SANGGAH halak Israel laho mandipari Bah Jordan hu Tanoh Parpadanan, dong ma piga-piga naboru na roh manjumpahi sidea. Na roh ai naboru hun bangsa na legan na dong ijai. Iarahkon ma dalahi-dalahi Israel ai hu pestani. Ijai sidea boi mandapot hasoman na baru, manortori, ampa mangan-mangan. Tapi legan do hasomalan ni bangsa-bangsa ai pakon halak Israel halani sidea maningon unduk bani Titah ni Naibata. Ra do piga-piga dalahi ai marpingkir, ‘Lang pala mahua ai. Domma ibotoh hita aha na dear.’

 Tapi aha ma na masa? Bibel patugahkon, “Ipungkah bangsa ai ma marriah-riah pakon boru ni halak Moab.” Sasintongni, naboru-naboru ai sihol ase halak Israel manombah gana-gana ni sidea. Janah sonai do na masa! Halani ai “gajag ma ringis ni Jahowa mangidah halak Israel”.​—4 Mus. 25:1-3.

Dong dua Titah ni Naibata na ilanggar halak Israel: Manombah gana-gana ampa mangkorjahon parriah-riahon. Halani ai, dong marribu halak na matei. (2 Mus. 20:4, 5, 14; 5 Mus. 13:7-10) Ambit namin unduk sidea bani Titah ni Naibata, tontu na marribu halak ai boi dihut mandipari Bah Jordan janah masuk hu Tanoh Parpadanan.​—4 Mus. 25:5, 9.

Humbani na masa ai apostel Paulus manurat, “Gabe usihan do na masa bani sidea, tapi isuratkon do ai bahen lumba-lumba banta, na manggoluh ibagas panorang ni ujung ni dunia on.” (1 Kor. 10:7-11) Tontu malas tumang uhur ni Sibolis halani mardousa halak Israel ai janah lang boi masuk hu Tanoh Parpadanan. Na masa bani sidea ai gabe sipasingat ma ai hubanta! Sonari on pe, marosuh do homa Sibolis ase hita lang boi masuk hu dunia baru na ijanjihon Naibata.

Sonari marusaha do homa Sibolis manggunahon tirangkap sisonai laho manangkap halak Kristen. Janah domma marhasil ai bani buei halak. Hinan, marhasil do ia mambahen halak Israel ase mangkorjahon parriah-riahon. Sonari igunahon Sibolis do homa tirangkap na marbahaya ai ma pornografi.

Piga-piga tahun na salpu, anggo sasada halak sihol mangidah pornografi, maningon laho ma ia hu bioskop na mamutar film sisonai. Atap laho hu toko buku na manjual buku sisonai. Tapi, ra do bahat na maila laho hu ianan sisonai halani mabiar adong na mangidahsi. Tapi sonari, sasada halak domma boi sip-sip mangidah pornografi. Marhitei internet boi do halak mangidah ai i parhorjaan atap i motor. Anjaha bani piga-piga ianan, boi do homa sasada halak manonggor pornografi i rumah ni sandiri.

Lang pitah ai. Marhitei HP atap tablet, lambin urah do halak mangidah pornografi. Halani ai, boi ma halak mangidah gambar-gambar porno sanggah mardalan, i motor, atap i kereta api.

Halani pornografi ai urah idapot janah boi sip-sip ididah, tontu lambin marbahaya tumang ma ai sonari on marimbangkon na hinan. Bahat do halak na mangidah pornografi gabe lang be martuah parhajabuanni, lang dong harga dirini, anjaha seda panggora ni uhurni. Na siparahan, gabe seda ma homa parhasomananni pakon Jahowa. Tontu setuju do hita anggo pornografi ai sada tirangkap na marbahaya tumang bani halak na mangidah ai. Dokah do pengaruhni ai, janah sipata ra do sasada halak na ongga mangidah pornografi lang boi manlupahon aha na ididahni.

Tapi ibotoh hita do anggo Jahowa manlinggomi hita humbani tirangkap ni Sibolis ai. Hassi pe sonai, ase boi hita ilinggomi, maningon itangihon hita ma Jahowa, ulang songon halak Israel hinan na lang ra ‘manangihon’ Ia. (2 Mus. 19:5) Magigi tumang do Jahowa bani pornografi. Hunja ibotoh hita ai?

Dingat ma: legan tumang do uhum na ibere Naibata hubani bangsa Israel pakon uhum ni bangsa-bangsa ijia. Ganup uhum ai songon dingding, na boi manlinggomi halak Israel humbani parlahou na sambor na ibahen bangsa-bangsa na legan. (5 Mus. 4:6-8) Humbani uhum ai tangkas ma magigi tumang do Jahowa mangidah parriah-riahon.

Dobkonsi ipatugah Jahowa parlahou na butak na ibahen bangsa-bangsa na ijai, nini ma bani  halak Israel, “Ulang ma ihutkon hanima parlahou ni halak i tanoh Kanaan, tanoh na laho boanon-Ku hanima. . . . Butak do tanoh ai, anjaha uhumon-Ku do sidea halani hasalahan ni sidea ai.” Halani pansing do Naibata ni halak Israel, magigi do Ia mangidah hagoluhan ni halak Kanaan. Anjaha butak do homa tanoh na iiankon sidea ai.​—3 Mus. 18:3, 25, Kitab Suci Terjemahan Dunia Baru.

Hassi pe domma iuhum Jahowa halak Kanaan hinan, tapi totap do halak mangkorjahon parriah-riahon. Lobih 1.500 tahun dobkonsi ai, sonai do homa parlahou ni bangsa-bangsa ididah si Paulus. Lang dong aturan bani sidea. Ujungni, ‘gabe lang maila sidea mangkorjahon sagala habutakon’. (Ep. 4:17-19) Sonari pe, bahat do halak na lang maila mangkorjahon parriah-riahon. Halani ai, maningon marusaha ma hita padaohon diri humbani pambahenan na sisonai.

Magigi tumang do Jahowa hubani pornografi. Halani hita itompa Naibata usih songon rupa-Ni, artini boi do ibotoh hita aha na madear ampa na masambor. Anjaha domma homa ibere Jahowa aturan pasal berhubungan seks. Pitah sidea na domma marhajabuan do na boi mangkorjahon ai. (1 Mus. 1:26-28; Pod. 5:18, 19) Tapi sonaha halak na mangojur ase halak na legan mangidah pornografi? Tongon-tongon ma sidea lang unduk hubani aturan ni Jahowa ai. Halani ai ma uhuman-Ni ma sidea.​—Rom 1:24-27.

Tapi sonaha bani halak na sangaja manonton atap mambasa pornografi? Ra do pangahap ni sidea ai pitah hiburan na lang dong bahayani. Tapi sasintongni sidea domma setuju hubani halak na lang unduk bani uhum ni Naibata. Ra do mungkahni sidea lang ongga tarpingkir pasal ai. Halani ai ma Bibel patugahkon anggo juakjuak ni Naibata maningon magigi mangidah pornografi. Bibel mangkatahon, “Ihaholongi Jahowa do na mangkagigihon na masambor.”​—Ps. 97:10.

Bani piga-piga halak ra do lang urah padaohkon diri humbani pornografi. Anjaha hita pe ra do marpangahap lang salah mangidah pornografi ai. (Jer. 17:9) Halani hita jolma na mardousa, hita maningon marusaha manlawan harosuh seks na so patut ai. Hassi pe sonai, bahat do sanina botou na domma marhasil padaohkon diri  humbani pornografi. Tontu on gabe bukti hita pe boi padaohkon diri humbani pornografi. Dingat ma Bibel boi do mangurupi hita ase maluah humbani tirangkap ni Sibolis ai.

Hinan halani halak Israel mamingkirhon na salah, gabe ihorjahon sidea ma homa na salah. Ujungni iuhum Jahowa ma sidea. Sonari on pe, boi do masa sisonai hubanta. Si Jakobus mangkatahon, ganup halak ‘itarik-tarik anjaha iompan-ompani hisap-hisap ni uhurni sandiri. Jadi anggo marbanggal ma hisap-hisap ni uhur ai, itubuhkon ma dousa’. (Jak. 1:14, 15) Anggo sasada halak lalab mamingkirhon na salah, boi do ujungni ia mambahen dousa. Jadi pingkiran na salah maningon podas ma iambukkon hita ai ase ulang mambahen na lang madear.

Anggo mulai adong pingkiran na salah, maningon podas ma iambukkon hita ai. Jesus mangkatahon, “Halani ai, anggo tanganmin atap naheimin do na mambahen mardousa ho, rotap anjaha ambukkon ma in, . . . Anjaha anggo matamu do na mambahen mardousa ho, pulsitkon ma in anjaha ambukkon.” (Mat. 18:8, 9) Ijon Jesus sedo manuruh hita ase mamonggolhon anjaha mangambukkon pagori ni angkulanta. Tapi ibahen ia do limbaga na patuduhkon maningon podas do hita mangambukkon ganupan na boi mambahen hita tartolsu. Sonaha hita boi mangihutkon sipasingat ai domu hubani pornografi?

Sonaha porini tartonggormu pornografi? Ulang ma pangahapmu, ‘Lang mahua ai.’ Ulang ma lalab tonggor. Tapi mintor pamatei ma TV, komputer, atap Hp-mu. Pingkirhon ma na madear. On ma na boi mangurupi ham ase ulang lalab mardingat aha na itonggor ham nongkan ai.

Sonaha porini ham lang ongga be mangidah pornografi, tapi lang boi manlupahon aha na ongga ididah ham? Gambar-gambar atap film pornografi dokah do martahan janah boi do sompong roh hubagas pingkiran. Anggo masa sonai, ra do gabe sihol ham mangkorjahon na butak, umpamani masturbasi. Jadi maningon  jaga ma ham bani situasi sisonai, anjaha pingkirhon ma aha na laho bahenonmu laho manlawan ai.

Patoguh ma uhurmu laho mangkorjahon harosuh ni Naibata. Tiru ma si Paulus na mangkatahon, “Hupukpuki do angkulangku anjaha hupatunduk.” (1 Kor. 9:27) Ulang paturut pingkiran na butak manrajai dirimu. Tapi “mubah ma marhitei habayuon ni uhur, ase boi [ham] manimbangi atap aha do rosuh ni uhur ni Naibata, ai ma na madear, harosuh ampa na gokan dear”. (Rom 12:2) Dingat ma: Mamingkirhon anjaha mangkorjahon harosuh ni Naibata do na parrohkon hatuahon, sedo mamingkirhon na butak.

Marusaha ma mardingat piga-piga ayat na boi mangurupi. Umpamani, Psalmen 119:37; Jesaya 52:11; Mateus 5:28; Epesus 5:3; Kolosse 3:5; pakon 1 Tessalonika 4:4-8. Jadi sanggah roh pingkiran na butak ai, mintor ingat ma ayat-ayat ai, ase boi ham mangusihi pangahap ni Jahowa pasal pornografi. Dob ai, gabe ibotoh ham ma aha na maningon bahenonmu.

Tapi sonaha anggo pangahapmu lang boi ham manlawan harosuh laho mangidah pornografi? Tiru ma Sitiruon na ibahen Jesus. (1 Ptr. 2:21) Dobkonsi ia ididi, roh ma Sibolis laho manlajou ia. Aha ma na ibahen Jesus? Totap do ilawan ia Sibolis. Igunahon Jesus do ayat-ayat laho manlawan parlajouan ni Sibolis ai. Ia mangkatahon, “Laho ma ho Bolis!” Ujungni laho ma Sibolis. Songon Jesus, ham pe boi do monang manlawan Sibolis. (Mat. 4:1-11) Sibolis ampa dunia on marusaha mambahen nasiam mamingkirhon na butak. Tapi marhitei pangurupion ni Jahowa, boi do ham marhasil manlawan tirangkap ni Sibolis ai.

Tongtong ma pindo pangurupion ni Jahowa. Si Paulus mangkatahon, “Pabotohkon nasiam ma pangindoan nasiam bani Naibata. . . Anjaha damei ni Naibata, na mangatasi haganup paruhuron, in ma manramotkon uhur ampa pingkiran nasiam ibagas Kristus Jesus!” (Pil. 4:6, 7) Jadi, damei ni Naibata boi mangurupi nasiam manlawan pingkiran na salah. Anggo ipadohor nasiam dirimu hubani Jahowa, ‘padohoron-Ni ma diri-Ni bani nasiam’.​—Jak. 4:8.

Anggo totap orot parhasomananta pakon Pargogoh na So Tarimbang, lang boi hita hona tirangkap ni Sibolis. Jesus mangkatahon, “Roh ma raja ni dunia on [Sibolis]. Seng dong kuasani bangku.” (Joh. 14:30) Mase sonai ihatahon Jesus? Ia patorangkon, “Na marsuruh ahu, Ia do hasomanku. Seng ongga itadingkon sahalak ahu, ai rosuh ni uhur-Ni do tongtong huhorjahon.” (Joh. 8:29) Hita pe anggo tongtong mangkorjahon harosuh ni Naibata, seng ongga tadingkonon-Ni hita. Jadi anggo ipadaoh hita dirinta humbani pornografi, maluah ma hita hun tirangkap ni Sibolis ai.