1. Малы милемлы Иисуслэсь кылъёссэ лыдэ басьтоно?

 БЕРПУМ нуналъёс сярысь веракуз, Иисус Христос дышетскисьёсызлэсь мылкыдзэс ӝутӥз: «Асьтэдыз асьтэос чаклалэ... та улонлэн сюлмаськонъёсынызы сэрен [яке сюлмаськонъёсын сэрен со сярысь, кызьы улонлы коньдон поттыны] сюлэмъёсты секыт медаз улы» (Лука 21:34). Милемлы та кылъёсты лыдэ басьтоно. Малы? Пӧртэм сюлмаськонъёс, кудъёсыныз та дуннеысь адямиос пумисько, милесьтым но палэнтӥ уг ортчо.

2. Кыӵе шуг-секытъёсын пумиськыло куд-ог вын-агайёс но сузэр-апайёс?

² Куддыръя шуг-секытъёс огез бӧрсьы огез кылдо. Тани кык учыръёс. Рассеянной склерозэн b курадӟись Джон c нимо агаез кышноез кельтӥз, кудӥныз соос 19 ар ӵоже ӵош улӥзы. Собере кык нылъёсыз Иеговалы ужамысь-тыршемысь дугдӥзы. Боб но Линда нимо кузпалъёс мукет шуг-секытъёсын пумиськизы. Соос кылизы ужтэк, нош собере улон интытэк но. Со сяна, Линдалэн сюлмыз висьыны кутскиз, соин сэрен со кулыны но быгатэ вал. Озьы ик солэсь шедьтӥзы висёнзэ, кудӥз сэрен солэн мугорыз висёнъёсын нюръяськыны ӧз быгаты ни.

3. Мае ми тодӥськомы Иегова сярысь, Филиппыослы 4:6, 7 лыдэ басьтыса?

³ Оскыны луэ: Кылдытӥсьмы но яратӥсь Атаймы, Иегова, вала, кызьы ми вылын сюлмаськонъёс шӧдӥсько. Но со  милемлы юрттыны дась. (Лыдӟе Филиппыослы 4:6, 7.) Библиын гожтэмын, кыӵе шуг-секытъёсын Иеговалэн ужась-тыршисьёсыз пумиськылӥзы но кызьы со соослы юрттылӥз. Эскеромы куд-ог учыръёсты.

4. Кыӵе шуг-секытъёсын пумиськиз Илия но мар солы юрттӥз?

⁴ Илия секыт дыре ужаз-тыршиз но бадӟым шуг-секытъёсын пумиськылӥз. Израильысь Ахав эксэй, кудӥз Инмарлы оскымон ӧй вал, Иезавелез кышно басьтӥз. Со вал лек но кескич кышномурт, озьы ик со Вааллы йыбыртъяз. Соос быдэс шаерзэс Вааллы йыбырттонэ кыскизы. Со сяна, соос Иеговалэсь трос пророкъёссэ виизы. Нош Илия утиськыны быгатӥз. Озьы ик, Иеговалы оскиськыса, Илия сютэм дыръёсы улэп кыльыны быгатӥз (3 Экс. 17:2—4, 14—16). Со сяна, со Иеговалы оскиськиз, куке пумит сылӥз Вааллэн пророкъёсызлы но соослы, кинъёс солы йыбыртъяло вал. Израиль калыклэсь Илия мылкыдзэ ӝутылӥз Иеговалы ужаны-тыршыны (3 Экс. 18:21—24, 36—38). Со секыт дыръёсы Илия трос пол ас вылаз Иеговалэсь юрттэмзэ шӧдылӥз.

5, 6. Мае шӧдӥз Илия, 3 Эксэйлыкъёслэсь 19:1—4 лыдэ басьтоно ке, но кызьы Иегова Илияез оскытӥз, сое яратэ шуыса?

⁵ Лыдӟе 3 Эксэйлыкъёслэсь 19:1—4. Озьы ке но Илия туж кышказ но Вирсавия каре бызьыса кошкиз, куке Иезавель сое виёз шуыса кылзэ сётӥз. Солэн сокем мылкыдыз куашкамын вал, со аслыз кулон но куриз. Малы? Илия тырбыдэстэм но «асьмеос кадь ик адями вал» (Иак. 5:17). Сюлмаськыса но туж зол жадьыса, вылды, со номыр  карыны ӧз быгаты ини. Со малпаз, дыр, солэн тыршемез юнме луиз, Израильын умой пала номыр уг воштӥськы но со гинэ Иеговалы ужаны-тыршыны азьланьтэ шуыса (3 Экс. 18:3, 4, 13; 19:10, 14). Милемлы валантэм кадь потыны быгатоз, оскымон пророклэн кулэмез потэ вал шуыса. Нош Иегова Илияез валаз.

⁶ Иегова Илияез солэн кылъёсыз понна ӧз курла. Со юрттӥз солы выльысь юн луыны (3 Экс. 19:5—7). Собере Иегова, мертаны луонтэм кужымзэ возьматыса, Илиялы лякытэн юрттӥз малпаськон амалзэ тупатыны. Со бӧрсьы Иегова вераз, Израильын эшшо 7 000 адями вань на шуыса, кудъёсыз Вааллы уг йыбыртъяло (3 Экс. 19:11—18). Озьы Иегова Илияез оскытӥз, сое яратэ шуыса.

7. Малы милемыз буйгатэ со, кызьы Иегова Илиялы юрттӥз?

⁷ Али тӥляд улонады секыт дыръёс луыны быгато. Соку малпаське, кызьы Иегова учкиз Илиялэн шӧдонъёсыз шоры. Со тӥледыз буйгатоз но оскытоз, Иегова милесьтым но сюлмаськонъёсмес вала шуыса. Со тодэ, мае ми быгатӥськомы лэсьтыны, нош мае ум. Озьы ик со малпанъёсмес но шӧдонъёсмес тодэ (Пс. 102:14; 138:3, 4). Ми но, Илия сямен, Иеговалы оскиськомы ке, Инмар юрттоз милемлы вормыны шуг-секытъёсты, кудъёсыз милемыз сюлэмшугъяськыто (Пс. 54:23).

8. Кызьы Иегова юрттоз тӥледлы сюлэмшугъяськонъёс дыръя?

⁸ Сюлэмшугъяськонъёс дыръя тӥ малпаны быгатоды, номыре воштыны уг луы шуыса, но тӥляд мылкыдды куашканы быгатоз. Сыӵе дыре тодады возёно, Иегова сюлэмшугъяськонъёс дыръя тӥледлы юрттоз шуыса. Кызьы? Со мылкыдмес ӝутэ солы сюлмаськонъёсмы сярысь вераны. Но юрттэт сярысь тэльмырыса вӧсяськемдылы Инмар одно ик ответ сётоз (Пс. 5:4; 1 Пётр 5:7). Соин ик ялан Иеговалы вӧсяське со сярысь, мар тӥледыз сюлмаськытэ. Тӥ уд кылэ Инмарлэсь куаразэ озьы, кызьы Илия кылӥз, нош со вераськоз тӥледын аслаз Кылыз, Библия, пыр но аслаз организациез пыр. Со, мае тӥ лыдӟиськоды Библиысь, быгатэ тӥледыз буйгатыны но тӥледлы оскон сётыны. Со сяна, тӥледыз огъя оскисьёсты юнматыны быгато (Рим. 15:4; Евр. 10:24, 25).

9. Кызьы милемлы эшмы юрттыны быгатэ?

⁹ Иегова Илияез косӥз ужезлэсь оглюкетсэ Елисейлы сётыны. Озьы Иегова Илиялы умой эш сётӥз, кудӥз солы секыт дыръя юрттысал. Туннэ но милемлы сюлмаськонъёсынымы нюръяськыны капчигес луоз, ми шӧдонъёсмы сярысь эшмылы верамы ке (4 Экс. 2:2; Мад. 17:17). Тӥ вӧзын сыӵе адями ӧвӧл ке, Иеговалы вӧсяське: со тӥледлы шедьтыны мед юрттоз юн осконэн христиан муртэ, кудӥз тӥледыз юнматыны быгатысал.

10. Малы Илияен луэм учыр милемлы оскон сётэ? Кызьы милемыз юнматэ кыл сётон, кудӥз гожтэмын Исаиялэн 40:28, 29?

¹⁰ Иегова Илиялы сюлэмшугъяськонъёсыз дыръя юрттӥз но, со трос аръёс ӵоже Инмарлы ужаны-тыршыны быгатӥз на. Илияен луэм учыр милемлы оскон сётэ. Секыт сюлэмшугъяськон тазалыкмы но мылкыдмы вылын туж уродэн шӧдӥськыны быгатэ. Нош ми Иеговалы оскиськомы ке, со милемыз юнматоз, ми азьланяз но солы ужаны-тыршыны мед быгатомы шуыса. (Лыдӟе Исаиялэсь 40:28, 29.)

11—13. Кызьы шуг-секытъёс но сюлмаськонъёс шӧдӥсько вал Инмарлэн куинь ужась-тыршисьёсыз вылын, кудъёсыз вашкала дыръёсы улӥзы?

¹¹ Иеговалэн мукет ужась-тыршисьёсыз но,  кудъёсыз сярысь ми Библиысь лыдӟиськомы, секыт дыръёсын пумиськылӥзы. Кылсярысь, Анна курадӟиз нылпиосыз ӧвӧлэн, нош со дыре со возьыт шуыса лыдъяськиз. Со сяна, картэзлэн кыкетӥ кышноез сое мыскылляз (1 Экс. 1:2, 6). Анналы сокем секыт вал, со бӧрдыса но номыр сиытэк улӥз (1 Экс. 1:7, 10).

¹² Давид но сюлэмшугъяськонъёсын пумиськылӥз. Малпаське, маин солы пумиськоно луиз. Трос лэсьтэм янгышъёсыз сэрен Давидэз возьытлыкез йырйиз (Пс. 39:13). Солэн яратоно пиез Авессалом солы пумит ӝутскиз но берлогес кулӥз (2 Экс. 15:13, 14; 18:33). Озьы ик яратоно эшез Давидлы оскымон ӧз кыльы (2 Экс. 16:23—17:2; Пс. 54:13—15). Псаломъёсты гожъякуз, Давид трос пол вералляз, макем солэн мылкыдыз куашкамын но макем со Иеговалы оскиське (Пс. 37:6—11; 93:17—19).

¹³ Берлогес псаломъёсты гожъясь лек адямиослэн улэмзылы вожъяськыны кутскиз. Со потэмын вал, вылды, Асаф левитлэн выжыысьтыз, кудӥз Иерусалимысь храмын ужаз-тыршиз. Урод шӧдонъёсыз сэрен со шумпотонзэ ыштӥз. Сое шум уг потто вал бакель каронъёс но, кудъёссэ со Инмарлы ужаса-тыршыса басьтылӥз (Пс. 72:2—5, 7, 12—14, 16, 17, 21).

14, 15. Малы дышето милемыз куинь эскерем учыръёс?

¹⁴ Та куинь ужась-тыршисьёс Инмарлы юрттэт понна вазиськылӥзы. Соос ӟырдыт вӧсяськонъёсын Инмарлы сюлэмзэс усьтӥзы но солы веразы, малы соослы сокем секыт. Озьы ик соос храме ветлэмысь ӧз дугдэ (1 Экс. 1:9, 10; Пс. 54:23; 72:17; 121:1).

¹⁵ Соос пӧлысь котькудӥзлы Иегова гажам-жалямзэ возьматӥз. Анналэн сюлмыз каньыл луиз (1 Экс. 1:18). Давид гожъяз: «Шонер  улӥсьлэн трос куректон-кайгуэз, нош соослэсь ваньмызлэсь сое Кузё-Инмар мозмытоз» (Пс. 33:20). Нош псаломъёсты гожъясь шӧдӥз, Иегова, сое лякытэн тупатъякуз, сое бур китӥз кутыса возиз шуыса. Со гожтӥз: «Нош мыным шумпотон — Инмарлэн матаз мыныны! Инмаре Кузё-Инмаре, Тон вылэ оскиськыса улӥсько» (Пс. 72:23, 24, 28). Малы дышето милемыз та учыръёс? Куддыръя ми туж секыт дыръёсын пумиськыны быгатӥськомы. Нош ми ваньзэ чиданы быгатомы, Иеговалы вӧсяськимы ке, солэсь кылзӥськимы ке но малпаськимы ке со сярысь, кызьы со мукетъёсызлы юрттылӥз (Пс. 142:1, 4—8).

16, 17. а) Малы мукет адямиослэсь палэнсконо ӧвӧл? б) Мар милемыз юнматыны быгатэ?

¹⁶ Библиысь куинь эскерем учыръёс милемыз озьы ик дышето, милемлы Иеговалэсь но солэн калыкезлэсь палэнсконо ӧвӧл шуыса (Мад. 18:1). Нэнси нимо сузэр, кудӥз секыт сюлэмшугъяськон пыр потӥз, куке сое картэз кельтӥз, вера: «Мынам нокинэ адӟеме но нокинэн вераськеме ӧз поты. Озьы трос нуналъёс ӵоже кыстӥськиз. Нош макем кыдёке мон мукет адямиослэсь палэнски, сокем мӧзмытгес мыным луэ вал». Ваньмыз воштӥськиз, куке Нэнси луонлык утчаны кутскиз,  шуг-секытэн пумиськем адямиослы юрттон понна. Со вера: «Мон соосты кылзӥ, куке соос шуг-секытъёссы сярысь веразы. Но мон шӧдӥ, мукетъёсызлы гажан-жалянме возьматыкум, мон асме ӧжытгес жаляны кутски шуыса».

¹⁷ Милемыз кенешлэн пумиськонъёсыз юнматыны быгато. Отчы лыктыса, ми Иеговалы эшшо луонлык сётӥськомы на милемлы юрттыны но милемыз буйгатыны (Пс. 85:17). Эксэйлык юртын со юнматэ милемыз, святой духсэ, Библиез но ужась-тыршисьёссэ уже кутыса. Пумиськонъёсын ми ог-огмылэсь мылкыдмес ӝутӥськомы (Рим. 1:11, 12). Тани мар вера София нимо сузэр: «Иегова но милям вынлыкмы юрттӥзы мыным вань шуг-секытъёс пыр потыны. Озьы ик мыным туж юрттӥзы кенешлэн пумиськонъёсыз. Мон валай: тодытон уже но кенешлэн ужъёсаз тросгес пыриськыса, мыным капчигес луэ сюлэмшугъяськонъёсын но шуг-секытъёсын нюръяськыны».

18. Кызьы Иегова нюръяськыны юрттэ малпанэн, номыр уз воштӥськы ини шуыса?

¹⁸ Тӥляд сюлэмды шугъяське ке, тодады возе: Иегова кылзэ уг сёты азьланяз гинэ милемыз шуг-секытъёслэсь мозмытыны, нош со али ик ини юрттэ милемлы соосын нюръяськыны. Со милемлы кужым но мылкыд сётэ нюръяськыны малпанъёсын, номыр уз воштӥськы ини шуыса но ми номырлы ярасьтэмесь шуыса (Флп. 2:13).

19. Кыӵе кыл сётон гожтэмын Римъёслы 8:37—39?

¹⁹ Лыдӟе Римъёслы 8:37—39. Кызьы адӟиське апостол Павеллэн кылъёсысьтыз, номыр уз быгаты «асьмемыз Инмарлэн яратонэзлэсь люкыны». Нош кызьы юрттоно вын-агайёслы но сузэр-апайёслы, кудъёсыз шуг-секытъёсын пумисько? Вуоно статьяын эскериськоз, кызьы, Иеговалэсь адӟем карыса, гажан-жалянэз возьматоно но юнматоно соосты, кинъёслы секыт.