TAEM ol man Isrel oli rere blong krosem Jodan Reva blong go long Promes Lan, sam woman blong narafala kantri oli kam singaot olgeta blong oli kam long wan lafet. Maet ol man ya oli ting se hemia wan gudfala janis blong faenem ol niufala fren, danis, mo kakae gud. Ol fasin mo kastom blong ol woman ya oli no folem Loa we God i givim long Isrel. Nating se i olsem, maet ol man ya oli ting se: ‘Mifala i save samting we i stret. Bae mifala i lukaot gud.’

 ?Be wanem i hapen? Baebol i talem se: ‘Ol man Isrel oli stat blong go slip wetem ol woman Moab.’ Blong talem stret, plan blong ol woman ya i blong pulum ol man Isrel blong oli wosipim ol giaman god. !Mo hemia nao samting we i hapen! Yumi kasem save from wanem “Hae God i kros tumas long olgeta.”—Nam. 25:1-3.

Ol man Isrel oli brekem tu Loa blong God: Oli bodaon long ol aedol, mo oli mekem doti fasin blong seks. From samting ya, plante taosen long olgeta oli ded. (Eks. 20:4, 5, 14; Dut. 13:6-9) Samting we i moa nogud, se oli foldaon long trap ya taem oli klosap nomo long Promes Lan. Sipos oli no bin brekem Loa blong God, bambae oli krosem Jodan Reva wetem ol narafala man Isrel blong go long Promes Lan.—Nam. 25:5, 9.

Aposol Pol i tokbaot trabol ya, i se: “Ol samting ya we oli hapen long olgeta, oli raetem blong givim woning long yumi ya we yumi stap laef long wan taem we en i klosap.” (1 Kor. 10:7-11) Yumi save se Setan i glad tumas taem sam man Isrel oli mekem bigfala sin ya, nao oli no save go long Promes Lan. !Yumi waes sipos yumi lesin long woning ya, from we yumi save se Setan i wantem tumas blong blokem yumi, blong yumi no go insaed long niufala wol!

Tede, Setan i stap yusum ol trik we hem i luk se oli wok gud, blong mekem ol Kristin oli foldaon long trap. Olsem yumi tokbaot finis, hem i yusum ol doti fasin blong seks blong spolem ol man Isrel. Tede, ol doti fasin blong seks oli olsem wan trap we i nogud olgeta. Wan bigfala samting we i save pulum yumi blong foldaon long trap ya, hemia ol rabis pija.

Tede, man i save lukluk ol rabis pija we i no gat narafala man i save. Plante yia bifo, man i mas go long sinema blong lukluk ol doti muvi, o long wan spesel stoa blong pem ol buk blong ol rabis pija. Be plante man oli no go from we oli fraet se narafala man bambae i luk olgeta. Tede, man i save lukluk ol rabis pija long Intenet taem hem i stap long wok, o i sidaon long trak blong hem nomo. Long plante kantri, ol man mo woman oli lukluk ol rabis pija long haos blong olgeta nomo.

I no hemia nomo. Taem ol man oli stap wokbaot long rod o ron long bas, i isi nomo blong oli lukluk ol rabis pija long mobaelfon o tablet.

Tede ol rabis pija oli spolem plante moa man i bitim bifo, from we i isi moa blong lukluk olgeta. Be fasin ya i spolem mared blong olgeta, oli ting nating long olgeta bakegen, mo tingting blong olgeta i no moa stikim olgeta. Samting we i moa nogud, hemia se oli no moa fren gud wetem God. I tru nomo se ol rabis pija oli spolem ol man. Mo ol trabol we oli kasem long tingting mo filing blong olgeta i save stap longtaem, maet ful laef blong olgeta.

Jehova i save protektem yu long trap ya blong Setan. Be sipos yu wantem se Jehova i protektem yu, yu mas “obei” fulwan long hem, hemia samting we ol man Isrel oli no mekem. (Eks. 19:5) Yu mas kasem save se God i no laekem nating ol rabis pija. ?From wanem yumi talem olsem?

Traem tingbaot: Loa we God i givim long ol man Isrel i defren long loa blong ol narafala neson. Hem i olsem wan stonwol we i seraotem ol man Isrel long ol nesen raonabaot mo ol rabis fasin blong olgeta. (Dut. 4:6-8) Loa ya i soemaot wan impoten trutok: Jehova i no laekem nating ol doti fasin blong seks.

Jehova i toktok long ol man Isrel long saed blong ol rabis fasin blong ol nesen raonabaot, i se: “Naoia mi stap tekem yufala i go long kantri ya Kenan, be bambae yufala i no mas folem ol fasin nogud blong ol man . . . Ol fasin ya blong olgeta i mekem graon blong olgeta i kam doti  long fes blong mi, nao mi bambae mi spolem graon ya, mi mekem i kam nogud.” Long tingting blong tabu God blong Isrel, ol rabis fasin blong ol man Kenan i mekem se graon blong olgeta i kam nogud.—Lev. 18:3, 25.

Jehova i panisim ol man Kenan, be ol narafala nesen oli gohed blong mekem ol doti fasin blong seks. Bitim 1,500 yia biaen, Pol i tokbaot ol nesen we ol Kristin oli stap long medel blong olgeta, se “oli no moa gat sem nating, nao oli stap gohed olbaot.” Mo “oli stap mekem ol nogud fasin we man i no sem blong mekem, ale oli mekem evri samting we i no klin mo oli wantem tumas blong gohed long ol fasin ya.” (Efes. 4:17-19) Tede tu, plante man oli no moa sem blong mekem ol rabis fasin ya. Ol man blong Jehova oli no mas wajem ol doti fasin blong ol man blong wol.

Ol man we oli wokem ol rabis pija oli no soemaot respek nating long God. Hem i wokem yumi blong yumi tekem fasin blong hem, mo blong yumi haremsave wanem i stret mo wanem i no stret. God i waes taem hem i putum ol loa long saed blong seks. Hem i wantem se ol man mo woman we oli mared oli harem gud long seks. (Jen. 1:26-28; Prov. 5:18, 19) ?Be olgeta we oli wokem ol rabis pija oli stap mekem wanem? Oli stap sakemaot ol loa ya blong God, mo oli no gat respek long hem. Taswe, Jehova bambae i jajem olgeta.—Rom 1:24-27.

?Be olsem wanem long ol man we oli stap ridim ol doti buk mo lukluk ol rabis pija? Samfala oli ting se hemia i olsem wan pleplei nomo. Be samting we i tru se oli stap sakemaot ol loa blong Jehova. Long stat, maet oli no gat tingting blong mekem olsem. Be i klia se ol man blong Jehova oli mas no laekem nating ol rabis pija. Baebol i talem se: “Yufala we i lavem Jehova, yufala i mas agensem ol rabis fasin.”—Sam 97:10, NW.

Samting ya i no isi. Yumi sinman, mo oltaem yumi mas faet agensem ol tingting we oli no stret. Mo tu, hat blong yumi i save mekem eskius blong brekem loa blong God. (Jer. 17:9) Be sipos yu stap faet agensem nogud fasin ya, i gud yu tingbaot se plante we oli kasem trutok oli winim faet ya. Hemia i save leftemap tingting blong yu. Makem gud olsem wanem Tok blong God i save  givhan long yu, blong yu no foldaon long trap ya blong Setan.

Olsem yumi tokbaot finis, plante man Isrel oli letem ol nogud tingting oli lidim olgeta, nao oli kasem bigfala trabol. Sem samting i save hapen tede tu. Jemes we i brata blong Jisas, i tokbaot denja ya, i se: ‘Taem man i wantem tumas wan samting, hemia i save pulum hem, mo trikim hem. Nao taem tingting ya i kam strong long hem, hem i mekem sin.’ (Jem. 1:14, 15) Taem man i tingting tumas long wan nogud samting we hem i wantem, hemia i save lidim hem blong mekem sin. Taswe yumi mas sakemaot enikaen tingting long saed blong rabis fasin, yumi no moa tingbaot.

Sipos i gat sam nogud tingting we oli pulum yu, yu mas tekem aksen kwiktaem. Jisas i talem se: “Sipos han no leg blong yu i mekem yu yu foldaon, yu katemaot mo yu sakem. . . . Mo tu, sipos ae blong yu i mekem yu yu foldaon, yu stikimaot mo yu sakem.” (Mat. 18:8, 9) Jisas i no stap talem se yu mas katemaot haf bodi blong yu. Be hem i stap talem wan pijatok blong soemaot se yu mas faenemaot from wanem yu gat ol nogud tingting ya, mo mekem sam jenis kwiktaem. ?Olsem wanem yu save folem advaes ya long saed blong ol rabis pija?

Sipos yu sek long wan rabis pija we i kamaot long skrin, yu no mas ting se yu yu strong, yu no save foldaon. Wantaem nomo, yu mas tanem hed blong yu. Yu ofem TV kwiktaem. Yu hareap blong ofem kompiuta o mobaelfon. Yu tingbaot wan samting we i klin. Sipos yu mekem olsem, bambae yu no letem ol nogud tingting ya oli bos long yu, be yu yu bos long olgeta.

?Olsem wanem sipos yu no moa lukluk ol rabis pija, be wanwan taem yu tingbaot olgeta yet? Ol rabis pija oli save stap longtaem long tingting blong yu. Tingting ya i save kasem yu enitaem nomo. Sipos i hapen olsem, maet yu wantem mekem wan doti fasin, olsem pleplei wetem seks blong yu. From we ol tingting ya oli save kamaot  enitaem nomo, yu mas rere oltaem blong faet agensem olgeta.

Yu mas mekem tingting mo aksen blong yu i laenap wetem samting we God i wantem. Yu mekem olsem aposol Pol, we i ‘kilim bodi blong hem mo i fosem olsem wan slef.’ (1 Kor. 9:27) Yu no mas kam slef blong ol tingting we oli no klin. Baebol i talem se yu mas ‘mekem tingting blong yu i niuwan olgeta. Nao bambae yu save jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.’ (Rom 12:2) Tingbaot oltaem se sipos yu gat tingting olsem God mo yu mekem samting we hem i wantem, bambae yu harem gud moa i bitim we yu folem ol nogud filing blong yu.

I gud yu traem lanem sam vas blong Baebol. Nao taem samting we i no stret i kam long tingting blong yu, yu sakemaot mo yu tingbaot ol vas ya. Sam gudfala vas we oli save givhan long yu blong yu gat tingting olsem Jehova long fasin we hem i wantem yu blong mekem, hemia: Ol Sam 119:37; Aesea 52:11; Matiu 5:28; Efesas 5:3; Kolosi 3:5; mo 1 Tesalonaeka 4:4-8.

?Olsem wanem sipos tingting ya blong wantem mekem nogud fasin i kam strong tumas we yu no moa save blokem? Yu mas folem nambawan eksampol blong Jisas. (1 Pita 2:21) Afta we Jisas i baptaes, Setan i gohed nomo blong traem hem. ?Jisas i mekem wanem? Hem i agensem hem. Evri taem, hem i yusum wan vas blong Baebol blong agensem Setan, mo i talem se: “!Setan yu gowe!” nao Setan i lego hem. Jisas i gohed blong faet agensem Setan, mo yu mas mekem sem mak. (Mat. 4:1-11) Setan mo wol blong hem bambae oli gohed blong traem fulumap tingting blong yu wetem ol rabis fasin, be yu mas strong blong faet agensem olgeta. Yu save winim faet ya. Jehova i save givhan long yu, blong yu winim enemi blong yu.

Prea oltaem long Jehova. Pol i talem se: “Yufala i mas askem olgeta samting we yufala i wantem long God . . . nao tru long Kraes Jisas, pis ya blong God we i bigwan tumas i bitim olgeta save blong yumi, bambae i lukaot gud long hat mo tingting blong yufala.” (Fil. 4:6, 7) Taem yu stap traehad blong faet agensem ol nogud fasin, Jehova bambae i putum pis long tingting blong yu. Sipos yu kam klosap long Jehova, ‘hem bambae i kam klosap long yu.’—Jem. 4:8.

Nambawan samting blong protektem yumi long trap blong Setan, hemia blong stap klosap long King blong heven mo wol. Jisas i talem se: “Rula blong wol ya [Setan] i stap kam, mo hem i no gat paoa antap long mi.” (Jon 14:30) ?From wanem Jisas i gat strong tingting olsem? Hem i talem se: “Man we i sanem mi mi kam, hem i stap wetem mi. Hem i no lego mi mi stap mi wan, from we oltaem mi mekem ol samting we hem i glad long hem.” (Jon 8:29) Sipos yu mekem ol samting we Jehova i glad long hem, yu tu yu save gat strong tingting se bambae hem i neva lego yu. Yu no mas foldaon long trap ya blong lukluk ol rabis pija, olsem nao, Setan i no save holemtaet yu.