1. Re ka ekiša bjang Tatago rena yo lerato e lego Jehofa?

JEHOFA o re rata kudu. (Joh. 3:16) Ka gona re nyaka go mo ekiša. Re swanetše go dira sohle seo re ka se kgonago gore re ‘kwelane bohloko, re bontšhane lerato la borwarre, re šokele’ bohle, kudukudu bao ba “tswalanego le rena tumelong.” (1 Pet. 3:8; Bagal. 6:10) Ge bana babo rena le dikgaetšedi ba welwa ke mathata, re swanetše go ba thuša.

2. Re tlo ithuta’ng sehlogong se?

² Batho ka moka bao ba nyakago go ba ditho tša lapa la Jehofa le bao e šetšego e le ditho tša lona, ba tlo welwa ke mathata. (Mar. 10:29, 30) Ga go pelaelo gore re tlo welwa ke mathata a mantši ge bofelo bo dutše bo batamela. Re ka thušana bjang? A re boneng seo re ka ithutago sona mohlaleng wa Lota, Jobo le Naomi. Le gona re tlo boledišana ka a mangwe a mathata ao bana babo rena le dikgaetšedi ba lebeletšanago le ona lehono, gomme ra bona kamoo re ka ba thušago ka gona.

3. Go ya ka Petro wa Bobedi 2:7, 8, Lota o ile a dira phetho efe ya bošilo, gona mafelelo e bile afe?

³ Lota o ile a dira phetho ya bošilo ge a be a kgetha go dula gare ga batho bao ba bego ba itshwere gampe ba Sodoma. (Bala 2 Petro 2:7, 8.) Motse wa Sodoma o be o humile kudu, eupša Lota o ile a welwa ke mathata a magolo ka baka la go hudugela moo. (Gen. 13:8-13; 14:12) Go bonagala mosadi wa gagwe a ile a rata motse woo kudu le ba bangwe ba batho ba moo, moo a ilego a feleletša a se sa kwa Jehofa. O ile a se phologe  ge Modimo a be a neša mollo le sebabole motseng woo. Le gona nagana ka barwedi ba babedi ba Lota. Ba be ba beeleditšwe ke banna bao ba ilego ba hwela Sodoma ge Modimo a be a fediša motse woo. Lota o ile a loba ntlo ya gagwe, dithoto tša gagwe, gomme se bohloko le go feta, o ile a loba mosadi wa gagwe. (Gen. 19:12-14, 17, 26) Na Jehofa o ile a felela Lota pelo nakong yeo ya ge a be a le mathateng? Aowa!

4. Jehofa o ile a dira’ng go bontšha gore ga a felele Lota pelo? (Bona seswantšho sa letlakala la ka ntle.)

⁴ Gaešita le ge Lota a ile a ikgethela go yo dula Sodoma, Jehofa o ile a mo kwela bohloko gomme a romela barongwa gore ba hlakodiše yena le lapa la gagwe. Eupša go e na le gore Lota a kwe taelo ya barongwa ya gore a tšwe Sodoma gateetee, o ile a no “dikadika.” Barongwa ba ile ba swanelwa ke go swara yena le ba lapa la gagwe ka diatla gore ba ba ntšhe motseng woo. (Gen. 19:15, 16) Ke moka ba mmotša gore a tšhabele dithabeng. Eupša go e na le gore Lota a kwe taelo yeo ya Jehofa, o ile a kgopela gore a tšhabele motseng wa kgauswi. (Gen. 19:17-20) Jehofa o ile a se felele Lota pelo, o ile a mo theetša gomme a mo dumelela gore a tšhabele motseng woo. Ka morago Lota o ile a thoma go boifa gomme a tšhabela dithabeng, e lego yona tikologo yeo Jehofa a bego a itše a tšhabele go yona go tloga mathomong. (Gen. 19:30) Ruri Jehofa o ile a bontšha go se fele pelo. Re ka mo ekiša bjang?

5-6. Re ka diriša bjang Bathesalonika ba Pele 5:14 ge re dutše re ekiša Modimo?

⁵ Go swana le Lota, yo mongwe wa bana babo rena a ka dira phetho ya bošilo gomme a ipakela mathata a magolo. O tla dira eng ge seo se ka direga? Mohlomongwe o ka lekega go bolela gore o buna seo a se bjetšego. Ee, o tla be o rereša. (Bagal. 6:7) Eupša go e na le gore o bolele mantšu ao, o ka mo thuša. Re ka ekiša tsela yeo Jehofa a ilego a thuša Lota ka yona. Bjang?

⁶ Jehofa ga se a romela barongwa feela gore ba yo lemoša Lota, eupša o ile a ba laela le gore ba mo thuše go tšhabela kotsi yeo e bego e tlo wela Sodoma. Ka mo go swanago, le rena re ka swanelwa ke go lemoša ngwanabo rena ge e ba re bona eka o tlo tsena mathateng. E bile re ka ba ra swanelwa ke go mo thuša. Gaešita le ge a ka se diriše kapejana keletšo ya Beibele yeo re mo neilego yona, ga se ra swanela go mo felela pelo. Swana le barongwa bale ba babedi. Go e na le gore o ngale ngwaneno, o swanetše go nyaka ditsela tšeo o ka mo thušago ka tšona. (Joh. 3:18) O ka ba wa swanelwa ke go dira se sengwe gore o mo thuše go diriša keletšo yeo a e neilwego.—Bala 1 Bathesalonika 5:14.

7. Re ka ekiša bjang tsela yeo Jehofa a ilego a swara Lota ka yona?

⁷ Jehofa ga se a ka a šetša mafokodi a Lota. Go e na le moo, ka morago o ile a diriša moapostola Petro go mo hlalosa e le monna wa go loka. Ruri go a thabiša go tseba gore Jehofa ga a šetše mafokodi a rena! (Ps. 130:3) Na re ka kgona go ekiša tsela yeo Jehofa a ilego a swara Lota ka yona? Ee re ka kgona. Ge e ba re šetša dika tše dibotse tša bana babo rena le dikgaetšedi, re ka se ba felele pelo. Le gona go tla ba bonolo gore le bona ba amogele thušo yeo re ba neago yona.

8. Go kwela ba bangwe bohloko go tla re tutueletša go dira’ng?

⁸ Go fapana le Lota, Jobo ga se a welwa ke mathata ka ge a dirile phetho ya bošilo. Eupša o ile a lahlegelwa ke dithoto tša gagwe, a se sa ba le seriti setšhabeng e bile a babja o šoro. Se bohloko le go feta, yena le mosadi wa gagwe  ba ile ba hwelwa ke bana ba bona ka moka. Le gona bagwera ba Jobo ba bararo ba ile ba mo thomeletša ka maaka. Ke ka baka la’ng bagwera bao ba gagwe ba ile ba se mo kwele bohloko? Ka gobane ga se ba ka leka go kwešiša seo se bego se diragalela Jobo. Ka go re’ alo ba ile ba dira phetho yeo e sego yona gomme ba kitimela go mo ahlola. Re ka dira’ng gore re se swane le bona? Gopola gore Jehofa ke yena feela a tsebago ditaba ka botlalo. Theetša ka kelohloko seo motho yo a wetšwego ke mathata a go botšago sona. O se ke wa no kwa seo a se bolelago, eupša o leke go kwešiša bohloko bjo a bo kwago. Ge o ka dira seo, o tla kgona go kwela ngwaneno bohloko e le ka kgonthe.

9. Go ba le kwelobohloko go tla re thuša gore re se ke ra dira’ng, gona ka baka la’ng?

⁹ Go ba le kwelobohloko go tla re thuša gore re se ke ra tšama re bolela ka mathata a bana babo rena. Motho yo a nago le lesebo ga a age phuthego, eupša o a e aroganya. (Die. 20:19; Baroma 14:19) Ga a na botho e bile ga a naganele batho ba bangwe, le gona mantšu a gagwe a ka hlaba motho yo e lego gore o šetše a kwele bohloko. (Die. 12:18; Baef. 4:31, 32) Ruri go kaone kudu gore re lebelele dika tše dibotse tša motho gomme re nagane kamoo re ka mo thušago go lebeletšana le mathata a gagwe!

10. Mantšu ao a lego go Jobo 6:2, 3 a re ruta’ng?

¹⁰ Bala Jobo 6:2, 3. Ka dinako tše dingwe Jobo o be a fela a bolela ‘mantšu a bošilo.’ Eupša ka morago o ile a itshola. (Jobo 42:6) Go swana le Jobo, lehono motho yo a gateletšegilego a ka bolela mantšu a bošilo gomme ka morago a itshola. Re swanetše go arabela bjang? Go e na le gore re sole motho yoo, re swanetše go mo kwela bohloko. Gopola gore Jehofa o be a se a rera gore re be le mathata ao a re welago lehono. Ka gona re swanetše go  kwešiša ge yo mongwe wa bana babo rena a bolela mantšu a bošilo ge a gateletšegile. Le ge a ka bolela dilo tšeo e sego nnete ka Jehofa goba ka rena, ga se ra swanela go kitimela go mo galefela goba go mo ahlola.—Die. 19:11.

11. Bagolo ba ka ekiša Elihu bjang ge ba nea keletšo?

¹¹ Ka dinako tše dingwe motho yo a gateletšegilego a ka swanelwa ke go newa keletšo goba tayo. (Bagal. 6:1) Bagolo ba ka mo thuša bjang? Ba swanetše go ekiša Elihu yoo a ilego a theetša Jobo ka go mo kwela bohloko. (Jobo 33:6, 7) Elihu o ile a eletša Jobo ka morago ga gore a kwešiše mabaka a gagwe. Bagolo bao ba latelago mohlala wa Elihu, ba swanetše go theetša motho ka kelohloko gomme ba leke go mo kwešiša. Ke moka ge ba mo nea keletšo, ba tla kgona go fihlelela pelo ya gagwe.

12. Naomi o ile a kgongwa bjang ke lehu la monna wa gagwe le barwa ba gagwe ba babedi?

¹² Naomi e be e le mosadi yo a botegago yo a bego a rata Jehofa. Eupša ka morago ga gore a hwelwe ke monna wa gagwe le barwa ba gagwe ba babedi, o ile a nyaka go fetoša leina la gagwe gore e se sa ba Naomi eupša e be “Mara,” yeo e rago gore “Kgalako.” (Ruthe 1:3, 5, 20, mongwalo wa tlase, 21) Ngwetši ya gagwe e lego Ruthe o ile a mo thekga mathateng a gagwe ka moka. Ruthe o ile a thuša Naomi le go mo kgothatša. Ruthe o ile a kgothatša Naomi ka mantšu a bonolo eupša e le ao a tšwago pelong gomme a bontšha ka ditiro gore o a mo rata.—Ruthe 1:16, 17.

13. Ke ka baka la’ng motho yo a hlokofaletšwego ke molekane a hloka thušo ya rena?

¹³ Ge ngwanabo rena goba kgaetšedi a hlokofaletšwe ke molekane, o hloka thušo ya rena. Banyalani ba ka swantšhwa le mehlare e mebedi yeo e bjetšwego kgauswi le kgauswi. Ge nako e dutše e eya, medu ya mehlare yeo e a swaragana. Ge mohlare o mongwe o tumolwa gomme o ehwa, mohlare o mongwe o a omelela. Ka mo go swanago ge motho a hlokofaletšwe ke molekane wa gagwe, a ka tšea nako e telele a ekwa bohloko bjo bo tseneletšego. Paula * yoo monna wa gagwe a ilego a hlokofala go se gwa letelwa o re: “Bophelo bja ka bo ile bja hlakahlakana gomme ka ikwa ke sa kgone go dira selo. Ke be ke lahlegetšwe ke mogwera wa ka yo mogolo. Ke be ke boledišana le monna wa ka ka selo se sengwe le se sengwe. O be a thaba le nna e bile a nthekga ge ke le mathateng. Ke be ke llela go yena. Ke be ke ikwa eka bophelo bja ka bo eme tsii.”

14-15. Re ka homotša bjang motho yo a hlokofaletšwego ke molekane wa gagwe?

¹⁴ Re ka homotša bjang motho yo a hlokofaletšwego ke molekane wa gagwe? Selo sa bohlokwa seo re ka se dirago ke go boledišana le yena le ge re sa tsebe gore re ka reng. Paula yo re boletšego ka yena ka mo godimo o re: “Ke a kwešiša gore lehu le dira gore batho ba se tsebe gore ba bolele eng. Ba ka tshwenyega ka gore ba ka bolela dilo tšeo di ka kgopišago ba bangwe. Eupša go kaone go kwa selo seo se ka go kgopišago go e na le go se kwe selo.” Motho yo a hlokofaletšwego ga se a letela gore re mmotše selo seo a sa kago a se kwa. Paula o re: “Ke be ke leboga kudu ge bana bešo le dikgaetšedi ba no re, ‘Le rena re kwele bohloko.’”

¹⁵ William, yoo mosadi wa gagwe a hlokofetšego mengwageng e fetilego o re: “Ke leboga kudu ge batho ba bolela dilo tše dibotse ka mosadi wa ka, ka gobane seo se nkgonthišetša gore ba be ba mo rata le go mo hlompha. Thekgo yeo ke ilego ka e hwetša e ile ya nthuša kudu. Ke ile ka ikwa ke homotšegile ka gobane ke be ke rata mosadi wa ka kudu e bile e le  karolo ya bophelo bja ka.” Kgaetšedi yo a bitšwago Bianca yoo a hlokofaletšwego ke monna o re: “Ke a homotšega ge ba bangwe ba rapela le nna goba ba mpalela lengwalo goba a mabedi. Le gona ke ikwa ke le kaone ge ba bolela ka monna wa ka le ge ba ntheetša ge ke bolela ka yena.

16. (a) Re ka thuša bjang motho yo a hlokofaletšwego ke molekane? (b) Go ya ka Jakobo 1:27, re na le boikarabelo bofe?

¹⁶ Go etša ge Ruthe a ile a kgomarela Naomi wa mohlologadi, le rena re swanetše go tšwela pele re thekga bao ba hlokofaletšwego. Paula yo re boletšego ka yena pejana o re: “Gateetee ka morago ga gore monna wa ka a hlokofale ke ile ka hwetša thekgo e kgolo kudu go bana babo rena le dikgaetšedi. Eupša ge nako e dutše e eya, batho ba ile ba thoma go swarega ka mešomo ya bona ya letšatši le letšatši. Lega go le bjalo, nna bophelo bja ka bo be bo fetogile kudu. Go hola kudu ge batho ba lemoga gore motho yo a hlokofaletšwego o hloka thušo gaešita le ka morago ga dikgwedi, goba mengwaga.” Ke therešo gore batho ga ba swane. Motho yo mongwe a ka tlwaelana le maemo a gagwe kapejana. Mola yo mongwe a ka thatafalelwa ke go dira selo se sengwe le se sengwe seo a bego a se dira le molekane wa gagwe. Tsela yeo batho ba kwago bohloko ka yona ga e swane. Anke re duleng re gopola gore Jehofa o re neile tokelo le boikarabelo bja go hlokomela batho bao ba hlokofaletšwego ke balekane ba bona.—Bala Jakobo 1:27.

17. Ke ka baka la’ng re swanetše go thekga batho bao balekane ba bona ba ba tlogetšego?

¹⁷ Batho ba bangwe ba lebeletšana le kgateletšego  e kgolo kudu ge balekane ba bona ba ba tlogela. Joyce yo monna wa gagwe a ilego a mo tlogela gomme a yo dula le mosadi yo mongwe o re: “Ke ile ka kwa bohloko kudu ka morago ga gore monna wa ka a ntlhale go feta ge nkabe a be a hlokofetše. Ge nkabe a be a hlokofetše kotsing e itšego goba a bolailwe ke bolwetši, o be a tla be a sa ikgethela go hwa. Eupša mo lekgeng le monna wa ka o ikgethetše go ntlogela. Ke ile ka ikwa ke nyatšega e bile ke se na seriti.”

18. Re ka dira’ng go thuša bao ba se sa nago balekane?

¹⁸ Ge re direla batho bao ba se sa nago balekane dilo tše dibotse, re bontšha gore re a ba rata. Ka ge ba se sa na balekane, ba hloka bagwera ba babotse. (Die. 17:17) O ka bontšha bjang gore o mogwera wa bona? O ka ba laletša gore ba tlo ja le wena. Goba o ka fetša nako le bona le ithabiša, goba le le tšhemong. Le gona ka dinako tše dingwe o ka ba laletša gore ba tle ba be le wena borapeding bja lapa. Ge o ka dira bjalo, o tla thabiša Jehofa ka gobane o “kgauswi le ba dipelo tše di robegilego” e bile ke “moahloledi wa bahlologadi.”—Ps. 34:18; 68:5.

19. Go ya ka Petro wa Pele 3:8, o ikemišeditše go dira’ng?

¹⁹ Kgauswinyane ge Mmušo wa Modimo o tla be o buša mo lefaseng, ‘mathata ka moka a tla be a lebetšwe.’ Re fela pelo ya go tlo bona nako ya ge “dilo tša pele di ka se sa gopolwa, e bile di ka se sa rotoga pelong.” (Jes. 65:16, 17) Re sa letile gore nako yeo e fihle, anke re tšweleng pele re thekgana le go bontšha ka mantšu le ka ditiro gore re rata bana babo rena le dikgaetšedi.—Bala 1 Petro 3:8.