1. მუშენ ოკო გეფთვალისწინათ იესოშ გაფრთხილება?

იესოქ ბოლო დღალეფიშ გურშენ იწინასწარმეტყველ: „ქიდეკვირით თქვან დუც, ნამდა გურქ ვედგემონკან . . . ირდღაშ ოსოფინალით, [შხვა სიტყვეფით ქოფთქუათინ, ირდღაშიან საჭიროებეფით ვარდა თიშე წუხებათ, ნამდა ქიშუათ დასაბაღ ფარა დუდიშ ეიოჯუმალარო]“ (ლუკ. 21:34). მნიშვნელოვან რე, გეფთვალისწინათ თე გაფრთხილება, მუშენდა შხვეფცალო, ჩქი ხოლო ბრელ პრობლემას შეფხვადუთ.

2. მუ რთულ სიტუაციეფ უღნა ჩქინ და დო ჯიმალეფს?

² მინშა შილებე მუსხირენ პრობლემა ართათ მისოფუანდან. ქობძირათ მუსხირენ იეჰოვაშ მოწმეშ მაგალით. ართ ჯიმა, სახელო ჯონი, * ნამუსით გაფანტულ სკლეროზ უღჷ, განადგურებულო გინაფლენდჷ დუც, მუჟამსით ქორწინებაშე 19 წანაშ უკულ, ოსურქ მიოტუ. თეშ უკულ თიშ ჟირ ძღაბიქ ორგანიზაცია ქიდიტუ. ართ წყვილს, ბობი დო ლინდას შხვანერ სირთულეეფ უღდეს. თინეფს მეუდინეს სამუშაქ დო ჭიჭე ხანშა მუნეფიშ ჸუდექ ხოლო აჸუეს დატებელქ. თე ირფელწკუმა ართო, ლინდას გურიშ პრობლემეფქ ქუდაჭყჷ დო შილებედ უცბას დოღურკო. თის შხვა ლახალა ხოლო უღუდ, ნამუთ იმუნურ სისტემას აზიანენდჷ.

3. ფილიპელეფიშ 4:6, 7-იშ თანახმათ, მუშა შემლებნა ვორდათ დარწმუნებულ?

³ შემლებნა დარწმუნებულ ვორდათ, ნამდა ჩქინ გუმაჭყაფალს დო მოჸოროფე მუმა იეჰოვას, ჯგირო ესმებ, მუჭო ბგინაფლენთ დუც ოწუხებელიშ დროს. ათეშენ, თის ოკო მიმეხვარან, მივერუათ თე სირთულეეფს (წეკითხით ფილიპელები 4:6, 7). ღორონთიშ სიტყვას მოშინაფილ რე, მუნერ სირთულეეფს  შეხვადუდ ბრელ თიშ მსახური. თეს გეძინელ, თინა ხოლო რე მოჩამილ, მუჭო მეხვარ იეჰოვაქ თინეფს, მერუესკო თეცალ რთულ სიტუაციეფს. მორთ გუვარჩუათ მუსხირენ მაგალით.

4. მუ სირთულეეფს შეხვად ელიაქ დო მუჭო იგინ თე დროს იეჰოვაშ ელარნა?

⁴ ელია რთულ პერიოდის ცხოვრენდჷ დო ომსახურუდ ღორონც; თიქ ბრელ სერიოზულ პრობლემას შეხვად. თიმ დროს ისრაელს მეფე ახაბი მართველენდჷ, ნამუთ ართ-ართ რდუ თი მეფეეფშე, მით ვამორჩილდეს ღორონც. თის ოსურო ჸუნდჷ ბაალიშ თაყვანიშმცემელ იზებელი. თინეფქ მთელ ისრაელ ბაალიშ თაყვანიშმცემელეფით ეიოფშეს დო იეჰოვაშ ბრელ წინასწარმეტყველ გეშაჭყვიდეს. მარა ელიაქ ნტება მახერხჷ. თიქ დიდ შკირენაშ დროს ხოლო გინასკიდ, მუშენდა ონდუდ იეჰოვას (1 მეფ. 17:2—4, 14—16). თეს გეძინელ, თიქ ბაალიშ წინასწარმეტყველეფიშ დო თიშ თაყვანიშმცემელეფიშ წინააღმდეგ გეგშართჷ, მუშენდა, იეჰოვაშა რდუ მენდებულ. ელია ურაგადუდ ისრაელეფს, ემსახურესკო იეჰოვას (1 მეფ. 18:21—24, 36—38). თიქ ბრელშა იგინ იეჰოვაშ ელარნა, გაჭირებაშ დროს.

5, 6. 1 მეფეეფიშ 19:1—4-იშ თანახმათ, მუჭო გინაფლენდჷ დუც ელია დო მუჭო დარწმუნ იეჰოვაქ, ნამდა უჸორდჷ თინა?

⁵ წეკითხით 1 მეფეები 19:1—4. ელიაქ მანგარო დოშკურდჷ, მუჟამსით დედოფალ იზებელქ დარცქინ, ნამდა დოჸვილუნდჷ. თიქ ბეერ-შებაშა ინტჷ. ელიას თიცალო აფუდ გურ გოტახილ, ნამდა ღურა ხოლო ქინატრჷ. მუშენ რდუ ელია თეცალ მდგომარეობას? თინა არასრულყოფილ რდუ დო  ჩქინცალ გრძნობეფ უღუდ (იაკ. 5:17). შილებე მუშ ემოციურ მდგომარეობაქ მანგარო გეგნოშულიდკო. ვარდა ფიქრენდკო, ნამდა თიშ მონდომას, ხე ქეშუნწყუკო წმინდა თაყვანიშმცემლობას, მუთუნ შედეგიქ ვა მაჸუნ; შილებე თიშენ ხოლო წუხენდკო, ნამდა ისრაელს მდგომარეობა ვეთირუდ დო მუშ მეტ მითინ ვარდჷ იეჰოვაშ თაყვანიშმცემელ (1 მეფ. 18:3, 4, 13; 19:10, 14). შილებე მიკვედან, მუშენ გურჩქინდჷ თე ართგურ წინასწარმეტყველს თეცალ გრძნობეფქ, მარა იეჰოვას ჯგირო არჩქილედ ელიაშ.

⁶ თინა ვა გადღანებ ელიას თეცალ გრძნობეფიშ გიმოხანტუაშ გურშენ. პირიქით, ქიმეხვარ, დირთინუკო ძალეფ (1 მეფ. 19:5—7). უმოს გვიანო, ღორონთიქ მუშ სარკო ძალიერებაშ გიმორჩქინათ აზროვნება შეუსწორ წინასწარმეტყველს. თეშ უკულ, იეჰოვაქ ელიას უწუ, ნამდა ისრაელს 7 000 კოჩი რდუ, მით ვამსახურუდ ბაალს (1 მეფ. 19:11—18). თეცალ მოქციებათ, ღორონთიქ დარწმუნ ელია, ნამდა უჸორდჷ.

7. მუშა მარწმუნენა თიშ რჩქინა, მუჭო მეხვარ იეჰოვაქ ელიას?

⁷ თქვა ხოლო ხომ ვა რეთ მძიმე ემოციურ მდგომარეობას? თაშ ქორენ-და, გურშა ეიქექუანა თიშ რჩქინა, ნამდა იეჰოვას არჩქილედ, მუჭო გინაფლენდჷ ელია დუც. თეშ რჩქინა მარწმუნენა, ნამდა იეჰოვას არჩქილე ჩქინ ემოციურ მდგომარეობა. თის უჩქჷ, მუზმა შემლებნა დო თინა ხოლო, მუს ფიფქრენთ დო მუჭო ბგინაფლენთ დუც (ფსალმ. 103:14; 139:3, 4). მუჟამსით ელიაცალო ჩქი ხოლო ქიმვენდებუთ იეჰოვას, თინა ქიმმეხვარებნა მივერუათ პრობლემეფს, ნამდგაშ გურშენ ემოციურო გლახათ ბგინაფლენთ დუც (ფსალმ. 55:22).

8. მუჭო მიგეხვარებნა იეჰოვა მერუათ ემოციურ მდგომარეობას, განსაცდელეფიშ დროს?

⁸ განსაცდელეფიშ გურშენ შილებე დუც გლახათ გინაფლენდათ დო ფიქრენდათ, ნამდა თქვან სიტუაცია დღას ვეთირუ. ათეშენ, შილებე გურქ ხოლო გოიტირხან. თაშ ქორენ-და, ვაგგოჭყორდან, ნამდა იეჰოვას შეულებ ქიმგეხვარან, მერუათ თეცალ მდგომარეობას. მუჭო მიგეხვარებნა თინა? ღორონც ოკო, ნამდა ქეჩუათ, მუ გაწუხენა დო მუჭო გინაფლენთ დუც. თინა აუცილებერო ქუპასუხენს თქვან ოთხუალს დო ქიმგეხვარებნა (ფსალმ. 5:3; 1 პეტ. 5:7). თაშ ნამდა, ხშირას ქეჩით იეჰოვას თქვან პრობლემეფიშ გურშენ. მართალ რე თინა პირდაპირ ვა დოირაგადუანა, მუჭოთ ელიაშ შემთხვევას რდუ, მარა იეჰოვა ბიბლიაშ დო მუშ ორგანიზაციაშ საშვალებათ ქოიპასუხენა. თიშ სიტყვას ინოჭარილ შემთხვევეფ გურშა ეიქექუანა დო იმენდის ქიმერჩანა. თეს გეძინელ, თქვანდა გურიშ ელაკინა და დო ჯიმალეფს ხოლო შეულებნა (რომ. 15:4; ებრ. 10:24, 25).

9. მუჭო შეულებ სანდო მეგობარს ჩქინ მოხვარა?

⁹ იეჰოვაქ ელიას უწუ, ნამთინე პასუხიშმგებლობა ელისეს გეგნაბარკო. თეშნერო, ღორონთიქ ელიას დოუგორ ჯგირ მეგობარ, ნამუთ ქიმეხვარებუდ თის, მუჟამსით დუც გლახათ იგინანდჷ. ჩქი ხოლო, მუჟამსით ჩქინ გრძნობეფიშ გურშენ სანდო მეგობარს ქივეჩიებუთ, თინა მიმეხვარებნა მივერუათ ემოციურ მდგომარეობას (2 მეფ. 2:2; იგავ. 17:17). ქოფიქრენთ, ნამდა თეცალ მეგობარ ვა რჸუნა-და, ქოთხით იეჰოვას, ქიმგეხვარან, დოგორათ მოწიფულ ქრისტიან, ნამუთ ემოციურო ქელაიდირთუნა.

10. მუშ იმენდის მარზენა ელიაშ მაგალით დო მუჭო მიმეხვარებნა ესაიაშ 40:28, 29-ს მოჩამილ დაპირება?

¹⁰ იეჰოვაქ ელიას მეხვარ, მერუკო ემოციურ პრობლემეფს დო იმსახურკო ართგურო წანეფიშ დინახალე. ელიაშ მაგალით დიდ იმენდის მარზენა. შილებე შეფხვადათ თიცალ პრობლემეფს, ნამუთ ფიზიკურ დო ემოციურ ძალეფს მიდამღანა. მარა თეცალ დროს იეჰოვას ქიმვენდებუთ-და, თინა ქომჩანა ძალას, ნამუთ მოსაჭირნა, ნამდა ართგურო გუვაგრძელათ მსახურება (წეკითხით ესაია 40:28, 29).

11—13. მუჭო გინაფლენდჷ დუც ღორონთიშ სუმ მსახურ?

¹¹ ბიბლიას მოშინაფილ ღორონთიშ შხვა მსახურეფს ხოლო უღდეს ბრელ ოწუხებელ. მაგალთო, ხანას სქუა ვა ურჩქინდუდ, მუთ თი დროს დიდ ონჯღორეთ ითვალუდ; თეს გეძინელ, მუშ ქომონჯიშ მაჟია ოსურ გიაძიცენდჷ (1 სამ. 1:2, 6). ხანა თიცალ დამწუხრებულ რდუ, ნამდა ინგარდჷ დო ოჭკუმალს ხოლო ვა ჭკუმუნდჷ (1 სამ. 1:7, 10).

¹² მინშა მეფე დავითი ხოლო დუც ემოციურო გლახათ გინაფლენდჷ. დეფიქრით თი პრობლემეფშე, ნამდგას შეხვადუთ. თიქ ბრელშა დაშუ, ათეშენ დანაშაულიშ გრძნობა აწუხენდჷ (ფსალმ. 40:12). დავითიშ საჸოროფო სქუა აბესალომქ თიშ წინააღმდეგ მიდართჷ, მუდგას აბესალომიშ ღურაქ ქუმაჸუნ (2 სამ. 15:13, 14; 18:33). დავითის ხოლოშიან მეგობარქ ხოლო უღალატ (2 სამ. 16:23—17:2; ფსალმ. 55:12—14). ფსალმუნეფიშ უმენტაშის დავით ეჭარუნს, მუნერ გურგოტახილო გინაფლენდჷ დუც. მარა თეწკუმა ართო თის ხოლო იჩიებ, ნამდა იეჰოვაშ დიდ ნდობა უღუდ (ფსალმ. 38:5—10; 94:17—19).

¹³ ართ-ართ ფსალმუნმაბირეს ენჯარ უბადო ხალხიშ ჯგირ ცხოვრებაქ. შილებე თინა ლევიან ასაფიშ გამნარყ რდუკო, ნამუთ ღორონთიშ დიდებულ ტაძარს მსახურენდჷ. თე ფსალმუნმაბირეს მძიმე ემოციურ მდგომარეობა უღუდ დო დუც უბედურო გინაფლენდჷ. თის ართ პერიოდის თინა ხოლო ოეჭვუდ, ქოღირუდ დო ვარ მუთუნშა ღორონთიშ მსახურება (ფსალმ. 73:2—5, 7, 12—14, 16, 17, 21).

14, 15. მუს ბგურაფლენთ თე აბზაცის მოშინაფილ სუმ ბიბლიურ მაგალითშე?

¹⁴ ჟიშე მოშინაფილ სუმხოლო ჭეშმარიტ თაყვანიშმცემელ იეჰოვაშა რდუ მენდებულ. თინეფ შურდოგურით ლოცულენდეს დო იეჰოვას ეჩიებდეს მუნეფიშ ოწუხებელს. თინეფ თავისფალო ეჩიებდეს ღორონც  თი მიზეზეფს, მუდგაშ გურშენ გურ აფდეს გოტახილ. თე ირფელწკუმა ართო, ვემუტებნა იეჰოვაშ თაყვანიშცემაშ ადგილშა გილულა (1 სამ. 1:9, 10; ფსალმ. 55:22; 73:17; 122:1).

¹⁵ იეჰოვაქ გურშა მიღჷ თითოულიშ გაჭირება დო ქუპასუხ. მაგალთო ხანას, შინაგან სიმშვიდექ ქაშუ (1 სამ. 1:18). დავითიქ ჭარჷ: „ბრელ უბედრობა შეხვადუ მართალ კოჩის, მარა იეჰოვა ირფელშე ირსხენს თის“ (ფსალმ. 34:19). ჟიშე მოშინაფილ ფსალმუნმაბირექ, უმოს გვიანო, ქიგინ ნამდა, იეჰოვა ელურდჷ დო ჸოროფათ ხემძღვანელენდჷ. თინა იბირდჷ: „ჩქიმო ჯგირ რე ღორონთწკუმა დაახლოება. უზენაეს უფალ იეჰოვა რე ჩქიმ დუდიშ გითაფორაფალ“ (ფსალმ. 73:23, 24, 28). მუს ბგურაფლენთ თე მაგალითეფშე? მინშა შილებე სერიოზულ პრობლემეფქ ქუმაშუან, ნამუთ მანგარო გინოფშულიდნა. მარა შემლებნა მივერუათ თეცალ სიტუაციეფს, მუჟამსით დეფიფქრებუთ, მუჭო ოხვარუდ იეჰოვაქ შხვეფს, ქიმვენდებუთ თის ლოცვას დო დევემორჩილებუთ ირფელს, მუდგაშ კეთებას ფთხინა (ფსალმ. 143:1, 4—8).

16, 17. ა) მუშენ ოკო ვეუჩილითუათ დუდ იეჰოვა დო თიშ ხალხწკუმა ურთიერთობას? ბ) მუ მიმეხვარებნა დიფრთინუათ ძალეფ?

¹⁶ თე სუმ მაგალითშე ხოლო ართ მნიშვნელოვან გაკვეთილს ბგურაფლენთ — ჩქი იეჰოვა დო თიშ ხალხწკუმა ურთიერთობას დუდ ოკო ვეუჩილითუათ (იგავ. 18:1). ნენსი,  ნამუთ ქომონჯიქ მიოტუ, დუც განადგურებულო გინაფლენდჷ. თინა იჩიებ: „ბრელ ხანს ვორდ თიცალ მდგომარეობას, ნამდა ვა მოკოდ მითინიშ ძირაფა დო ვართ დორაგადაფა. მარა თექ ხოლო უფრაშიქ იჸუ ჩქიმო“. ნენსიქ უჯგუშო იგინ დუდ, მუჟამსით ქეცად ქიმეხვარკო თინეფს, მიდგას პრობლემეფ უღუდ. თინა იჩიებ: „მუჟამსით შხვეფ მუნეფიშ პრობლემეფშენ მეჩიებდეს, ვურჩქილედ თინეფს. თე დროს ნაკლებო ფიფქრენდჷ ჩქიმ დუდშე დო პრობლემეფშე“.

¹⁷ კრებაშ შეხვალამეფშა გილულა, ძალეფს მუჩანა. თექ დასწრებათ იეჰოვას ვარზენთ საშვალებას ქიმმეხვარან დო გურშა ემქექუან (ფსალმ. 86:17). თე შეხვალამეფს ღორონთ მამანგარენა წმინდა შურიშ, მუშ სიტყვაშ დო თანაქრისტიანეფიშ საშვალებათ. თეს გეძინელ, საშვალება მუმაჩამნა გურშა ელუკინათ ართიანს (რომ. 1:11, 12). ართ და სოფია იჩიებ: „იეჰოვაქ დო და დო ჯიმალეფქ მიმეხვარეს მივერიკო ჩქიმ ოწუხებელს. არძაშ უმოს მნიშვნელოვან ჩქიმო კრებაშ შეხვალამეფ რდუ. ვორწყექ, ნამდა მუთ უმოსო ბღებულენქ მონაწილებას ქადაგებას დო მიღჷ ურთიერთობა კრებაწკუმა, თით უმოსო ვორუქ ჩქიმ პრობლემეფს დო ოწუხებელს“.

18. მუჭო მიმეხვარებნა იეჰოვა, მუჟამსით დუც გლახათ ბგინაფლენთ?

¹⁸ მუჟამსით გლახათ ბგინაფლენთ დუც, ირიათო ფშუდან, იეჰოვა ხვალე თის ვა მოპირნა, ნამდა მომავალს სამუდამოთ მოსპუნს პრობლემეფს; თინა ამდღა ხოლო მოხვარნა მივერუათ ოწუხებელს. თინა მარზენა სურვილს დო ძალას გივორჯგინათ გურიშგოტახუას დო უიმენდობას (ფილ. 2:13).

19. მუშა მარწმუნენა რომაელეფიშ 8:37—39?

¹⁹ წეკითხით რომაელები 8:37—39. პავლე მოციქულ მარწმუნენა, ნამდა მუთუნს ვეშიალებე გენკმოჸოთან ღორონთიშ ჸოროფას. მუჭო შემლებნა მივეხვარათ ჩქინ და დო ჯიმალეფს, მით პრობლემეფს ობრძოლნა? თეშ უკულიან სტატიაშე ქობძირუნთ, მუჭო შემლებნა მივაჸუნათ იეჰოვაშ მაგალითის დო გურშა მიბღათ თინეფიშ გაჭირება.