1. Unsaon nato pagsundog ang atong mahigugmaong Amahan, si Jehova?

GIMAHAL kaayo ta ni Jehova. (Juan 3:16) Gusto natong sundogon ang atong mahigugmaong Amahan. Busa naningkamot ta sa pagpakitag “simpatiya, inigsoong pagmahal, [ug] kaluoy” ngadto sa tanan apan ilabina sa “atong mga igsoon sa pagtuo.” (1 Ped. 3:8; Gal. 6:10) Dihang ang mga membro sa atong espirituwal nga pamilya mag-atubag makapa-stress nga mga problema, gusto nato silang tabangan.

2. Unsay atong hisgotan niining artikuloha?

² Ang tanan nga gustong mahimong bahin sa pamilya ni Jehova makaatubang ug makapa-stress nga mga kahimtang. (Mar. 10:29, 30) Posible nga mas daghan pang pagsulay ang atong maatubang samtang magkaduol ang kataposan niining sistemaha. Sa unsang paagi ta magtinabangay? Atong hisgotan kon unsay atong makat-onan sa mga asoy sa Bibliya bahin kang Lot, Job, ug Noemi. Hisgotan sab nato ang pipila sa mga kalisdanan nga giatubang sa mga igsoon karon ug kon unsaon nato sila pagtabang.

3. Sumala sa 2 Pedro 2:7, 8, unsang dili maayong desisyon ang nahimo ni Lot, ug unsay resulta niini?

³ Si Lot nakahimog dili maayong desisyon dihang mipili siya sa pagpuyo kauban sa imoral kaayong mga tawo sa Sodoma. (Basaha ang 2 Pedro 2:7, 8.) Dato ang maong lugar, pero si Lot nakasinatig daghang kalisdanan tungod sa iyang pagbalhin didto. (Gen. 13:8-13; 14:12) Dayag nga gusto kaayo sa iyang  asawa ang maong siyudad o ang pipila ka tawo didto mao nga misupak siya kang Jehova. Nawad-an siya sa iyang kinabuhi dihang ang Diyos nagpaulan ug kalayo ug asupre sa maong lugar. Hunahunaa sab ang duha ka anak ni Lot. Minyoonon sila sa mga lalaki nga namatay sa Sodoma. Si Lot nawad-an sa iyang balay, kabtangan, ug ang pinakasakit sa tanan, sa iyang asawa. (Gen. 19:12-14, 17, 26) Niining makapa-stress kaayo nga kahimtang, nawad-an bag pailob si Jehova kang Lot? Wala.

4. Sa unsang paagi nagmapailobon si Jehova kang Lot? (Tan-awa ang hulagway sa atubangan sa magasin.)

⁴ Bisag mipili si Lot sa pagpuyo sa Sodoma, si Jehova mabinationg nagpadalag mga anghel sa pagluwas kaniya ug sa iyang pamilya. Pero imbes mosunod dayon sa dinaliang sugo sa mga anghel nga mobiya sa Sodoma, si Lot “naglangaylangay.” Kinahanglan pang hawiran sa mga anghel ang iyang kamot ug tabangan siya ug ang iyang pamilya sa pagbiya sa siyudad. (Gen. 19:15, 16) Dayon giingnan siya sa mga anghel nga modagan ngadto sa kabukiran. Pero imbes mosunod kang Jehova, si Lot mihangyo nga moadto sa duol nga lungsod. (Gen. 19:17-20) Si Jehova mapailobong naminaw ug misugot nga moadto si Lot nianang lungsora. Sa ulahi, si Lot nahadlok sa iyang pagpuyo didto mao nga mibalhin siya sa kabukiran, nga maoy unang gipaadtoan ni Jehova kaniya. (Gen. 19:30) Pagkadako sa gipakitang pailob ni Jehova! Sa unsang paagi masundog nato siya?

5-6. Unsaon nato pagpadapat ang 1 Tesalonica 5:14 sa atong pagsundog sa Diyos?

⁵ Sama ni Lot, lagmit may usa ka membro sa atong espirituwal nga pamilya nga makahimog dili maayong desisyon nga moresultag seryosong mga problema. Kon mahitabo nâ, unsay atong himoon? Tingali makahunahuna tang sultihan siya nga iyang giani ang iyang gipugas, nga maoy tinuod. (Gal. 6:7) Pero naa tay mas maayong mahimo. Puwede natong sundogon ang paagi ni Jehova sa pagtabang kang Lot. Sa unsang paagi?

⁶ Si Jehova nagpadalag mga anghel dili lang aron pasidan-an si Lot kondili aron tabangan sab siya sa pag-ikyas sa katalagman nga ipahamtang Niya sa Sodoma. Sa susama, kinahanglan tingali natong pasidan-an ang atong igsoon kon makita nato nga naa siyay ginabuhat nga iyang ikadaot. Pero puwede sab nato siyang tabangan. Bisan kon dili dayon niya ipadapat ang nadawat niyang tambag gikan sa Bibliya, kinahanglan tang magpailob. Sundoga ang duha ka anghel. Imbes mosurender dayon ug mopalayo sa atong igsoon, kinahanglang mangita tag praktikal nga mga paagi sa pagtabang kaniya. (1 Juan 3:18) Kinahanglan tingali nato siyang hawiran sa kamot, sa ato pa, tabangan siya sa pagpadapat sa maayong tambag nga gihatag kaniya.​—Basaha ang 1 Tesalonica 5:14.

7. Unsaon nato pagsundog ang panglantaw ni Jehova kang Lot?

⁷ Puwede untang magpokus si Jehova sa kasaypanan ni Lot. Pero dili kanay iyang gihimo. Gani, sa ulahi iyang gigiyahan si apostol Pedro sa pagsulat nga si Lot maoy matarong nga tawo. Malipay gyod ta nga si Jehova nagapasaylo sa atong mga sayop! (Sal. 130:3) Masundog ba nato ang panglantaw ni Jehova kang Lot? Kon magpokus ta sa maayong mga hiyas sa mga igsoon, mahimo tang mas mapailobon kanila. Lagmit mas dali nilang dawaton ang tabang nga atong itanyag.

8. Ang pagkamabination magpalihok nato sa pagbuhat sa unsa?

⁸ Dili sama kang Lot, si Job wala mag-antos tungod sa dili maayong mga desisyon. Pero nakasinati siyag grabeng mga problema. Nawad-an siya ug kabtangan, posisyon diha sa  komunidad, ug maayong panglawas. Mas grabe pa, namatay ang tanan niyang anak. Si Job giakusahan sab sa tulo niya ka dili tinuod nga higala. Unsa ang usa ka rason nga wala silay pagbati kaniya? Wala nila sabta kon unsa gyoy nahitabo kaniya. Kini ang hinungdan nga nakahimo silag sayop nga konklusyon ug gihukman siya. Unsay atong himoon aron dili ta makahimo niana nga sayop? Angay natong masabtan nga si Jehova lang ang nahibalo sa tanan bahin sa kahimtang sa usa ka tawo. Paminawa pag-ayo ang isulti sa tawong nag-antos. Pero dili lang kana, paningkamoti nga bation nimo ang iyang kasakit. Nianang paagiha lang nga makapakita kag tinuod nga pagkamabination sa igsoon.

9. Ang pagkamabination magpugong nato sa pagbuhat sa unsa, ug ngano?

⁹ Ang pagkamabination magpugong nato sa pagpakaylap ug makadaot nga tabi bahin sa mga problema nga giatubang sa uban. Ang manabi dili makapalig-on sa kongregasyon; siya makabungkag niini. (Prov. 20:19; Roma 14:19) Siya dili mahigugmaon ug walay paghunahuna sa uban, ug ang iyang ipanulti makapasamot sa kasakit sa tawong nag-antos. (Prov. 12:18; Efe. 4:31, 32) Maayo gyod nga magpokus ta sa maayong mga hiyas sa maong tawo ug maghunahuna kon unsaon nato siya pagtabang sa pagsagubang sa iyang kalisdanan!

10. Unsay gitudlo kanato sa Job 6:2, 3?

¹⁰ Basaha ang Job 6:2, 3. Dihay mga higayon nga si Job ‘nagpasagad ug sulti.’ Pero sa ulahi miadmitir siya nga sayop ang uban niyang gisulti. (Job 42:6) Sama kang Job, ang usa ka tawo nga nag-atubang karon ug makapa-stress nga problema lagmit magpasagad ug sulti, nga basolan niya sa ulahi. Unsa may atong reaksiyon? Imbes sawayon siya, kinahanglan  tang magmabination. Hinumdomi nga dili katuyoan ni Jehova nga kita makaatubag mga problema ug ma-stress. Busa masabtan nato kon ang usa ka matinumanong alagad ni Jehova magpasagad ug sulti dihang ma-stress pag-ayo. Bisan pag makasulti siyag dili mao bahin kang Jehova o kanato, dili dayon ta masuko o mohukom niya tungod sa iyang gisulti.​—Prov. 19:11.

11. Unsaon pagsundog sa mga ansiyano si Elihu dihang magtambag?

¹¹ Usahay, ang tawong nag-atubang ug makapa-stress nga problema nagkinahanglan pod ug tambag o disiplina. (Gal. 6:1) Unsaon kini paghimo sa mga ansiyano? Angay nilang sundogon si Elihu, kinsa mabinationg naminaw kang Job. (Job 33:6, 7) Ayha pa mitambag si Elihu dihang nasabtan na niya ang hunahuna ni Job. Ang mga ansiyano nga nagsundog kang Elihu maminaw pag-ayo ug maningkamot nga masabtan ang situwasyon sa maong tawo. Unya, dihang motambag sila, mas dakog posibilidad nga maabot nila ang kasingkasing sa ilang tambagan.

12. Unsay epekto kang Noemi sa kamatayon sa iyang bana ug duha ka anak?

¹² Si Noemi maoy maunongong babaye nga nahigugma kang Jehova. Apan human mamatay ang iyang bana ug duha ka anak, gusto niya nga ang iyang ngalan ilisag “Mara,” nga nagkahulogang “Pait.” (Ruth 1:3, 5, 20, footnote, 21) Ang umagad ni Noemi nga si Ruth miunong niya panahon sa iyang kalisdanan. Gawas sa paghatag ug praktikal nga tabang, gisultihan sab ni Ruth si Noemi ug makapahupayng mga pulong. Gipahayag ni Ruth ang iyang gugma ug pagsuportar kang Noemi sa simple ug sinserong mga pulong.​—Ruth 1:16, 17.

13. Nganong kadtong namatyag kapikas nagkinahanglan sa atong tabang?

¹³ Dihang ang membro sa atong espirituwal nga pamilya mamatyag kapikas, siya nagkinahanglan sa atong tabang. Ang magtiayon ikatandi sa duha ka kahoy nga nagtapad ug tubo. Paglabay sa panahon, ang mga gamot niini maglambod. Dihang maluka ug mamatay ang usa ka kahoy, grabeng maapektohan ang tapad niini nga kahoy. Sa susama, dihang ang usa mamatyag kapikas, siya maguol pag-ayo sa taas nga panahon. Si Paula, * kansang bana kalit nga namatay, miingon: “Nausab gyod ang akong kinabuhi, ug morag wala na koy mahimo. Nawad-an kog pinakasuod nga higala. Ang akong bana ang akong masultihan sa tanan. Ang akong kalipay iyang kalipay, ug gitabangan ko niya sa akong kalisdanan. Paminawan ko niya pirme sa akong mga problema. Gibati nako nga morag gipikas ang akong lawas.”

14-15. Unsaon nato paghupay kadtong namatyag kapikas?

¹⁴ Unsaon nato paghupay kadtong namatyag kapikas? Ang unang butang nga angay natong himoon mao ang pagpakig-estorya niya bisag dili ta segurado o komportable sa atong isulti. Si Paula, nga bag-o pang gihisgotan, miingon: “Nakasabot ko nga dili komportable ang mga tawo bahin sa kamatayon. Mabalaka sila kay basig malain ang uban sa ilang isulti. Pero arang-arang na lang nang makadungog kag dili kaayo nindot paminawon kay sa wala gyod kay madungog.” Ang tawong nagbangotan lagmit wala magdahom nga nindot kaayo tag isulti. Si Paula miingon: “Maapresyar gyod nako bisag moingon lang ang akong higala ug ‘Naguol ko sa nahitabo.’”

¹⁵ Si William, nga namatyag asawa pipila na  ka tuig ang milabay, miingon: “Maapresyar nako kon ang uban maghisgot ug mga eksperyensiya bahin sa akong asawa; nagpasalig ni nako nga siya gimahal ug gitahod. Dako kaayo ni nga tabang. Mahupayan gyod ko ini kay importante kaayo nako ang akong asawa ug dako siyang bahin sa akong kinabuhi.” Ang biyuda nga si Bianca miingon: “Mahupayan ko dihang ang uban mag-ampo uban nako ug magbasag usa o duha ka teksto. Dakog tabang dihang hisgotan nila ang akong bana ug dihang maminaw sila kon maghisgot ko bahin niya.”

16. (a) Unsay angay natong itagana niadtong namatyag minahal? (b) Sumala sa Santiago 1:27, unsay atong responsibilidad?

¹⁶ Sama ni Ruth nga miunong sa biyudang si Noemi, kinahanglang padayon natong tabangan kadtong namatyag minahal. Si Paula, nga gihisgotan ganina, miingon: “Pagkamatay gyod sa akong bana, daghan ang mitabang nako. Paglabay sa panahon, na-busy na sila sa ilang adlaw-adlawng buluhaton. Pero nausab na pag-ayo ang akong kinabuhi. Busa makatabang gyod kon makaamgo ang uban nga ang tawong namatyan nanginahanglag tabang sulod sa daghang bulan o daghang tuig pa gani.” Siyempre, lainlain ang tawo. Naay dali rang makaadyas. Pero para sa uban, matag higayon nga himoon nila ang ilang ginahimo kaniadto uban sa ilang minahal, mahinumdom sila sa nahitabo. Lainlain ang paagi sa pagbangotan sa matag tawo. Atong hinumdoman nga si Jehova naghatag natog pribilehiyo ug responsibilidad nga atimanon kadtong namatyag kapikas.​—Basaha ang Santiago 1:27.

17. Nganong kadtong gibiyaag kapikas nagkinahanglan sa atong tabang?

 ¹⁷ Ang uban nakigbisog sa grabeng kasakit ug stress dihang gibiyaan sila sa ilang kapikas. Si Joyce, kansang bana mibiya ug miipon sa laing babaye, miingon: “Ang diborsiyo mas sakit kay sa mamatyag bana. Kon namatay siya sa aksidente o sakit, dili to tinuyo. Pero ang iyang pagbiya nako, tinuyo. Mibati ko nga gipakaulawan ug gipakaubos.”

18. Unsay atong mahimo aron matabangan kadtong wala nay kapikas?

¹⁸ Dihang mohimo tag maayo niadtong wala nay kapikas, atong gipakita nga gimahal gyod nato sila. Mas gikinahanglan nila karon ang maayong mga higala. (Prov. 17:17) Unsaon nimo pagpakita nga higala ka nila? Puwede nimo silang imbitahon nga mangaon. Puwede sab nimo silang iuban sa paglingawlingaw o sa pagsangyaw, o kaha paapilon usahay sa inyong pamilyahanong pagsimba. Kon imo nang himoon, mapalipay nimo si Jehova, kay siya “duol niadtong mga dugmok ug kasingkasing” ug “tigpanalipod sa mga babayeng balo.”​—Sal. 34:18; 68:5.

19. Unsay giingon sa 1 Pedro 3:8 nga angay natong himoon?

¹⁹ Sa dili madugay, dihang ang Gingharian sa Diyos magmando na sa yuta, ang tanang “kasakit makalimtan.” Naghinamhinam gyod ta sa panahon dihang ‘ang kanhing mga butang dili na hinumdoman, ug dili na motungha sa kasingkasing.’ (Isa. 65:16, 17) Samtang nagpaabot nianang panahona, magtinabangay ta ug atong pamatud-an sa pulong ug buhat nga atong gimahal ang tanang membro sa atong espirituwal nga pamilya.​—Basaha ang 1 Pedro 3:8.