MANTANG an suanoy na mga Israelita nag-aandam nang magbalyo sa Salog nin Jordan pasiring sa daga na ipinanuga nin Diyos sa sainda, may mga nagbisita sa sainda. An mga bisita mga babaying taga ibang nasyon, asin inimbitaran ninda an mga lalaking Israelita sa sarong handaan. Garo baga sarong oportunidad ini na bihirang mangyari. Siisay man an mahabo na makabisto nin bagong mga amigo, makibayle, asin makakakan nin masisiram na kakanon. Dawa bakong kauyon kan Katugunan nin Diyos sa Israel an mga kaugalian asin pamantayan sa moral kan mga babaying idto, tibaad inisip kan nagkapirang lalaking Israelita: ‘Dai man kami maaano. Mag-iingat kami.’

 Ano an nangyari? Sinasabi sa sato kan ipinasabong na pagkasaysay: ‘An banwaan nagpuon [na magkaigwa nin imoral na seksuwal na relasyon] sa mga aking babayi kan Moab.’ An totoo, gusto kan mga babaying idto na magsamba an mga lalaking Israelita sa palsong mga diyos. Asin nangyari man nanggad iyan! Kaya masasabutan niyato kun taano ta ‘an kaanggutan ni Jehova luminaad tumang sa Israel.’—Bil. 25:1-3.

Binalga kan mga Israelitang idto an Katugunan nin Diyos sa duwang paagi: Nagduko sinda sa mga idolo, asin nagkomiter nin seksuwal na imoralidad. Rinibo an nagadan huli sa pagsuway ninda. (Ex. 20:4, 5, 14; Deut. 13:6-9) Taano ta partikular nang nakakamundo an ginibo ninda? Huling palaog na sinda kaidto sa Dagang Panuga. Kun dai binalga kan mga lalaking idto an Katugunan nin Diyos, nakabalyo na kuta sa Jordan an rinibong Israelitang idto pasiring sa Dagang Panuga.—Bil. 25:5, 9.

Mapadapit sa mga pangyayaring idto, nagsurat si apostol Pablo: “An mga bagay na ini nangyari sa sainda para magserbing mga halimbawa, asin isinurat an mga iyan bilang patanid sa satuya na mga inabutan kan katapusan kan mga sistema nin mga bagay.” (1 Cor. 10:7-11) Siguradong ikinaugmang marhay ni Satanas na nakagibo nin magabat na kasalan an mga Israelitang idto na huli kaiyan dai na sinda kuwalipikadong maglaog sa Dagang Panuga. Madunong nanggad na isapuso niyato an patanid na iyan, huling aram niyato na mayo na nanggad nin ibang mas gugustuhon si Satanas kundi an dai kita makalaog sa bagong kinaban nin Diyos!

Binibiktima ni Satanas an mga Kristiyano paagi sa mga taktika na pamilyar siyang marhay asin na napatunayan nang epektibo sa dakul na tawo. Sa kaso kan mga Israelita na sinambit kasubago, ginamit niya an imoral na seksuwal na relasyon. Sa satong panahon, peligrosong siod pa man giraray an imoralidad. An sarong epektibong paagi na puwede kitang mabiktima kaiyan iyo an pornograpiya.

Sa satong panahon, sa parati puwedeng maghiling nin pornograpiya an saro na dai na naaaraman nin iba. Kaidto, kun gusto nin saro na maghiling nin pornograpiya, tibaad kaipuhan niyang magduman sa teatro para maghiling nin pornograpikong mga pelikula o magbakal nin mga babasahon sa tindahan nin pornograpikong mga libro. Dakul na tawo an nasusupog na mahiling sinda sa siring na mga lugar o sa harani diyan kaya dai na lang sinda nagduduman. Pero ngunyan, basta may Internet, puwede ka nang makahiling nin pornograpiya sa trabaho o dawa sa laog nin kotse. Asin sa dakul na kadagaan, puwedeng maghiling nin pornograpiya an sarong lalaki o sarong babayi maski dai na siya maghali sa harong.

Bako lang iyan. Dahil sa mga mobile device, mas madali nang maghiling nin pornograpiya. Mantang naglalakaw sa tinampo o nakalunad sa bus o tren, an mga tawo puwedeng maghiling nin imoral na mga ritrato sa saindang mobile device.

Huling mas madali nang maghiling nin pornograpiya asin na gibuhon iyan na dai naaaraman kan iba, mas dakul ngunyan an nadadanyaran kaiyan urog kasuarin man. Dakulon na naghihiling nin pornograpiya an nadadanyaran an relasyon ninda sa saindang agom, an paggalang ninda sa sadiri, asin an saindang konsiyensiya. Pero an mas grabe, naisasapeligro ninda an saindang pakikiamigo sa Diyos. Iyo, nakakadanyar talaga an pornograpiya sa mga naghihiling kaiyan. Sa dakul na kaso, nagigin dahilan iyan nin grabeng mga kakulugan sa emosyon. Puwedeng luway-luway na mahali an mga kakulugan pero an mga epekto kaiyan tibaad magdanay nin halawig na panahon.

Pero dapat niyatong girumdumon na nagtatao si Jehova nin proteksiyon laban sa siod na ini ni Satanas. Tanganing magkaigwa kita kan proteksiyon ni Jehova, dapat na gibuhon niyato kun ano an dai nagibo kan suanoy na mga lalaking Israelita—an ‘istrikto siyang kuyugon.’ (Ex. 19:5, NW) Kaipuhan niyatong midbidon na ikinakaungis nin Diyos an pornograpiya. Paano niyato nasabi iyan?

Isip-isipon ini: An Katugunan nin Diyos sa suanoy na nasyon nin Israel mayo nanggad nin kaagid sa ano pa man na nasyon kan panahon na idto. Arog sa  sarong lanob, prinotektaran kaiyan an mga Israelita laban sa mga nasyon sa palibot ninda asin sa labi-labi karaot na mga gibo kaiyan. (Deut. 4:6-8) Malinaw na ipinahiling kan mga tugon na idto an sarong mahalagang marhay na katotoohan: Ikinakaungis ni Jehova an seksuwal na imoralidad.

Mapadapit sa imoral na mga gibo kan kaharaning mga nasyon, sinabi ni Jehova sa mga Israelita: “Dai nindo paggibuhon an mga ginigibo kan mga tawo sa Canaan, na dadarahan ko sa saindo. . . . An daga ninda nagin maati, asin papadusahan ko sinda huli sa saindang pagkakasala.” Para sa banal na Diyos kan Israel, daing data nanggad an istilo nin pamumuhay kan mga Canaanita kaya sa paghiling niya, an daga na iniistaran ninda nagin maati asin kontaminado.—Lev. 18:3, 25, NW.

Dawa pinadusahan ni Jehova an mga Canaanita, an ibang mga tawo padagos na naggibo nin seksuwal na imoralidad. Pakalihis nin labing 1,500 na taon, an mga nasyon kun sain nakaistar an mga Kristiyano ilinadawan ni Pablo na “mayo nang minimidbid na ano man na pamantayan sa moral.” Sa katunayan, “biyo na sindang nagpadara sa daing pakundangan na paggawi tanganing gibuhon an gabos na klase nin karigsukan na may kapasluan.” (Efe. 4:17-19) Dakul man na tawo ngunyan an mayong pakundangan sa imoral na paggawi. Dapat na likayan kan tunay na mga parasamba an paghiling sa imoral na mga aktibidad kan mga tawo sa kinaban na ini.

An pornograpiya grabeng kawaran nin paggalang sa Diyos. Linalang niya an tawo nin siring sa saiyang ladawan asin kasugad niya saka tinawan niya kita nin kakayahan na madeterminaran kun ano an disente asin bako. An Diyos madunong na nagbugtak nin rasonableng mga limitasyon kun dapit sa seksuwal na relasyon. Itinao niya sa mga mag-agom an seksuwal na relasyon para sa saindang kaugmahan. (Gen. 1:26-28; Tal. 5:18, 19) Pero ano an ginigibo kan mga nagpoprodusir o nagpapalakop nin pornograpiya? Biyo nindang binabaliwala an mga pamantayan nin Diyos sa moral. Iyo, an mga tawong nagpapalakop nin pornograpiya dai nin paggalang ki Jehova. Huhukuman nin Diyos an mga nagbabaliwala sa saiyang mga pamantayan paagi sa pagprodusir asin pagpalakop ninda nin imoral na mga materyal.—Roma 1:24-27.

Pero kumusta an mga tawong tuyong nagbabasa o naghihiling nin pornograpiya? Tibaad isipon kan iba na libangan iyan na dai man nakakaraot. Alagad an totoo, sinusuportaran ninda an mga nagbabaliwala sa mga pamantayan ni Jehova. Tibaad bako man iyan an intensiyon ninda kan magpuon sindang  maghiling nin pornograpiya. Dawa arog kaiyan, malinaw na ipinapahiling kan Bibliya na an mga nagsasamba sa tunay na Diyos dapat na ikaungis nanggad an pornograpiya. An Bibliya nagsasadol: “Ikaungis nindo an maraot, O kamong mga namumuot ki Jehova.”—Sal. 97:10, NW.

Puwede man na madipisilan dawa an mga naglilikay na maghiling nin pornograpiya. Bako kitang perpekto, asin tibaad kaipuhan niyatong labanan an maating seksuwal na mga pagmawot. Saro pa, puwede kitang dayaon kan satong bakong perpektong puso na maghanap nin maidadahilan tanganing balgahon an pagbuot nin Diyos. (Jer. 17:9) Pero dakul na nagin Kristiyano an nanggana sa laban na ini. Makakapakusog sa saimo an halimbawa ninda kun nakikipaglaban ka man sa kaagid na problema. Hilingon kun paano ka matatabangan kan Tataramon nin Diyos na malikayan an siod ni Satanas na pornograpiya.

Arog kan sinambit kasubago, dakul na Israelita an dai kinontrol an salang mga pagmawot sagkod na napahamak sinda. Puwede man na mangyari iyan ngunyan. Ilinadawan ni Santiago, na tugang ni Jesus sa ina, an peligro: “An lambang saro [naguguyod] asin naaakit kan sadiri niyang pagmawot. Dangan an pagmawot, pag iyan nangidam, nangangaki nin kasalan.” (Sant. 1:14, 15) Pag kuminusog an salang pagmawot sa puso nin saro, posibleng marhay na makagibo na siya nin kasalan. Kaya dapat niyatong halion an imoral na mga kaisipan, asin dai pagparaisipon iyan.

Kun natetentaran nin maating mga kaisipan, humiro tulos. Sinabi ni Jesus: “Kaya, kun an saimong kamot o bitis nagigin dahilan na magkasala ka, putula iyan asin iapon mo. . . . Siring man, kun an saimong mata nagigin dahilan na magkasala ka, hulwata iyan asin iapon mo.” (Mat. 18:8, 9) Dai man digdi sinasabi ni Jesus na kulgan niyato an satong hawak. Ipinapahiling niya sa ilustrasyon na iyan na kaipuhan niyatong tulos-tulos asin desididong halion an dahilan kan problema. May koneksiyon sa pornograpiya, paano niyato iaaplikar an sadol na iyan?

Kun makahiling ka nin pornograpiya, dai isipon na, ‘Dai man ako maaano ka’ni.’ Tulos na irayo an saimong mata. Isara ora mismo an telebisyon. Tulos-tulos na i-shut down an computer o i-off an mobile device. Magpokus giraray sa mga bagay na malinig. Makakatabang ini sa saimo na makontrol an saimong kaisipan imbes na ika an makontrol nin salang mga pagmawot.

Paano kun nagpundo ka na sa paghiling nin pornograpiya pero nagpapabalik-balik iyan paminsan-minsan sa saimong isip? An pornograpikong mga imahe o kaisipan puwedeng magdanay nin halawig na panahon sa isip nin saro. Puwede iyan na magsabong sa isip ano man na oras. Kun mangyari iyan, tibaad maisip mong gumibo nin sarong bagay na maati, arog nin masturbasyon. Kaya girumdumon na puwedeng bigla na lang na magsabong sa isip an siring na mga kaisipan, kaya magin andam na labanan iyan.

Pakusugon an determinasyon mo na iuyon an saimong mga kaisipan asin paggawi sa kabutan nin Diyos. Arugon si apostol Pablo na andam na ‘lanugon an saiyang hawak asin gibuhon iyan na magin siring sa uripon.’ (1 Cor. 9:27) Dai pagtugutan na magin uripon ka nin maating mga pagmawot. ‘Liwaton an saimong pagkatawo paagi sa pagbago kan saimong isip, tanganing mapatunayan mo sa saimong sadiri an kabutan nin Diyos na marahay asin akseptable saka perpekto.’ (Roma 12:2) Tandaan: An pag-isip asin paggawi kauyon kan kabutan nin Diyos urog nanggad na nakakaugma kisa sa pagsunod sa makasalan na mga tendensiya.

Magtuom nin partikular na mga teksto. Dangan pag nagsabong sa isip an salang mga kaisipan, piriton an sadiri na isipon an mga tekstong iyan. An mga tekstong arog kan Salmo 119:37; Isaias 52:11; Mateo 5:28; Efeso 5:3; Colosas 3:5; asin 1 Tesalonica 4:4-8 makakatabang sa saimo na maiuyon an saimong kaisipan sa pagmansay ni Jehova dapit sa pornograpiya asin sa kun ano an inaasahan niya sa saimo.

Paano kun may pagkakataon na haros dai mo na makontrol an pagmawot mong maghiling o mag-isip nin imoral na mga bagay? Maingat na sundan an mga lakad kan satong Arugan, si Jesus. (1 Ped. 2:21) Pagkatapos na mabawtismuhan si Jesus, pigparatentaran siya ni Satanas. Ano an ginibo ni Jesus? Padagos siyang nagsayuma. Paagi sa sunod-sunod na paggamit nin mga teksto, sinayumahan niya an mga sugot ni Satanas. Sinabi niya: “Humali ka Satanas!” dangan binayaan siya ni Satanas. Dai nanggad nagsuko si Jesus sa laban niya ki Satanas, kaya dapat iyo ka man. (Mat. 4:1-11) Si Satanas asin an saiyang kinaban padagos na pupurbaran na laugan nin imoral na mga kaisipan an saimong isip, alagad dai magsuko sa laban. Puwede kang manggana sa pakikipaglaban sa pornograpiya. Sa tabang ni Jehova, madadaog mo an saimong kaiwal.

Padagos na mamibi ki Jehova asin maghagad nin tabang sa saiya. Sinabi ni Pablo: “Ipaaram nindo sa Diyos an saindong mga kahagadan; asin an katuninungan nin Diyos na nakakalabi sa gabos na pakasabot iyo an magbabantay sa saindong puso asin kaisipan paagi ki Cristo Jesus.” (Fil. 4:6, 7) An katuninungan nin Diyos nakakatabang sa sato mantang nakikipaglaban kita sa kasalan. Kun marani ka ki Jehova, “marani siya sa [saimo].”—Sant. 4:8.

An pinakaepektibong proteksiyon laban sa ano man na peligro iyo an pagkaigwa nin makusog na relasyon sa Soberano kan uniberso. Sinabi ni Jesus: “An tagapamahala kan kinaban [si Satanas] madatong na, asin mayo siya nin kontrol sa sako.” (Juan 14:30) Taano ta arog kaiyan kakusog an pagtitiwala ni Jesus? Sinabi niya kaidto: “Siya na nagsugo sa sako nasa kaibanan ko; dai niya ako pinabayaan na ako sana, huli ta pirmi kong ginigibo an mga bagay na nakakapaugma sa saiya.” (Juan 8:29) Mantang ginigibo mo an mga bagay na nakakapaugma ki Jehova, nungka ka man niyang papabayaan. Kun lilikayan mo an siod nin pornograpiya, dai ka masisiod ni Satanas.