine Iehova i te tauturu mai i teie nei e a muri aˈe. E nehenehe Iehova e tuu mai i roto ia tatou “te hinaaro e te puai” no te faaoromai tamau.—Phil. 2:13.

19. Eaha te haapapuraa ta te Roma 8:37-39 e horoa ra?

¹⁹ A taio i te Roma 8:37-39. Te haapapu ra te aposetolo Paulo e ore roa te tahi mea e faataa ê ia tatou i te here o te Atua. E ia hepohepo to tatou mau taeae e tuahine, e nafea ia tauturu atu? E faaite mai to mua ˈtu haapiiraa e nafea tatou ia pee i to Iehova hiˈoraa ma te faaite i te aumauiui e te faaoromai i nia i to tatou mau hoa Kerisetiano.