ATUAQQISSAAGASSAQ 26
Nanertisimasut ikiukkit
“Tamassi isumaqatigiillusi inooqatigiigitsi misiginneqataasarlusi, qatanngutigiittut asaqatigiillusi, nallittuisarlusi qanilaarlusilu.” – 1 PETR 3:8.
ERINARSUUT 105 ‘Guuti tassaavoq asanninneq’
QILANAARTUUT *
1. Ataatarput asannittoq, Jehova, qanoq ilaarsinnaavarput?
JEHOVAP asangaarpaatigut, Ataatarpullu asannittoq ilaarusupparput. (Joh 3:16) Kikkunnut tamanut, “pingaartumik uppeqatitsinnut”, ‘misiginneqataarusuppugut, qatanngutigiittut asaqatigiilluta nallittuisarlutalu’. (Gal 6:10; 1 Petr 3:8) Anersaakkut qatanngutitta ilaat erloqinartorsioraangata ikiorusuttarpavut.
2. Allaaserisami suut sammissavavut?
2 Jehovap ilaqutariissortaanut ilaajumasut tamarmik ajornartorsiutinik nalaataqartussaapput. (Mark 10:29, 30) Pissutsit aaqqissuussaanerata naangajalernerani suli annerusumik misilinneqarnissarput ilimanarpoq. Qanoq ikioqatigiissinnaavugut? Loti, Jobi No’omilu pillugit oqaluttuat qanoq ilinniarfigisinnaanerlugit sammeriartigu. Taava ajornartorsiutit qatanngutitta nalaattagaasa ilaat eqqartussavavut qanorlu ikiorsinnaanerlugit paasillugu.
KAMAGITTARTUUGIT
3. Petrusip allagaasa aappaat 2:7, 8-milu ersersinneqartutut Loti qanoq aalajangiinerluppa, qanorlu kinguneqartumik?
3 Loti Sodomamut ingasattumik inuunerluttoqarfiusumut nuukkami aalajangiinerluppoq. (2 Petrusi 2:7, 8 atuakkit). Nuna najugaqarfigisaa naggorillunilu pigissaarfiuvoq, Lotilli Sodomamut nuunnini akisunaarpaa. (1 Mos 13:8-13; 14:12) Nuliata illoqarfik taassumanilu najugaqartut ilaat ima nuannarilertigigunarpai allaat Jehovamut naalanngilluni. Guuti nunami innermik ikuallassaammillu siallertitsimmat inuunini annaavaa. Aamma Lotip panii marluk eqqarsaatigikkit. Angutinik Sodomami toqutaasunik aappassiaqaraluarput. Lotip angerlarsimaffini pigisanilu tamaasa annaavai, nuliamili toqukkut annaanera alianarnerpaavoq. (1 Mos 19:12-14, 17, 26) Piffissami erloqinartorsiorfiusumi tamatumani Jehovap Loti kamagittarfigiunnaarpaa? Naamik.
4. Jehovap Loti qanoq kamagittarfigaa? (Saqqaani assiliaq takuuk).
4 Loti Sodomami najugaqarniarluni aalajangeraluartoq Jehovap misiginneqataalluni inngilit aallartippai taanna ilaqutaalu annaakkumallugit. Inngililli Sodomamit ingerlaannaq qimaaqqusinerat maleruarnagu Loti ‘piumaataalerpoq’. Ilaqutaalu illoqarfimmit qimaaniassagamik inngilinit tasissiunneqarput. (1 Mos 19:15, 16) Taava Loti qaqqanukaqquaat. Jehovali naalannagu aperaa illoqarfimmut ungasinngitsumut qimaasinnaanerluni. (1 Mos 19:17-20) Jehovap kamagittarluni Loti tusarnaarpaa illoqarfimmukarnissaalu akueralugu. Kingornali Lotip illoqarfimmiinnini siooragilerpaa qaqqanullu, Jehovap aallaqqaammut orneqqusaanut, nuulluni. (1 Mos 19:30) Jehovap kamagittarnera tupinnangaarami, ilaa? Qanoq ilaarsinnaavarput?
5-6. Guutimik ilaarsinitsinni Thessalonikamiunut allakkat siulliit 5:14 qanoq maleruarsinnaavarput?
5 Lotip pisimaneratut anersaakkut qatannguterput aalajangiinerlunnini pissutigalugu ajornartorsiungaalersinnaavoq. Taamaattoqarpat qanoq qisuariassaagut? Imaassinnaavoq oqarusuttugut siaruartikkani katersuinnarai. (Gal 6:7) Tamanna ilumooraluartoq pitsaanerusumik qisuariarsinnaavugut. Jehovap Lotimik ikiuinera ilaarsinnaavarput. Qanoq?
6 Jehovap Loti mianersoqquinnarniarnagu Sodomamili ajunaarnersuarmit aniguisinnissaanut ikiorniarlugu inngilit aallartippai. Assingusumik qatannguterput ajornartorsiutigilersinnaasaminik iliuuseqarnera pillugu mianersoqqusariaqarsinnaavarput. Aamma imaassinnaavoq ikiorsinnaagipput. Biibili najoqqutaralugu siunnersuutit ingerlaannaq maleruanngikkaluarpagilluunniit kamagittarfigisariaqarparput. Inngilit marluk ilaakkit. Qatannguterput ilagisartagariunnaarnagu oqaatsitsigut iliuutsitsigullu ikiorniartuartariaqarparput. (1 Joh 3:18) Tasissiutissavarpullusooq siunnersuutillu pitsaasut maleruarnissaanut ikiorlugu. – 1 Thessalonikamiut 5:14 atuaruk.
7. Jehovap Lotimut isiginnittaasia qanoq ilaarsinnaavarput?
7 Lotip kukkussutai Jehovap isiginiarnerusinnaagaluarpai. Taamaaliornanili kingusinnerusukkut apustili Petrusi isumassarsisillugu allatsippaa Loti angutaasoq naapertuilluartoq. Kukkussutitsinnik Jehovap isumakkeerfiginnittarnera nuanningaarami! (Tuss 130:3) Jehovap Lotimut isiginnittaasia ilaarsinnaavarput? Qatanngutitta pissusii nuannersut eqqumaffiginerugutsigit uppeqativut kamagittarfiginerulissavavut. Kingunerisaanik ikiuerusunnitsinnik akuersinissartik ajornannginnerutissavaat.
MISIGINNEQATAASARIT
8. Misiginneqataaneq sunissamut killitsissutigissavarput?
8 Jobi Lotitut naalliulissutigisaminik aalajangiinerlunngilaq. Taamaattorli perlussiungaarpoq. Pigisani inuiaqatigiinnilu inissisimaffini annaavai napparsimalerlunilu. Ajornerusumilli pisoqarpoq, nulianilu qitornatik tamaasa toqukkut annaavaat. Aamma Jobi ikinngutipalaanit unnerluutigineqarpoq.
Ilaatigut suna pissutigalugu tuppallersaasuusaartut taakkua Jobi misigeqatiginngilaat? Qanoq pisoqavinnersoq paasiniannginnamikku kukkusumik naliliillutik Jobi ajortuunerarpaat. Uagut qanoq assingusumik kukkunaveersaarsinnaavugut? Paasisariaqarparput pissutsit inuup atugai tamaasa Jehovap kisimi nalunngikkai. Inuk naalliuuteqartoq tusarnaarluaruk. Oqaasii tusaaginnarnagit anniaatai misiginiarsarikkit. Aatsaat taamaaliornikkut qatanngutinnut misiginneqataasinnaavutit.9. Misiginneqataagutta sunavianngilagut, aamma sooq?
9 Misiginneqataagutta inuup ajornartorsiutai ajortumik oqaluuserinavianngilavut. Oqaatissuaasoq ilagiinnik ineriartortitsinani avissaartuutitsivoq. (Uss 20:19; Rom 14:19) Asannittuunani isumaatsuuvoq, oqaasiilu nanertisimareersumut anniaataangaarsinnaapput. (Uss 12:18; Ef 4:31, 32) Pitsaaneruvorli inuup pissusii ajunngitsut isiginiarnerugutsigit misilinneqarneranilu qanoq ikiorsinnaanerlugu eqqarsaatigigutsigu.
10. Jobi 6:2, 3-milu allassimasut qanoq ilinniarfigaavut?
10 Jobi 6:2, 3 atuakkit. Ilaannikkut Jobi ‘isumaatsutut oqaluttarpoq’. Kingusinnerusukkulli oqaaserisimasami ilaat eqqunngitsuunerat nassuerutigaa. (Job 42:6) Aamma nalitsinni erloqinartorsiortoq kingusinnerusukkut peqqissimissutigisaminik isumaatsutut oqaluttoorsinnaavoq. Qanoq qisuariassaagut? Isornartorsiuinata misiginneqataasariaqarpugut. Eqqaamajuk Jehovap ajornartorsiuteqarnissarput nanertisimanissarpullu siunertarinngikkaa. Taamaammat paasinarpoq Jehovamut kiffaasoq aalajaatsoq nanertisimanermini isumaatsutut oqaluttoorsinnaasoq. Allaat Jehova pillugu uagulluunniit pilluta eqqunngitsumik oqaaseqaraluarpat kamaatissanngilarput oqaasiilu pillugit eqqartuunnagu. – Uss 19:11.
11. Utoqqaanertat siunnersuigaangata Elihu qanoq ilaarsinnaavaat?
11 Inuup erloqinartumik ajornartorsiortup ilaannikkut siunnersorneqarnissani imaluunniit perorsaatissinneqarnissani pisariaqartittarpaa. (Gal 6:1) Unamminiarnartoq tamanna utoqqaanertat qanoq iliuuseqarfigisinnaavaat? Elihu, misiginneqataangaarluni Jobimik tusarnaartoq, ilaartariaqarpaat. (Job 33:6, 7) Jobip eqqarsartaasia aatsaat paasereeramiuk Elihu siunnersuivoq. Utoqqaanertat Elihumik ilaarsisut tusarnaarluassapput pissutsillu ajornartorsiortup atugai paasiniarluarlugit. Taava siunnersuilerunik tusarnaartimi uummataata killinnissaa ilimanarnerussaaq.
TUPPALLERSAASARIT
12. Uimi ernermilu marluk toqunerat No’omimut qanoq sunniuteqarpa?
12 No’omi Jehovamik ilumoorfiginnittuullunilu asannittuuvoq. Uimili ernerisalu marluk toqunerisa kingorna No’omimik taaneqarusukkunnaarluni “Mara”-mik, “narrutsassimasoq”-mik isumaqartumik, taaneqarusuttalerpoq. (Ruth 1:3, 5, 20, quppernerup ataani ilanngussaq, 21) Misilinneqarnerani ukuaata Ruthip najortuarpaa. No’omip pisariaqartitaanik ikiuinnarnagu Ruthip tuppallersarpaa. Qamannga pisumik asanninnini tapersersuininilu No’omimut oqaatsimigut ersersippaa. – Ruth 1:16, 17.
13. Aapparminik toqukkut annaasaqartup annertoqqusersorneqarnissani sooq pisariaqartippaa?
13 Anersaakkut qatanngutitta aapparminik toqukkut annaasaqaruni uatsinnik annertoqqusersorneqarnissani pisariaqartissavaa. Aappariit orpinnut marlunnut sanileriillutik naajartorsimasunut assersuunneqarsinnaapput. Ukiut ingerlanerini orpiit sorlaat ilaguttarput. Orpiup aappaa sorlai ilanngullugit nusunneqarlunilu asiuppat aappaa sunnerneqangaarsinnaavoq. Taamatuttaaq kinaluunniit aapparminik toqukkut annaasaqartoq misigissutsimigut sivisuumik sunnerneqarsinnaavoq. Paula, * uiminik annaasaqariasaartoq, ima oqarpoq: “Inuunera allanngorluinnarpoq soriarsinnaanngitsutullu misigalunga. Ikinngutiginerpaasara annaavara. Sunaluunniit pillugu uiga oqaluttuuttarpara. Nuannaaraangama nuannaaqatigisarpaanga erloqinartorsiorninnilu annertoqqusersortarlunga. Ajornartorsiorninni qiaffigisinnaajuarpara. Affaannaasutut misigeqaanga.”
14-15. Aapparminik annaasaqarsimasoq qanoq tuppallersarsinnaavarput?
14 Aapparminik annaasaqarsimasoq qanoq tuppallersarsinnaavarput? Iliuuserisassarput siulleq tassaavoq oqaloqatiginissaa naak qanoq oqassanerluta iliuuseqassanerlutaluunniit peqqusiileqilissutigisinnaagaluarlugu. Paula, eqqaaneqareersoq, ima oqarpoq: “Nalunngilara toqusoqarsimatillugu akunnattuungasoqartartoq. Inuit kukkusumik oqassasoralutik ernumasarput. Oqaaseqanngippatali annernarnerungaassaaq.” Aliasuttup ilimaginavianngilaa isumatusaarluta oqassasugut. Paula ima nangippoq: “Ikinngutikka misiginneqataallutik oqaraangata qujamasuutigisarpara.”
15 William, ukiualuit matuma siorna nuliaminik annaasaqartoq, oqaluttuarpoq: “Allat nuliara ilagalugu qanoq misigisaqarsimanerminnik oqaluttuaraangata nuannaartarpunga, qulakkeertarakku asaneqarlunilu ataqqineqartoq. Taamatut tapersersorneqarnera iluaqutigeqaara tuppallersaatigingaarlugulu,
nuliarami inuuninni pingaaruteqarsimaqimmat.” Uillarneq Biancamik atilik ima nassuiaavoq: “Qinoqatigineqartarnera allassimaffialunnguanillu atuffanneqartarnera tuppallersaatigisarpara. Allat uiga pillugu misigisalikkersaarnerat oqaluttuarninnilu tusarnaartarnerat iluaqutaasarpoq.”16. (a) Aapparminik annaasaqarsimasup suna pisariaqartippaa? (b) Jaaku 1:27 naapertorlugu qanoq akisussaaffeqarpugut?
16 Soorlu Ruthip No’omi uillarninngorsimasoq najortuaraa uaguttaaq aapparminik annaasaqarsimasoq tapersersortuartariaqarparput. Paula, siusinnerusukkut eqqaaneqartoq, ima oqarpoq: “Uima toqunerata kinguninngua tapersersorneqangaarpunga. Piffissalli ingerlanerani allat inuunerat nalinginnaasumik ingerlaqqilerpoq. Uangali inuunera allanngorujussuarpoq. Toqukkut annaasaqarnerup kingorna qaammatialuit, allaammi ukiualuit, aliasuttup tapersersorneqarnissani pisariaqartikkaa allat paasigaangamikku iluaqutaangaartarpoq.” Soorunalimi tamatta assigiinngilagut. Ilaasa pissutsit atukkatik nutaat sungiukkiartupallassinnaasarpaat. Allalli aappartillu iliuuserisartagaraluatik iliuuserigaangamikkit annaasaqarsimanertik eqqaasarpaat. Aliasunneq inummiit inummut assigiinneq ajorpoq. Eqqaamassavarput Jehovap toqukkut annaasaqarsimasunik isumaginninnissatsinnik immikkut pisinnaatitaaffilerlutalu akisussaaffileraatigut. – Jaaku 1:27 atuaruk.
17. Sooq aapparminit qimataasut uatsinnik tapersersorneqartariaqarpat?
17 Ilaat aapparminnit qimanneqarnertik erloqissutigingaartarpaat.
Joyce, uiminit arnaq alla pillugu qimanneqartoq, ima oqarpoq: “Avinnerput misigissutsikkut anniaataangaarmat misigivunga uiga toqukkut annaasuugukku annernannginnerussasoq. Ajunaarluni napparsimalluniluunniit toqusimagaluaruni tamanna nammineq aalajangersimanavianngikkaluarpaa. Uimali aalajangerpaa qimanniarlunga. Nikanarsagaallunga narrunarsagaasutut misigivunga.”18. Aappaqarunnaarsimasut ikiorumallugit qanoq iliorsinnaavugut?
18 Aappaqarunnaarsimasunut inussiarnersumik iliuuseqaraangatta asallugit ersersittarparput. Pitsaasunik ikinnguteqarnissartik aatsaat taama pisariaqartitsigaat. (Uss 17:17) Ikinngutaanerit qanoq takutissinnaaviuk? Neriartoqqusinnaavatit. Aamma nuannersunik sammisaqaqatiserisinnaavatit oqaluusseqatiseralugilluunniit. Periarfissaq alla tassaavoq ilaqutariittut atuaqqissaaqatigiinnissinnut qaaqqullattaanissaat. Taamaalioruit Jehova nuannaartissavat, taassumami “qanippai sequmissimasumik uummatillit”, aamma ‘uillarnernik sernissuisuuvoq’. – Tuss 34:19; 68:6.
19. Petrusip allagai siulliit 3:8 eqqarsaatigalugu suna aalajangiusimalluinnarpiuk?
19 Ungasinngitsukkut Guutip naalagaaffia nunarsuarmi naalakkersuilerpat “erloqinerit puigugaassapput”. ‘Pereersut eqqaamaneerunnissaat eqqaaqqinneqannginnissaallu’ erinigingaarparput. (Es 65:16, 17) Tamannali pitinnagu tapersersoqatigiikkisa, aamma oqaatsitsigut iliuutsitsigullu anersaakkut ilaquttavut tamaasa asallugit ersersitsigu. – 1 Petrusi 3:8 atuaruk.
ERINARSUUT 111 Nuannaarnermut pissutaasut
^ imm. 5 Loti, Jobi No’omilu Jehovamut kiffartornerminni aalajaakkaluarlutik inuunerminni erloqinartunik nalaataqartarput. Taakku qanoq ilinniarfigisinnaanerlugit allaaserisami sammissavarput. Aamma kamagittartuunissatta, misiginneqataasarnissatta qatanngutitsinnillu ajornartorsiortunik tuppallersaasarnissatta pingaaruteqarnerat sammineqassaaq.
^ imm. 13 Allaaserisami atit allanngortitaapput.
^ imm. 57 ASSIMI MALUGISASSAT: Qatanngutip angutip kamattup ‘isumaatsutut oqalunnerani’ utoqqaanertaq kamagittarluni tusarnaartoq. Kingorna eqqissereermat utoqqaanertap inussiarnersumik siunnersorpaa.
^ imm. 59 ASSIMI MALUGISASSAT: Aappariit inuusuttut qatanngut angut nuliaminik ungasinngitsukkut toqusoorsimasoq ilagigaat. Nuliarigalua pillugu eqqaamasatik nuannersut eqqartorpaat.