NAJOLO, naeng menyeberang Sunge Jordan nama halak Israel laho masuk tu Tano na Dijanjihon. Alai, ro ma piga-piga borua sian bangso na asing manjumpangi nasida. Ditogihon angka borua i ma angka baoa ni halak Israel asa marpesta dohot nasida. Ra, hira na so sala do i diulahon. Alana, dapot ni nasida ma dongan na baru, boi marjogeti, jala mangallang sipanganon na tabo. Hape sasintongna, maralo do hasomalan dohot pangalaho ni angka borua i tu Patik ni Debata na dilehon tu halak Israel. Alai ra didok roha ni angka baoa ni halak Israel do, ‘Ndang pola boha i. Ndang gabe tarela-ela hita tu nasida.’

 Alai aha ma na masa? Bibel mandok, “Sampur [mangulahon seks] ma nasida dohot boruboru ni halak Moab.” Sasintongna, ditogihon angka borua i pe baoa ni halak Israel i, asa disomba nasida do debata na so sintong. Jala marhasil do angka borua i! Ujungna, “mansai tarrimas ma Jahowa tu nasida”.​—4 Mus. 25:1-3, Bibel siganup ari.

Disomba halak Israel do patung jala diulahon nasida do seks na so patut. Ndang diihuthon nasida Patik ni Debata. Alani i, gabe mate do marribu halak. (2 Mus. 20:4, 5, 14; 5 Mus. 13:7-10) Hape sasintongna, nunga jonok nasida tu Tano na Dijanjihon i.​—4 Mus. 25:5, 9.

Alani i didok apostel Paulus, “Sude na masa i gabe sipasingot do i tu hita. Jala disurat do i gabe parsiajaran tu hita angka na mangolu di panutup ni jaman on.” (1 Kor. 10:7-11) Tontu las do roha ni Sibolis ala ndang diihuthon halak Israel Patik ni Jahowa jala ndang masuk nasida tu Tano na Dijanjihon. Gabe marsiajar do hita sian contoh on. Taboto, las do roha ni Sibolis molo ndang dohot hita masuk tu tano na imbaru na dijanjihon Debata!

Saonari, dipangke Sibolis do muse jorat na sarupa tu halak Kristen. Songon tu halak Israel najolo, dipangke ibana do seks na so patut. Di tingkinta saonari pe, tongtong do i gabe jorat na boi parohon jea. Contohna, i ma pornografi.

Saonari, boi do ndang diboto halak na asing molo sasahalak mangida pornografi. Najolo, molo sasahalak naeng mangida pornografi, ingkon laho do ibana tu bioskop manang tu toko buku. Godang do na maila laho tusi, alana maila molo tarboto halak. Alai saonari, ala nunga adong internet, boi do sasahalak mangida pornografi tingki karejo manang di parkiran. Di luat na asing, angka halak boi mangida pornografi di jabuna sandiri.

Asing ni i, saonari boi do diida halak pornografi di HP. Alani i, boi do diida nasida i tingki di pardalanan, di bus manang di kereta api.

Ala mura halak saonari mangida pornografi jala boi ndang diboto halak na asing, gabe boi do i mambahen godang masalah. Umpamana, gabe sursar do parsaripeon ni angka halak, ndang diargai be dirina sandiri, jala targanggu panggora ni roha. Alai na mambahen lam susa, boi do sega parale-aleonta tu Debata. Boi ma tadok, halak na mangida pornografi mambahen susa dirina sandiri. Gabe sega do pingkiranna, jala sai holan i ma na dipingkiri.

Alani i, asa boi malua sian jorat ni Sibolis, ingkon marhaposan tu Jahowa do hita. Unang ma songon halak Israel najolo, ingkon unduk do hita tu Jahowa asa dijaga hita. (2 Mus. 19:5) Ingkon tatiru do pangkilalaan ni Jahowa na mangkagigihon pornografi. Boasa tadok songon i?

Pingkirhon ma on: Imbar situtu do patik na dilehon Debata tu halak Israel sian patik ni bangso na asing di tingki i. Songon tembok, patik i manjaga halak Israel jala paboahon tu nasida asa unang mangulahon angka ulaon na rorang songon na diulahon bangso na di humaliang ni nasida. (5 Mus. 4:6-8) Patik i patangkashon sada hasintongan na ringkot, i ma magigi do roha ni Jahowa tu seks na so patut.

Dipaboa Jahowa do tu halak Israel taringot angka ulaon na rorang na diulahon bangso na asing. Didok Ibana, “Ndang jadi tiruonmuna pambahenan ni halak di tano Kanaan, hasahatanmuna tu joloan on togihononku. . . . Tarramun ma tano i, gabe ingkon marlulu Ahu dompak tano i ala hajahatonna.” Magigi do Debata tu angka na diulahon halak Kanaan. Gabe ramun do diida Ibana luat i alani nasida.​—3 Mus. 18:3, 25.

 Nang pe naung diuhum Jahowa halak Kanaan, sai adong do na mangulahon seks na so patut. Lobi sian 1.500 taon dungkon i, dipaboa si Paulus do molo halak Kristen mangolu di tingki angka halak “ndang adong aturan di ngolu ni nasida”. Gariada, “diulahon do ulaon ni halak na so umboto ila, jala ndang marnasae nasida mangulahon angka ulaon na ramun”. (Eps. 4:17-19) Saonari pe, ndang maila angka halak mangulahon na rorang. Alani i, ingkon marsitutu do hita asa unang mangida angka na rorang.

Ditompa Debata do hita tumiru rupana. Dilehon do tu hita kemampuan laho mamboto dia na sintong dohot dia na sala. Dibahen Debata do aturan taringot hubungan seks. Didok Debata, holan na suami istri do na boi mangulahon hubungan seks. (1 Mus. 1:26-28; Poda 5:18, 19) Alani i, boi ma tadok pornografi mangaleai Debata. Alai songon dia do taringot angka halak na mambahen pornografi? Nunga dialo nasida aturan na dibahen Jahowa taringot seks. Angka halak na mambahen pornografi nunga mangaleai Jahowa. Alani i, laho uhumon ni Debata ma angka halak na mangalo aturanna, i ma angka halak na mambahen pornografi.​—Rom 1:24-27.

Alai songon dia do taringot angka halak na jotjot manjaha manang mangida pornografi? Ra didok roha ni nasida, ndang hiburan na berbahaya i. Hape sasintongna, dohot do nasida mangaleai aturan na dibahen Jahowa. Jala tangkas do dipasingot Bibel, molo angka sisomba Jahowa ingkon marsitutu mangkagigihon pornografi. Didok do di Bibel, “Hamu ale angka na mangkaholongi Jahowa, sai hagigihon hamu ma na jat!”​—Ps. 97:10.

Ndang mura sasahalak na hea mangida pornografi laho pasidingkon i. Ala ndang sempurna dope hita, ingkon marsitutu do hita asa ndang taihuthon giot-giot ni daging na sala. Jala olo do didok rohanta, ndang sala mangida pornografi. (Jer. 17:9) Alai godang do halak Kristen na marhasil pasidingkon pornografi. Pengalaman ni  nasida boi do patoguhon rohanta laho pasidingkon pornografi i. Parrohahon ma songon dia Bibel boi mangurupi hita pasidingkon jorat ni Sibolis marhite pornografi.

Songon na dipaboa nangkin, dipaloas halak Israel do pingkiran na sala di rohana jala parohon jea do i tu nasida. Boi do i masa tu hita saonari. Si Jakobus anggi ni Jesus mandok, “Ganup halak . . . ditarik jala dijorat sangkap-sangkapna sandiri. Molo sai dipingkiri sangkap-sangkapna i, diulahon ma dosa.” (Jak. 1:14, 15) Molo diloas sasahalak pingkiran na rorang sai adong di dirina, lam leleng boi do gabe diulahon ibana dosa. Alani i, molo adong pingkiran na rorang di rohanta, pintor pasiding ma i jala unang tapingkiri.

Jesus mandok, “Alani i, molo tartuktuk ho alani tangan manang patmu, ponggol jala bolongkon ma i. . . . Molo mardosa ho alani matami, pulsikkon jala bolongkon ma i.” (Mat. 18:8, 9) Na didok Jesus dison, ndang lapatanna gabe talukkai dirinta sandiri. Dibahen Jesus pe tudosan on, laho paboahon tu hita asa taboto aha na mambahen hita gabe marpingkiran na rorang jala ingkon hatop pasidingkon i. Songon dia ma carana?

Molo tompu adong diida hamu pornografi, unang ma didok rohamu, ‘Ndang tarela-ela ahu’. Pintor hatop ma i pasiding. Pintor hatop ma pamate TV, HP manang komputermuna. Pingkiri ma muse angka na denggan. Molo songon i do dibahen hamu, boi ma dirajai hamu pingkiranmuna asa unang sai mamingkirhon angka na rorang.

Molo nunga marhasil hamu pasidingkon pornografi, songon dia do molo tompu diingot hamu muse angka na hea diida hamu? Leleng do asa mago sian pingkiran angka pornografi na hea diida. Jala boi do i tompu ro tu pingkiran. Molo masa  sisongon i, ra gabe tarela-ela do hamu mangulahon na rorang, songon masturbasi [mangosos-ososhon alat kelamin]. Alani i, ingkon jaga do hita molo tompu ro pingkiran na sala i. Jala ingkon taparade hian do dirinta asa pasidingkon i.

Marsitutu ma hamu asa mamingkirhon jala mangulahon aha na dihalomohon Debata. Tiru ma si Paulus na mandok, “Hulinsingi do dagingku jala hubahen do ahu songon hatoban.” (1 Kor. 9:27) Unang hamu dirajai pingkiran na sala. Alai “muba ma hamu marhite paubahon pingkiranmuna. Asa diboto hamu lomo ni roha ni Debata na denggan, na sintong, jala na palashon rohana”. (Rom 12:2) Ingot ma, ndang boi hamu marlas ni roha molo diihuthon hamu pingkiran na rorang. Alai, boi do hamu marlas ni roha molo mamingkirhon jala mangulahon na dihalomohon Debata.

Ingot ma piga-piga ayat ni Bibel. Jala tingki tompu ro pingkiran na sala, marsitutu ma asa mamingkirhon angka ayat i. Umpamana, Psalmen 119:37; Jesaya 52:11; Mateus 5:28; Epesus 5:3; Kolosse 3:5; dohot 1 Tessalonik 4:4-8. Angka ayat on boi mangurupi hamu asa maniru Jahowa na mangkagigihon pornografi jala mangulahon aha na dihalomohon rohana.

Songon dia do molo maol dihilala hamu pasidingkon angka na rorang sian pingkiranmuna? Tiru ma Jesus. (1 Ptr. 2:21) Dung tardidi Jesus, torus do diela-ela Sibolis ibana. Alai aha do na diulahon Jesus? Dialo ibana do Sibolis. Dipangke Jesus do marragam ayat laho mangalo Sibolis. Didok ibana, “Laho ma ho Bolis!”, dung i, laho ma Sibolis. Tiru ma Jesus na sai marsitutu laho mangalo Sibolis. (Mat. 4:1-11) Marsitutu do Sibolis dohot portibi na dirajai ibana laho mambahen hamu mamingkirhon angka na rorang. Alai, unang ma menyerah. Boi do hamu marhasil laho pasidingkon pornografi. Jala diurupi Jahowa do hamu laho mangulahon i.

Tongtong ma martangiang tu Jahowa laho mangido asa diurupi. Si Paulus mandok, “Pangido hamu ma saluhutna tu Debata. Asa marhite Kristus Jesus, lehonon ni Debata ma tu hamu hadameon na so boi diantusi jolma, na boi manjaga roha dohot pingkiranmuna.” (Plp. 4:6, 7) Hadameon ni pingkiran na sian Debata, boi mangurupi hamu laho pasidingkon angka pingkiran na rorang. Molo dipajonok hamu dirimuna tu Jahowa, tontu pajonohonna do dirina tu hamu.​—Jak. 4:8.

Molo tongtong hamu marale-ale tu Jahowa, i ma Debata Natumimbul di saluhutna, boi ma dipasiding hamu jorat ni Sibolis. Jesus mandok, “Na ro ma parhuaso ni portibi on [Sibolis]. Alai ndang marhuaso i tu ahu.” (Joh. 14:30) Boasa pos roha ni Jesus? Didok ibana muse, “Ibana na marsuru ahu i do donganku, ndang dipasombu Ibana sahalakku, ai tongtong do huulahon lomo ni rohana.” (Joh. 8:29) Molo tongtong taulahon angka na dihalomohon Jahowa sian nasa tolapta, pos ma rohanta ndang tadingkonon ni Jahowa hita. Tongtong ma pasiding pornografi, asa ndang boi dijorat Sibolis hamu.