1. Sar šaj te oponašina amare manglje Dade, e Jehova?

O JEHOVA but mangela amen (Jov. 3:16). Amen mangaja te oponašina amare manglje Dade. Odoljese amen daja sa amendar te ova „ko jekhipe ko mislija, saosećajna, pherde phraljikane mangipaja, milostiva“ premalo sare, a posebno premalo amare phralja hem phenja (1. Petr. 3:8; Gal. 6:10). Amen mangaja te pomožina amare phraljen hem phenjen ked isi ljen pharipa hem stres.

2. So ka dikha ko akava članko?

² Svako ko mangela te ovel deo ando Jehovaso narodo ka ovel lje stresna situacije ko dživdipe (Mar. 10:29, 30). Sar avela o krajo akalje svetoso, amen verovatno ka ovel amen sa poviše kušnje. Sar šaj te pomožina jekh jekhese? Akana ka dikha so šaj te sikljova kotar o Lot, o Jov hem i Nojemina. Isto adžahar, ka dikha kola problemija amare phralja hem phenja isi ljen avdije hem ka dikha sar šaj te pomožina ljen te ikljoven ko krajo peklje problemencar.

3. Premali 2. Petrova 2:7, 8, koja lošno odluka andža o Lot hem so ulo palo odova?

³ O Lot andža jekh but lošno odluka ked birindža te živini ko Sodom, maškaro but nemoralna manuša. (Čitinen 2. Petrova 2:7, 8.) Odova than hine but barvalo, ama o Lot hine lje but bare pharipa odoljese so selindža pe odothe (Post. 13:8-13; 14:12). Izgleda so oljesi romni odobor but manglja odija diz ja e manušen kola bešlje odothe so irindža  po dumo e Jehovase. Oj našaldža po dživdipe ked o Devel mukhlja boršim andi jag hem ando sumpor ko odova than. Razmislin hem kotar e Lotese duj čhaja kola hine verime. Ked počmindža te džal boršim andi jag hem ando sumpor oljenge verenikija mulje. O Lot našaldža po čher hem sa so hine lje, ama odova so najviše dukhavdža lje tano so našaldža pe romnja (Post. 19:12-14, 17, 26). Dži o Lot nakhlja prekalo akala stresna situacije, da li o Jehova našaldža poklo strpljenje premalo oljeste? Na.

4. Sar o Jehova mothovdža strpljenje premalo Lot? (Dikh i slika ko početko ando akava časopis.)

⁴ Iako o Lot birindža te živini ko Sodom, o Jehova mothovdža ljese saosećajnost adžahar so bičhaldža e anđelen te spasinen hem olje hem oljese porodica. Ama, umesto odmah te šunel e anđele so mora te ikljol ando Sodom, o Lot na čerdža odmah odova. O anđelija morandilje te doljen lje kotar vas hem te pomožinen oljese hem oljese porodicače te ikljol andi diz (Post. 19:15, 16). O anđelija palo odova phendže oljese te našel ko bregija. Ama, umesto te šunel e Jehova, o Lot pučlja lje te džal ki diz koja hine paše odothe (Post. 19:17-20). O Jehova strpljivo šundža lje hem mukhlja lje te džal ki odija diz. Palo odova, o Lot darandilo te živini ki odija diz hem dželo te živini ko bregija, ko than kuri o Jehova prvo phendža ljese te džal (Post. 19:30). Savo baro strpljenje o Jehova mothovdža oljese! Sar šaj amen te oponašina e Jehova?

5-6. Sar šaj te primenina o lafija ando 1. Solunjanima 5:14 dži oponašinaja e Devlje?

⁵ Isto sar o Lot, hem avdije disavo phral ja phen šaj te anel lošna odluke hem adžahar te čeren pese bare problemija ko dživdipe. So valjani te čera ako avela dži odova? Šaj ka manga te phena oljendže so akana čedena odova so sejindže, soj tano hem čače (Gal. 6:7). Ama, šaj te čera diso pošukar. Amen šaj te pomožina ljen adžahar sar so o Jehova pomožindža e Lote. Sar šaj te čera odova?

⁶ O Jehova na bičhaldža e anđelen samo te upozorinen e Lote, nego hem te pomožinen lje te na desini pe oljese o pharipa kola ulje ko Sodom. Isto adžahar, amen šaj ka valjani te upozorina amare phralje ako dikhaja so čerela diso so šaj te anel ljese problemi. Ama, šaj hem te pomožina lje. Čak, ako na prihvatini odmah o savet andi Biblija kova dobindža, amen valjani te ova strpljiva. Ov sar odola duj anđelija. Ma vazde te vasta kotar to phral, nego pomožin lje, na samo lafencar nego hem čer diso (1. Jov. 3:18). Amen šaj ka valjani, samči te dola lje kotar vas, hem te pomožina lje te šunel o šukar savet kova dobindža. (Čitinen 1. Solunjanima 5:14.)

7. Sar šaj averen te dikha sar so o Jehova dikhlja e Lote?

⁷ O Jehova šaj hine te dikhel samo e Lotese mane. Ama, ov prekalo Petar dindža te pisini pe ki Biblija so o Lot hine pravedno manuš. Kobor bahtalje hijam so o Jehova oprostini amare greške! (Ps. 130:3). Šaj li te dikha ko avera odova so o Jehova dikhlja ko Lot? Ako amen dikhaja o šukar osobine kola isi ljen amare phralja hem phenja, ka mothova pobaro strpljenje premalo oljende. Tegani hem oljendže šaj ka ovel polokho te prihvatinen amari pomoć.

8. So i saosećajnost ka čhivel amen te čera?

⁸ O Jov na hine lje bare pharipa ko dživdipe, sebepi so ov andža lošno odluka sar o Lot. Ama, ipak hine lje bare problemija. Našaldža sa so hine lje, našaldža po ugled hem po sastipe. Te ovel pana pogore, oljese hem oljese romnjače mulje sa oljenge  čhave. Uzo odova, e Jovese trin hovavne amala optužindže lje. Sose odola manuša kola alje te utešinen lje na mothovdže saosećanje premalo oljeste? On na pokušindže te haljoven so čače desini pe e Jovese. Hem sebepi odova, hine ljen pogrešno mišljenje hem osudindže lje. Sar šaj amen te izbegnina te čera asavki greška? Na valjani te bistra so samo o Jehova džanela sa ando odova problemi kova isi lje amaro phral ja phen. Šun pažljivo ked o phral ja i phen vačeri tuče kotar save pharipa nakhela. Ma šun samo o lafija kola vačeri, nego de sa tutar te osetine oljengi dukh koja isi ljen ano vilo. Samo tegani šaj te mothove saosećanje premalo toklo phral ja phen.

9. So na ka čera ako hijam saosećajna?

⁹ Ked hijam saosećajna, tegani na ka ogovorina averen adžahar so ka vačera ando oljenge problemija averendže. O manuš kova ogovorini, našti te ohrabrini e manušen ki skupština. Ov obeshrabrini ljen (Posl. 20:19; Rimlj. 14:19). O manuš kova vačeri bizo te razmislini nane ljubazno hem oljese lafija šaj te povredinen e osoba koja već isi la bare pharipa (Posl. 12:18; Ef. 4:31, 32). Kobor tano pošukar ked ki osoba dikhaja o šukar osobine hem razmislinaja sar te pomožina la te ikljol ko krajo peklje problemencar!

10. So sikljovaja ando Jov 6:2, 3?

¹⁰ Čitinen Jov 6:2, 3. Ked hine lje pharipa, o Jov disavo puti na razmislindža sostar vačeri. Ama, ov priznajindža so disave buča kola vačerdža hine pogrešna (Jov 42:6). Isto sar o Jov, o manuš kova avdije isi lje bare problemija, šaj te vačeri diso sostar ni na razmislindža hem palo odova te kajini pe. So amen valjani te čera?  Umesto te kritikujina lje, amen valjani te mothova saosećanje. Ama, ma bistre so e Jehovasi namera na hine te ovel amen problemija hem stresna situacije ko dživdipe. Odoljese šaj te haljova so ked e Jehovaso verno sluga isi lje bare problemija, šaj te vačeri diso bizo te razmislini. Čak, ako vačeri diso ando Jehova ja amendar so nane tačno, amen na valjani sigate te holjana ja te osudina lje sebepi odova (Posl. 19:11).

11. Sar šaj o starešine te oven sar o Elijuj ked dena savet?

¹¹ Disavo puti ked o manuš isi lje bare problemija, valjani neko te del lje savet ja te pomožini lje te ispravini pe ko diso (Gal. 6:1). Sar šaj o starešine te čeren odova? On valjani te čeren odova so čerdža o Elijuj, kova mothovdža baro saosećanje dži šundža e Jove (Jov 33:6, 7). O Elijuj dindža savet tek ked haljilo sar o Jov razmislini. Sar o Elijuj, hem o starešine pažljivo ka šunen hem ka pokušinen te haljon e manušesi situacija. Tegani hem ked ka den savet, ov šaj ka resel dži e manušeso vilo.

12. Sar hine e Nojeminače ked olako rom hem olake čhave mulje?

¹² I Nojemina hine jekh verno romni koja manglja e Jehova. Ked olako rom hem olake duj čhave mulje, oj manglja te menini po nav. Na manglja više te vičini pe Nojemina. Manglja te vičini pe „Mara“ so značini „čerkipe“ (Ruta 1:3, 5, 20, fusn., 21). E Nojeminaki bori, i Ruta, ačhilji olaja dži hine la odola pharipa. Uzo odova, oj pomožindža e Nojemina na samo te ovela odova so valjani olače, nego hem utešindža la. I Ruta mothovdža mangipe hem pomožindža e Nojemina adžahar so iskreno ohrabrindža la (Ruta 1:16, 17).

13. Sose okoljendže kola našaldže pe rome ja pe romnja valjani amari pomoć?

¹³ Ked dijekhe amare phraljese ja phenjače merela o rom ja i romni, tegani amen valjani te pomožina ljen. O rom hem i romni šaj te oven sar duj kašta kola barjona jekh uzo jekh. Sar nakhena o berša, oljenge korenija sa pobuter povezinena pe. Ked jekh kaš ikalji pe ando koreno, akava aver kaš kova tano uzo ljeste patini. Isto adžahar, ked džiko sebepi o meribe našalji pe rome ja pe romnja, šaj but vreme te patini. Amari phen i Paula *, kaso rom iznenada mulo phenela: „Moklo dživdipe potpuno menindža pe hem osetindžum so nane man snaga nisose. Našaldžum meklje najšukar amalje. Oljeja šaj hine te vačerav ando sa. Ov hine uzo mande hem ked hine maje lošno hem ked hine maje šukar. Ked god phravdžum ljese mo vilo ov uvek šundža man. Čače osetindžum so jekh deo mandar našaldilo.“

14-15. Sar šaj te utešina nekas ko našaldža pe rome ja pe romnja?

¹⁴ Sar šaj te utešina nekas ko našaldža pe rome ja pe romnja? Prvo važno buti koja valjani te čera tani te vačera oljeja ja olaja, čak iako na osetinaja amen prijatno ja na džanaja so te phena. Amari phen i Paula phenela: „Haljovava so ked neko merela o manuša na džanena so te phenen. On darana te na phenen diso pogrešno. Ama, pogore tano ked o manuša ništa na vačerena.“ I osoba koja nekas našaldža verovatno na očekujini amendar te phena diso mudro. I Paula vačeri: „Hijum lje zahvalno ked me amala samo phendže soj tano žao oljendže.“

¹⁵ Amaro phral o Vilijam, kasi romni mulji nekobor berš angljeder phenela: „Ked avera phenena maje kola šukar buča  setinena pe kotar mi romni, tegani odova mothovi maje so hine manglji hem so poštujindže la. Adžahar but pomožinena man. Oljenge lafija but utešinena man, sebepi so but mangljum me romnja hem oj hine maje but važno ko moklo dživdipe.“ Amari phen i Bjanka koja našaldža pe rome phenela: „Utešini man ked avera molinena pe mancar hem čitinena maje nekobor stihija. But pomožini man ked on vačerena maje kotar mo rom hem ked šunena man dži me vačerava oljestar.“

16. (a) So valjani te čera okoljese ko našaldža nekas kas manglja? (b) Premalo Jakov 1:27, koja odgovornost sare isi amen?

¹⁶ Sar so i Ruta ačhilji e Nojemina, hem amen valjani ponodri te pomožina okoljendže kola našaldže okoljen kas manglje. Amari phen i Paula vačeri: „Ked mulo mo rom, but manuša alje te pomožinen man hem te utešinen man. Ama, sar nakhlja o vreme, on hine zauzeta peklje bučencar. Moklo dživdipe na hine više isto. But tani bari pomoć ked avera haljona so e manušese kova isi lje dukh ano vilo valjani pomoć masekoncar ja čak beršencar palo odova.“ Naravno, svako manuš tano različito. Disave izgleda sigate sikljona ko neve okolnostija. A disave svako puti ked čerena diso so čerdže odola osoba kas našaldže, osetinena sar odija rana paljem phravdžola. Svakonesi dukh dukhala averčhane. Na valjani te bistra so o Jehova svakonese amendar dela čast hem odgovornost te brinina amen okoljendar kola našaldže pe rome ja pe romnja. (Jakov 1:27.)

17. Sose valjani te pomožina okoljen kas o rom ja i romni mukhlja?

 ¹⁷ Disavendže tano but pharo hem stresno ked o rom ja i romni mukhela ljen. Amari phen i Džojs, kola o rom mukhlja sebepi avere romnjako, phenela: „O razvod dukhavdža man pobuter nego li ked bi ov merela. Ked bi merela sebepi so hine lje udes, ja sebepi so naborsalo, tegani odova na bi ovela oljeso izbor. Ama, mo rom kokri birindža te mukhel man. Odova hine maje baro poniženje.“

18. Sar šaj te pomožina okoljendže kola tane kokri?

¹⁸ Ked amen čeraja disave tikne hem šukar buča okoljendže kola ačhilje kokri, tegani amen mothovaja so mangaja ljen. Akana ked tane kokri, oljendže valjanena šukar amala (Posl. 17:17). Sar šaj te mothove so tu hijan oljengo amal? Šaj te vičine ljen koro tute zajedno te han maro. Šaj te družine tut oljencar ja šaj te dža oljencar ki služba. Isto adžahar, disavo puti šaj te vičine ljen ko toklo porodično proučibe. O Jehova ka ovel bahtalo ako čereja odova, odoljese so ov „tano paše okoljencar soj tane phage viljeja“ hem arakhi okoljen kola našaldže pe rome ja pe romnja (Ps. 34:18; 68:5).

19. Premalo 1. Petrova 3:8, so valjani te čera?

¹⁹ Pana hari, e Devljeso Kraljevstvo ka vladini upri phuv hem tegani ka cidel sa o pharipa. Jedva adžičeraja ked odova so hine anglal na ka avel amendže ki godi, niti ka pojavini pe ko vilo (Is. 65:16, 17). Dži na avela odova dive, mangaja sarine te pomožina jekh jekhe hem odoljeja so vačeraja hem so čeraja te mothova so mangaja sa amare phraljen hem phenjen. (1. Petrova 3:8.)