BENƐ e piɛ bɔɔ nɛ Israel bi ɔmɛ maa po Yordan Pa a kɛ ya ngɔ Si Womi Zugba a, ni komɛ je mahi nɛ bɔle mɛ ɔ a mi kɛ ba a ngɔ. Yi komɛ nɛ a je ma nɛ ɔmɛ a mi ɔ ya fɔ̃ Israel nyumu ɔmɛ nine kɛ ha okplɔɔ ngmɛmi. Eko ɔ, a na nine fɔmi nɛ ɔ kaa he blɔ ngua ko nɛ a ná nɛ a kɛ ma ná huɛmɛ ehehi, a maa do, nɛ a maa ye niye ní kpakpa. E ngɛ mi kaa yi ɔmɛ a je mi bami kɛ a kusumihi je ekpa ngɛ mlaahi nɛ a kɛ ha Israel bi ɔmɛ ɔ he mohu lɛɛ, se eko ɔ, Israel nyumu ɔmɛ ekomɛ de a he ke: ‘Wa le nɔ́ nɛ da kɛ nɔ́ nɛ dɛ. Wa maa hyɛ wa he nɔ saminya.’

 Mɛni lɛ je mi kɛ ba? Ngmami ɔ de ke: “A kɛ Moab yi ɔmɛ nɛ ngɛ lejɛ ɔ bɔni nyumu kɛ yo yakayaka fiɛmi fiɛmi.” Ngɛ anɔkuale mi ɔ, yi nɛ ɔmɛ suɔ nɛ Israel nyumu ɔmɛ nɛ a ya ja a lakpa mawu ɔmɛ, nɛ a pee jã niinɛ! ‘Nɔ́ nɛ ɔ ha Yehowa mi mi fu ma a,’ nɛ e da blɔ jã.​—4 Mose 25:1-3.

Israel bi nɛ ɔmɛ tɔ̃ Mawu Mlaa a ngɛ blɔ enyɔ nɔ. Kekleekle ɔ, a ya ja amagahi. Nɔ́ nɛ ji enyɔ ɔ, a kɛ a he ya wo ajuama bɔmi mi. A kpɛti nihi akpehi abɔ gbo ngɛ Mawu tue nɛ a gbo ɔ he je. (2 Mose 20:4, 5, 14; 5 Mose 13:6-9) Nɔ́ nɛ ha nɛ sane nɛ ɔ pa ngɛ mɔbɔ ji kaa e piɛ bɔɔ pɛ nɛ a maa su Si Womi Zugba a nɔ. Kaa nyumu nɛ ɔmɛ ya tɔ̃ we Mawu Mlaa a nɔ ɔ, jinɛ a kpɛti nihi akpehi abɔ nɛ a gbo ɔ ko gbo we, nɛ a ko po Yordan Pa a kɛ ya Si Womi Zugba a nɔ.​—4 Mose 25:5, 9.

Bɔfo Paulo de ngɛ nɔ́ nɛ ba a he ke: “Ní nɛ ɔmɛ ba a nɔ kaa nɔ hyɛmi níhi, nɛ a ngma konɛ a kɛ bɔ wɔ nihi nɛ níhi a blɔ nya tomi nɛ ɔmɛ a nyagbe ɔ ba ná wɔ ɔ kɔkɔ.” (1 Kor. 10:7-11) E ngɛ heii kaa Satan bua jɔ kaa Israel bi ɔmɛ a kpɛti ni komɛ pee yayami nɛ hɛdɔ ngɛ he kɛ si Yehowa, nɛ lɔ ɔ ha nɛ a ya sui Si Womi Zugba a nɔ. Akɛnɛ wa le kaa Satan be suɔe nɛ waa sɛ Mawu je ehe ɔ mi he je ɔ, nile ngɛ mi kaa wa maa bu kɔkɔ bɔmi nɛ ɔ tue!

Satan suɔ nɛ e sisi Kristofohi, enɛ ɔ he ɔ, e guɔ níhi nɛ e kɛ tsu ní kɛ sisi nihi be ko nɛ be nɛ e ye manye ɔ nɔ kɛ peeɔ jã. Kaa bɔ nɛ e ba ngɛ Israel bi ɔmɛ a blɔ fa mi ɔ, Satan ngɔ ajuama bɔmi kɛ sisi mɛ. Mwɔnɛ ɔ hu ɔ, ajuama bɔmi ji klama nɛ Satan guɔ nɔ kɛ sisiɔ nihi. Blɔ kake nɛ klama nɛ ɔ ma nyɛ maa du wɔ ji kɛ gu ajuama bɔmi he videohi kɛ fonihi a hyɛmi nɔ.

Mwɔnɛ ɔ, nihi hyɛɛ ajuama bɔmi he videohi kɛ fonihi nɛ nɔ ko li. Jeha komɛ nɛ be ɔ, ke nɔ ko ngɛ hlae nɛ e hyɛ ajuama bɔmi he video loo foni ɔ, ja e ya sini jemi hehi aloo tsuapohi nɛ a juaa womihi nɛ ajuama bɔmi fonihi ngɛ mi ɔ. Nihi fuu yɛ he nɛ ɔmɛ ejakaa e peeɔ mɛ zo kaa nihi maa na mɛ. Se mwɔnɛ ɔ, nɔ ko ma nyɛ maa hyɛ ajuama bɔmi he videohi kɛ fonihi ngɛ Intanɛti ɔ nɔ ngɛ ní tsumi he aloo lɔle mi. Ngɛ ma komɛ a nɔ ɔ, nihi hyɛɛ ajuama bɔmi he videohi kɛ fonihi ngɛ a wehi a mi.

Jehanɛ hu ɔ, mobile fon kɛ tablɛti nɛ pɔ he ɔ ha nɛ e he wɛ ha nihi kaa a maa hyɛ ajuama bɔmi he videohi kɛ fonihi. Ke nihi ngɛ nyɛɛe, a ngɛ lɔle aloo tlee mi po ɔ, a nyɛɔ nɛ a hyɛɛ ajuama bɔmi he videohi kɛ fonihi ngɛ a fon aloo a tablɛti ɔmɛ a nɔ.

Akɛnɛ e yi kaa nihi maa hyɛ ajuama bɔmi he videohi kɛ fonihi, nɛ jehanɛ hu e yi kaa a kɛ maa laa nɛ nɔ ko be lee he je ɔ, ajuama bɔmi he videohi kɛ fonihi ngɛ nihi awi yee wawɛɛ pe be ko nɛ be ɔ. Ajuama bɔmi he videohi kɛ fonihi a hyɛmi ha nɛ nihi a gba puɛ, a biɛ puɛ, nɛ a he nile hu gbo. Nɔ́ nɛ pe kulaa a, huɛ bɔmi nɛ ngɛ a kɛ Mawu a kpɛti ɔ puɛ. Enɛ ɔ he ɔ, wa ma nyɛ ma de ke ajuama bɔmi he videohi kɛ fonihi a hyɛmi yeɔ nɔ awi wawɛɛ, nɛ behi fuu ɔ, nyagbahi nɛ jeɔ mi kɛ baa a hiɔ si be kɛkɛɛ.

Se e sa nɛ waa le kaa Yehowa tsɔɔ wɔ bɔ nɛ wa maa pee ha kɛ po wa he piɛ kɛ je Satan klama nɛ ɔ he. Ke wa suɔ nɛ Yehowa nɛ po wa he piɛ ɔ, e sɛ nɛ waa pee wa ní kaa Israel bi nɛ a tɔ̃ Mawu Mlaa a. E sa nɛ waa “bu [Mawu] gbi tue.” (2 Mose 19:5) E sa nɛ waa na kaa Mawu hiee ajuama bɔmi he videohi kɛ fonihi. Mɛni he je nɛ wa de jã a?

Mo susu he nɛ o hyɛ. Mlaahi nɛ Mawu wo Israel bi ɔmɛ ɔ je ekpa kulaa ngɛ je ma amɛ a mlaa amɛ a he. Mlaa a ngɛ kaa gbogbo nɛ maa po Israel bi ɔmɛ a he piɛ kɛ je ní yayahi nɛ mahi nɛ bɔle mɛ ɔ peeɔ ɔ a he. (5 Mose 4:6-8) Mlaa amɛ ha nɛ wa na heii kaa Yehowa hie ajuama bɔmi.

Yehowa tsɔɔ ní peepeehi nɛ sɛ nɛ mahi nɛ bɔle Israel bi ɔmɛ peeɔ. Lɔ ɔ se ɔ, e de Israel  bi ɔmɛ ke: ‘Kanaan bi ɔmɛ nɛ i ngɔ nyɛ kɛ yaa a zugba a nɔ ɔ, nyɛ ko pee a kusumi níhi. A ble zugba a, nɛ lɔ ɔ he ɔ, ma gbla zugba a tue.’ Israel Mawu nɛ e ngɛ klɔuklɔu ɔ na kaa Kanaan bi ɔmɛ a je mi bami puɛ hluu kaa a ní peepee ɔmɛ ble zugba a.​—3 Mose 18:3, 25.

E ngɛ mi kaa Yehowa gbla Kanaan bi ɔmɛ a tue mohu lɛɛ, se nihi ya nɔ nɛ a ngɔ a he kɛ wo ajuama bɔmi mi. Maa pee jeha 1,500 se ɔ, Paulo tsɔɔ kaa nihi nɛ bɔle Kristofo ɔmɛ ji nihi nɛ “nɔ́ ko nɔ́ ko pee we mɛ zo.” Ngɛ anɔkuale mi ɔ, “a ngɔ a he kɛ ha nɔ buimi ngmlikiti konɛ a kɛ hɛ tsumi nɛ tsu mu ní tsumi slɔɔtohi tsuo.” (Efe. 4:17-19) Mwɔnɛ ɔ hu ɔ, nihi fuu ngɔɔ a he kɛ woɔ je mi bami yaya mi nɛ zo pee we mɛ. E sa nɛ anɔkuale Kristofohi nɛ a bɔ mɔde wawɛɛ konɛ a ko hyɛ ní yayahi nɛ nihi peeɔ ngɛ je ɔ mi ɔ.

Nihi nɛ a bua jɔ ajuama bɔmi he videohi kɛ fonihi a he ɔ be bumi kɛ ha Mawu. Mawu bɔ adesahi ngɛ e subai nɔ, nɛ e ha wɔ nyɛmi nɛ waa kɛ leɔ nɔ́ nɛ hi kɛ nɔ́ nɛ hí. Nile ngɛ mi kaa Mawu wo mlaahi ngɛ bɔmi nami he. Mawu to bɔmi nami he blɔ nya kɛ ha nyumu kɛ yo nɛ a sɛ gba si himi mi ɔ pɛ konɛ a bua nɛ jɔ ngɛ gba si himi ɔ mi. (1 Mose 1:26-28; Abɛ 5:18, 19) Lɛɛ nihi nɛ a peeɔ ajuama bɔmi he videohi kɛ fonihi aloo a jeɔ yi kɛ haa nihi ɔ hu nɛɛ? Mɛ hu a ní peepee ɔ tsɔɔ kaa a kua je mi bami he mlaahi nɛ Mawu wo ɔ. Niinɛ, nihi nɛ a munyu tumi tsɔɔ kaa tɔmi ko be ajuama bɔmi he videohi kɛ fonihi a hyɛmi he ɔ bui Yehowa kulaa. Mawu maa kojo nihi nɛ a kua mlaahi nɛ e wo ɔ, nɛ́ a peeɔ ajuama bɔmi he videohi kɛ fonihi aloo a jeɔ yi kɛ haa nihi ɔ.​—Rom. 1:24-27.

Nɛ nihi nɛ a jeɔ blɔ nɛ a hyɛɛ ajuama bɔmi he videohi kɛ fonihi aloo a kaneɔ he ní ɔ hu nɛɛ? Ni komɛ ma susu kaa e ji hɛja jemi nɛ yi nɔ awi. Se nihi kaa jã a fĩ nihi nɛ a kua Yehowa mlaa amɛ ɔ a se. Eko ɔ, sisije ɔ, tsa pi jã ji a susumi. Baiblo ɔ ha nɛ wa na heii kaa e sa nɛ Mawu sɔmɔli anɔkualetsɛmɛ tsuo nɛ a hie ajuama bɔmi he videohi kɛ fonihi. Baiblo ɔ de ke: “Nihi tsuo nɛ nyɛ suɔ Yehowa, nyɛɛ hie yayami.”​—La 97:10, NW.

E he ma nyɛ maa wa ha nihi nɛ a sume kaa a maa hyɛ ajuama bɔmi he videohi kɛ fonihi ɔ kaa a ma fĩ si nɛ a be hyɛe. Nɔ́ he je ji kaa wa yi mluku, nɛ e he hia nɛ waa hwu kɛ si bɔmi nami he akɔnɔ yayahi. Jehanɛ hu ɔ, wa tsui ma nyɛ maa sisi wɔ kaa tɔmi ko be  ajuama bɔmi he videohi kɛ fonihi a hyɛmi he. (Yer. 17:9) Se nihi babauu nɛ a ba pee Kristofohi ɔ nyɛ nɛ a kpa ajuama bɔmi he videohi kɛ fonihi a hyɛmi. Enɛ ɔ ji odase nɛ tsɔɔ kaa mo hu o ma nyɛ ma kpa ajuama bɔmi he videohi kɛ fonihi a hyɛmi. Mawu Munyu ɔ ma nyɛ maa ye bua mo konɛ o yu o he ngɛ Satan klama nɛ ji ajuama bɔmi he videohi kɛ fonihi a hyɛmi he.

Kaa bɔ nɛ wa na kɛ sɛ hlami ɔ, Israel bi fuu ngmɛ blɔ nɛ akɔnɔ yaya nɛ a ná a ha nɛ a pee yayami. Nɔ́ ko kaa jã ma nyɛ maa ba wɔ hu wa nɔ mwɔnɛ ɔ. Yesu nyɛminyumu Yakobo tsɔɔ oslaa nɛ ngɛ akɔnɔ yaya nɛ nɔ ko ma ná a he. E de ke: “Nɔ fɛɛ nɔ ɔ, lɛ nitsɛ e we akɔnɔ nɛ e hii lɛ gblae nɛ e hii lɛ sisie. Kɛkɛ ɔ, ke akɔnɔ ɔ ngɔ hɔ ɔ, e fɔɔ yayami.” (Yak. 1:14, 15) Ke nɔ ko ngmɛ blɔ nɛ akɔnɔ yaya wa ngɛ e tsui mi ɔ, lɔ ɔ ma nyɛ ma ha nɛ e ya pee yayami. Enɛ ɔ he ɔ, ke nɔ́ ko nɛ sɛ ba wa juɛmi mi ɔ, e sa nɛ wa je kɛ je wa juɛmi mi mohu pe nɛ wa maa hi he susue.

Ke o yɔse kaa o pɔɔ níhi nɛ sɛ a he susumi ɔ, moo pee he nɔ́ ko oya nɔuu. Yesu de ke: “Enɛ ɔ he ɔ, ke o nane aloo o nine ha nɛ o nane ngɛ tɔ̃tɔ̃e ɔ, poo nɛ o sake ngɔ fɔ he. . . . Jehanɛ hu ɔ, ke o hɛ ngmɛ ha nɛ o nane ngɛ tɔ̃tɔ̃e ɔ, ta nɛ o sake ngɔ fɔ he.” (Mat. 18:8, 9) Se tsa pi wa nane aloo wa nine nitsɛ nɛ wa maa po aloo wa hɛ ngmɛ nitsɛ nɛ wa ma ta a he munyu nɛ Yesu ngɛ tue. Nɔ́ he tomi nɔ́ nɛ ɔ tsɔɔ kaa e sa nɛ wa yɔse nɔ́ nɛ ha nɛ wa ngɛ ní yayahi a he susue ɔ konɛ wa je wa he kɛ je he oya nɔuu. Kɛ ga womi nɛ ɔ kɔɔ ajuama bɔmi he videohi kɛ fonihi a hyɛmi he ha kɛɛ?

Ke o hɛ ngmɛ gba ajuama bɔmi he video aloo foni ko nɔ ɔ, ko de ke: ‘Enɛ ɔ be mi awi ko yee.’ Je o hɛ ngmɛ kɛ je he oya nɔuu. Gbee tiivi ɔ amlɔ nɔuu. Gbee kɔmpiuta a, fon ɔ, aloo tablɛti ɔ nɔuu. Moo hyɛ nɔ́ ko nɛ sa mohu. Jã nɛ o maa pee ɔ ma ha nɛ o ye susumi yayami ɔ nɔ mohu pe nɛ akɔnɔ yaya maa ye o nɔ.

Ke o kpa ajuama bɔmi he videohi kɛ fonihi a hyɛmi, se ke pee ɔ, níhi nɛ o hyɛ ɔ pɔɔ o juɛmi mi bami hu nɛɛ? Ke nɔ ko hyɛ  ajuama bɔmi he fonihi ɔ, níhi nɛ e hyɛ ɔ ma nyɛ maa tlɔ e juɛmi mi be kɛkɛɛ. Susumi nɛ ɔmɛ ma nyɛ maa ba nɔ ɔ juɛmi mi be saa be. Ke e ba jã a, eko ɔ, e maa pee mo kaa o ngɔ o he kɛ wo mu ní tsumi ko mi. Kaa nɔ hyɛmi nɔ́ ɔ, e maa pee mo kaa o fiɛ o fɔmi níhi a he. Enɛ ɔ he ɔ, o hɛ nɛ hi o he nɔ kaa susumi nɛ ɔmɛ ma nyɛ maa ba o juɛmi mi be mi nɛ o hyɛ we blɔ, nɛ́ o dla o he hu kaa o maa hwu kɛ si mɛ.

Moo fia o pɛɛ si kaa o ma ha nɛ o susumi kɛ o ní peepee kɛ Mawu suɔmi nya ní peemi ma kɔ. Moo bɔ mɔde nɛ o kase Paulo. E de ke: “I waa ye nɔmlɔ tso ɔ yi mi nɛ i hɛɛɔ lɛ kaa nyɔguɛ.” (1 Kor. 9:27) Ko ha nɛ akɔnɔ yaya nɛ ngɔ mo nyɔguɛ. Baiblo ɔ de ke: “Nyɛ . . . tsake . . . kɛ gu nyɛ juɛmi nɛ nyɛ maa hi tsakee ɔ nɔ, konɛ nyɛ nitsɛmɛ nyɛ ná Mawu suɔmi nya ní nɛ e ye mluku, nɛ e hi, nɛ e sa e hɛ mi ɔ nɔ mi mami.” (Rom. 12:2) E sa nɛ wa kai kaa ke wa susumi kɛ wa ní peepee kɛ Mawu suɔmi nya ní kɔ ɔ, lɔ ɔ ma ha nɛ wa ná bua jɔmi nitsɛnitsɛ mohu pe nɛ wa maa pee níhi nɛ sɛ.

Moo kase Ngmami komɛ kɛ wo o yi mi konɛ ke níhi nɛ sɛ ba o juɛmi mi ɔ, o bɔ mɔde nɛ o kai jamɛ a ngmami ɔmɛ. Ngmami komɛ kaa La 119:37; Yesaya 52:11; Mateo 5:28; Efeso Bi 5:3; Kolose Bi 3:5; kɛ 1 Tɛsalonika Bi 4:4-8 ɔ maa ye bua mo konɛ o na Yehowa susumi ngɛ ajuama bɔmi he videohi kɛ fonihi a he, kɛ nɔ́ nɛ e suɔ kaa o pee.

Ke be komɛ ɔ, e peeɔ mo kaa o hyɛ aloo o susu níhi nɛ sɛ a he se e yeɔ ha mo kaa o ma je o juɛmi kɛ je níhi kaa jã a nɔ hu nɛɛ? Moo nyɛɛ Yesu nane mami he ɔmɛ a se. (1 Pet. 2:21) Benɛ a baptisi Yesu se ɔ, Satan ka lɛ si abɔ. Mɛni Yesu pee? Yesu ngmɛɛ we e he ha lɛ. Yesu tsɛ ngmamihi a se kɛ tsi kahi nɛ Satan kɛ ba e nɔ ɔmɛ a nya. E de ke: “Satan, jee hiɛ ɔ kɛ ho!” kɛkɛ nɛ Satan je e he. Moo ya nɔ nɛ o hwu kɛ si Abosiami kaa bɔ nɛ Yesu pee ɔ. (Mat. 4:1-11) Satan kɛ e je ɔ maa ya nɔ nɛ a maa bɔ mɔde kaa a maa pee níhi nɛ ma ha nɛ o susu níhi nɛ sɛ a he, se yaa nɔ nɛ o hwu kɛ si jamɛ a susumi ɔmɛ. O ma nyɛ maa hwu kɛ si ajuama bɔmi he videohi aloo fonihi a hyɛmi. Yehowa ma nyɛ maa ye bua mo konɛ o ye o he nyɛlɔ ɔ nɔ kunimi.

Yaa nɔ nɛ o sɔle kɛ ha Yehowa nɛ o de lɛ nɛ e ye bua mo. Paulo de ke: “Nyɛɛ gu sɔlemi kɛ pɛɛ kpami nɛ mi wa kɛ sina nɔ kɛ ha nɛ Mawu nɛ e le nyɛ ní bimi ɔmɛ; nɛ Mawu tue mi jɔmi ɔ nɛ pã níhi a sisi numi tsuo ɔ maa bu nyɛ tsui kɛ nyɛ juɛmi he kɛ gu Kristo Yesu nɔ.” (Filip. 4:6, 7) Mawu tue mi jɔmi ɔ maa ye bua mo konɛ o hwu kɛ si yayami peemi. Ke o hɛ mo kɛ su Yehowa he ɔ, “e maa hɛ lɛ kɛ su [o] he.”​—Yak. 4:8.

Ke wa ha nɛ huɛ bɔmi nɛ ngɛ waa kɛ Yehowa Mawu wa kpɛti ɔ mi wa a, e maa po wa he piɛ kɛ je Satan klama amɛ a he. Yesu de ke: “Je ɔ nɔ yelɔ ɔ ma, nɛ e be he wami ko ngɛ ye nɔ.” (Yoh. 14:30) Mɛni he je nɛ Yesu kɛ nɔ mi mami tu munyu nɛ ɔ? Be ko ɔ, e de ke: “Nɔ nɛ e tsɔ mi ɔ kɛ mi ngɛ; e si we imi nɔ kake too, ejakaa i peeɔ níhi nɛ e bua jɔ he be fɛɛ be.” (Yoh. 8:29) Ke o pee níhi nɛ sa Yehowa hɛ mi ɔ, mo hu o ma nyɛ ma ná nɔ mi mami kaa e be mo kuae gblegbleegble. Moo yu o he kɛ je ajuama bɔmi he videohi kɛ fonihi a hyɛmi he, nɛ Satan klama a be nyɛe maa du mo.