1. Tipagine si aida ani degeturani ti ni kuti ga Yesu zahe?

ROGO ga Yesu sangbanebi yo tipa yangara arame, ko aya: “Oni bánda tironi, oni ka hisa kpotoroni yo na . . . berã pa gi unga re,” watadu berãpa marã tipa ka raka; na bakabangirise tipa raka na aʹuru dunduko. (Rk. 21:34) Si naida ani degeturani kuti gu zahe re. Tipagine? Mbiko ani nagbiatirani awere na kina bangisa agu akpakarapai kura aboro agbiatiyo na ni.

2. Gini akpakarapai awirinarani agbiatiyo na ni nga gu nafudi yo?

² Ti kura aregbo, ani ima rengba ka gbiatirani na badungu apai nga gu nafuda rani ti bangisa regbo sa. Oni makianga agi akpiapai re. Dezire Yekova du rimoko nga John, * nga guko nambu be gu kaza nagbarasa berãse adu na bakere gberãrago ho diako i aima raka na ri tipa agarã 19 ambuko ni. Na awiriko ue ni adegude ki mbu iriso Yekova. Arogotise du rimoyo nga Bob na Linda agbiatiyo na gu kura akpakarapai kia tigayo. I dunduko ue azanga gayo asunge, na ka gene adunga berewe beyo kaa raka rogo gu kporo i adu rogoho ya, si kini idi i guari ho. Kupati agu akpakarapai re, munganga ape gupai fu Linda nga ri na gu kaza tiri nga ga ngbaduse naima rengba ka imo ri, na gu kura kaza aima tona ka gbarasa agu aũkpotori nasovura kuti akaza.

3. Ringbisihe kuti AFiripoio 4:6, 7, ginipai si aida ani du na kido tipaha?

³ Ani ima rengba kadu na gu kido nga Bakusirani nga gu Barani nga boro nyemuse nga Yekova, ima rugatiko na pa wai du ani ho du ani ni ni fudifudi rani. Na ko naida ka undo rani ani dibe agu akpakarapai ani agbiatirani na ni. (Oni gedi AFiripoio 4:6, 7.) Fugo Mbori na badungu akpiapai rogoho nga gu nafura tipa  agu akpakarapai airisiko ahihe. Si nasakapai a tipa wai Yekova aundo yo i dibe agu akpakarapai naafuda yo re. Ani makianga bete akpiapai.

4. Gini akpakarapai Eriya agbiatiko na ni, na gini bipai ko adu na ni tipa Yekova?

⁴ Eriya airisi Yekova ti kere aregbo na ko ki gbiatiko na kere akpakarapai. Bakindo Aba, nga bakindo sa dagba agu abakindo yo naadunga ni ruruyo ya rogo gu pangbanga nga ga aYisaraere adi Izebere ni diako, nga gu gbegberẽ dee nanaairiso Bara. I ue dunduko ahiisi ringara na iriso Bara na ki imi badungu ga Yekova anebi. Eriya amangi ome ki zubo beyo. Ko abati a be kere ngbongi nikido ko kuti Yekova. (1 Aba. 17:2-4, 14-16) Kurigure, Eriya akido kuti Yekova ho ko andu ni fuo agu anebi nangia ga Bara yo gbiati airisi Bara. Ko angarasi aYisaraere tipa i irisi Yekova. (1 Aba. 18:21-24, 36-38) Eriya aima bi wai Yekova abandako na ki undoko ti regbo gu fudifudiapai re.

5-6. Ringbisihe kuti 1 Abakindo 19:1-4, ginipai Eriya aberẽhe, na wai du Yekova ayugu gupai nga ko ima kpinyemu Eriya?

⁵ Oni gedi 1 Abakindo 19:1-4. Ono tie, gunde azi Eriya ho Nakindo Izebere aserẽ ko ni nga ri naida ka imoko. Sidu, ko azubo ku rogo gu rago nangia Bera-saba. Ko adu na bakere gberãrago si ki sako ko “sana he Mbori idi he fu ko ko kpi.” Ginipai nasako rago gberẽ tiko wa gure? Eriya angia boro zangarengba, “nihi dungu apai wakina rani.” (Yak. 5:17) Si rengbe kadu nga ko adu ni fudifudiko ni bakerehe gbe na ko kidu na bakere mbugo. Si rengbe kadu nga Eriya aberẽ gupai nga gu ome ko aamangaha ka  sonosa ziazia irisombori aadunga na sunge ti ni te, pai ho na ariatihe Yisaraere yo te, na ko nga gu yangara bangisa boro naairiso Yekova kindi. (1 Aba. 18:3, 4, 13; 19:10, 14) Kina ngbarani rengbe ka zera nga gi ruru nebi re abi tiko wa gure. Ono Yekova aima rugatiko na ga Eriya berãpai.

⁶ Yekova aazinganga na Eriya tipa peko gako berãpai te. Kuba gure, ko aundo Eriya ko gbia ome. (1 Aba. 19:5-7) Kusa, Yekova aundo Eriya ko rugu gako berãpai ni yugoko Gako bakere ome fuko. Fuo gure, Yekova ayugu gupai fuko nga aboro kindi Yisaraere yo du bangeyo nga 7,000 naima ká ka iriso Bara. (1 Aba. 19:11-18) Ni yugo Yekova agi akpiapai re fu Eriya, Ko ayuguhe fuko nga ko ima kpinyemuko.

7. Gini kidohe ani agbiaha tigu gene Yekova aundo Eriya ngbaha?

⁷ Ya mo mo nandu rogo dungu fudifudiapai yo? Si nipa wasa furani tie ka ino gupai nga Yekova aima rugatiko na ga Eriya aberãpai! Si nafu gu kidohe furani nga ko ima rugatiko a na gaani fudifudiapai. Ko ima ino agu apai rengbe ani ka mangaha na gu ka ani amanganga ha ya, na ko ima ino agu apai ani aberã tipaha gbiati gaani bipai. (Tam. 103:14; 139:3, 4) Ka ani wiriki Eriya ni kido ani kuti Yekova, ko nika undo rani ani mangipai kuti agu akpakarapai nga gu nasa gupai nga ani du ni fudifudi rani.​—Tam. 55:22.

8. Waigu Yekova nika undo ro mo mangipai kuti gupai nafuda ro?

⁸ Ho du mo ni ni fudifudiro, si ima rengba ka saro mo berẽ gupai nga agu apai du tipa ro aʹarianga tihe berewe te, si ki sa gupai nga mo du na gberãrago. Ka pai wa gure mangi, mo tingidi gupai nga Yekova nika undo ro aundo mo mangipai kuti gupai nafuda ro. Waigu ko nika undo ro? Ko nayambaro mo peke pa gamo abakabangirise fuko. Na ko nika karagapai akaraga kuti gamo kpee tipa undo. (Tam. 5:3; 1 Pet. 5:7) Sidu, mo ni kpari fu Yekova dedede tipa gamo akpakarapai. Ko afuranga foro wa gu ko afura fu Eriya te, ono ko nika fura foro vurube Fugoko nga Ziazia Kekeapai, na vurube gako riigbu. Agu apangbanga mo agedaha rogo Ziazia Kekeapai ima rengba ka fu wasa foro na ki fu maabangirise. Berewe a, awirinamo ima rengba ka ngarasaro.​—Rom. 15:4; Eb. 10:24, 25.

9. Waigu rengbe gu bakurearani du ani na kido kuti ni ka undo rani?

⁹ Yekova agumba gupai fu Eriya nga ko fu bete gako asunge fu Erisa. Ngba gi gene re, Yekova afu wene bakure fu Eriya nga guko narengbe ka undo ko ko du na diabese ho ko anidu ni na bakere gberãrago. Wakina gure a, ho ani agumba agu apai ni nafuda rani fu gu bakurearani du ani na kido kuti ni, ni rengbe arengba ka undo rani ani dibe agu apai nafuda rani re. (2 Aba. 2:2; Snz. 17:17) Ka mo bi gupai nga boro ho rengbe mo ka pe pa gamo akpakarapai fu ni gbiati gamo aberãpai te, mo kpari fu Yekova ko undo ro mo gbia gu wirina nga Kristano naima nyaka rogo toro yo rengbe ka ngarasaro.

10. Waigu ga Eriya kpiapai afu maabangirise furani, na wai rengbe gu kidohe du rogo Yesaya 40:28, 29 ka undo rani?

¹⁰ Yekova aundo Eriya ko dibe agu apai naafuda ko na ko irisiko ni ruruko tipa badungu agarã. Gu kpiapai nga ga Eriya nafu maabangirise furani. Ti gu kura aregbo, ani ima rengba ka gbiatirani na badungu apai nga gu nafuda rani si ki sa gupai nga ani du na mbugo ti kpotorani na berãrani yo. Wa vura duhe wo, ka ani kido kuti Yekova, ko nika fu gu ome afu furani ani aidaha tipa kaa irisoko kindi.​—Oni gedi Yesaya 40:28, 29.

11-13. Waigu du nifudifudise berãse yo adu na maapai kurii ga Mbori amoyambu biata naadu mbata kusayo?

¹¹ Gu kura aboro kinaho du payo rogo Ziazia Kekeapai yo nagbiatiyo a na bakere fudifudiapai. Ni kpiapai, Ana adu ni fudifudi ri ni bakerehe  gbe mbiko gupai nga ri aarengbanga ka vunga agude te na iwari aavunga agude na kini sawia ri. (1 Sam. 1:2, 6) Gu fudifudipai Ana adu rogoyo asari ri du na bakere gberãrago si ki sa gupai nga ri kpari na nyemu riahe ki gbataka tiri.​—1 Sam. 1:7, 10.

¹² Ti kura aregbo, ome fudifudiapai aima fu rii Bakindo Davide. Mo berẽnga kurii agu akpakarapai ko agbiatiko na ni. Sangbakpoto ko yo aambusa ko ni kerehe be gu dungu aingahe ko amangihe. (Tam. 40:12) Wiriko ko akpinyemu ko gbe nangia Abisaroma asamungu kutiko, na gipai re ki ye na kpio kuti Abisaroma. (2 Sam. 15:13, 14; 18:33) Na mbembedi bakurea Davide sa abiriki ko. (2 Sam. 16:23–17:2; Tam. 55:12-14) Badungu agu atambuahe Davide akehe nayugopa gako gberãrago gbiati gako nyanyaki kido kuti Yekova.​—Tam. 38:5-10; 94:17-19.

¹³ Kusa, bake papara Atambuahe atona ka kpi gu raka nga ga gbegberẽ aboro. Si ima rengba kadu nga ko angia tita gu boro Revi nangia Asafa, na ko amangisunge rogo “ga Mbori kparakpara ziazia ba.” Gi bake papara Atambuahe re adu ni fudifudi ko berãko yo, si kini sako ka ko dunga na ngbarago ya na ka ko rengbenga kina be agu ahe naadu beko ya. Ko atona kaa kapa pa agu amaku naye ti irisombori.​—Tam. 73:2-5, 7, 12-14, 16, 17, 21.

14-15. Ginipai ani awirikaha ti agu akpiapai du rogo Ziazia Kekeapai yo nibipa ndu ani fuo Yekova tipa undo?

¹⁴ Gu ga Yekova amoyambu biata i nafura tipa yo re dunduko akido kuti Yekova tipa undo. I akpari fu Yekova tipa gayo abakabangirise. I agumbapa ndu agu apai fuko gbaiga i adu ti ni ni fudifudiyo. Na i aandu kindi kumbatayo kaa ndu ku rogo gu ba naadu tipa iriso Yekova.​—1 Sam. 1:9, 10; Tam. 55:22; 73:17; 122:1.

¹⁵ Yekova akaragapai ni nunga fuyo dunduko ni basasa. Ana agbia gu zereda nga ga berãse yo. (1 Sam. 1:18) Davide akepai ki ya: “Gbigbitapai  namanga ruru boro ngenge; ono Yekova nabatasa ni be he dunduko.” (Tam. 34:19) Na bake papara atambuahe aye ka bi gupai kusa nga Yekova ‘nazada kumbabeko,’ kini ngbe fuko kumbatayo na wene arugute. Ko abibia ki ya: “Si ni wene he fere ka mbeda na Mbori; mi moi Gbia nga Mbori ni gi bagbuko.” (Tam. 73:23, 24, 28) Ginipai ani awirikaha ti agi akpiapai re? Ti kura aregbo, ani ima rengba ka gbiatirani na kere kpakaraapai nga gu rengbe ka sa gupai nga ani du ni fudifudi rani. Ono ani ima rengba kadu na diabese ka ani aberãkuriipa wai Yekova naundo gu kura aboro, kini kido kutiko rogo kparakpee yo, na kini gisangbako ni manga ani agu apai ko asana rani ani mangihe.​—Tam. 143:1, 4-8.

16-17. (a) Tipagine si aidanga ani kpara tirani ti ni kusayo ti Yekova na gako aboro ya? (b) Waigu rengbe ani ka gbia gaani ome berewe?

¹⁶ Agu akpiapai biata re nayugo gu kura nyanyakipa pai berewe furani​—si aidanga ani kpara tirani kusayo ti Yekova na tigako aboro te. (Snz. 18:1) Nancy, naadu ni fudifudi ri ni bakerehe ho kumbari ambu ri ni aya: “Gu kura dungu aʹuru kinaho mi anaaidanga ka bi boro watadu ka fura na ai boro ya. Ono tie, ho mi anaakpara tire ni kusayo ti aboro, mi anidu na bakere gberãrago.” Apai aʹariatihe ho Nancy angere ni tipa agu agene rengbe ri ka undo agu aboro ngbaha  du rogo akpakarapai. Ri aya: “Mi anaadegature ho kura aboro anaapeka pa agu akpakarapai ni i asota na ni. Mi aye ka bi gupai nga wa nunga agu aboro re anaamanga re si asa gupai nga ka rago naagberãnga tire tipa tire ya.”

¹⁷ Ani rengbe ka gbia gaani ome berewe nidu ani pati agu adunguratise nga ga dungurati. Ho du ani ni ba adunguratise yo, ani nafu bakere amomu fu Yekova ko ‘undo rani, na ki ngarãsi rani.’ (Tam. 86:17) Ba adunguratise yo du ko angarasa rani ni vurube gako ziazia toro, Fugoko, na gako aboro. Adunguratise nafu momu furani “ani mongo wasa” na akuarani dagba tirani. (Rom. 1:11, 12) Wirinarani du rimo ri nga Sophia aya: “Yekova gbiati awirinarani naundo re mi naahipai. Gu nyakipaha anyaka gbe fere nga agu adunguratise nga ga dungurati. Mi ima ye ka bi gupai nga ho mi atungusapai ni ni bakerehe na gimi dungurati, si naundo re mi nimangipai kuti agu apai nafuda re gbiati bakabangirise.”

18. Ginihe Yekova narengbe ka fuhe furani ka ani du na gberãrago?

¹⁸ Ho du ani ni na gberãrago, si naida ani tingidi gupai nga Yekova akidongo rani sa tipa ka dia kina agu apai nafuda rani kusayo nyeanye kindi kumbatayo te, ono ko naundo rani a ani dibe agu apai nafuda rani awere. Ko nafu “ida pai na manga ha” furani watadu ko nafu idapai gbiati ome tipa ani dibe gberãrago gbiati zanga maabangirise.​—Frp. 2:13.

19. Gini kidohe ARomo 8:37-39 afuhe furani?

¹⁹ Oni gedi ARomo 8:37-39. Gu mokedi nangia Pauro akido rani nga he ho rengbe ka kpara rani tiga Mbori nyemuse te. Waigu rengbe ani ka undo awirinarani nga aguyo naasada ka diabe agu apai nafuda yo? Gu kekeapai ngbefuo gere nika fura tipa wai rengbe ani ka wirika Yekova ni yugo ani nunga na ni undo ani awirinarani ho du yo ni ni fudifudiyo.