ИЗРАИЛЬ албаты Ханаан јердиҥ бозогозында турган. Олорго јӱк ле Иордан сууны кечерге арткан. Кенетийин, олорго сакыбаган айылчылар — туш јериниҥ ӱй улузы келип, израильдиҥ эрлерин байрамга кычырган. Бу кычырту олорго јилбилӱ болгон болор, нениҥ учун дезе анда јаҥы најылар, бијелер, амтанду курсак болор. Олордыҥ чӱм-јаҥдары ла ак-чек болорыныҥ нормалары Кудайдыҥ Јасагынаҥ башка да болгон болзо, кемизи де мынайып сананган болор: «Коркыыр неме јок. Мен ајарыҥкай болорым не. Јаман неме этпезим».

 Оноҥ ары не болды? Агару Бичикте: «Израильдиҥ эрлери Моав јериниҥ кыстарыла конып баштаган» — деп айдылат. Је чынынча болзо, туш ӱй улус израильдиҥ эрлерин тӧгӱн кудайларга бажырып баштазын деп кӱӱнзеген. Олордыҥ кӱӱни бӱдӱп калды. Мынаҥ улам «Израильге Иегованыҥ чугулы тӱшти» (Тоол. 25:1—3).

Бу учуралда израильтяндар эки уур кинчек эткен: чалуларга бажырып баштаган ла эш-нӧкӧри эмес улусла конгон. Мынаҥ улам муҥдар тоолу эр улус јӱрӱмин јылыйткан (Чыг. 20:4, 5, 14; Јаҥ. т. 13:6—9). Је эҥ ле ачынчылузы, олорго јӱк ле Иордан сууны кечерге арткан да болзо, олор Ханаан јерге кирбеген (Тоол. 25:5, 9).

Бу учурал керегинде элчи Павел мынайып бичиген: «Бу ончозы биске тем эдип олорло болгон; биске, калганчы чакта јӱрген улуска, ӱредӱ болзын деп бичилген» (1 Кор. 10:7—11). Сатана израильтяндардыҥ мындый уур кинчек эдип, Ханаан јерге кирбегенине тыҥ сӱӱнди. Биске бу учуралды бир де ундыбас керек, нениҥ учун дезе Сатана бисти Кудайдыҥ берерге турган јаҥы телекейине кирбезин деп албаданат.

Сатана христиандарды тӧгӱндеерге, бойыныҥ сӱӱген эп-аргаларын тузаланат. Оныҥ мындый тузактарына кӧп улус тӱшкен. Ӧрӧги айдылганыла, израильтяндар Сатананыҥ сӧзине кирип, эш-нӧкӧри эмес улусла конып баштаган. Бӱгӱнги кӱнде андый тузак оноҥ јаан каршузын јетирет. Кӧп улус мындый тузакка порнография кӧрӱп баштайла тӱжӱп калган.

Бӱгӱнги кӱнде кижиниҥ порнография кӧрӱп турганын кем де билбей јат. Алдындагы ӧйдӧ «јаан улустыҥ кинолорын» јӱк ле кинотеатрда эмезе видеосалондо кӧрӧтӧн. Анайда ок порнографиялу журналдар јӱк ле андый бичиктер садылып турган магазиндерде болгон. Оныҥ учун кӧп улус андый јерлерге улустаҥ уйалып барбай туратан. Је бӱгӱнги кӱнде кажы ла кижи, интернет ле бар болзо, порнографияны иште, керек дезе машинада отурган ӧйдӧ кӧрӧр аргалу. Кӧп ороондордо улус порнографияны айылдаҥ чыкпазынаҥ да кӧрӱп јат.

Порнографияны кӧрӧтӧн ӧскӧ дӧ аргалар бар. Мобильный телефондордыҥ болужыла порнография кӧрӧргӧ оноҥ јеҥил болуп калган. Эмди улус порнографияны бойыныҥ телефонынаҥ тышкары јӱреле эмезе автобуста барып јадала кӧрӱп јат.

Порнографияны кайдаҥ ла кӧрӧр арга бар болуп калганынаҥ улам, улус мындый тузакка алдындагызына кӧрӧ, кӧп тӱжет. Порнография кӧрӱп турган коркышту кӧп улус эш-нӧкӧриле колбуларын ӱрейт, бойын тообой барат, уйадын укпай барат. Је эҥ ле јаманы, анайып олор Кудайла колбуларын ӱреп јат. Оныҥ учун порнографияны кӧрӱп тургандар бойына јаан каршу јетирет деп, јарт кӧрӱнет. Порнографияныҥ каршузын тереҥ шыркага тӱҥдештирерге јараар. Андый шырка узакка јазылбай јат, керек дезе јаман сорбулар артыргызат.

Је Иегова бисти Сатананыҥ андый тузагынаҥ корулап алар аргалу деп ундыбас керек. Тузакка тӱшпеске, израильдиҥ эрлери чилеп јӱрбей, карын Кудайдыҥ «кажы ла айткан сӧзине багынар» керек (Чыг. 19:5). Кудай порнографияны чек кӧрӧр кӱӱни јок деп ундыбас керек. Бис Иегованыҥ мындый кӧрӱмине нениҥ учун алаҥзыбай јадыс?

Сананып ийзеер де: јебрен ӧйдӧ Кудайдыҥ Израиль албатыга берген јасактарынаҥ јакшы јасактар болбогон. Бу јасактар, стенедий чилеп, Израиль албатыны ӧскӧ албатылардыҥ јескинчилӱ чӱм-јаҥдарынаҥ корулаган (Јаҥ. т. 4:6—8). Анайда ок бу јасактардаҥ Иегованыҥ балыр јӱрӱмди кӧрӧр кӱӱни јогы кӧрӱнет.

Израильге одоштой јаткан албатылар кирлӱ половой колбуларды јаман кӧрбӧгӧн. Оныҥ учун Иегова албатызына мындый јакару берген:  «Мен слерди апарып јаткам Ханаан јериниҥ улузыныҥ керектерин этпегер. [...] Бу јер быјарсып калган, оныҥ учун мен оны кинчеги учун кату каруузына тургузарым» (Лев. 18:3, 25). Израильдиҥ агару Кудайы хананейлердиҥ јӱрӱмин коркышту јескинчилӱ кӧргӧн, оныҥ учун Кудайдыҥ кӧзинде олордыҥ јаткан јери де кирлӱ ле быјарла толо болгон.

Иегова хананейлерди кату каруузына тургузып та саларда, ӧскӧ албатылар оноҥ ло ары балыр јӱрӱм јӱрген. Је 1500 јылдаҥ ажыра ӧй ӧдӧ берерде, элчи Павел христиандарды айландыра јаткан албатылардыҥ нормалары керегинде мындый сӧстӧр айткан: «Олор нени де сеспей барып, бойлорын балыр јӱрӱмге берип, кандый ла быјар керектерди тойор-канарын билбей эдип јадылар» (Еф. 4:17—19). Бӱгӱнги кӱнде кӧп улус андый ла јӱрӱм јӱрет. Оныҥ учун Кудайдыҥ чындык ишчилери, канча кире аргазы бар, јескинчилӱ немелерди кӧрбӧс учурлу.

Порнография кӧрӱп тургандар Кудайды тообой турганын кӧргӱзет. Кудай улусты бойына кеберлеш эдип ле јаманды ла јакшыны сезип турар эдип јайаган. Ол улуска половой јӱрӱм јанынаҥ ойгор јасактар берген. Оныҥ амадузыла болзо, мындый колбуларла јӱк ле эш-нӧкӧрлӧр јакшызынар учурлу (Баш. 1:26—28; Укаа 5:18, 19). Је порнография чыгарып таркадып турган улус Кудайдыҥ ак-чек болорыныҥ нормаларын бир де тообой јат. Андый улус Кудайды уйатка тӱжӱрет. Порнография таркадып, Кудайдыҥ јасагын бузып турган улустыҥ ончозын Иегова јаргылап салар (Рим. 1:24—27).

Је биле тура порнографияны кӧрӱп эмезе кычырып турган улус керегинде нени айдар? Кезик улустыҥ санаазыла, порнографияда јаман ла неме јок. Је чынынча болзо, андый улус, Кудайдыҥ јасактарын бир де тообой турган улустыҥ тоозына кирип турганын билбей јадылар. Оныҥ да учун Кудайдыҥ чындык ишчилери порнографияны јескинчилӱ неме деп кӧрӱп турар учурлу. Агару Бичик: «Иегованы сӱӱп тургандар, јаманды кӧрӧр кӱӱнигер јок болзын» — деп айдат (Сар. 97:10).

Керек дезе порнографияны кӧрбӧскӧ дӧ турган кижи, андый ченелте боло берзе, тузакка тӱжӱп калардаҥ айабас. Бис ончобыс толо кеминде эмезис, оныҥ учун биске сексуальный кӱӱнисти  токтодорго кезикте кӱч болуп јат. Анайда ок порнография кӧрӧринде бир де јаман неме јок деп бойысты бӱдӱмјилеп салардаҥ айабазыс (Иер. 17:9). Андый да болзо, кӧп улус христиан болуп баштайла, мындый тартыжуда јеҥип алган. Мыны билгенис порнографияны кӧрӧтӧн ченелтеге кирбеске болужар. Эмди, Кудайдыҥ Сӧзи слерге Сатананыҥ мындый тузагына тӱшпеске канайып болужарын шӱӱжип ийектер.

Ӧрӧги айдылганыла, кӧп израильтяндар јастыра кӱӱнине алдыртып, тӱбекке тӱшкен. Андый неме бӱгӱн де болуп калардаҥ айабас. Христостыҥ ӱренчиги Иаков мынайып бичиген: «Је кажы ла кижи акту бойыныҥ кычазына јилбиркедип ле мекеледип ченелет. Кыча дезе, табынала, кинчек чыгарып алат, эдилген кинчек — ӧлӱм экелет» (Иак. 1:14, 15). Кижи јастыра кӱӱнин токтотпозо, учы-тӱбинде кинчек эдердеҥ айабас. Оныҥ учун кинчектӱ санааларды бойыстаҥ сӱрер керек.

Јаман санаалар келзе, тургуза ла Иисустыҥ айтканын бӱдӱригер: «Колыҥ эмезе будыҥ јаманга баштаза, олорыҥды кезип, бойыҥнаҥ таштап ий. [...] Кӧзиҥ јаманга баштаза, оныҥды кодорып, бойыҥнаҥ таштап ий» (Матф. 18:8, 9). Бу ӱлгерде Иисус бисти бойыстыҥ эди-каныска каршу јетирзин деп айтпаган. Је биске буудак болуп турган немедеҥ капшай ла айрыларын кӧргӱскен. Иисустыҥ бу сӧстӧри порнография кӧрӧтӧн ченелтеле тартыжарга канайып болужат?

Слер кандый бир јескинчилӱ неме кӧрӱп ийзеер, слерге каршу болбос деп сананбагар. Тургуза ла кайа кӧрӱгер. Капшай ла телевизорды, компьютерди эмезе телефонды ӧчӱригер. Ајаругарды јакшы немеге эдигер. Ол тушта слер бойыгардыҥ кӱӱнигерге бактыртып јӱрбезигер, карын кӱӱнигерди бойыгарга бактырып аларыгар.

Слер порнографияны кӧрӧрин токтодып та салган болзоор, је кезикте кӧргӧн јескинчилӱ немелер санаагарга тӱҥей ле келип турза, нени эдер эдигер? Порнографияныҥ јуруктары ла балыр санаалар кижиниҥ меезине тереҥ кирип  калат. Анайып олор кенетийин санаага кирип турардаҥ айабас. Андый ӧйдӧ слер јастыра кӱӱнигерди бӱдӱрерге кӱӱнзеп, мастурбация эдер эмезе оноҥ до јаман неме эдер болороор. Оныҥ учун слерге кенетийин кирлӱ санаалар келзе, олорло тартыжарга белен болыгар.

Слердиҥ санаалараар ла эткен керектереер Кудайды сӱӱндирип турзын деп, бек шӱӱп алыгар. Элчи Павелдеҥ тем алыгар. Ол бойы керегинде мындый сӧстӧр бичиген: «Эди-канымды согуп, оны бойыма кул эдип јадым» (1 Кор. 9:27). Кирлӱ кӱӱнигерге јеҥдиртпегер. Агару Бичикте айдылганын бӱдӱригер: «Санаагарды јаҥыртып, бойыгарды солыгар. Анайып, Кудай слердеҥ нени кӱӱнзеп турганын, не Ого јакшы, не јарап турганын, Оныҥ толо кеми не болгонын билип аларыгар» (Рим. 12:2). Ундыбагар, бистиҥ ырызыс кинчектӱ кӱӱнисти бӱдӱрип јӱргенистеҥ эмес, је Кудайга јараар эдип сананганыстаҥ ла јӱргенистеҥ камаанду.

Слерге јастыра санаалар келип турза, Агару Бичиктиҥ кезик ӱлгерлерин эске алып туругар. Темдектезе, Сарын 119:37; Исаия 52:11; Матфей 5:28; Ефестегилерге 5:3; Колоссыдагыларга 3:5; 1 Фессалоникадагыларга 4:4—8. Бу ӱлгерлерди ӱренип аларга јараар. Олор порнографияга Иегованыҥ кӧрӱмиле кӧрӧргӧ, анайда ок Иегова слердеҥ нени сакып турганын оҥдоорго болужар.

Је порнография кӧрӧр кӱӱнис тыҥ келип турза эмезе балыр санаалар баштаҥ чек чыкпай турза, нени эдер? Иисус Христостоҥ тем алыгар (1 Петр 2:21). Иисус чӧҥӱрилип калган кийнинеҥ, Сатанага ченедип турарда, бойын канайып тудунды? Ол Сатанага јеҥдиртпеске, оныҥ ченелтелерин ӧдӧргӧ, Агару Бичимелдиҥ сӧстӧрин тузаланган. Иисус ого: «Менеҥ кеде тайыл, сатана!» — деп айдарда, Сатана оны артыргызып салган. Иисус Сатанага бир де јай бербеген, слерге де анайып эдер керек (Матф. 4:1—11). Сатана ла оныҥ телекейи слердиҥ санаагарды оноҥ ло ары киртидерге албаданар, је слер бир де јайымжыбас учурлу. Анайып, бу тартыжуны Иегованыҥ болужыла јеҥип аларыгар.

Иеговага јаантайын мӱргӱп, болуш сурагар. Павел мынайып айткан: «Не де керегинде санааркабагар, је јаантайын мӱргип ле сурап, алкыш айдып, Кудайдыҥ алдында керексигенеерди ачыгар. Ол тушта Кудайдыҥ не ле сагыштаҥ бийик амыры јӱректеригерди ле сагыжыгарды Христос Иисустыҥ Бойында чеберлеер» (Флп. 4:6, 7). «Кудайдыҥ амырын» табып алзаар, слер јастыра санааларга алдыртпазыгар. Анайда ок Иеговага јууктазаар, «Ол слерге јууктаар» (Иак. 4:8).

Слер Јер-телекейдиҥ Бийиле јуук колбуларлу болзогор, Сатананыҥ кандый да тузагына тӱшпезигер. Иисус: «Бу телекейдиҥ кааны [Сатана] келип јат. Оныҥ Менде ӱлӱӱзи јок [ондо мени башкарар јаҥ јок, ЈТ]» — деп айткан (Иоанн 14:30). Иисус нениҥ учун алаҥзу јогынаҥ мынайып айткан? Ол мынайып јартайт: «Мени Ийгени дезе Мениле кожо: Ол Мени јаҥыскандыра артырбады, нениҥ учун дезе Мен качан да болзо, Ого јараганыла эдип турум» (Иоанн 8:29). Слер Иегованы јаантайын сӱӱндирерге албаданып турган болзогор, ол слерди качан да артыргыспас. Айдарда, порнографияны кӧрбӧгӧр, ол тушта слер Сатананыҥ тузагына тӱшпезигер.