1. Paano niyato maaarog an satong mamumuton na Ama na si Jehova?

NAMUMUTAN kitang marhay ni Jehova. (Juan 3:16) Gusto niyatong arugon an satong mamumuton na Ama. Kaya nagmamaigot kitang magpahiling nin “pakikidamay, nin pagkamuot na siring kan sa magturugang, [asin] nin mamumuton na pagmalasakit” sa gabos, pero lalo na sa “satuyang mga tugang sa pagtubod.” (1 Ped. 3:8; Gal. 6:10) Pag napapaatubang sa nakaka-stress na mga kadipisilan an mga miyembro kan satong espirituwal na pamilya, gusto tang tabangan sinda.

2. Ano an pag-uulayan ta sa artikulong ini?

² An gabos na gustong magin miyembro kan pamilya ni Jehova mapapaatubang sa nakaka-stress na mga sitwasyon. (Mar. 10:29, 30) Posibleng marhay na mapaatubang kita sa mas dakul pang problema mantang nagdadangadang an katapusan kan sistemang ini. Paano ta matatabangan an lambang saro? Pag-ulayan niyato an mga manunudan ta sa mga halimbawa ni Lot, Job, asin Noemi na mababasa ta sa Bibliya. Pag-uulayan ta man an nagkapirang kadipisilan na inaatubang ngunyan kan satong mga tugang asin kun paano ta sinda matatabangan na maatubang an mga iyan.

3. Arog kan ipinapahiling sa 2 Pedro 2:7, 8, anong salang desisyon an nagibo ni Lot, asin ano an nagin resulta kaiyan?

³ Sala an nagin desisyon ni Lot kan pilion niyang mag-istar sa Sodoma na grabe kaimoral kan mga tawo. (Basahon an 2 Pedro 2:7, 8.) Mauswag an Sodoma, pero nakaeksperyensiya si Lot nin dakul na kadipisilan huli sa paglipat niya diyan. (Gen. 13:8-13; 14:12) Minalataw na nagustuhan na marhay kan saiyang agom an  siyudad o an nagkapirang tawo diyan kaya sinuway kaini si Jehova. Nagadan an agom ni Lot kan an Diyos magpauran nin kalayo asin asupre sa lugar na iyan. Asin isipa man an duwang aking babayi ni Lot. An mga katrato ninda kaiba sa mga nagadan sa Sodoma. Nawara ki Lot an saiyang harong, mga pagsadiri asin, an pinakamakulog sa gabos, an saiyang agom. (Gen. 19:12-14, 17, 26) Sa nakaka-stress na panahon na ini, nawaran daw nin pasensiya si Jehova ki Lot? Dai.

4. Paano ipinahiling ni Jehova an saiyang pagkamapasensiya ki Lot? (Hilingon an ritrato sa cover.)

⁴ Dawa ngani pinili ni Lot na mag-istar sa Sodoma, may pagmalasakit na nagsugo si Jehova nin mga anghel tanganing iligtas siya saka an saiyang pamilya. Alagad, imbes na magsunod tulos sa apuradong pagbuot kan mga anghel na maghali sa Sodoma, ‘nag-atraso pa’ si Lot. Kinaipuhan kan mga anghel na kaputan an kamot niya asin tabangan siya saka an saiyang pamilya na makadulag paluwas sa siyudad. (Gen. 19:15, 16, NW) Dangan sinabihan siya kan mga anghel na magdulag pasiring sa kabukidan. Pero imbes na magsunod ki Jehova, nakiulay si Lot na duman na sana sa kaharaning banwa. (Gen. 19:17-20) Mapasensiyang nagdangog si Jehova asin tinugutan si Lot na magduman sa banwang idto. Pero pag-abot nin panahon, natakot si Lot na mag-istar duman kaya naglipat siya sa kabukidan, an mismong lugar na pinapadumanan sa saiya ni Jehova. (Gen. 19:30) Pambihira nanggad na pasensiya an ipinahiling ni Jehova! Paano ta siya maaarog?

5-6. Paano niyato iaaplikar an 1 Tesalonica 5:14 mantang inaarog ta an Diyos?

⁵ Arog ni Lot, tibaad makagibo nin salang mga desisyon an sarong miyembro kan satong espirituwal na pamilya asin magsapar nin seryosong mga problema huli kaiyan. Kun mangyari iyan, ano an magigin reaksiyon ta? Tibaad sabihon ta sa saiya na inaani niya man sana an itinanom niya, na totoo man. (Gal. 6:7) Pero, may mas marahay kitang puwedeng gibuhon. Puwede tang arugon si Jehova sa kun paano niya tinabangan si Lot. Paano ta iyan magigibo?

⁶ Isinugo ni Jehova an mga anghel bako lang tanganing patanidan si Lot kundi para man tabangan siyang makadulag sa grabeng kapahamakan na maabot sa Sodoma. Kaagid kaiyan, tibaad kaipuhan niyatong patanidan an satong tugang kun nahihiling ta na may ginigibo siyang ikakapahamak niya. Pero tibaad puwede ta man siyang tabangan. Dawa pa kun dai niya inaaplikar tulos an basado sa Bibliyang konseho na itinatao sa saiya, kaipuhan niyatong magin mapasensiya. Arugon an duwang anghel. Imbes na pabayaan na sana asin rayuan an satong tugang, dapat kitang maghanap nin praktikal na mga paagi na tabangan siya. (1 Juan 3:18) Tibaad kaipuhan tang kaputan an saiyang kamot, sabi ngani, asin tabangan siyang iaplikar an marahay na mga sadol na itinatao sa saiya.—Basahon an 1 Tesalonica 5:14.

7. Paano ta maaarog an pagmansay ni Jehova ki Lot?

⁷ Puwede kutanang nagpokus si Jehova sa mga sala ni Lot. Imbes, pinasabngan niya si apostol Pedro pag-abot nin panahon na apudon si Lot na matanos. Maugma nanggad kita na pinapatawad ni Jehova an satong mga sala! (Sal. 130:3) Puwede ta daw arugon an pagmansay ni Jehova ki Lot? Kun mapokus kita sa marahay na mga kuwalidad kan satong mga tugang, magigin mas mapasensiya kita sa sainda. Dangan, posibleng marhay na magin mas madali sa sainda na akuon an tabang ta.

8. Papahiruon kita nin pagmalasakit na gibuhon an ano?

⁸ Bakong arog ni Lot, nagsakit si Job bakong huli ta nakagibo siya nin salang desisyon. Alagad, nakaeksperyensiya siya nin grabeng mga trahedya—nawara an saiyang mga pagsadiri, estado sa komunidad, asin marahay na salud. An mas grabe pa, nagadan an gabos nindang aki. Inakusaran man si Job kan tulong sagin na mga amigo niya. Ano an sarong dahilan kaya dai  nagin mapagmalasakit an tulong sagin na mga amigo niya? Nagpokus sana sinda sa nahihiling ninda. Huli kaiyan, sala an nagin kongklusyon ninda asin daing hirak na hinusgaran si Job. Paano ta malilikayan na makagibo nin kaagid na sala? Tandaan na si Jehova sana an nakakaaram kan gabos na detalye dapit sa sitwasyon nin sarong tawo. Magdangog na marhay sa sinasabi kan tawong nagsasakit. Dai sana basta magdangog; hinguwahon man na mamatian an namamatian niyang kulog. Dangan saka ka sana makakapahiling nin tunay na pakikidamay sa saimong tugang.

9. Kun kita mapagmalasakit, lilikayan niyato na gibuhon an ano, asin taano?

⁹ Kun kita mapagmalasakit, lilikayan niyato na magpalakop nin nakakaraot na tsismis mapadapit sa mga problemang inaatubang kan iba. An nagpapalakop nin tsismis dai nakakapakusog sa kongregasyon kundi rinaraot iyan. (Tal. 20:19; Roma 14:19) Bako siyang mabuot saka mayo nin konsiderasyon, asin an mga sinasabi niya puwedeng makakulog sa tawong nagsasakit na ngani. (Tal. 12:18; Efe. 4:31, 32) Mas marahay nanggad kun hihilingon niyato an marahay na mga kuwalidad nin saro asin iisipon kun paano niyato siya matatabangan sa saiyang mga problema!

10. Ano an itinutukdo sa sato kan sinasabi sa Job 6:2, 3?

¹⁰ Basahon an Job 6:2, 3. May mga pagkakataon na nakataram si Job nin mga bagay na dai niya pinag-iisipan. Pero kan huri, inadmitir niya na may mga sala siyang nasabi. (Job 42:6) Arog ni Job, an sarong tawo na napapaatubang sa nakaka-stress na problema tibaad makataram nin dai pinag-iisipan, na tibaad pagbasulan niya sa huri. Ano an dapat na magin reaksiyon ta? Imbes na magin mapagkritika, dapat na magin mapagmalasakit kita. Girumdumon na bakong katuyuhan ni Jehova na maeksperyensiyahan nin siisay man sa sato an mga problema asin kadipisilan na inaatubang ta ngunyan. Kaya masasabutan ta kun makataram nin dai pinag-iisipan an sarong  maimbod na lingkod ni Jehova pag nakakamati nin grabeng stress. Dawa kun nagtataram siya nin salang mga bagay dapit ki Jehova o sa sato, dapat na dai tulos kita maanggot sa saiya o na husgaran siya sa pagsabi nin siring na mga bagay.—Tal. 19:11.

11. Paano maaarog kan mga elder si Elihu pag nagtatao nin konseho?

¹¹ Kun minsan, kaipuhan man nin konseho o makakatabang na disiplina an saro na napapaatubang sa nakaka-stress na problema. (Gal. 6:1) Paano ini gigibuhon kan mga elder? Marahay na arugon ninda si Elihu, na nagdangog na may udok na empatiya ki Job. (Job 33:6, 7) Saka sana nagtao nin konseho si Elihu kan masabutan na niya an pagmansay ni Job. Kun inaarog kan mga elder si Elihu, magdadangog sindang marhay asin hihinguwahon na masabutan an sitwasyon kan indibidwal. Kaya, kun magtao na sinda nin konseho, posibleng marhay na maabot ninda an puso kan indibidwal.

12. Ano an nagin epekto ki Noemi kan pagkagadan kan saiyang agom asin duwang aking lalaki?

¹² Si Noemi sarong maimbod na babaying namumutan si Jehova. Pero kan magadan an saiyang agom asin duwang aking lalaki, gusto niyang salidahan an saiyang pangaran nin Mara na nangangahulugan na Mapait. (Rut 1:3, 5, 20, 21, NW) Sa gabos na kasakitan ni Noemi, dai siya binayaan kan manugang niyang si Ruth. Bako lang praktikal na tabang an itinao ni Ruth ki Noemi kundi nagtaram man siya nin may pagranga sa saiya. Ipinahiling ni Ruth ki Noemi an saiyang pagkamuot asin suporta paagi sa simple asin sinserong mga tataramon.—Rut 1:16, 17.

13. Taano ta kaipuhan kan mga nagadanan nin agom an satong suporta?

¹³ Pag nagadanan nin agom an sarong miyembro kan satong espirituwal na pamilya, kaipuhan niya an satong suporta. An sarong mag-agom puwedeng iagid sa duwang kahoy na magkataid na nagdakula. Sa paglihis nin mga taon, nagsarabudan na an saindang mga gamot. Pag an sarong kahoy nagabot asin nagadan, puwedeng madanyaran nin grabe an saro pang kahoy. Kaagid kaiyan, pag an saro nagadanan nin agom, tibaad makamati siya nin grabeng mga emosyon sa halawig na panahon. Si Paula, * na biglang nagadanan nin agom, nagsabi: “Talagang nagbago an buhay ko, asin pagmati ko mayo akong maginibo. Nawara an best friend ko. Nasasabi ko ki agom an gabos. Maugma siya pag maugma ako saka sinusuportaran niya ako sa masakit na mga panahon. Pirmi siyang nagdadangog pag sinasabi ko an mga problema ko. Talagang pagmati ko garo man sana nawara an kabangang parte kan hawak ko.”

14-15. Paano ta mararanga an saro na nagadanan nin agom?

¹⁴ Paano ta mararanga an saro na nagadanan nin agom? An inot niyatong dapat gibuhon iyo na makipag-ulay sa saiya, dawa pa tibaad nag-aalangan ka o dai mo aram kun ano an sasabihon. Si Paula na sinambit kasubago, nagsabi: “Nasasabutan ko na bakong komportable sa mga tawo na pag-ulayan an kagadanan. Naghahadit sinda na tibaad sala an masabi ninda. Pero mas marahay nang may magsabi sa saimo nin makaalangan na bagay kisa mayo lamang sindang sabihon.” Posibleng dai man nag-aasa an nagadanan na masabi kita nin madunong na mga tataramon. Sinabi ni Paula: “Napapahalagahan ko talaga maski sabihon sana kan mga amigo mi na ‘Namumundo kami sa nangyari.’”

¹⁵ Si William, na nagadanan nin agom pirang taon na an nakaagi, nagsabi: “Napapahalagahan ko pag nag-iistorya an iba nin mga eksperyensiya mapadapit ki agom; nakakaasigurar iyan sa sako na namumutan asin iginagalang ninda siya. Dakulaon na tabang sa sako an suportang ini. Nakakarangang marhay iyan sa sako huling mahalagang marhay sako si agom saka nagin dakulang  parte siya kan buhay ko.” Si Bianca na sarong balo, nagsabi: “Nararanga akong marhay pag namimibi kaiba ko an iba saka pag may ihinihiras sindang mga teksto sa sako. Nakakatabang sa sako pag nag-iistorya sinda dapit ki agom asin pag nagdadangog sinda sa sako pag nag-iistorya ako dapit saiya.”

16. (a) Ano an dapat niyatong itao sa saro na nagadanan nin mahal sa buhay? (b) Sigun sa Santiago 1:27, igwa kita nin anong responsabilidad?

¹⁶ Kun paanong dai binayaan ni Ruth an balong si Noemi, kaipuhan ta man na padagos na suportaran an mga nagadanan nin mahal sa buhay. Si Paula, na sinambit kasubago, nagsabi: “Pagkagadan mismo ni agom, grabeng suporta an inako ko. Paglihis nin panahon, garo baga nagbalik na sa normal an buhay kan mga tawo. Pero ako, biyong nagbago an buhay ko. Dakulaon na tabang pag narerealisar kan iba na an nagadanan nangangaipo nin suporta sa masurunod na bulan—o mga taon pa ngani—pagkagadan kan saindang mahal sa buhay.” Siyempre, magkakaiba an lambang tawo. May mga nakaka-adjust tulos sa bago nindang kamugtakan. Pero an iba, sa kada may gibuhon sindang aktibidad na ginigibo ninda kaidto kaiba kan nagadan nindang mahal sa buhay, mapait na nagpapagirumdom iyan sa sainda na mayo na siya. An lambang indibidwal magkakalain an paagi nin pagmundo. Lugod na tandaan niyato na itinatao sa sato ni Jehova an pribilehiyo asin responsabilidad na atamanon an mga nagadanan nin agom.—Basahon an Santiago 1:27.

17. Taano ta kaipuhan kan mga binayaan nin agom an satong suporta?

¹⁷ Kun an saro bayaan kan saiyang agom, grabeng kamunduan asin stress an resulta kaiyan. Si Joyce, na binayaan kan saiyang agom huli sa  ibang babayi, nagsabi: “Para sako, an kulog kan pagdiborsiyo mi haros mas grabe pa kisa kun nagadan si agom. Kun nagadan siya sa aksidente o hilang, sarong bagay iyan na dai niya pinili. Pero sa sitwasyon na ini, pinili kan agom ko na bayaan ako. Makasupog talaga sa parte ko.”

18. Ano an puwede tang gibuhon tanganing tabangan an mga nagadanan o binayaan nin agom?

¹⁸ Pag ginigibuhan ta nin simpleng mga akto nin kabuutan an mga nagadanan o binayaan nin agom, sinisiyerto niyato sa sainda na talagang namumutan ta sinda. Ngunyan na solo na sinda, lalo na nindang kaipuhan an marahay na mga amigo. (Tal. 17:17) Paano mo mapapatunayan na amigo ka ninda? Puwede mo sindang imbitaran na magkakan. Saka puwede mo sindang alukon na maglibang-libang o ibanan sa ministeryo. Puwede mo man sindang imbitaran paminsan-minsan sa saindong pampamilyang pagsamba. Kun gigibuhon mo iyan, mapapaugma mo si Jehova, huling “harani [siya] sa mga nalugadan an puso” asin “paraprotektar nin mga babaying balo.”—Sal. 34:18; 68:5, NW.

19. Isinasaisip an 1 Pedro 3:8, ano an determinado mong gibuhon?

¹⁹ Dai na mahahaloy, ‘malilingawan [an gabos] na kasakitan’ pag namamahala na sa daga an Kahadian nin Diyos. Talagang hinahalat-halat na niyato an panahon na ‘[an dating mga bagay] dai na magigirumduman, ni masabong man iyan sa puso.’ (Isa. 65:16, 17, An Banal na Biblia) Sagkod na dai pa iyan nangyayari, lugod na suportaran niyato an lambang saro asin patunayan ta paagi sa satong tataramon asin gibo na namumutan niyato an gabos na miyembro kan satuyang espirituwal na pamilya.—Basahon an 1 Pedro 3:8.