1. Paano naton mailog ang aton mahigugmaon nga Amay nga si Jehova?

PALANGGA gid kita ni Jehova. (Juan 3:16) Gusto naton ilugon ang aton mahigugmaon nga Amay. Gani ginatinguhaan naton nga magpakita sang “simpatiya, utudnon nga pagpalangga, [kag] kaluoy” sa tanan, ilabi na sa aton mga “masigkatumuluo.” (1 Ped. 3:8; Gal. 6:10) Kon na-stress ang aton mga kauturan bangod sang mabudlay nga mga problema, dapat naton sila buligan.

2. Ano ang binagbinagon naton sa sini nga artikulo?

² Ang tanan nga gusto mangin bahin sang pamilya ni Jehova makaeksperiensia gid sang mabudlay nga mga kahimtangan. (Mar. 10:29, 30) Mahimo gid nga mas madamo nga mga pagtilaw ang aton maeksperiensiahan samtang nagahilapit ang katapusan sini nga sistema. Gani dapat kita magbuligay. Paano? Binagbinagon naton kon ano ang aton matun-an sa kasaysayan nanday Lot, Job, kag Noemi. Binagbinagon man naton ang pila ka kabudlayan nga ginabatas sang aton mga kauturan subong, kag hibaluon naton kon paano naton sila mabuligan nga masarangan ang mga problema.

3. Ano ang indi husto nga desisyon ni Lot, kag ano ang resulta sini suno sa 2 Pedro 2:7, 8?

³ Indi husto ang desisyon ni Lot nga mag-istar sa Sodoma bangod tam-an ka imoral ang mga tawo diri. (Basaha ang 2 Pedro 2:7, 8.) Manggaranon ini nga lugar, pero nangin mabudlay gid ang kabuhi ni Lot. (Gen. 13:8-13; 14:12) Mahimo nga nanamian  gid ang iya asawa sa sini nga siudad ukon sa pila ka tawo nga nagaistar diri amo nga ginpasulabi niya ini sangsa pagtuman kay Jehova. Gani napatay sia sang nagpaulan ang Dios sang kalayo kag asupre sa sini nga lugar. Kamusta naman ang duha ka anak nga babayi ni Lot? Kalaslon na kuntani sila, pero napatay man ang ila mga nobyo nga taga-Sodoma. Wala na si Lot sing balay, mga pagkabutang, kag asawa, nga amo ang pinakamasakit sa tanan. (Gen. 19:12-14, 17, 26) Sa sining mabudlay nga kahimtangan, naubos bala ang pasensia ni Jehova kay Lot? Wala.

4. Paano nangin mapinasensiahon si Jehova kay Lot? (Tan-awa ang piktyur sa kober.)

⁴ Bisan pa nagdesisyon si Lot nga mag-istar sa Sodoma, naluoy si Jehova sa iya gani nagpadala sia sang mga anghel para luwason sia kag ang iya pamilya. Pero, imbes nga tumanon dayon ang sugo sang mga anghel nga dalidali nga maggua sa Sodoma, ‘daw indi pa maghalin’ si Lot. Gani gin-uyatan sang mga anghel ang iya kamot kag ginbuligan nila sia kag ang iya pamilya nga makagua sa siudad. (Gen. 19:15, 16) Dayon ginsilingan sia sang mga anghel nga magdalagan pakadto sa bukid. Pero imbes nga tumanon si Jehova, nagpangabay si Lot nga sa malapit nga banwa lang sia malagyo. (Gen. 19:17-20) Mapinasensiahon nga ginpamatian ni Jehova si Lot kag ginpasugtan sia nga magpalagyo sa sini nga banwa. Sang ulihi, hinadlukan sia didto gani nagsaylo sia sa bukid, nga amo ang lugar nga una nga ginsiling ni Jehova nga palagyuhan niya. (Gen. 19:30) Mapinasensiahon gid si Jehova! Paano naton sia mailog?

5-6. Kon ginailog naton ang Dios, paano naton maaplikar ang 1 Tesalonica 5:14?

⁵ Pareho kay Lot, posible nga makahimo man sang indi maayo nga desisyon ang aton utod kag magresulta sa mga problema. Kon matabo ini, ano ang himuon naton? Basi hambalan naton sia nga ginaani lang niya ang iya ginsab-ug, nga posible matuod man. (Gal. 6:7) Pero may mas maayo kita nga mahimo. Ilugon naton ang ginhimo ni Jehova kay Lot. Paano?

⁶ Nagpadala si Jehova sang mga anghel, indi lang para paandaman si Lot, kundi para buligan man sia nga makapalagyo sa Sodoma. Sing kaanggid, mahimo nga kinahanglan naton paandaman ang aton utod kon nakita naton nga indi maayo ang mangin resulta sang iya ginahimo. Pero basi mabuligan man naton sia. Kon wala niya dayon ginaaplikar ang mga ginalaygay sa iya nga base sa Biblia, dapat kita mangin mapinasensiahon. Iluga ang duha ka anghel. Sa baylo nga mag-untat sa pagbulig sa utod, dapat kita mangita sang paagi kon paano sia mabuligan. (1 Juan 3:18) Basi kinahanglan man naton uyatan ang iya kamot, ukon buligan sia nga iaplikar ang ginalaygay sa iya.—Basaha ang 1 Tesalonica 5:14.

7. Paano naton mailog si Jehova sa kon paano niya gintamod si Lot?

⁷ Puede kuntani nga ang mga sala lang ni Lot ang gintalupangod ni Jehova. Pero gintuytuyan niya sang ulihi si apostol Pedro nga isulat nga si Lot isa ka matarong nga tawo. Nalipay gid kita nga ginapatawad ni Jehova ang aton mga sala! (Sal. 130:3) Paano naton mailog si Jehova sa kon paano niya gintamod si Lot? Kon magpokus kita sa maayo nga mga kinaiya sang aton mga kauturan, mabuligan kita sini nga mangin mapinasensiahon sa ila. Kon himuon naton ini, mahimo nga batunon nila ang aton bulig.

8. Ano ang aton himuon kon may kaluoy kita?

⁸ Pareho kay Lot, nag-antos man si Job, pero indi bangod nakahimo sia sang sala nga desisyon. Nadula ang iya mga pagkabutang, ginpakanubo sia, kag nagbalatian. Ang mas masakit pa gid kay napatay ang tanan niya nga kabataan. Ginsumbong man si Job sang iya tatlo ka  indi matuod nga mga abyan. Ngaa wala naluoy kay Job ining tatlo ka masabad nga manuglugpay? Ang isa ka rason amo nga wala nila gintinguhaan nga hangpon ang matuod nga kahimtangan ni Job. Gani sala ang ila paghangop sa nagakatabo kay Job kag ginhukman nila sia dayon. Ano ang himuon naton para indi naton mailog ang ila ginhimo? Dumduma nga si Jehova lang ang nakahibalo sang tanan parte sa kahimtangan sang tawo nga nagaantos. Gani pamatii sing maayo ang ginasiling sang imo utod. Pero indi lang basta mamati; tinguhai man nga hangpon ang iya ginabatyag. Kon himuon mo ini, nagasimpatiya ka sa imo utod.

9. Kon maluluy-on kita, ano ang indi naton paghimuon, kag ngaa?

⁹ Kon maluluy-on kita, indi naton pag-ikutsokutso ang parte sa problema sang iban. Ang nagakutsokutso wala nagapabakod sa kongregasyon, kundi ginapaluya niya ini. (Hulu. 20:19; Roma 14:19) Indi sia mainayuhon kag wala niya ginahunahuna sing maayo ang iya mga ginahambal, gani makahalit pa gid ini sa tawo nga nagaantos. (Hulu. 12:18; Efe. 4:31, 32) Mas maayo gid nga magpokus kita sa maayo nga mga kinaiya sang aton utod kag pamensaron naton kon paano sia mabuligan!

10. Ano ang ginatudlo sa aton sang Job 6:2, 3?

¹⁰ Basaha ang Job 6:2, 3. May mga tion nga naghambal si Job nga “wala [anay] nagahunahuna sing maayo.” Pero, ginbawi niya sang ulihi ang pila sa ginsiling niya. (Job 42:6) Pareho kay Job, ang tawo nga na-stress posible man maghambal nga wala anay nagahunahuna sing maayo nga mahimo hinulsulan niya sa ulihi. Kon matabo ini, ano ang himuon naton? Sa baylo nga pakalainon ang tawo nga na-stress, dapat kita mangin maluluy-on. Dumduma nga indi katuyuan ni Jehova nga makaeksperiensia kita sang mga problema kag stress. Gani  hangpon naton kon ang isa ka matutom nga alagad ni Jehova makahambal nga wala anay nagahunahuna sing maayo bangod sang grabe nga stress. Bisan pa makahambal sia sing indi maayo parte kay Jehova ukon parte sa aton, indi naton sia dayon pag-akigan ukon hukman.—Hulu. 19:11.

11. Kon nagalaygay ang mga gulang, paano nila mailog si Elihu?

¹¹ Kon kaisa, ang utod nga na-stress bangod sang problema kinahanglan man laygayan. (Gal. 6:1) Paano ini mahimo sang mga gulang? Dapat nila ilugon si Elihu, nga nagpakita sang tumalagsahon nga empatiya samtang nagapamati kay Job. (Job 33:6, 7) Ginlaygayan lang ni Elihu si Job sang mahangpan na niya ang ginabatyag ni Job. Dapat ilugon sang mga gulang si Elihu paagi sa pagpamati sing maayo kag pagtinguha nga hangpon ang kahimtangan sang utod. Kon himuon nila ini, mahimo gid nga malab-ot sang ila laygay ang tagipusuon sang utod.

12. Ano ang gusto nga himuon ni Noemi sang napatay ang iya bana kag duha ka anak nga lalaki?

¹² Palangga ni Noemi si Jehova kag matutom sia nga nagaalagad sa iya. Pero sang mapatay ang iya bana kag duha ka anak nga lalaki, gusto niya nga islan ang iya ngalan sing “Mara,” buot silingon “Mapait.” (Rut 1:3, 5, 20, footnote, 21) Wala sia ginbiyaan sang iya umagad nga si Rut sa tion sang kabudlayan. Ginbuligan sia ni Rut kag ginlugpayan. Simple lang ang ginhambal ni Rut pero sinsero niya nga ginpabutyag ang iya pagpalangga kag pagsuporta kay Noemi.—Rut 1:16, 17.

13. Ngaa kinahanglan sang utod nga napatyan sang bana ukon asawa ang aton bulig?

¹³ Kon napatay ang bana ukon asawa sang aton utod, kinahanglan niya ang aton bulig. Ang mag-asawa daw pareho sa duha ka magkatupad nga kahoy nga dungan nga nagtubo. Pagligad sang pila ka tuig, ang ila mga gamot nagasamburanay na. Kon ang isa ka kahoy gabuton kag mapatay, maapektuhan gid ang nabilin nga kahoy. Sing kaanggid, kon ang isa mapatyan sang bana ukon asawa, mahimo masubuan gid sia sa malawig nga tion. Si Paula, * nga hinali lang nga napatay ang bana, nagsiling: “Daw nagbaliskad ang akon kalibutan, kag pamatyag ko daw wala na ako sing mahimo. Wala na ang akon pinakasuod nga abyan nga ginasugiran ko sang tanan. Ara sia sa tupad ko sa tanan nga tion, sa kalipay man ukon sa kasubo. Handa gid sia pirme magpamati sa akon mga problema. Pamatyag ko napatay man ang katunga sang akon lawas.”

14-15. Paano naton malugpayan ang isa nga napatyan sang bana ukon asawa?

¹⁴ Paano naton malugpayan ang isa nga napatyan sang bana ukon asawa? Ang una nga importante naton nga himuon amo ang istoryahon sia, bisan pa daw indi kita kabalo kon ano ang aton ihambal. Si Paula, nga ginsambit kaina, nagsiling: “Nahangpan ko nga nabudlayan ang mga tawo kon paano istoryahon ang namatyan. Nabalaka sila nga basi sala ang ila mahambal kag mas masubuan pa gid ang ila ginaistorya. Masubo gid man kon daw indi husto ang mahambal sang isa, pero mas masubo kon indi na gid sia mag-istorya.” Mahimo nga wala man ginapaabot sang napatyan sang pinalangga nga makatalandog gid ang aton ihambal. Si Paula nagsiling: “Daku na ang epekto sa akon bisan magsiling lang ang akon mga abyan sing, ‘Nasubuan gid ako sa natabo.’”

¹⁵ Si William, nga napatay ang asawa pila ka tuig na ang nagligad, nagsiling: “Naapresyar ko gid kon may mag-istorya sa akon parte sa nadumduman nila sa akon asawa, kay ginapakita sini nga palangga nila sia kag ginapabaloran.  Daku gid ang nabulig sini sa akon. Nagalugpay gid ini sa akon bangod palangga ko gid ang akon asawa kag nangin daku sia nga parte sang akon kabuhi.” Si Bianca, nga isa ka balo, nagsiling: “Kon may magpangamuyo upod sa akon ukon may magpaambit sang isa ukon duha ka teksto, nagahaganhagan ang akon kasubo. Nagamag-an ang akon pamatyag kon nagaistorya sila parte sa akon bana kag kon magpamati sila kon ako naman ang mag-istorya parte sa iya.”

16. (a) Ano ang dapat naton himuon para sa mga napatyan sang pinalangga? (b) Suno sa Santiago 1:27, ano ang aton responsibilidad?

¹⁶ Pareho kay Rut nga wala gid ginbiyaan ang balo nga si Noemi, dapat padayon man naton nga buligan ang mga napatyan sang pinalangga. Si Paula, nga ginsambit kaina, nagsiling: “Sang napatay ang akon bana, madamo dayon ang nagbulig sa akon. Pero pagligad sang tion, masako naman sila sa ila mga hilikuton kag mga rutina sang una. Pero ako ’ya, indi na mangin pareho sang una ang akon kabuhi. Daku gid nga bulig kon mahangpan sang iban nga kinahanglan sang mga napatyan sang pinalangga ang padayon nga suporta bisan magligad ang binulan ukon tinuig pa gani.” Siempre, indi palareho ang mga tawo. Ang pila madasig nga naka-adjust sa ila bag-o nga kahimtangan. Ang iban naman gulpi lang masubuan kon may himuon sila nga hilikuton nga nagapahanumdom sa ila sang ila pinalangga, ilabi na gid kon magkaupod nila ini nga ginahimo sang una. Indi palareho ang aton reaksion sa kasubo. Dumdumon naton nga ginhatagan kita ni Jehova sang pribilehiyo kag responsibilidad nga atipanon ang  mga napatyan sang bana ukon asawa.—Basaha ang Santiago 1:27.

17. Ngaa kinahanglan sang mga ginbiyaan sang ila bana ukon asawa ang aton bulig?

¹⁷ Ang mga ginbiyaan sang ila bana ukon asawa nagabatyag man sang grabe nga kasubo kag stress. Si Joyce, nga ginbiyaan sang iya bana bangod sang iya kerida, nagsiling: “Daw mas masakit pa ang diborsio sangsa mapatyan sang bana. Kon napatay sia bangod sa aksidente ukon balatian, wala sia sing kontrol sa sini. Pero hungod ako nga ginbiyaan sang akon bana. Pamatyag ko daw wala ako sing pulos.”

18. Ano ang mahimo naton para sa mga balo ukon sa mga ginbiyaan sang ila bana ukon asawa?

¹⁸ Kon ginabuligan naton ang mga balo ukon ang mga ginbiyaan sang ila bana ukon asawa, ginapakita naton sa ila nga palangga naton sila. Kinahanglan gid nila ang maayo nga mga abyan. (Hulu. 17:17) Paano mo mapakita nga abyan ka nila? Mahimo mo sila agdahon nga magkaon, ukon updan sa paglingawlingaw ukon sa pagministeryo. Mahimo mo man sila paupdon kon kaisa sa inyo pangpamilya nga pagsimba. Kon himuon mo ini, mapahalipay mo si Jehova, kay “malapit [sia] sa mga nagaantos” kag “manugpangapin [sia] sang mga balo.”—Sal. 34:18; 68:5.

19. Suno sa 1 Pedro 3:8, ano ang dapat mo himuon?

¹⁹ Sa indi madugay, kon maggahom na ang Ginharian sang Dios diri sa duta, ang tanan nga “kalisdanan malipatan na.” Ginakalangkagan na gid naton ang pag-abot sang tion nga “ang nagligad nga mga butang indi na pagdumdumon, ukon magpabilin sa tagipusuon.” (Isa. 65:16, 17) Pero samtang wala pa ini, padayon kita nga magbuligay kag ipakita naton sa pulong kag sa buhat nga palangga gid naton ang aton mga kauturan.—Basaha ang 1 Pedro 3:8.