1. Paquemodo kita puede imita con el diaton amable Tata, si Jehova?

SI Jehova ta ama gayot kanaton. (Juan 3:16) Y quierre kita imita con el diaton amable Tata. Poreso, ta pricura kita demonstra “empatia, ama con uno y otro como hermano y hermana [y] tiene lastima” na todo pero especialmente con el “maga hermano y hermana na fe.” (1 Ped. 3:8, NW; Gal. 6:10) Si ta enfrenta problema diaton maga hermano y hermana na fe, quierre gayot kita ayuda kanila.

2. Cosa kita discuti na este articulo?

² Todo quien quierre queda parte del familia de Jehova hay enfrenta maga malisud situacion. (Mar. 10:29, 30) Posible, mas manada problema kita enfrenta mientras ta queda cerca el fin de este sistema. Paquemodo kita puede ayuda con uno y otro? Considera kita si cosa leccion kita puede saca na ejemplo de Lot, Job y Noemi. Hay discuti tambien kita el maga problema que ta enfrenta el diaton maga hermano y hermana ahora y mira si cosa kita puede hace para ayuda kanila.

3. Asegun na 2 Pedro 2:7, 8, cosa mal decicion el ya hace si Lot y cosa el maga resulta?

³ Si Lot ya hace mal decicion cuando ya decidi le queda junto na maga bien imoral gente de Sodoma. (Le con el 2 Pedro 2:7, 8.) Rico este lugar pero si Lot ya experiencia manada dificultad cay ya esta le alla. (Gen. 13:8-13; 14:12) Posible, ya gusta el de suyu mujer con el lugar o con el maga gente alla poreso  ya desobedece le con Jehova. Ya muri le cuando el Dios ya hace cae ulan de fuego y azufre na ese lugar. Pensa tambien con el dos anak mujer de Lot. Cerca ya sila casa con el maga hombre quien ya muri na Sodoma. Nuay mas casa y propiedad si Lot pero el mas duele na todo, ya muri el de suyu mujer. (Gen. 19:12-14, 17, 26) Na este bien dificil situacion, ya perde ba el paciencia de Jehova con Lot? Nuay.

4. Paquemodo ya dale mira paciencia si Jehova con Lot? (Mira con el letrato na cover.)

⁴ Maskin pa si Lot ya decidi esta na Sodoma, si Jehova ya dale mira de suyu compasion cuando ya imbia le maga angel para salva con ele y de suyu familia. Pero en vez de obedece dayun con el mandato del maga angel, “yan dulug siempre” si Lot. El angel ya agarra con el de suyu mano y ya ayuda con ele y con el de suyu familia sale na ciudad. (Gen. 19:15, 16) El maga angel ya habla con ele que corre para na monte. Pero en vez de obedece con Jehova, ya pidi si Lot que esta le na un cerca lugar. (Gen. 19:17-20) Si Jehova con paciencia ya oi y ya permiti con Lot que anda na ese lugar. Na uliji, si Lot ya tiene miedo esta na ese lugar y ya cambia na monte, na mismo lugar donde si Jehova ya manda con ele anda del primero. (Gen. 19:30) Que bien paciencioso gayot si Jehova! Paquemodo kita puede imita con ele?

5-6. Paquemodo kita puede aplica con el 1 Tesalonica 5:14 mientras ta imita kita con Dios?

⁵ Igual con Lot, el un hermano o hermana puede hace mal decicion y causa serioso problema con el de suyu mismo cuerpo. Si sucede se, cosa kita hace? Baka habla kita con ele que ta cosecha lang le si cosa le ya siembra. (Gal. 6:7) Deverasan man se pero mas bueno si ayuda kita con ele igual si paquemodo ya ayuda si Jehova con Lot. Paquemodo se kita hace?

⁶ Ya imbia si Jehova con el maga angel gendeh lang para dale aviso con Lot sino para ayuda tambien con ele para gendeh le man umit na calamidad del Sodoma. Na igual manera, posible necesita kita dale aviso con el diaton hermano si tiene le cosa ta hace que posible causa con ele peligro. Pero, puede tambien kita dale ayuda con ele. Maskin pa gendeh le dayun ta aplica el consejo na Biblia, necesita kita queda paciencioso. Imita con el dos angel. En vez de gendeh mas ayuda y deja con el diaton hermano, debe kita hace practical manera para asisti con ele. (1 Juan 3:18) Baka necesita kita con ele ayuda aplica con el consejo que ya dale con ele.​—Le con el 1 Tesalonica 5:14.

7. Paquemodo kita puede imita si paquemodo si Jehova ta mira con Lot?

⁷ Puede era si Jehova man focus na imperfeccion de Lot. Pero na uliji, ya manda le escribi con apostol Pedro que refiri con Lot como un recto gente. Bien alegre kita cay si Jehova ta perdona con el diaton maga kamali! (Sal. 130:3) Paquemodo kita puede imita si paquemodo si Jehova ta mira con Lot? Si man focus kita na maga buen calidad del diaton maga hermano y hermana, mas queda kita paciencioso kanila. Como resulta, baka mas acepta sila el ayuda que ta dale kita.

8. Cosa kita hace si tiene kita compasion?

⁸ Gendeh igual con Lot, nuay sufri si Job cay ya hace le mal decicion. Pero ya experiencia le grabe problema, ya perde el de suyu propiedad y posicion na comunidad y ya enferma le. El mas grabe, ya muri el de suyu maga anak. Ya acusa tambien con ele el de suyu tres falso amigo. Cosa el un razon si porque nuay dale mira compasion el de suyu tres falso amigo? Nuay sila pricura entende si cosa gayot  el situacion de suyu. Como resulta, ya tiene sila gendeh justo idea y ya juzga dayun sila con Job. Paquemodo kita puede evita con ese kamali? Acorda que si Jehova lang sabe si cosa gayot el situacion del un persona. Oi enbuenamente con el cosa ta habla el persona y pricura sinti si cosa le ta sinti. Na ese manera, puede tu dale mira empatia con el de tuyu hermano o hermana.

9. Si tiene kita compasion, cosa kita evita hace y porque?

⁹ El compasion manda move kanaton para gendeh man chismis acerca con el problema que ta enfrenta el otro. El quien ta hace chismis gendeh ta anima con el maga hermano na congregacion sino ta hace luya kanila. (Prov. 20:19; Rom. 14:19) Gendeh le ta pensa si cosa el efecto del cosa le ta hace y el de suyu palabra puede hace sinti duele con el persona que ta sufri ya daan. (Prov. 12:18; Ef. 4:31, 32) Mas bueno si mira kita con el buen calidad del un persona y pensa si na cosa manera kita puede ayuda con ele!

10. Cosa ta enseña kanaton el Job 6:2, 3?

¹⁰ Le con el Job 6:2, 3. Tiene maga tiempo que si Job ya habla maga gendeh buen cosas que gendeh le ta pensa. Pero na uliji, ya admiti le que gendeh justo el cosa le ya habla. (Job 42:6) Igual con Job, el un persona que ta enfrenta problema posible habla maga mal cosas que ta arripinti le na uliji. Cosa kita debe hace? En vez de juzga dayun, debe kita demonstra compasion. Acorda que gendeh proposito de Jehova que enfrenta kita problema y dificultad ahora. Poreso, puede kita entende si porque el un fiel siervo de Jehova ta puede habla maga cosas que gendeh le ta pensa si bajo na grabe problema. Maskin pa si habla le maga cosas que gendeh justo acerca con Jehova o kanaton, gendeh kita debe rabia dayun  con ele o juzga con ele cay ya habla le se maga cosas.​—Prov. 19:11.

11. Paquemodo el maga anciano puede imita con Elihu si ta dale consejo?

¹¹ Tiene vez, el un persona quien ta enfrenta grabe problema ta necesita consejo o disciplina que puede ayuda con ele. (Gal. 6:1) Paquemodo el maga anciano puede hace con ese? Necesita sila imita con Elihu quien ya oi con Job con empatia. (Job 33:6, 7) Ya dale lang consejo si Elihu cuando ya puede ya le entende con Job. El maga anciano puede imita con Elihu si oi sila enbuenamente y pricura entende con el situacion del persona. Despues, si dale ya sila consejo, mas puede sila alcanza con el corazon del quien ta oi.

12. Cosa el efecto con Noemi cuando ya muri el de suyu marido y dos anak hombre?

¹² Si Noemi un leal mujer quien ta ama con Jehova. Pero despues muri de suyu marido y dos anak, quierre le cambia de suyu nombre y hace con este “Mara” que quierre decir “Mapait.” (Rut 1:3, 5, 20, ftn., 21) El hierna de Noemi, si Rut, ya esta junto con ele maskin pa na de suyu malisud situacion. Nuay lang dale practical ayuda si Rut sino ya dale le comforta con Noemi por medio na de suyu maga palabra. Ya manda sinti si Rut el de suyu amor y suporta con Noemi por medio na simple y sincero maga palabra.​—Rut 1:16, 17.

13. Porque necesita suporta aquellos quien ya muri el marido o mujer?

¹³ Si ya muri el marido o mujer del diaton hermano o hermana na fe, necesita le el diaton suporta. El un man maridable puede compara na dos pono que junto ya crici. Mientras ta pasa el tiempo, el reiz del un pono tan lucut na reiz del otro pono. Si arranca con el un pono y muri este, tiene este efecto con el otro pono. Na igual manera, si ya muri el marido o mujer del un persona, posible le sinti grabe emocion por largo tiempo. Si Paula, * quien bigla lang ya muri el marido, ya habla: “Ya cambia gayot el de mio vida y ya sinti yo maluya. Nuay ya el de mio best friend. Ta habla yo con el de mio marido el todo. Alegre le si alegre yo y ta suporta le conmigo maskin na dificil situacion. Ta oi le pirmi conmigo si tan cuento yo acerca con el de mio maga problema. Ya sinti gayot yo que dol gendeh ya yo completo.”

14-15. Cosa kita hace para dale comforta con aquellos quien ya muri el marido o mujer?

¹⁴ Paquemodo kita dale comforta con aquellos quien ya muri el marido o mujer? El una que debe hace amo converza kanila maskin pa tan huya tu, gendeh comfortable o no sabe si cosa habla. Si Paula, que ya menciona enante, ya habla: “Ta entende yo que gendeh comfortable el maga gente si tiene quien ya muri. Tan lingasa sila que baka habla sila maga cosas que puede hace sinti duele con otro. Pero mas malo si nuay gayot sila cosa habla.” El un dolorido persona gendeh ta expecta kanaton que puede sila oi maga bonito palabra. Si Paula ya habla: “Ta aprecia yo si el de mio maga amigo y amiga ta habla, ‘Triste yo na cosa ya sucede.’”

¹⁵ Si William, quien ya muri el mujer cuanto año ya el ya pasa, ya habla: “Ta aprecia yo si el otro ta cunta conmigo maga experiencia acerca na de mio mujer; ta asigura este conmigo que ta ama y ta respeta sila con ele. Bien grande ayuda conmigo si ta hace se sila. El diila maga palabra ta dale gayot comforta conmigo, cay bien precioso conmigo el de mio mujer y ya tiene importante parte na de mio vida.” Un viuda que el nombre si Bianca ya explica: “Ta dale conmigo comforta si ta reza el otro junto conmigo y ta le uno o dos  texto conmigo. Ta puede ayuda conmigo si tan cuento sila acerca na de mio marido y si ta oi sila mientras tan cuento yo acerca con ele.”

16. (a) Cosa kita debe dale con aquellos quien ya muri el marido o mujer? (b) Asegun na Santiago 1:27, cosa responsibilidad kita tiene?

¹⁶ Igual con Rut quien ya esta junto con Noemi, necesita tambien kita continua suporta con aquellos maga dolorido. Si Paula que ya menciona enante, ya habla: “Despues del muerte del de mio marido, manada el quien ya dale comforta conmigo. Pero despues del cuanto tiempo, ya queda ya sila busy na diila cada y cual trabajo. Ya cambia gayot de mio vida. Un grande ayuda si ta puede nota el otro que el un dolorido persona ta necesita ayuda por cuanto mes o año pa gane despues del muerte.” Deverasan, gendeh igual el cada persona. El otro pronto lang man adjust na diila nuevo situacion. Pero el los demas, cada vez hace sila el trabajo que ta hace sila junto na diila marido o mujer de antes, ta hace este acorda kanila que solo-solo ya lang sila. El cada individual otro-otro el manera si paquemodo ta enfrenta con el dolor. Acorda kita que ya dale kanaton si Jehova el privilegio y responsibilidad para cuida con aquellos quien ya muri el marido o mujer.​—Le con el Santiago 1:27.

17. Porque ta necesita diaton suporta aquellos con quien ya abandona el marido o mujer?

¹⁷ El cuanto marido o mujer ta experiencia grabe dolor y stress cay ya abandona kanila el diila mujer o marido. Si Joyce, con quien ya  deja el marido cay ya sigui na otro mujer, ya habla: “Mas grabe el dolor cuando yan divurcio conmigo el de mio marido contra si ya muri le. Si ya muri le por causa na accidente o enfermedad, gendeh quel de suyu decicion. Pero na de mio situacion, el de mio marido ya iscuji deja conmigo. Ya sinti yo que nuay yo valor.”

18. Cosa kita puede hace para ayuda con aquellos nuay mas marido o mujer?

¹⁸ Si hace kita maga buen cosas para con aquellos nuay mas marido o mujer, ta dale kita mira que ta ama gayot kita kanila. Ahora cay solo ya lang sila, mas ta necesita sila maga buen amigo y amiga. (Prov. 17:17) Paquemodo tu dale mira que amigo tu diila? Puede tu invita kanila para come junto. Y puede tu invita kanila man junto na recreacion o na ministerio. El otro manera tambien amo invita kanila tiene vez na de ustedes de familia adoranza. Si hace tu se, puede tu hace alegre con Jehova cay ele ‘cerca con aquellos quien dolorido el corazon’ y el “quien ta protege con el maga viuda.”​—Sal. 34:18; 68:5.

19. Base na 1 Pedro 3:8, cosa tu determinao hace?

¹⁹ Gendeh mas dura, si rula ya el Reino del Dios aqui na tierra, todo “el maga problema de antes hay ulvida ya.” Ta espera kita con el tiempo donde “el maga cosas de antes gendeh mas acorda y perde ya este na corazon.” (Isa. 65:16, 17) Mientras tanto, suporta kita con uno y otro y dale mira por medio na diaton palabra y maga accion que ta ama kita con el diaton maga hermano y hermana.​—Le con el 1 Pedro 3:8, NW.