1. Xeeni vanireerela aya ovaha ephoole nlopolo na Yesu?

EPROFESIA aalavunle awe voohimya sa mahiku ookiserya, Yesu aahimmye so: “Mwipasope, wira mirima sanyu sihilemeliwe ni sonanara ni sohapala ni sovelaveliha s’ekumi”. (Luka 21:34) Hiyo nihaana ovaha ephoole nlopolo nno na Yesu. Nthowa xeeni? Nthowa noowi, okathi ola wooxankiha ninkhala ahu, pooti onikhumelela mixankiho soovelaveliha.

2. Mixankiho xeeni sinaaphwanya anna ni arokora akina?

² Okathi mukina, ninnikumana mixankiho soovelaveliha okathi omosaru. Nkahaya nwehe matakiheryo vakhaani anittharelana. Munna oniihaniwa Makaario, * onninwereya oretta oniihaniwa esclerose múltipla. Munna ole aahixanka vanceene okathi mwaarawe aamutthyanwe awe, nnaamwi yaavirinhe iyaakha 19 athelanne ene. Anaawe anli aaxithiyana yaahihiya omukokhorela Yehova. Vano muxankiho wa anamathelana akina aniihaniwa Bob ni Linda woovirikana ni muxankiho wa Makaario. Oowanli aya aahoomoliwa omutekoni, nto okhala wira khiyaarina musurukhu wira alive empa yaalukari aya, awo ahoomoliwa. Etthu yootepa oxankiha, okhala wira Linda enninwereya erooho aahiiso murima, nave erutthu awe khenwerya omwaakiherya iretta sinimphwanya.

3. Moovarihana ni aFilipi 4:6, 7, nikupaliki exeeni?

³ Yehova, Tiithi ahu oophenta ni Mpattuxa ahu. Tivonto, ninnikupali wira onnisuwela oxanka wahu ni onniphavela onikhaliherya okathi ninwanana ahu mixankiho. (Mmusome aFilipi 4:6, 7.) Biibiliya onnilavula matakiheryo manceene a arumeyi a Muluku yaavilenle oxanka. Nave onnihimya moota Yehova aakhalihenrye awe okathi owo wooxankiha. Nrowe nithokorerye matakiheryo vakhaani.

4. Mixankiho xeeni saamukhumelenle Eliya, ni aamoonela sai Yehova?

⁴ Profeta Eliya aamurumeela Yehova okathi wooxankiha ni aahikumana mixankiho sinceene. Mwa ntakiheryo, Mwene Akhabi aalamulela okathi ole, khaaroromeleya wa Yehova. Akhabi aahimuthela Yezabeli, yoowo aamukokhorela Bayali. Nto Akhabi ni Yezabeli yaahiwiiriha atthu anceene elapo ele omukokhorela Bayali ni yaahiwiiva maprofeta a Yehova. Masi Eliya khiiviwe. Mwaha woomuroromela Yehova, Eliya aahoopowa okathi wa etala yuulupale yaakhumelenle elapo ele. (1 Mam. 17:2-4, 14-16) Nave, Eliya aahimuroromela Yehova okathi aavaanyiha awe maprofeta ni atthu ale yaamukokhorela Bayali. Eliya aahivikaniha waatumererya aIsarayeli omukokhorela Yehova. (1 Mam. 18:21-24, 36-38) Okathi ole wotheene wooxankiha, Eliya aahoona wira aanikhaliheriwa ni Yehova.

5-6. Moovarihana ni 1 Mamwene 19:1-4, tuuvi waari moonelo wa Eliya? Yehova aamoonihenrye sai wira aanimphenta?

⁵ Mmusome 1 Mamwene 19:1-4. Eliya aahoova vanceene okathi Pwiyamwene ootakhala Yezabeli aaphavela awe omwiiva. Nto aahitthyawela oBeri-Xeba. Owo aahixanka vanceene mpakha “anaphavela okhwa”. Exeeni yaamwiiriha Eliya okhalana moonelo owo? Mwaha woowi aari oohimalela ni “ari mutthu ntoko hiyo”. (Yak. 5:17) Woonasa wene, Eliya aahixinttiwa ni oxanka ni okhulumuwa. Pooti wira, Eliya uupuwela wira wiimananiha wawe wotheene okhaliherya  okokhorela wekeekhai khiwaakumihenrye etthu. Nave uupuwela wira khiivo etthu yaaturukeyale wIsarayeli ni oona wira yena paahi taamukokhorela Yehova. (1 Mam. 18:3, 4, 13; 19:10, 14) Woonasa wene, munnixanka vaavo munuupuwela anyu moonelo wa profeta ole oororomeleya. Masi Yehova aanisuwela oratteene moonelo wa Eliya.

⁶ Okathi Eliya aamulenle awe Yehova itthu saamuxankiha, Yehova khampwapwenle. Ohiya-vo, Yehova aahimukhaliherya Eliya okhalana ikuru. (1 Mam. 19:5-7) Muhoolo mwaya, mooreerela murima Yehova aahimukhaliherya Eliya oturuka muupuwelo awe omooniheryaka owerya wawe. Nave Yehova aahimuleela Eliya wira yaahikhala atthu 7.000 wIsarayeli yaamurumeela Yehova, yaawo yaakhoottale omukokhorela Bayali. (1 Mam. 19:11-18) Yehova aahipaka itthu iyo sotheene wira omooniherye Eliya wira aanimphenta.

7. Xeeni ori aya woolipiha moota Yehova aamukhalihenrye awe Eliya?

⁷ Niireke muniwanana muxankiho woovelaveliha? Akhala wira ti siiso, ti voomaaliha wuupuwela wira Yehova anisuwela mixankiho sa Eliya! Eyo enooniherya wira Yehova onnisuwela mixankiho ninwanana ahu. Maana onnisuwela itthu ninwerya ahu opaka ni itthu nihinwerya ahu, nave onnisuwela muupuwelo ni moonelo ahu. (Esal. 103:14; 139:3, 4) Akhala wira nnoomutakiha Eliya nimuroromelaka Yehova moomalela, owo onoonikhaliherya owanana oxanka wahu.​—Esal. 55:23.

8. Yehova onrowa wookhaliheryani sai owanana oxanka?

⁸ Oxanka pooti omwiiriha mutthu okhalana muupuwelo woohiloka ni okhulumuwa vanceene. Akhala wira eyo ti etthu eniwiiraneelani, musuweleke wira Yehova onimookhaliheryani owanana oxanka wanyu. Masi Yehova onrowa wookhaliheryani sai? Muhaana onvekela, maana oniphavela wira mmuleeleke itthu sotheene sinooxankihani ni onnilipiherya wira onimwaakhula mavekelo anyu. (Esal. 5:4; 1 Ped. 5:7) Tivonto, khula okathi munxanka anyu, munvekeleke Yehova. Owo khonrowa olavula ni nyuwo ntoko aalavunle awe ni Eliya. Masi onoolavula ni nyuwo omurumeelaka Biibiliya ni muloko wa eKristau. Matakiheryo manceene munrowa anyu ophwanya animookhaliheryani vanceene okhalana nlipelelo ni nimaaliho. Nave anna ni arokora animookhaliheryani ni woolipihani.​—aRom. 15:4; aHéb. 10:24, 25.

9. Mpatthani oororomeleya onrowa onikhaliherya sai?

⁹ Yehova aahimuleela Eliya wira aahaana okhaliheriwa ni Eliseyo. Mwaha woopaka eyo, Yehova aahinvaha Eliya mpatthani aarowa omukhaliheryaka okathi wooxankiha. Moolikanasa, Yehova oniphavela wira mmuleeleke mixankiho sanyu mpatthani anyu oororomeleya, owo onimookhaliheryani owanana oxanka ni oriipiwa wanyu murima. (2 Mam. 2:2; Mir. 17:17) Muupuwelaka wira khamurina mpatthani mukhanle anyu oomuleela mixankiho sanyu, muhaana onvekela Yehova wira ookhaliheryeni omphwanya muKristau oolipa momunepani onrowa wookhaliheryani, woolipihani ni woomaalihani.

10. Yowiiraneya ya Eliya ennivaha nlipelelo xeeni? Yooleiherya eri Yesaya 40:28, 29, ennikhaliherya sai?

¹⁰ Okhaliheriwaka ni Yehova, Eliya aahiwerya owanana oxanka wawe ni aahiviriha iyaakha sinceene omurumeelaka Yehova moororomeleya. Yowiiraneya ya Eliya enninivaha nlipelelo. Okathi mukina, hiyo pooti oxanka vanceene mpakha okhulumuwa. Masi akhala wira nnoomuroromela Yehova ni murima wotheene, owo onoonivaha ikuru wira nivikanihe ovilela ni omukokhorela.​—Mmusome Yesaya 40:28, 29.

11-13. Mixankiho xeeni saaphwannye arumeyi araru a Muluku?

¹¹ Arumeyi akina a khalai a Yehova yaahiwanana mixankiho suulupale. Mwa ntakiheryo, Ana aahixanka ni wuuliwa muru mwaha woohiyara. Etthu ekina yaatepa omuxankiha waari ooveehiwa ni naamwaatteiwa awe. (1 Sam. 1:2, 6) Oxanka wa Ana waari wuulupale, nto aamakela wunla ni khaaphavela olya.​—1 Sam. 1:7, 10.

¹² Nave waahikhala okathi Mwene Davidi ahaareere awe oxanka. Nkahaya muupuwele mixankiho aavilenle awe. Owo aahiriipiwa murima vanceene mwaha wa itampi aapanke awe. (Esal. 40:13) Davidi aanilupatthiwa ni mwanawe iihaniwa Absalomi nto muhoolo mwaya, Absalomi aahiiviwa. (2 Sam. 15:13, 14; 19:1) Nave Davidi aahirukunuweliwa ni mpatthani awe muulupalexa. (2 Sam. 16:23–17:2; Esal. 55:13-15) Isaalimo sinceene Davidi olempe awe, ninnoona wira hata aaxankale ni okhulumuwa, owo khaahiyale omuroromela Yehova.​—Esal. 38:6-11; 94:17-19.

¹³ Muhoolo mwaya, nasalimo mukina aahipacerya waakhalela nrima atthu ootakhala, yaawo yaakhala ntoko wira yaanipuha. Vanikhala wira nasalimo owo aari Mulevi a nloko na Asafi, yoowo aarumeela empa ya Muluku. Nasalimo ole aahixanka vanceene mpakha oriipiwa murima ni okhulumuwa. Owo aahipacerya wuupuwela wira omurumeela Muluku khahiyo etthu yooloka.​—Esal. 73:2-5, 7, 12-14, 16, 17, 21.

14-15. Matakiheryo a arumeyi araru a Muluku anniixuttiha exeeni voohimya sa omuroromela Yehova?

¹⁴ Arumeyi otheene oororomeleya a Yehova naalavunle ahu yaaniroromela okhaliheriwa ni Yehova. Awo yaaninvekela ni omuxonttela  Yehova amuleelaka mixankiho saya. Nave yaahimuleela Yehova etthu yaawiiriha oxanka. Etthu yuulupale yaapanke aya tiila: Awo khiyaahiyale orowa opuro yaathukumana aya wira amukokhorele Yehova.​—1 Sam. 1:9, 10; Esal. 55:23; 73:17; 122:1.

¹⁵ Mooreerela murima, Yehova aahaakhula mavekelo aya. Ana aahiphwanya murettele wa mmuupuweloni. (1 Sam. 1:18) Mwene Davidi aalempe so: “Naxariya onnèhereriwa n’uxanka wunjene: vano Muluku onomwakiha mahiku othene”. (Esal. 34:20) Nave nasaalimo ole aahoona wira Yehova ‘amunvarela ntata nawe nolophwana’ ni aamunvaha miruku sooloka. Nto owo iipale so: “Vano miyo, oreriwa waka wowattamelani: Apwiya, miyo kinnotthyawelelani”. (Esal. 73:23, 24, 28) Matakiheryo ala anniixuttiha exeeni? Okathi mukina pooti onikhumelela mixankiho sinceene sookhulumula. Masi nnoowerya ovilela mixankiho iyo. Etthu nikhanle ahu oopaka tiila: Nihaana wuupuwelela moota Yehova aakhalihenrye awe atthu akina khalai, omuroromela, onvekela ni wiiwelela khula etthu onnivekela awe.​—Esal. 143:1, 4-8.

16-17. (a) Xeeni vahinireerela aya wiivalaanya? (b) Ninrowa ophwanya sai ikuru?

¹⁶ Ntakiheryo na arumeyi ale oororomeleya a Muluku ninniniixuttiha etthu ekina yootthuneya,  etthu ene tiila: Nihikhala-khale nimuhiyaka Yehova ni atthu awe okathi wa mixankiho. (Mir. 18:1) Nancy aahixanka vanceene okathi iyawe aamuhiyale awe. Owo onihimya wira: “Yaahikhala mahiku kahaaphavela aka onweha aahiiso olavula ni mutthu. Nto vaavo kaatepa aka wiivalaanya kaamutepa oriipiwa murima”. Eyo yaahiturukeya okathi Nancy aapacenrye awe ophavela waakhaliherya atthu akina yaarina mixankiho. Vano Nancy onihimya so: “Kaanawiriyana atthu awo okathi yaalavula aya mixankiho saya. Nto kaahoona wira okathi kaawiriyana aka ni waakhaliherya atthu awo, mixankiho saka saanivukuwa”.

¹⁷ Mithukumano sinninikhaliherya ophwanya ikuru. Tthiri okathi ninkhala ahu mmithukumanoni ninnoona wira Yehova ‘onninikhaliherya n’unihakalaliha’. (Esal. 86:17) Nave Yehova onninlipiha orumeelaka munepa awe wootteela, Biibiliya ni anna a mmulokoni. Nave-tho, mithukumano sinninikhaliherya ‘olipihana’ mukina ni mukhwaawe. (aRom. 1:11, 12) Murokora oniihaniwa Sofia ohimmye so: “Yehova, anna ni arokora annikikhaliherya ovilela mixankiho saka. Tthiri mithukumano ti sootepa otthuneya. Kihoona wira vaavo kinluttuweliwa aka olaleerya ni orowela mithukumano, kinniphwanya ikuru wira kivilele oxanka waka”.

18. Akhala wira nookhulumuwa, exeeni Yehova onrowa awe onivaha?

¹⁸ Vaavo munxanka anyu, muupuweleke wira Yehova khahiyo paahi onleiherya omaliha mixankiho sahu muhoolo. Masi hata olelo-va, owo onninivaha itthu sinnikhaliherya ovilela oxanka wahu. Nave Yehova onninivaha “otthuna” ni owerya wira nivilele oxanka ni okhulumuwa wahu.​—aFil. 2:13.

19. ARoma 8:37-39, onnilipiherya exeeni?

¹⁹ Mmusome aRoma 8:37-39. Murummwa Paulo ohimmye wira khiivo etthu ekhanle oonimwalanyiha ni ophenta wa Muluku. Hata vari siiso, anna ni arokora anceene annixanka. Nto nihaana omutakiha Yehova, niwoonelaka othunku ni waakhaliherya ale axankale. Masi ninrowa owerya sai waakhaliherya anna ni arokora awo? Mwaha onittharela ninrowa othokorerya moota nikhanle ahu oopaka eyo.