ГӘДИМ Исраил халгы Јеһованын онлара вәд етдији дијара ҝирмәк үчүн Иордан чајыны кечмәјә һазырлашырды. Бу заман онларын бәзи гонаглары пејда олур. Бу гонаглар јаделли гадынлар иди, онлар исраилли кишиләри шәнлијә дәвәт етмәјә ҝәлмишдиләр. Бу тәклиф чох мөһтәшәм ҝөрүнүрдү. Јени достлар, рәгс, дадлы јемәкләр олдугҹа ҹәлбедиҹи сәсләнирди. Јаделли гадынларын әхлаг дәјәрләри вә адәт-әнәнәләри Јеһованын исраиллиләрә вердији Ганунла узлашмаса да, ҝөрүнүр, исраилли кишиләрдән бәзиләри «биз тәсирә дүшмәрик, еһтијатлы олаҹағыг» дејә дүшүнмүшдү.

 Бәс нә баш верди? Аллаһын Кәламында дејилир: «Халг Муаб гызлары илә зина етмәјә башлады». Әслиндә, бу гадынлар исраилли кишиләрин сахта аллаһлара ибадәт етмәсини истәјирди. Белә дә олду! Вә һаглы олараг, «Јеһованын Исраилә гәзәби тутду» (Сај. 25:1—3).

Бу исраиллиләр Аллаһын Ганунуну икитәрәфли позду: онлар бүтләрә сәҹдә гылды вә ҹинси әхлагсызлыг етдиләр. Минләрлә инсан итаәтсизлик уҹбатындан һәјатыны итирди (Чых. 20:4, 5, 14; Ган. 13:6—9). Ән дәһшәтлиси исә бу фаҹиәнин нә заман баш вермәси иди. Әҝәр исраиллиләр Аллаһын Ганунуну позмасајдылар, гыса бир заманда Иордан чајыны кечиб Вәд едилмиш дијара дахил олаҹагдылар (Сај. 25:5, 9).

Бу һадисәләрлә бағлы һәвари Булус јазмышды: «Бүтүн бунлар ибрәт кими онларын башына ҝәлди вә бу дөврүн сонунда јашајан бизләр үчүн хәбәрдарлыг мәгсәдилә јазылыб» (1 Кор. 10:7—11). Шүбһәсиз, бу исраиллиләрин ҹидди ҝүнаһа јол вермәси вә нәтиҹәдә Вәд едилмиш дијара ҝирә билмәмәси Шејтанын үрәјинҹә иди. Исраиллиләрин сәһвиндән ибрәт ҝөтүрмәјимиз олдугҹа ваҹибдир, чүнки Шејтанын ән бөјүк арзусу бизи Аллаһын вәд етдији Ҹәннәтә дахил олмагдан мәһрум етмәкдир!

Шејтан мәсиһиләри овламаг үчүн јахшы билдији вә ишә јарајан тәләләрдән истифадә едир. Гејд олундуғу кими, исраиллиләри тәләјә салмаг үчүн о, ҹинси әхлагсызлыгдан истифадә етмишди. Әхлагсызлыг бу ҝүн дә тәһлүкәли тәләләрдән бири олараг галыр. Бизи әхлагсызлыг тәләсинә сүрүкләјәҹәк ән ҝүҹлү васитәләрдән бири порнографијадыр.

Бу ҝүн һеч кимин хәбәри олмадан порнографијаја бахмаг мүмкүндүр. Әввәлләр порнографијаја бахмаг истәјәнләр намүнасиб филмләр изләмәк үчүн кинотеатра ҝетмәли, јахуд да порнографик мәзмунлу китабларын сатылдығы мағазалара үз тутмалы иди. Бир чохлары чох ҝүман ки, киминсә онлары ҝөрәҹәјиндән утандығы үчүн бу кими јерләрдән узаг дурурду. Амма инди интернет васитәсилә ишдә, јахуд машында отуруб порнографијаја бахмаг мүмкүндүр. Бир чох өлкәләрдә исә истәр кишиләрин, истәрсә дә, гадынларын елә өз евләриндәҹә порнографијаја бахмаг имканы вар.

Һәлә бу һарасыдыр. Електрон ҹиһазлар порнографијаја бахмағы даһа да асанлашдырыб. Инсанлар күчәдә ҝәзәндә, автобусда, јахуд гатарда електрон ҹиһазларында әхлагсыз шәкилләрә баха билир.

Бу ҝүн порнографијаја бахмаг вә буну ҝизләтмәк асан олдуғу үчүн әввәлки дөврә нисбәтдә даһа чох инсан зәрәр ҝөрүр. Порнографијаја алудә олан сајсыз-һесабсыз инсан аилә һәјатына, өзүнәһөрмәт һиссинә вә виҹданына хәләл јетирир. Ән бетәри исә, онлар Аллаһла мүнасибәтләрини тәһлүкә алтына атыр. Әмин ола биләрсиниз ки, порнографија она бахан инсана бөјүк зәрәр верир. Әксәр һалларда исә инсана дәрин емосионал јара вурур. Бу јаралар јаваш-јаваш сағалса да, изләри узун илләр гала билир.

Шејтанын бу тәләсинә дүшмәмәк үчүн Јеһованын тәгдим етдији мүдафиәдән аҝаһ олмалыјыг. Әҝәр Онун мүдафиәсиндә олмаг истәјириксә, исраилли кишиләрдән фәргли олараг, Јеһоваја «һәр шејдә» итаәт етмәлијик (Чых. 19:5). Биз дәрк етмәлијик ки, Јеһова порнографијаја нифрәт едир. Буну нәјин әсасында демәк олар?

Ҝәлин бир факты нәзәрә алаг ки, Јеһованын Исраил халгына вердији ганунлар һәмин дөврдә јашајан диҝәр халгларын ганунларындан фәргләнирди. Бу ганунлар, санки бир сәдд кими, исраиллиләри әтраф халглардан вә онларын пис әмәлләриндән горујурду (Ган. 4:6—8). Онлар ваҹиб бир һәгигәти ајдын ҝөстәрирди: Јеһова ҹинси әхлагсызлыға нифрәт едир.

 Јеһова әтраф халгларын әхлагсыз давранышларыны садаладыгдан сонра исраиллиләрә демишди: «Сизи апардығым Кәнан дијарындакы әмәлләри тәкрарламајын... Онларын торпағы да мурдардыр. Мән о торпағын сакинләрини ҝүнаһларына ҝөрә ҹәзаландыраҹағам». Доғрудан да, кәнаниләрин һәјат тәрзи Исраилин мүгәддәс Аллаһынын ҝөзүндә о гәдәр мәнфур иди ки, О, онларын јашадығы торпағы да натәмиз, мурдар һесаб едирди (Лав. 18:3, 25).

Јеһова кәнаниләри ҹәзаландырса да, диҝәр халглар һәлә дә әхлагсызлыг етмәјә давам едирди. Бундан тәхминән 1500 ил сонра һәвари Булус мәсиһиләрин дөврүндә јашајан башга халглары белә тәсвир етмишди: «Онлар абыр-һәјаны бүсбүтүн итирәрәк аҹҝөзлүклә һәр ҹүр натәмиз иш ҝөрмәк үчүн өзләрини азғынлыг ҝирдабына гәрг едибләр» (Ефес. 4:17—19). Бу ҝүн дә чохлары әхлагсызлыг едир вә бундан хәҹаләт чәкмир. Һәгиги мәсиһиләр һәр јанда нүмајиш олунан әхлагсыз сәһнәләри ҝөрмәмәк үчүн әлләриндән ҝәләни етмәлидир.

Порнографија Аллаһа гаршы бөјүк һөрмәтсизликдир. Аллаһ инсанлары Өз сурәтиндә вә Өзүнә бәнзәр јарадыб. О, бизә ләјагәт һисси бәхш едиб. Јеһованын ҹинси мүнасибәтләрлә бағлы гојдуғу мәһдудијјәтләр һикмәтлидир. О, ҹинси мүнасибәти никаһ дахилиндә әр-арвада һәзз ҝәтирмәси үчүн бәхш едиб (Јар. 1:26—28; Мәс. 5:18, 19). Бәс порнографик материаллары истеһсал едән вә ја инсанлары онлара бахмаға тәшвиг едәнләр нә едир? Онлар Аллаһын әхлаг дәјәрләрини рәдд едир. Бәли, порнографијаны тәблиғ едәнләр Јеһова Аллаһа гаршы бөјүк һөрмәтсизлик едир. Порнографик материаллар истеһсал едәрәк, јахуд башгаларыны онлара бахмаға сәсләјәрәк Аллаһын әхлаг дәјәрләринә мәһәл гојмајанлар Онун һөкмүнә дүчар олаҹаг (Ром. 1:24—27).

Бәс биләрәкдән порнографијаја баханлар вә ја бу мәзмунлу нәшрләр охујанлар һагда нә демәк олар? Бәзиләри бунун зәрәрсиз олдуғуну дүшүнә биләр. Әслиндә исә онлар Јеһованын ганунларыны һечә сајанлары дәстәкләмиш олурлар. Бәлкә дә, порнографијаја бахмаға башлајанда онларын мәгсәди бу олмајыб. Истәнилән һалда, Мүгәддәс Китаб ајдын ҝөстәрир ки, Аллаһын һәгиги хидмәтчиләри порнографијадан икраһ етмәлидирләр. Кәламда  јазылыб: «Еј Јеһованы севәнләр, пислијә нифрәт един» (Зәб. 97:10).

Лакин порнографијаја бахмағы тәрҝитмәк истәјәнләр буна чәтинлик чәкә биләр. Биз гејри-камилик вә натәмиз ҹинси арзулара гаршы мүбаризә апармалы олуруг. Үстәлик, хаин үрәјимиз бизи Аллаһын ганунундан кәнара чыхмаг үчүн бәһанә ахтармаға тәһрик едә биләр (Әрм. 17:9). Амма сонрадан мәсиһи олан бир чохлары бу дөјүшдән галиб чыха билибләр. Буну билмәк порнографија илә мүбаризә апаранларын она гаршы дурмаг әзмини мөһкәмләндирәҹәк. Ҝәлин ҝөрәк Аллаһын Кәламы бизи Шејтанын порнографија тәләсиндән неҹә горујур.

Гејд олундуғу кими, исраилли кишиләрин чоху јанлыш арзуларынын онлары фәлакәтә сүрүкләмәсинә јол верди. Бу ҝүн дә ејни шеј баш верә биләр. Иса Мәсиһин гардашы Јагуб тәһлүкәни белә тәсвир етмишди: «Һәр кәс өз нәфси илә товланыб алданараг сынаныр. Сонра нәфс бојлу галыб ҝүнаһ доғур» (Јаг. 1:14, 15). Әҝәр инсан үрәјиндә јанлыш арзуларын бој атмасына јол верәрсә, чох ҝүман ки, ҝүнаһ ишләјәҹәк. Одур ки, әхлагсыз фикирләрдән азад олмалы, бу һагда дүшүнмәмәлијик.

Ҝөрсәниз ки, натәмиз фикирләрдән гуртула билмирсиниз, гәти тәдбирләр ҝөрүн. Иса Мәсиһ демишди: «Әҝәр әлин вә ја ајағын сәни ҝүнаһа сүрүкләјирсә, ону кәс ат... Һәмчинин әҝәр ҝөзүн сәни ҝүнаһа сүрүкләјирсә, ону чыхар ат» (Мәт. 18:8, 9). О, бу сөзләри һәрфи мәнада демирди. Иса бунунла бизи ҝүнаһа сүрүкләјән шејин мәнбәјини дәрһал вә гәтијјәтлә арадан галдырмалы олдуғумузу нәзәрдә тутурду. Бу мәсләһәти порнографија мәсәләсинә неҹә тәтбиг етмәк олар?

Әҝәр порнографијаја раст ҝәлсәниз, «бу, мәнә тәсир етмәз» дејә дүшүнмәјин. Дәрһал үзүнүзү чевирин. Ҹәлд телевизору сөндүрүн. Компүтер вә ја електрон ҹиһазынызы јубанмадан сөндүрүн. Фикринизи пак, мәгбул шејләрә көкләјин. Белә етсәниз, јанлыш арзулар сизи јох, сиз онлары идарә едәҹәксиниз.

Бәс порнографијаја бахмаг вәрдишиндән гуртулдугдан сонра белә, кечмишдә  бахдығыныз сәһнәләр вахташыры ҝөзүнүздә ҹанланырса, онда неҹә? Порнографик шәкилләр вә ја фикирләр узун мүддәт инсанын јаддашында гала билир. Онлар истәнилән ан чағырылмамыш гонаг кими пејда олур. Бу заман инсанда мастурбасија кими натәмиз әмәлләрә истәк јарана биләр. Одур ки, бу ҹүр фикирләрин һәр ан пејда ола биләҹәјини нәзәрә алын вә онларла мүбаризә апармаға һазырлыглы олун.

Аллаһын ирадәсинә ујғун дүшүнмәјә вә давранмаға даһа да гәтијјәтли олун. «Бәдәнимә ҹәфа вериб ону көлә кими өзүмә табе етдирирәм» дејән һәвари Булуса бәнзәмәјә чалышын (1 Кор. 9:27). Натәмиз истәкләрин сизи идарә етмәсинә јол вермәјин! «Дүшүнҹәнизи јениләшдирәрәк бүсбүтүн дәјишин ки, Аллаһын јахшы, хош вә камил ирадәсини дәрк едәсиниз» (Ром. 12:2). Јадда сахлајын: Аллаһын ирадәсинә ујғун дүшүнмәк вә давранмаг ҝүнаһлы истәкләрә тәслим олмагдан даһа бөјүк мәмнунлуг ҝәтирир.

Мүгәддәс Китабдан бәзи ајәләри әзбәрләмәјә чалышын. Ағлыныза әхлагсыз фикирләр ҝәләндә өзүнүзү һәмин ајәләр барәдә дүшүнмәјә мәҹбур един. Зәбур 119:37; Әшија 52:11; Мәтта 5:28; Ефеслиләрә 5:3; Колослулара 3:5 вә 1 Салоникилиләрә 4:4—8 кими ајәләр сизә көмәк едәҹәк ки, Јеһова кими порнографијаја нифрәт едәсиниз вә Онун сиздән нә ҝөзләдијини анлајасыныз.

Бәс әхлагсыз шејләрә бахмаг вә онлар һагда дүшүнмәк истәји һәддиндән артыг ҝүҹлүдүрсә, нә едә биләрсиниз? Бизим үчүн өрнәк олан Иса Мәсиһин нүмунәсини аддымбааддым изләјин (1 Бут. 2:21). Вәфтиз олундугдан сонра Шејтан ону ард-арда сынаға чәкир. Иса нә едир? О, һәр дәфәсиндә мүгавимәт ҝөстәрир. Иса ајә далынҹа ајә ситат ҝәтирәрәк Шејтанын сынагларына гаршы дурур. О: «Рәдд ол, Шејтан!» дејир вә Шејтан ондан әл чәкир. Иса Мәсиһ Иблислә мүбаризәдә тәслим олмады, сиз дә тәслим олмајын! (Мәт. 4:1—11). Шејтан вә онун дүнјасы бундан сонра да ағлынызы әхлагсыз фикирләрлә долдурмаға чалышаҹаг, тәслим олмајын, мүбаризәни давам един! Сиз порнографијаја галиб ҝәлә биләрсиниз. Јеһова сизә дүшмәнинизи мәғлуб етмәјә көмәк едәҹәк.

Јеһоваја дурмадан дуа един вә көмәк истәјин. Һәвари Булус дејирди: «Һәр мәсәлә барәдә диләјинизи... Аллаһа билдирин. Онда Аллаһын һәр бир ағылдан үстүн олан сүлһү үрәјинизи вә фикирләринизи Мәсиһ Иса васитәсилә горујаҹаг» (Филип. 4:6, 7). Аллаһын сүлһү ҝүнаһа гаршы мүбаризәнизи асанлашдыраҹаг. Сиз Јеһоваја јахынлашдыгҹа, «О да сизә јахынлашаҹаг» (Јаг. 4:8).

Шејтанын тәләләриндән мүдафиә олунмағын ән ҝөзәл јолу Каинатын Һөкмдары илә јахын олмагдыр. Иса Мәсиһ демишди: «Бу дүнјанын һөкмдары [Шејтан] ҝәлир. Онун мәним үзәримдә һакимијјәти јохдур» (Јәһ. 14:30). Исада бу әминлик һарадан иди? О изаһ етмишди: «Мәни ҝөндәрән мәнимләдир. О, мәни тәк гојмајыб, чүнки мән һәмишә Онун бәјәндији ишләри ҝөрүрәм» (Јәһ. 8:29). Јеһованын бәјәндији ишләри ҝөрдүјүнүз тәгдирдә, О, сизи дә атмајаҹаг. Порнографија тәләсиндән узаг дурсаныз, Шејтан үзәриниздә ағалыг едә билмәјәҹәк.