1. Нӕ бон куыд у нӕ уарзӕгой Фыд Йегъовӕйы фӕзмын?

ЙЕГЪОВӔ нӕ тынг уарзы (Иоан. 3:16). Ӕмӕ мах дӕр фӕнды нӕ уарзӕгой Фыды фӕзмын. Уымӕ гӕсгӕ, апостол Петр куыд загъта, афтӕмӕй нӕм хъуамӕ иннӕты рыст хъара, ӕфсымӕрты уарзӕм ӕмӕ кӕрӕдзийы зын ӕмбарӕм. Апостол Павел дӕр загъта, хорздзинад алкӕмӕн дӕр кӕй хъуамӕ аразӕм, «уӕлдайдӕр та, уырнындзинады фӕрцы иу бинонтӕ кӕимӕ стӕм, уыдонӕн» (1 Пет. 3:8; Гал. 6:10). Уӕдӕ нӕ хотӕ ӕмӕ не ’фсымӕртӕ зындзинӕдтӕ куы февзарынц, уӕд нӕ фӕфӕнды, цӕмӕй-иу сын баххуыс кӕнӕм.

2. Ацы статьяйы дзырд цӕуыл цӕудзӕн?

² Йегъовӕйӕн лӕггад кӕнын кӕй фӕнды, уыдон се ’ппӕт дӕр зындзинӕдтыл ӕмбӕлдзысты (Мар. 10:29, 30). Ацы дунейы кӕрон цас ӕввахсдӕр кӕны, уыйас уыцы зындзинӕдтӕ, ӕвӕццӕгӕн, фылдӕр кӕндзысты. Нӕ бон куыд у кӕрӕдзийӕн ӕххуыс кӕнын? Цӕй ӕмӕ базонӕм, Лот, Иов ӕмӕ Ноемины хабӕрттӕй нӕ бон зондӕн райсын цы у, уый. Стӕй ма аныхас кӕнӕм, абон нӕ хотӕ ӕмӕ не ’фсымӕртӕ цавӕр зындзинӕдтыл ӕмбӕлынц ӕмӕ сын нӕ бон баххуыс кӕнын куыд у, ууыл.

3. 2 Петры 2:7, 8 стихтӕй куыд зыны, афтӕмӕй Лот цавӕр ӕвзӕр уынаффӕ рахаста ӕмӕ уый цӕмӕ ӕркодта?

³ Лот Содомы хӕлд адӕмы ’хсӕн цӕрынвӕнд кӕй скодта, уый хорз уынаффӕ нӕ уыди. (Бакӕс 2 Петры 2:7, 8.) Уыцы зӕхх кӕд хъӕздыг уыд, уӕддӕр Лотӕн, уым кӕй ӕрцард, уый тынг зынаргъ слӕууыд (Райд. 13:8–13; 14:12). Йӕ усы зӕрдӕйӕн уыцы горӕт кӕнӕ йӕ адӕмӕй чидӕртӕ, ӕвӕццӕгӕн, афтӕ адджын систы, ӕмӕ, Йегъовӕ цы загъта, уымӕ нӕ байхъуыста. Ӕмӕ  Хуыцау уыцы зӕххыл зынг ӕмӕ сондон куы ныккалдта, уӕд йӕ мӕлӕт уым ссардта. Ахъуыды-ма кӕнӕм Лоты дыууӕ чызгыл дӕр. Кӕмӕ хъуамӕ смой кодтаиккой, уыдон дӕр Содомы амардысты. Лот баззад ӕнӕ хӕдзарӕй ӕмӕ ӕнӕ исбонӕй. Ӕппӕты стырдӕр бӕллӕх та уыд, йӕ ус кӕй амард, уый (Райд. 19:12–14, 17, 26). Уыцы бӕллӕхты рӕстӕг Йегъовӕ Лотмӕ цавӕр миниуӕг равдыста?

4. Йегъовӕ Лотмӕ фӕразондзинад куыд равдыста? (Кӕс нывмӕ ӕддаг цъарыл.)

⁴ Кӕд Лот Содомы йӕхи фӕндмӕ гӕсгӕ ӕрцард, уӕддӕр ын Йегъовӕ фӕтӕригъӕд кодта ӕмӕ йӕм зӕдты рарвыста, цӕмӕй йӕ йӕ бинонтимӕ фервӕзын кодтаиккой. Фӕлӕ йын зӕдтӕ куы загътой, зӕгъгӕ, рӕвдздӕр Содомӕй ацу, уӕд «нӕ тагъд кодта». Уӕд зӕдтӕн ӕндӕр гӕнӕн нал уыд, ӕмӕ Лотӕн, йӕ усӕн, стӕй йӕ дыууӕ чызгӕн сӕ къухтыл фӕхӕцыдысты ӕмӕ сӕ горӕтӕй ракодтой (Райд. 19:15, 16). Уый фӕстӕ зӕдтӕ Лотӕн загътой, цӕмӕй хӕхтӕм алыгъдаид. Фӕлӕ уырдӕм алидзыны бӕсты Йегъовӕйӕн загъта, цӕмӕй йӕ, Содоммӕ хӕстӕг цы гыццыл горӕт уыд, уырдӕм алидзын бауагътаид (Райд. 19:17–20). Йегъовӕ фӕразондзинад равдыста: сабырӕй йӕм байхъуыста ӕмӕ йын йӕ курдиат сӕххӕст кодта. Фӕстӕдӕр Лот уыцы горӕты цӕрын нал уӕндыд ӕмӕ хӕхтӕм алыгъд – Йегъовӕ йын фыццаг кӕдӕм загъта, уырдӕм (Райд. 19:30). Ӕвӕдза, цӕй диссаджы фӕразондзинад равдыста Йегъовӕ! Махӕн та йӕ нӕ бон куыд у бафӕзмын?

5, 6. Нӕ бон куыд у, 1 Фессалоникӕгтӕм 5:14 стихы цы фыст ис, уымӕ гӕсгӕ архайын ӕмӕ афтӕмӕй Хуыцауы фӕзмын?

⁵ Нӕ чырыстон хотӕ ӕмӕ ’фсымӕртӕй дӕр исчи Лотау, гӕнӕн ис, ӕвзӕр уынаффӕ рахӕсса ӕмӕ йӕхи стыр мӕстыты хай бакӕна. Ахӕм уавӕры-иу куыд хъуамӕ бакӕнӕм? Чи зоны нӕ фӕфӕнды зӕгъын, цы байтыдтай, уый ӕркарстай, зӕгъгӕ. Ӕмӕ, гӕнӕн ис, уый ӕцӕгдӕр афтӕ у (Гал. 6:7). Фӕлӕ хуыздӕр уаид, мах дӕр уыцы хойӕн кӕнӕ ӕфсымӕрӕн, Йегъовӕ Лотӕн куыд баххуыс кодта, афтӕ куы баххуыс кӕниккам.

⁶ Йегъовӕ йӕ зӕдты Лотмӕ ӕрмӕст уый тыххӕй нӕ арвыста, цӕмӕй йын загътаиккой, горӕтӕй ацу, зӕгъгӕ. Арвыста ма сӕ, цӕмӕй, Содомыл цы бӕллӕх ӕруадзынмӕ хъавыд, уымӕй фервӕзынӕн ын баххуыс кодтаиккой. Гӕнӕн ис, мах дӕр не ’фсымӕры бафӕдзӕхсын бахъӕуа, куы йӕ зонӕм, ӕмӕ, цы аразынмӕ хъавы, уый йӕ бӕллӕхмӕ ӕркӕндзӕн, уӕд. Фӕлӕ ма йын уымӕй уӕлдай, чи зоны, нӕ бон уа баххуыс кӕнын дӕр. Библийӕ йын цы уынаффӕ радтой, уымӕй спайда кӕныныл куы нӕ тагъд кӕна, уӕддӕр ӕм хъуамӕ фӕразондзинад ӕвдисӕм. Хъуамӕ уӕм уыцы дыууӕ зӕды хуызӕн – ма-иу ӕй ныууадзӕм ӕмӕ-иу ын ныхасӕй дӕр ӕмӕ хъуыддагӕй дӕр баххуыс кӕнӕм (1 Иоан. 3:18). Чи зоны йын ахӕсгӕ хуызы йӕ къухыл ныххӕцын дӕр бахъӕуа, ома йын бахъӕуа баххуыс кӕнын, цӕмӕй спайда кӕна, цы хорз уынаффӕ йын радтой, уымӕй. (Бакӕс 1 Фессалоникӕгтӕм 5:14.)

7. Йегъовӕ Лотмӕ цы цӕстӕй каст, уымӕй йӕ нӕ бон куыд у бафӕзмын?

⁷ Йегъовӕйӕн йӕ бон уыдаид Лотӕн ӕрмӕст йӕ хъӕндзинӕдтӕм кӕсын. Фӕлӕ Йегъовӕ ахӕм нӕу. Фӕстӕдӕр Хуыцауы фӕндонмӕ гӕсгӕ апостол Петр Лоты схуыдта рӕстгӕнӕг. Цы хорз у, Йегъовӕ нын нӕ рӕдыдтытӕ кӕй хатыр кӕны! (Пс. 130:3). Йегъовӕ Лотмӕ цы цӕстӕй каст, уымӕй йӕ нӕ бон куыд у бафӕзмын? Нӕ хотӕн ӕмӕ не ’фсымӕртӕн сӕ хорз миниуджытӕ куы уынӕм, уӕд семӕ фӕразондӕр уыдзыстӕм. Ӕмӕ-иу нын уӕд уыдон дӕр не ’ххуысыл ӕнцондӕрӕй сразы уыдзысты.

8. Иннӕты зын кӕй ӕмбарӕм, уый цӕмӕй бӕрӕг уыдзӕн?

⁸ Лотӕй уӕлдай Иов ӕвзӕр уынаффӕтӕ нӕ хаста. Фӕлӕ йыл уӕддӕр бирӕ бӕллӕхтӕ  ’рцыд: йӕ мулкӕй ницыуал баззад, адӕмы ’хсӕн ын кад нал уыд ӕмӕ удхайраг низӕй фӕрынчын. Ӕппӕты стырдӕр бӕллӕх та уыд, йӕ сывӕллӕттӕ иууылдӕр кӕй фӕмард сты, уый. Уымӕй уӕлдай ма йын йе ’ртӕ мӕнг хӕлары йӕ бӕллӕхты йӕхи фӕаххосджын кодтой. Цымӕ йын йе ’мбӕлттӕ йӕ зын цӕуылнӕ бамбӕрстой? Уымӕн йӕ аххосӕгтӕй иу уыди, Иов ӕцӕгӕй цы уавӕры уыд, уымӕ уӕлӕнгай цӕстӕй кӕй кастысты, уый. Уымӕ гӕсгӕ раст хатдзӕгтӕ не скодтой ӕмӕ Иовы карз уайдзӕфты бын фӕкодтой. Ахӕм рӕдыдӕй нӕхи цӕй фӕрцы бахиздзыстӕм? Хъуамӕ ӕмбарӕм, адӕймагӕн йӕ уавӕр кӕронмӕ ӕрмӕстдӕр Йегъовӕ кӕй фӕзоны. Бӕллӕх кӕуыл ӕрцыд, уыцы хо кӕнӕ ӕфсымӕр цы фӕдзуры, уымӕ-иу хъуамӕ лӕмбынӕг байхъусӕм ӕмӕ-иу бацархайӕм, цӕмӕй-иу ын йӕ рыст бамбарӕм. Ӕрмӕстдӕр уӕд бауыдзӕн нӕ бон нӕ хойы кӕнӕ не ’фсымӕры зӕрдӕйы рыст нӕ зӕрдӕмӕ айсын.

9. Иннӕты зын куы ’мбарӕм, уӕд нӕхи цӕмӕй хиздзыстӕм?

⁹ Иннӕты зын куы ’мбарӕм, уӕд, цы зындзинӕдтыл сӕмбӕлдысты, уыдӕтты тыххӕй алы мӕнг ныхӕстӕ нӕ кӕндзыстӕм. Иннӕты фыдкой кӕнын чи уарзы, уый ӕмбырд фидар нӕ кӕны, фӕлӕ йӕ дихтӕ кӕны (Ӕмб. 20:19; Ром. 14:19). Ахӕм адӕймаг хӕларзӕрдӕ нӕу, фӕлӕ у ӕнӕрхъуыды, ӕмӕ йӕ ныхӕстӕ, ӕнӕ уымӕй дӕр зӕрдӕрыст чи у, ахӕм адӕймагӕн, гӕнӕн ис, карды цӕфау уой (Ӕмб. 12:18; Еф. 4:31, 32). Цас хуыздӕр у, адӕймагӕн йӕ хорз миниуджытӕ куы уынӕм ӕмӕ йын йӕ зындзинӕдтӕ сфӕразынӕн куыд баххуыс кӕнӕм, ууыл куы хъуыды кӕнӕм!

10. Иовы 6:2, 3 стихты цы фыст ис, уымӕй цӕуыл ахуыр кӕнӕм?

¹⁰ Бакӕс Иов 6:2, 3. Иов-иу «ӕнӕзонд ныхӕстӕ» дӕр скодта. Фӕлӕ уый фӕстӕ загъта, мӕ ныхӕстӕ фӕстӕмӕ исын, зӕгъгӕ (Иов 42:6). Абон дӕр, стыр зындзинӕдтӕ чи ӕвзары,  ахӕм адӕймаг, гӕнӕн ис, Иовау ӕнӕзонд ныхӕстӕ скӕна, ӕмӕ сыл стӕй фӕсмон кӕна. Ахӕм ныхӕстӕ фехъусгӕйӕ-иу куыд хъуамӕ бакӕнӕм? Хъуамӕ-иу ыл фаутӕ ӕвӕрын ма райдайӕм, фӕлӕ-иу ын йӕ зын бамбарыныл бацархайӕм. Рох нӕ ма уӕд, Йегъовӕ нӕ афтӕ кӕй не сфӕлдыста, цӕмӕй зындзинӕдтӕ ’взарӕм ӕмӕ маст кӕнӕм. Уымӕ гӕсгӕ бамбарӕн ис, Хуыцауы иузӕрдион лӕггадгӕнджытӕй исчи истӕуыл тынг куы фӕмаст кӕны, уӕд хатт ӕнӕрхъуыды ныхӕстӕ цӕмӕн фӕкӕны, уый. Кӕд суанг Йегъовӕйы тыххӕй кӕнӕ махӕн нӕхи тыххӕй дӕр цыдӕр раст нӕ загъта, уӕддӕр-иу ӕм хъуамӕ ма рамӕсты уӕм ӕмӕ-иу ын йӕ ныхӕсты тыххӕй уайдзӕфтӕ ма кӕнӕм (Ӕмб. 19:11).

11. Хистӕр нӕлгоймӕгтӕ искӕмӕн уынаффӕ куы фӕдӕттынц, уӕд сӕ бон Елиуйы фӕзмын куыд вӕййы?

¹¹ Стыр зындзинадыл чи сӕмбӕлд, ахӕм адӕймагӕн иуӕй-иу хатт фӕхъӕуы цавӕрдӕр уынаффӕ раттын кӕнӕ йын зонд бацамонын (Гал. 6:1). Хистӕр нӕлгоймӕгтӕн уый сӕ бон куыд у аразын? Уыцы хъуыддаджы хъуамӕ фӕзмой Елиуйы. Уый Иовмӕ тынг лӕмбынӕг хъуыста (Иов 33:6, 7). Елиуй бамбӕрста, Иов куыд хъуыды кодта, уый ӕмӕ йын ӕрмӕстдӕр уый фӕстӕ радта уынаффӕ. Елиуйы чи фӕзмы, уыцы хистӕр нӕлгоймӕгтӕ адӕймагмӕ лӕмбынӕг байхъусынц ӕмӕ фӕархайынц, цӕмӕй йын йӕ уавӕр бамбарой. Ӕмӕ йын уый фӕстӕ уынаффӕ куы раттынц, уӕд сын уый дӕр сӕ уынаффӕмӕ хуыздӕр байхъусы.

12. Ноеминыл йӕ цардӕмбалы ӕмӕ йӕ дыууӕ фырты мӕлӕт куыд фӕзынд?

¹² Ноемин Йегъовӕйы уарзта ӕмӕ йыл уыд иузӕрдион. Фӕлӕ йӕ сӕрыхицау ӕмӕ йӕ дыууӕ фырты куы амардысты, уӕд ӕй фӕндыд, цӕмӕй йӕ хуыдтаиккой ӕндӕр номӕй, «Марӕ», зӕгъгӕ (нысан кӕны «маст») (Руф 1:3, 5, 20, фип., 21). Уыцы фыдӕвзарӕнты рӕстӕг йӕ чындз Руф ӕппынӕдзух уыд йӕ цуры. Руф Ноеминӕн ӕрмӕст хъуыддагӕй не ’ххуыс кодта, фӕлӕ ма йӕ ныхасӕй дӕр рӕвдыдта. Хуымӕтӕг, зӕрдӕбын ныхӕстӕй йын ӕмбарын кодта, кӕй йӕ уарзы, уый ӕмӕ йын йӕ ныфс фидар кодта (Руф 1:16, 17).

13. Йӕ цардӕмбал кӕмӕн амард, уыдоны не ’ххуыс цӕмӕн фӕхъӕуы?

¹³ Нӕ чырыстон хотӕй ӕмӕ ӕфсымӕртӕй искӕмӕн йӕ цардӕмбал куы амӕлы, уӕд уыцы хо кӕнӕ ’фсымӕры не ’ххуыс тынг фӕхъӕуы. Ус ӕмӕ лӕджы абарӕн ис, фӕрсӕй-фӕрстӕм чи зайы, дыууӕ ахӕм бӕласимӕ. Рӕстӕг куыд фӕцӕуы, афтӕ уыцы бӕлӕстӕн сӕ уидӕгтӕ кӕрӕдзийыл стыхсынц. Ӕмӕ дзы стӕй иу ӕдбындзар куы стонынц, уӕд иннӕ, гӕнӕн ис, ӕмӕ тынг бахъыгдард уа. Афтӕ адӕймаг дӕр йӕ цардӕмбалы мӕлӕты фӕстӕ, гӕнӕн ис, афтӕ маст кӕна, ӕмӕ бирӕ рӕстӕг йӕ бон йӕхимӕ ӕрцӕуын ма уа. Йӕ сӕрыхицау ӕнӕнхъӕлӕджы кӕмӕн амард, иу ахӕм хо, Паулӕ *, загъта: «Мӕ дуне мыл рафӕлдӕхт, мӕ бон ӕппындӕр ницыуал уыд. Мӕ хуыздӕр ӕмбал мӕ фарсмӕ нал уыд. Мӕ алы ныхас дӕр-иу уымӕн кодтон. Мӕ циныл-иу мын фӕцин кодта, зын-иу мын куы уыд, уӕд та-иу мын баххуыс кодта. Мӕ мӕстытӕ-иу ын куы дзырдтон, уӕд-иу мӕм алкӕддӕр байхъуыста. Цыма мын ме ’рдӕг алыг кодтой, афтӕ фӕдӕн».

14, 15. Йӕ цардӕмбал кӕмӕн амард, ахӕм адӕймаджы нӕ бон куыд у ныхасӕй барӕвдауын?

¹⁴ Йӕ цардӕмбал кӕмӕн амард, ахӕм адӕймаджы нӕ бон куыд у ныхасӕй барӕвдауын? Фыццаджыдӕр ын хъуамӕ исты зӕгъӕм, кӕд фӕтыхсӕм кӕнӕ, цы зӕгъӕм, уый нӕ фӕзонӕм, уӕддӕр. Паулӕ, уӕлдӕр кӕй ныхӕстӕ ӕрхастам, уый, загъта: «Ӕмбарын ӕй, исчи куы амӕлы, уӕд бирӕтӕ, сӕхи куыд дарой, уый нӕ фӕзонынц. Сӕ ныхӕстӕ зианджынмӕ хъыг куы фӕкӕсой, уымӕй фӕтӕрсынц. Фӕлӕ фӕлтау афтӕ уӕд, цӕйнӕфӕлтау ӕппындӕр мацы зӕгъай». Зианджын цавӕрдӕр зондджын ныхӕстӕм нӕ фенхъӕлмӕ кӕсы.  Паулӕ зӕгъы: «Ме ’мбӕлттӕ-иу мын, „тынг хъыг мын у“, зӕгъгӕ, кӕй загътой, уый тыххӕй-иу сӕ бузныг уыдтӕн».

¹⁵ Уильямӕн йӕ бинойнаг амард цалдӕр азы размӕ. Уильям радзырдта: «Иннӕтӕ мын мӕ бинойнаджы хорз хъуыддӕгты тыххӕй куы фӕдзурынц, уӕд мын уый тынг ӕхсызгон вӕййы. Уӕд фембарын, кӕй йӕ уарзтой ӕмӕ йын кӕй аргъ кодтой. Уый мын тынг ӕххуыс кӕны. Сӕ ныхӕстӕ мын стыр удӕнцойы хос вӕййынц, уымӕн ӕмӕ йӕ бирӕ уарзтон ӕмӕ мын цард йемӕ адджындӕр уыди». Иу идӕдз хо та, Бьянкӕ, загъта: «Иннӕтӕ мемӕ куы скувынц ӕмӕ мын Библийӕ иу кӕнӕ дыууӕ стихы куы бакӕсынц, уӕд мын фенцондӕр вӕййы. Тынг ма мын ӕххуыс кӕны, мӕ сӕрыхицауы тыххӕй мын куы фӕдзурынц кӕнӕ сын ӕз мӕхӕдӕг йӕ кой куы фӕкӕнын, уӕд мӕм кӕй фӕхъусынц, уый».

16. а) Йӕ цардӕмбал кӕмӕн амард, уыдонӕн нӕ ӕххуыс кӕнын цӕмӕн хъӕуы? б) Иаковы 1:27 стихмӕ гӕсгӕ ныл цавӕр хӕс ис?

¹⁶ Руф Ноемины фарсмӕ куыд уыд ӕмӕ йын куыд ӕххуыс кодта, афтӕ мах дӕр хъуамӕ ӕххуыс кӕнӕм, йӕ цардӕмбал кӕмӕн амард, уыдонӕн. Уӕлдӕр кӕй кой кодтам, уыцы Паулӕ загъта: «Мӕ цардӕмбал куы амард, уӕд мын иннӕтӕ фыццаг рӕстӕг тынг ӕххуыс кодтой. Фӕлӕ гыццыл фӕстӕдӕр алчидӕр йӕхи царды хабӕрттӕм аздӕхт. Мӕнӕн та мӕ цард бынтондӕр фӕивта. Хорз вӕййы, иннӕтӕ куы фембарынц, зианджыны се ’ххуыс цалдӕр мӕйы кӕнӕ та суанг цалдӕр азы дӕр кӕй фӕхъӕуы». Кӕй зӕгъын ӕй хъӕуы, адӕм иухуызон не сты. Иуӕй-иутӕ, сӕ цардӕмбал сӕ фарсмӕ кӕй нал ис, ууыл тагъддӕр сахуыр вӕййынц. Фӕлӕ иннӕтӕн та, иумӕ-иу цы арӕзтой, уыдӕттӕ ныр иунӕгӕй цал хатты фӕаразынц,  уал хатты сӕ зӕрдӕйы рыст сног вӕййы. Адӕм куыд алыхуызон сты, маст дӕр афтӕ алыхуызон фӕкӕнынц. Хъуамӕ нӕ зӕрдыл дарӕм, идӕдзтӕн ӕххуыс кӕнын нын Йегъовӕ кӕй бахӕс кодта, ӕмӕ уый та стыр кад у. (Бакӕс Иаковы 1:27.)

17. Йӕ цардӕмбал кӕй ныууадзы, уыдоны не ’ххуыс цӕмӕн фӕхъӕуы?

¹⁷ Иуӕй-иутӕ зӕрдӕцӕф фӕвӕййынц ӕмӕ стыр маст бавзарынц, сӕ цардӕмбӕлттӕ сӕ куы ныууадзынц, уӕд. Джойсы дӕр йӕ сӕрыхицау ныууагъта, ӕмӕ мӕнӕ цы зӕгъы: «Мӕлгӕ куы акодтаид, уӕд мӕ зӕрдӕ афтӕ тынг нӕ фӕрыстаид. Аварийы кӕнӕ исты низӕй куы амардаид, уӕд уый йӕхи фӕндон нӕ уыдаид. Фӕлӕ ам хабар ӕндӕр у – мӕ цардӕмбал мӕ йӕхи фӕндонмӕ гӕсгӕ ныууагъта. Мӕхимӕ зӕххӕй сисыны аккаг дӕр нал кастӕн».

18. Цардӕмбал кӕмӕн нал ис, уыдонӕн нӕ бон куыд у ӕххуыс кӕнын?

¹⁸ Цардӕмбал кӕмӕн нал ис, уыдонӕн исты гыццыл хорздзинӕдтӕ куы кӕнӕм, уӕд ӕй уындзысты, ӕцӕгдӕр сӕ кӕй уарзӕм, уый. Иунӕгӕй чи баззайы, уый хорз ӕмбӕлттӕ тынг фӕхъӕуы (Ӕмб. 17:17). Уӕдӕ се ’мбӕлттӕ кӕй стӕм, уый сын нӕ бон равдисын куыд у? Ис сӕ фӕхонӕн иумӕ къӕбӕр бахӕрынмӕ кӕнӕ иу гыццыл иумӕ баулӕфынмӕ. Йе та сӕ нӕ бон у немӕ уацамынды акӕнын. Иуӕй-иу хатт сӕ вӕййы фӕхонӕн нӕ бинонты ахуырмӕ дӕр. Афтӕ куы кӕнӕм, уӕд Йегъовӕйы зӕрдӕ рухс кӕндзыстӕм, уымӕн ӕмӕ Йегъовӕ «хӕстӕг у, зӕрдӕсаст чи у, уыдонмӕ» ӕмӕ у «идӕдзты тӕрхонгӕнӕг», кӕнӕ хъахъхъӕнӕг (Пс. 34:18; 68:5).

19. 1 Петры 3:8 стихмӕ гӕсгӕ, цы хъуамӕ аразӕм?

¹⁹ Адӕм Хуыцауы Паддзахады дӕлбар куы цӕрой, уӕд ӕппӕт зындзинӕдтӕ дӕр ферох уыдзысты. Тагъд ралӕудзӕн ахӕм рӕстӕг, ӕмӕ, «раздӕр цы уыд, уыдон хъуыды дӕр ничиуал ӕркӕндзӕн ӕмӕ зӕрдӕйы дӕр нал баззайдзысты» (Ис. 65:16, 17). Ӕмӕ цалынмӕ уыцы рӕстӕг не ’рцыд, уӕдмӕ кӕрӕдзийӕн ӕххуыс кӕнӕм ӕмӕ, нӕ чырыстон хоты ӕмӕ ӕфсымӕрты кӕй уарзӕм, уый ныхасӕй дӕр ӕмӕ хъуыддагӕй дӕр ӕвдисӕм. (Бакӕс 1 Петры 3:8.)