1. Ligongo cici tukusosekwa kupikanila maloŵe gaŵatukalamwisye Yesuga?

YESU pajwasalaga yakwamba masiku gambesi, jwatite, “Nambo mlilolecesye mwacimsyene kuti mitima jenu jikasitopelwa ni . . . yakusawusya ya umi awuno.” (Luk. 21:34) Ligongo cici tukusosekwa kupikanila yaŵatukalamwisye Yesuyi? Masiku agano, jwalijose akusasimana ni yakusawusya yejinji mpela yeleyi.

2. Ana abale ni alongo ŵetu ŵane akusasimana ni yakusawusya yapi yakulagasya nganisyo?

² Ndaŵi sine, tukusasimana ni yindu yakutulagasya nganisyo yejinji pandaŵi jimo. Kwende tuganicisye yisyasyo yakuyicisyayi. Jwamboni jwine lina lyakwe John, * jwalagasice nganisyo mnope pandaŵi jele ŵamkwakwe ŵawundwice ni kumleka kwa yaka 19. Kaneko ŵanace ŵakwe ŵaŵili ŵacisikana ŵalesile kumtumicila Yehofa. Nombe Bob ni Linda ŵalagasicesoni nganisyo mwakulekangana ni mwayaŵelele ni John jula. Jemanjaji masengo gamalile, soni ŵasosekwaga kusama nyumba jaŵatamaga. Konjecesya pelepa, Linda ŵamsimene ni ulwele wa mtima wawukakombolece kum’wulaga. Ulwelewu watandite konanga citeteyo ca m’cilu mwakwe.

3. Ana lilemba lya Afilipi 4:6, 7, likusatusalila yamtuli pakwamba ya Yehofa?

³ Mpaka tuŵe ŵakusimicisya kuti Mkupanganya jwetu, jwali Atati ŵetu ŵacinonyelo, Yehofa, akusapikanicisya mwayikusatukwayila mumtima patukulagasika nganisyo. Soni akusasaka kutukamucisya kuti tumalane ni yakusawusya yatukusasimana nayo. (Aŵalanje Afilipi 4:6, 7.) M’maloŵe ga Mlungu mwana yisyasyo yejinji ya ŵakutumicila ŵakwe ŵaŵakombwele  kupilila yakusawusya. Gakusasalasoni yaŵatite Yehofa pakwakamucisya jemanjajo kuti amalane ni kulagasika nganisyoko. Kwende tukambilane yine mwa yisyasyo yeleyi.

4. Ana Eliya jwasimene ni yakusawusya yamtuli, soni jwakwete umboni wamtuli pakwamba ya Yehofa?

⁴ Eliya jwamtumicilaga Yehofa mu ndaŵi jakusawusya soni jwasimene ni yakusawusya yakogoya. Mwenye Ahabu, jumo mwa ayimwene ŵangakulupicika ŵa mu Isalaeli, jwalombele Yesebele jwaŵaliji mundu jwakusakala juŵalambilaga Baala. Jemanjaji ŵalimbikasyaga ŵandu kuti amlambileje Baala, mwamti ŵayikene pakwawulaga ŵakulocesya ŵa Yehofa. Eliya jwakombwele kutila. Jwalakwe jwakulupwicesoni pandaŵi jakwapali sala. (1 Ayi. 17:2-4, 14-16) Konjecesya pelepa, Eliya jwamdalilaga Yehofa pandaŵi jaŵasisyaga ŵakulocesya soni ŵakulambila ŵa Baala. Jwalakwe ŵalimbikasyaga Aisalaeli kuti amtumicileje Yehofa. (1 Ayi. 18:21-24, 36-38) Eliya jwakwete umboni wakwanila wakuti Yehofa ŵamkamucisyaga pandaŵi jiŵasimanaga ni yakusawusya.

5-6. Mwakamulana ni 1 Ayimwene 19:1-4, ana Eliya jwalipikanaga mwamtuli, soni Yehofa jwalosisye camtuli kuti akusamnonyela jwalakwe?

⁵ Aŵalanje 1 Ayimwene 19:1-4. Nambope, Eliya wamkamwile woga pandaŵi jele Yesebele ŵamjogoyisye kuti cam’wulaje. Kaneko jwalakwe jwatilile ku Belesheba. Eliya jwatengwice mnope mwamti jwayikene pakuŵenda kuti ‘amkunde kuti agambe kuwa.’ Ana cici cacamtendekasisye kulipikana m’yiyi? Eliya jwaliji jwangali umlama, jwalakwe  “jwaliji mundu mpela uweji.” (Yak. 5:17) Ndaŵi sine jwalakwe jwalagasikaga nganisyo mwamti jwatengukaga mnope. Komboleka Eliya jwaganisyaga kuti yajwatesile pakumalila macili gakwe kulimbikasya kulambila kweswela yaliji yangali mate. Jwalakwe jwayiwonaga kuti pangali cacacenjile mu Isalaeli, soni kuti jwalakwe ŵaliji jikape jwaŵamtumicilaga Yehofa. (1 Ayi. 18:3, 4, 13; 19:10, 14) Mpaka tusimonje kuti ligongo cici jwakulocesya jwa Mlungu jwalipikanaga camti m’yiyi. Nambope Yehofa ŵampikanicisyaga mwaŵapikanilaga mumtima.

⁶ Yehofa nganamkalipila Eliya ligongo lyakulipikana camti m’yiyi. M’malo mwakwe ŵamkamucisye jwalakwe kuti apatesoni macili. (1 Ayi. 19:5-7) Panyuma pakwe, Yehofa ŵacenjile kaganisye ka Eliya mwakumlosya macili gakwete Yehofajo. Kaneko Yehofa ŵamsasile Eliya kuti mu Isalaeli mwana ŵandu ŵakwana 7,000 ŵaŵakanile kumlambila Baala. (1 Ayi. 19:11-18) Pakamulicisya masengo yisyasyo yeleyi, Yehofa ŵamlosisye Eliya kuti akusamnonyela.

7. Ana yaŵatesile Yehofa pakumkamucisya Eliya, yikutusimicisya cici?

⁷ Ana wawojo yipali yayikwalagasya nganisyo? Yili yakulimbikasya kumanyilila kuti Yehofa ŵampikanicisye Eliya. Yeleyi yikusatusimicisya kuti jwalakwe akusapikanicisyasoni yakusawusya yatukusimana nayo. Yehofa akusamanyilila malile gatukwete pakatende ka yindu soni jwalakwe akusamanyilila yatukuganisya ni mwatukupikanila mumtima. (Sal. 103:14; 139:3, 4) Naga tukumsyasya Eliya mwakumdalila Yehofa, jwalakwe cacitukamucisya kuti tukombole kumalana ni yakusawusya yampaka yitutendekasye kulagasika nganisyo.—Sal. 55:22.

8. Ana Yehofa cacitukamucisya camtuli kumalana ni kulagasika nganisyo?

⁸ Kulagasika nganisyo mpaka kututendekasye kuganisya kuti yakusawusya yatukusimana nayo ngasiyimala, soni mpaka tutenguceje mnope. Naga yeleyi yili yitendekwe, tukumbucileje kuti Yehofa cacitukamucisya kumalana ni yayikusatulagasya nganisyoyo. Ana Yehofa mpaka atukamucisye camtuli? Jwalakwe akusatulimbikasya kuti tumsalileje yakusawusya yatukusimana nayo soni mwatukupikanila mumtima. Jwalakwe cacitujanga patukumŵenda cikamucisyo. (Sal. 5:3; 1 Pet. 5:7) M’yoyo, tukusosekwa kupopelaga kwa Yehofa mwakumsalila yakusawusya yatukusimana nayo. Jwalakwe ngasaŵeceta ni m’weji meso ni meso mpela mwayaŵelele ni Eliya, m’malo mwakwe cacitulimbikasya kupitila m’Maloŵe gakwe gagali m’Baibulo soni likuga lyakwe. Ngani syatukusaŵalanga m’Baibulo mpaka situlimbikasye soni kutupa cembeceyo. Abale ni alongo ŵetu mpaka atulimbikasyesoni.—Alo. 15:4; Aheb. 10:24, 25.

9. Ana mundu jwatukusamdalila mpaka atukamucisye camtuli?

⁹ Pandaŵi jele Yehofa ŵamsalile Eliya kuti ampe Elisha gane mwa masengo gakwe, pelepa Yehofa ŵamkamucisye Eliya kuti akole mjakwe jwampaka amkamucisye kumalana ni yakusawusya yayamtengusyaga. Mwakulandana ni yeleyi, patukumsalila jwine mwatukupikanila mumtima, jwalakwe cacitukamucisya kunandiya yayikutulagasya nganisyoyo. (2 Ayi. 2:2; Mis. 17:17) Naga akuyiwona kuti nganakola jwalijose jwampaka amsalile yakusawusya yawo, apopeleje kwa Yehofa kuti ŵakamucisye kupata Mklistu jwamkomangale jwampaka ŵalimbikasye.

10. (a) Ana yayamtendecele Eliya mpaka yitupe camtuli cembeceyo? (b) Ana maloŵe gagali pa Yesaya 40:28, 29, mpaka gatukamucisye camtuli?

¹⁰ Yehofa ŵamkamucisye Eliya kuti akombole kumalana ni kulagasika nganisyo soni kuti akombole kumtumicila jwalakwe mwakulupicika. Yaŵasimene nayo Eliya yikusatupa cembeceyo. Ndaŵi sine mpaka tusimane ni yakulagasya nganisyo yampaka yijonanje cilu cetu soni kaganisye ketu. Nambope naga tukumdalila Yehofa, jwalakwe cacitupa macili gakutukamucisya kuti tumtumicileje jwalakwe.—Aŵalanje Yesaya 40:28, 29.

11-13. Ana kulagasika nganisyo kwakwayiye camtuli ŵakutumicila ŵa Mlungu ŵakalakala?

¹¹ M’Baibulo mukusasimanikwasoni ŵandu ŵane ŵaŵalagasice nganisyo. Mwacisyasyo, Hana jwalagasice mnope  nganisyo ligongo lyakuti jwaliji jwangaŵeleka, soni jwalagaga ni yacipongwe yaŵamtendelaga jwamkongwe mjakwe. (1 Sam. 1:2, 6) Kulagasika nganisyoku kwamtendekasyaga Hana kuti adandawuleje mnope, kutamila kulila soni ngasaka kulya.—1 Sam. 1:7, 10.

¹² Ndaŵi sine, Mwenye Daudi jwalagasikaga mnope nganisyo. Aganicisye ya yakusawusya ya ŵasimene nayo. Jwalakwe jwalagasice mnope nganisyo ligongo lya yindu yakulemweceka yejinji yaŵatesile. (Sal. 40:12) Abisalomu, jwaŵaliji mwanace jwakwe jwakunonyelwa ŵamjimucile jwalakwe, yayatendekasisye kuti panyuma pakwe Abisalomujo awulajidwe. (2 Sam. 15:13, 14; 18:33) Konjecesya pelepa, Daudi jwatendeledwe yangali cilungamo ni mjakwe jwapamtima. (2 Sam. 16:23–17:2; Sal. 55:12-14) Yejinji yaŵalembile Daudi m’buku ja masalimo yikusalosya mwaŵapikanilaga mumtima. Pandaŵiji jwaliji ali atengwice nambo cikulupi cakwe pa Yehofa caliji cangatenganyika.—Sal. 38:5-10; 94:17-19.

¹³ Ndaŵi jine jwamasalimo jwine jwatandite kukumbila ndamo sya ŵandu ŵakusakala. Jweleju komboleka kuti jwatumicilaga “m’Nyumba ja Ambuje” soni komboleka kuti jwaliji Mlefi jwa mumbagwilo ja Asafu. Jwamasalimoju jwatandite kulagasika mnope nganisyo, yayamtendekasyaga kuti akasangalalaga soni ngajikutila ni yindu yajwakwete. Jwalakwe jwatandite kugawona majali gakusapata mundu ligongo lya kumtumicila Mlungu kuti gali gangakwanila.—Sal. 73:2-5, 7, 12-14, 16, 17, 21.

14-15. Ana tukulijiganya cici pa yisyasyo yitatu ya m’Baibulo pangani jakumdalila Yehofa kuti atukamucisyeje?

¹⁴ Ŵandu ŵatatu ŵaŵamtumicilaga Yehofa ŵatwasasile kundanda kula, ŵamdalilaga jwalakwe. Jemanjaji ŵapopelaga kwa Yehofa mwakumsalila yayalagasyaga nganisyo. Paŵapopelaga, ŵaŵecetaga mwagopoka pakusala yayatendekasyaga kuti alagasiceje nganisyo. Wosopeŵa nganaleka kwawula kumalo gaŵamlambililaga Yehofa.—1 Sam. 1:9, 10; Sal. 55:22; 73:17; 122:1.

¹⁵ Yehofa jwajangaga mapopelo ga jemanjaji mwacanasa. Yeleyi yamtendekasisye Hana kola  mtendele wamumtima. (1 Sam. 1:18) Daudi jwalembile kuti, “Mundu jwambone akuyiwona yisawusyo yejinji, nambo Ambuje akusamkulupusya jwelejo m’yisawusyo yakwe yosope.” (Sal. 34:19) Panyuma pakwe, jwamasalimoju jwalipikene kuti Yehofa ‘akumkamula mkono wakwe wamlyo,’ mwakumlongolela ni maloŵe gacinonyelo. Jwalakwe jwajimbile kuti, “Nambo une, kukunonyela kuŵandikana ni Mlungu; simicisye kuti kwa Ambuje ni kwakutilila kwangu.” (Sal. 73:23, 24, 28) Ana tukulijiganya cici pa yisyasyo yeleyi? Ndaŵi sine mpaka tusimane ni yakusawusya yekulungwa mnope yampaka yitutendekasye kulagasika nganisyo. Nambo mpaka tumalane ni kulagasika nganisyoku naga tukuganicisya yaŵatesile Yehofa pakwakamucisya ŵandu ŵane, kumdalila jwalakwe mwakupopela soni kumpikanila patuŵendile kuti tutende cine cakwe.—Sal. 143:1, 4-8.

16-17. (a) Ligongo cici ngatukusosekwa kulipatula? (b) Ana mpaka tupatesoni macili camtuli?

¹⁶ Yisyasyo yitatu yatuyiweniyi, yikutujiganya ciwundo cakusosekwa mnope cakuti ngatukusosekwa kulipatula kwa ŵandu ŵakusamtumicila Yehofa. (Mis. 18:1) Nancy jwaŵalagasice mnope nganisyo ligongo lyakuti ŵamkwakwe ŵamlesile jwatite, “Masiku gejinji nganisakaga kuŵecetana kapena kuwonegana ni jwalijose. Nambope, yasimanikwaga kuti pangulipatula, yatendekasyaga kuti mbeje jwakudandawula mnope.” Yindu  yacenjile pandaŵi jele Nancy jwasosaga matala gakwakamucisya ŵandu ŵane ŵaŵasimanaga ni yakusawusya. Jwalakwe jwatite, “Napikanilaga ŵane paŵalondesyaga ya yakusawusya yakusimana nayo. Nayiweni kuti panguganicisya mnope yayakusawusya ya ŵane, yatendekasyaga kuti ngaganicisyaga yakusawusya yangusimana nayo.”

¹⁷ Mpaka tupate macili mwakusimanikwa pamisongano jampingo. Patuli pamisongano jikusaŵasoni mbali jakumtendekasya Yehofa kuti ‘atukamucisye soni kutulimbisya mtima.’ (Sal. 86:17) Kumisonganoku, jwalakwe akusatulimbikasya pakamulicisya masengo msimu weswela, Maloŵe gakwe soni ŵandu ŵakwe. Misongano jikusatupa upile ‘wakulimbikasyana jwine ni mjakwe’ (Alo. 1:11, 12) Mlongo jwine lina lyakwe Sophia jwatite, “Yehofa soni abale ni alongo ŵangamucisyaga kuti mbilile yakusawusya yanasimanaga nayo. Cindu cakusosekwa mnope kwa une caliji misongano ja mpingo. Nayiweni kuti panalipelekaga mnope mu undumetume soni kusimanikwa pamisongano jampingo, yangamucisyaga kuti ngombole kumalana ni kulagasika nganisyo.”

18. Ana Yehofa mpaka atupe cici patutengwice?

¹⁸ Patutengwice, tukumbucileje kuti Yehofa nganagamba kusala kuti cacimasya kulagasika nganisyo msogolo. Nambo jwalakwe mpaka atukamucisye kumalana ni kulagasika nganisyoko apanopano. Jwalakwe “akusatupa macili” kuti tukombole kumalana ni kutenguka soni kulipikana kuti ŵangali cembeceyo.—Afil. 2:13, NW.

19. Ana lilemba lya Aloma 8:37-39, likusatusimicisya yamtuli?

¹⁹ Aŵalanje Aloma 8:37-39. Ndumetume Paulo jwasimicisye kuti pangali campaka citulekanganye ni cinonyelo ca Mlungu. Ana mpaka twakamucisye camtuli abale ni alongo ŵetu ŵakulingalinga kumalana ni kulagasika nganisyo? Ngani jakuyicisya jicisala yampaka tutende pakumsasya Yehofa mwakulosya canasa soni kwakamucisya abale ni alongo ŵakulagasika nganisyo.