TIYA mamitaˈlif ko Israil to Yortan ˈAlo micomod i sapafeli no Kawas cangranan a kanatal i, mitahidangay ko ˈalafang a fafahiyan to faˈinayan no Israil mirienang to tahka. O ngaˈayay a toki konini, wa ngaˈay cangra mafanaˈ to faelohay a widang, malacafay komaen minanom ato makero. Soˈlin o nanaman ato palinian no waywayan noniya ˈalafang fafahiyan misafelitay to Sarikec no Kawas, kawra harateng no roma faˈinayan no Israil: ‘Awaay ko maanan, ecato ka fiyor kako,’ sanay.

 Ikor mifekaday ko maanan a demak hani? Masowalay no Fangcalay Cudad, maˈaˈodangay to fafahiyan no Moap ko roma tamdaw. Misaaliay koya fafahiyan cangranan mitaˈong to makaniway kawas, hai sanay cangra midemak! Telocto, ‘mangolaway ci Yihofa to Israil tamdaw.’—Saˈosi 25:1-3.

Itiniay tosa pakayraan a misafelit ko Israil to Sarikec no Kawas, mitaˈongay to samiyay ato maˈodangay. Telocto, pakayni i caka pidofdof to Kawas tosaay ˈofad ko mapatayay tamdaw. (Kasadakan 20:4, 5, 14; Limoˈot 13:6-9) Patayen cangra toniya toki, tada ka adayayanto, ano cowa pisafelit cangra to sarikec, wa ngaˈay micomod i sapafeli no Kawas cangranan a kanatal.—Saˈosi 25:5, 9.

Masowalay no tarokos ci Pawlo koniya demak, sanay: “O sakaira nonini a demak i cangraan i, o sapakafanaˈaw to tamdamdaw. O sakapitilid tonini i, o sapalimoˈotaw i titaanan. Nawhani o pahereherekan nonini a hekal ko ˈorip ita anini.” (1 Korinto 10:7-11) Maˈaraw ko Israil taˈangay ko raraw ecato picomod i Mikiˈokan a Pala, maedeng malitaˈangay ci Satan. Mikitini i mamacenon kita, samanen sapicongedaw ci Satan kitanan micomod i faelohay a hekal no Kawas.

Mafanaˈay ci Satan mikayhid to tamdaw, misamacayay cingra pakararaw to Krisciyang. Malecad o salakatay, tano malafoay a madadiˈiyay a waywayan ko sapitalakal ningra anini, ano miseping kita to kaacekan a lalakaw wa madolo a malefong toniya talakal.

ˈAyaw no pina poloˈ miheca, sapinengnengaw to kaacekan a lalakaw ko tamdaw tayraay i mikiriwiˈay a ikakang ato patiyaman, kawra matalaway maˈaraw no tao. Anini sato, ngaˈayay ko tamdaw icowa kaˈaraw no tao a pakayraan minengneng to kaacekan a lalakaw, tinakoen itini katayalan anca lalomaˈ no paliding a minengneng. Roma pala, caka sadak ko tamdaw ngaˈayayto miseping to kaacekan a lalakaw.

O soci, pingpan ato wangcan madoloayto ko tamdaw a minengneng to kaacekan a lalakaw. Ano romakat i maci anca mikalic to faso, ngaˈayay ko tamdaw tano soci ato pingpan minengneng to kaacekan a sasing.

Samanen madoloayto a minengneng to kaacekan a lalakaw, hanaca mahimeday, o piwarak no kaacekan a lalakaw to tamdaw mikikakaay to salakatay. O minengnengay to kaacekan lalakaw a tamdaw malecaday o miripaˈay to sanengseng no niyah, mapaelayto ko falocoˈ, mapalakay ko raramod alatek. Pakidemay i, o hatiniay waywayan mipalakay to kalawidang nangra ci Yihofaan. Minengneng ko ˈalomanay tamdaw to kaacekan lalakaw mawalakay ko falocoˈ, hanaca halafinay padadotoc ko tatiihay a pifiyor. Mahapinangay, tada pakidemay ko pipalak no kaacekan lalakaw to tamdaw.

Ngaˈayay ci Yihofa midipot kitanan, padama kitanan miliyas to talakal ni Satan. Ano makalimay kita madipot no Kawas, o mamisoˈliˈlin a midofdof to sowal Ningra, hamaan matiya o pakidemay ko pitiˈer to niyah a Israil tamdaw. (Kasadakan 19:5) Tada ˈintehay ci Yihofa to kaacekan lalakaw, hano mafanaˈ kita hani?

O sapafeli ni Yihofa to Israil a Sarikec, cowa ka lecad to sarikec no kalo a kitakit. O sarikec malecaday o lowil, midipot to Israil eca ka nahol no waywayan no roma finacadan. (Limoˈot 4:6-8) Mikitini i sarikec mahapinang ita, ˈintehay ci Yihofa to malafoay madadiˈiyay a waywayan.

Pasowalan ni Yihofa ko Israil to tatiihay a waywayan no taliyokay a finacadan.  Palimoˈot cangranan: ‘O kakeriden Ako tamowanan a Kanan pala, o demak no itiraay tamdaw, aka a pidemak kamo . . . cowa ka korac ko sera nangra. O sasaˈosien Ako ko raraw nora sera.’ Pakaynien i makoracay a Kawas, tada maperaray ko pakayraan no Kanan tamdaw maˈorip, mansa o cikaditay ko kitiraan nangra saan ko pinengneng no Kawas.—Lifi 18:3, 25.

Misayfangan ni Yihofa ko Kanan a tamdaw, kawra o roma finacadan padotocay midemak to kaacekan a demak. Maedeng ikor no 1,500 miheca, sowal ni Pawlo to hekal tamdaw, “mafukilto cangra to ngodo,” saka, “maˈotit a midemak to masamaamaanay a kaacekan a demak.” (Ifiso 4:17-19) Malecaday ko pakayraan anini, cowa ka ngodo ko tamdaw midemak to kaacekan a demak. Anini, midokoay to Kawas a tamdaw, o mamiliyas to kaacekan lalakaw.

Tada ˈintehay ci Yihofa to kaacekan lalakaw. Palecaden Ningra to tireng no Niyah a misangaˈ ko tamdaw, pafeli kitanan to mangodoay harateng, pasifanaˈ kitanan to matatodongay tatiihay. Citanengay ko Kawas, itini madadiˈiyay a demak patirengay to palinian, edengan o mararamoday ko ngangaˈay madadiˈi. (Satapangan 1:26-28; Taneng 5:18, 19) Mihaenay, misangaˈ, palilam anca miowing to tao minengneng to kaacekan lalakaw, o cowa ka ngodo to patirengan no Kawas a palinian, cowa ka ngodo ci Yihofaan. O mihaenay to demak a tamdaw o mamicada to sasawkit no Kawas.—Loma 1:24-27.

Minengneng to kaacekan lalakaw o milawlaay aca sanay ko harateng no roma tamdaw, kawra mihaen to demak, o midamaay to cowa ka ngodo to palinian ni Yihofaan a tamdaw. Ihkalay ko sowal no Fangcalay Cudad: ‘Maolahay ci Yihofaan a tamdaw, kaˈinteh kamo to tatiihay demak.’ (ˈOlic 97:10) Mihaenay, o midokoay to Kawas a tamdaw, o mamikaˈinteh to kaacekan lalakaw.

O roma tamdaw mafanaˈayto cowa ka ngaˈay minengneng to kaacekan a lalakaw, kawra cowa pakatoor. Samanen cowa ko malefotay ko tamdaw, latekay iraay ko malafoay a coos, hanaca roma tamdaw milipalaway  to niyah, minengneng to kaacekan lalakaw coko raraw sanay a miharateng. (Yirimiya 17:9) Nikawrira, malaˈosiay miremo to dangoc no niyah ko roma Krisciyang. Ano misaˈicelay kiso a micoˈay to mararaway a coos, sayaren ko falocoˈ, oha mamalaˈosi kiso. Nengnengen ita sasamaan ko Kimad no Kawas padama kitanan miliyas to talakal ni Satan.

Masowalay i fafekang, o mararaway a coos pairaay to ka adayayan a teloc no Israil, o hatiniay ka adayayan mamifekad anini alatek. Sowal no safa ni Yis ci Yakop, “O ˈanof no tireng ko sakasolot no tamdaw a masawi. Cipuyapuy ko ˈanof ningra i, mahofoc to raraw.” (Yakop 1:14, 15) Ano lomahad i falocoˈ no tamdaw ko mararaway harateng, wa mikayat to sakararawaw. Mihaenay, o fafalahen ita ko mararaway a coos—hamaan haharatengsa to malafoay a demak.

Ano mahapinang iso haharateng sanay ko niyah to malafoay a demak, tatangsol a misaˈosi to demak. Sowal ni Yis: “O romasato, ano sakaciraraw iso ko tatihi a kamay, ano eca i, o tatihi a waˈay iso i, ketonen a mifalah . . . Ano sakaciraraw iso ko tatihi a mata iso i, dicohen a mifalah.” (Matay 18:8, 9) Cowa ko papidokaˈay ci Yis kitanan, patinakoay a mitadtad, o kakilimen ita ko lalangian no mararway harateng, dotoc tangsolen a mifalic. Wa samaan kita midofdof toniya limoˈot, miliyas to kaacekan a lalakaw hani?

Latekay fahal sanay masadak i ˈaˈayaw ko kaacekan lalakaw, hamaan misakaniw to niyah, somowal: “Cato ka fiyor kako.” Ka tangsol paliyas to minengnengan, kalikien mipadeng ko tilifi, tangsol mipadeng to tingnaw ato soci, ano mihaen o mamaˈimer ko harateng iso, wa eca ka maˈmet no mararaway harateng.

Ano cowato pinengneng kiso to kaacekan lalakaw, kawra masadakay i ponoˈ kora sasing, sasamaanto hani? O kaacekan  lalakaw wa halafin materek i ponoˈ alatek, hanaca fahal sanay masadak. Itiya, sapidemakaw kiso to kaacekan a demak, tinakoen misolasol. Mihaenay ka pisinanot, micerid a misaday micoˈay to sakayhid.

Seteken ita ko falocoˈ palecad to harateng ato waywayan no niyah to saali no Kawas. O ngaˈayay taˈarawan ko tarokos ci Pawlo, ‘padotocay misetiˈ to tireng no niyah, ho malo mitengilay to limoˈot a koli ko tireng.’ (1 Korinto 9:27) Hamaan maˈmet no mararaway a coos, ‘safaelohen ko harateng a mifalic to niyah, ho mahapinang ko ngaˈayay, malefotay kahemekan a araaw no Kawas.’ (Loma 12:2) O karenec mitoor to saali no Kawas misimsim a midemak, mikikakaay to pitoor to mararaway a coos.

Tanamen paifalocoˈen ko sinael, ano iraay ko mararaway coos i ponoˈ i, simsimen ko sinael. Tinakoen: ˈOlic 119:37; Isaya 52:11; Matay 5:28; Ifiso 5:3; Kolosay 3:5; 1 Tisalonika 4:4-8. Oniya sinael papadama kitanan cipinang to saali ni Yihofa, mamahecad kita ci Yihofaan mikaˈinteh to kaacekan a lalakaw.

Ano sapinengnengaw kiso to kaacekan lalakaw anca miharateng to kaacekan a demak i, sasamaanto hani? Songilaˈen misinanot ko taˈarawan ni Yis, mitodong cingranan. (1 Pitiro 2:21) Ikor micada to ˈino ci Yis i, padotocay ci Satan mikayhid cingranan. Samanay ko demak ni Yis hani? Padotocay ci Yis a miconged, tano adihayay a sinael miconged ci Satanan. Pasowal sa cingra: “Satanaw, piliyas takowanan.” Ngaˈ miliyasay ci Satan. Pakayni i piˈodis ni Satan, cowa pisawad ci Yis a miconged, haenen iso ci Yisan aka pisawad. (Matay 4:1-11) Ci Satan ato hekal ningra, sapitomesaw i ponoˈ iso to kaacekan a harateng, kawra aka a mapadik, ci Yihofa mamidama tisowanan pakalowid to sakayhid no kaacekan a lalakaw.

Cangacangen ita ko sadama ni YIhofa. Sowal ni Pawlo: ‘Pasowalen ko Kawas to milongocan namo. Mihaen, papafelien no Kawas kamo to rihaday, ikakaay no niharatengan no tamdaw. O hatiniay rihaday pakayniay ci Yis Kristoan, wa ngaˈay misimaw to falocoˈ ato harateng namo.’ (Filipi 4:6, 7) Ano misaˈicelay kiso micoˈay to sakayhid no kaacekan lalakaw, o sapafeli no Kawas a rihaday, papaira to haˈicel iso a tanektek. Ano ingiden iso ci Yihofa, o aingiden Ningra kiso.—Yakop 4:8.

Ano makalimay kiso madipot, miliyas to sakalefongaw i talakal ni Satan, pairaen ko ngaˈayay kalawidang to saˈakawangay a Tatapangan. Sowal ni Yis: ‘Wa irato ko mikowanay to hekal a hongti ci Satan, awaay ko ˈicel ningra misamaan takowanan.’ (Yohani 14:30) Hano pakasoˈlin ci Yis tonini hani? Sanay ko sowal ningra: ‘Mikapotay takowanan koya miocoray takowanan. Cowa piliyas Cingra takowanan, cowa pakacecay takowanan, samanen miceriday kako midemak to kahemekan Ningra a demak.’ (Yohani 8:29) Todongen ita ci Yis padotoc midemak to kahemekan ni Yihofa a demak, cowa ko laliyasen ni Yihofa kita. Misaˈicel kita a miliyas to kaacekan lalakaw, ecato ko mamalefong i talakal ni Satan.