NTÉ bone b’Israël ba kômesane na ba zu dañe Jourdain a ke Si ya ntiñetan, beyeñe ve suan. Beza fe le? Binga ya meyoñe mefe, be nga zu bañete be abôk. Bone b’Israël be nga yiane simesane na: ‘Ke mbamba fane ya vômane nyi! Bia zu bi mimfefé bemvôé, bia zu kôme ke di a nyu, bia zu fe tame bone jem.’ Akusa bo na metum a mefulu ya nlame binga bete me mbe me wosa’an a Atiñe Yéhôva a nga ve be, befam béziñe ya Israël be mbe ve simesane na: ‘Jôm éziñe ja ye ke bia bo. Bii tabe ntyel.’

 Nde ñhe jé é nga boban? Bible a jô na: ‘Bôte be nga taté na ba bo bijabô a bengone ya Moab.’ Binga bete be nga su’ulane fe jeñe na be wone befam bete be kañe bivuse bezambe. A be nga bele fe de bo! Bia kôme ñhe wô’ô amu jé “Yéhôva a nga yaa Israël.”​—Nb. 25:1-3.

Bone b’Israël be nga tyame metiñe me Yéhôva mebaé: Be nga kañe bengunemelan, be bo fe mvite mame ya bisôk. Betoyini be bôt be nga jañele ényiñe jab amu melo. (Nk. 20:4, 5, 14; Dt. 13:6-9) Jam da dañe dañ ôlun é ne na, befam bete ba bele mane wu éyoñ éte be ntele na ba zu nyiine Si ya ntiñetan.​—Nb. 25:5, 9.

A lat a mam mete, nlômane Paul ô nga tili na: “Mam mete me nga bobane be be mboane ya éve’ela; a me nga tiliban mfa’a ya nlebane wongan, be bia bete susu’a ya biyoñ e kuiya.” (1 Bec. 10:7-11) Satan a nga kôme vak éyoñ a nga yen ane bone b’Israël ba kôme dumban abé été a jañele fane ya nyiine Si ya ntiñetan. Ajô te, bi nji yiane bo fianga a abendé Paul, amu bia kôme wô’ô na Satan a jeñ a ngul ése na a dibe bia zen éyoñ bi ntoo menyiine ya mfefé émo ji.

Satan a lame Bekristen; mezen a belane me me jaéya zu ma kpwé abui bôt. Avale bi ndeme mane yen, a nga belane mam bisô’ô na a kpwé bone b’Israël. Ôlam ôte wo ke ôsu a kpwé abui bôte den. Beta zene wua a belane nye asu na a bi bia ôlam ôte a ne pornographie.

Melu ma, môt a ne ngule ya lobane pornographie bôte bevo’o teke yem. Melu mvuse ki a mbe na, asu na môt a yene pornographie, a mbe a yiane ke salle de cinéma, nge ke éfatyele ba kuane bekalate ba ngôné mvite mboan ete; benya bôtô étame ki mbe be mbe be bili ôva’a ngule ya ke avale bevôm ete. Ôson ô mbe ô kama’an abui bôte na e ke avale bevôm ete. Ve dene ki, a zene ya internet, môt a ne yene pornographie nda bisaé nge ke a bete metua. Abui mesi, befam a binga be ne yene pornographie be too si menda map.

Sa ke ve abim ete étam. Bôte be bili betéléfôn a betablette be ne yene pornographie be wulu’ njoñ, nge ke be bete taxi a bemetua éyoñ ba ke mulu map.

Jôm ete nje pornographie a ndamaneya abui bôte den. Bi vo’o lañ abime meluk pornographie a bôéya, nge abime bôt e jañeleya éjijine jab étome pornographie, nge ke abime bôte mone môte ya nlem a bôm étome nsem ôte wua wua. Jam da dañ é ne na, môt a yene pornographie a ne ndaman élate jé a Yéhôva. Bi vo’o du’uban a buni na môt a ne yene pornographie jôm é teke nye bo. Abui bôt é ngenan é be’e meveñe ya mbia nsem ete azukui den. Meveñe mete me ne ke ma yet ôte’ete’ ôte’etek, ve bifele ya été bi ne bo te man môs éziñ.

Ve bia yiane tabe ndi na Yéhôva a ne volô bia na bi sa’ale ôlam ôte. Nge bia yi na Yéhôva a kamane bia, bia yiane bo jam e nga kate bone b’Israël melu mvus, bia yiane ‘bo fo’o’ ve avale Yéhôva a jô bia. (Nk. 19:5) Bia yiane kôme ba’ale na Yéhôva a wô’ô pornographie nya nyé. Amu jé bia jô nalé?

Tame fase jame di: Atiñe Yéhôva a nga ve bone b’Israël e mbe e sela’an a metiñe ya meyoñe mevo’o mese ya éyoñ éte. Atiñ ete e mbe ane aka’a da kamane be na be bo te vu bôte be mbe be bôma’ane be a mbia mimboane miap. (Dt. 4:6-8) Metiñe mete me mbe me ngôné’é beta ñye’elane nyi: Yéhôva a vini mvite mame ya bisôk.

Éyoñe Yéhôva a maneya lañe bone b’Israël mbia be mame meyoñe ma bômane be  me mbe me bo’ok, a nga jô be na: “Mia ye sa’ale bo mam ma bobane Canaan vôm ma kee mia. . . . Si [éte é ne] mvin, . . . me nga [zu] ve je melep.” Mise me mfumbane Zambe ya Israël, mbia be mam Becananéen be mbe be bo’o me nga ve si jabe mvit.​—Lv. 18:3, 25, Mfefé Nkôñelan.

Ve njiane Yéhôva a nga jiane Becananéen ô nji kamane meyoñe mevo’o na me kee mvite mame ya bisô’ ôsu. Mimbu 1 500 mvus, Paul a nga kobô ajô bôte ya meyoñe mete a jô’ô na “be maneya vôô minlem, be nga ve bebien mfa’a ya bisôk, a bo mam mese me ne mvit minyamete été.” (Beép. 4:17-19) Dene fe, abui bôte da bo mam bisôk teke wô’ô ôson. Benya Bekristene ba yiane kôme tebe aval mam ete ôyap.

Môt a nye’e pornographie a biasé Yéhôva mbia mbiasan. Yéhôva a nga té bia éve’ela jé, a ve fe bia fe’e ya yemelane na jame di e ne abé, dina ke mvo’é. Nde é nga yiane na a telé minné a lat nkeane binoñ. A nga tyi’i na nkeane binoñ wo yiane bobane ve zañe bôt be ne nlu’an. (Met. 1:26-28; Min. 5:18, 19) Bôte ki ba kuli bigeñgeñ a bekalate ba wumulu pornographie, Yéhôva a yene be aya? Bôte bete ba biasé metiñe me Yéhôva angôndô. Bi ne jô jô na ba ta Yéhôva. Yéhôva a ye ve be ma’ane ya mbia mboane wop.​—Bero. 1:24-27.

Jé ke bi ne jô mfa’a ya bôt ba lañe pornographie nge ke yene nye bigeñgeñ? Bôt béziñ be ne simesane na jôme ja ye ke kui be to’o ba yene pornographie. Ve ba vuane na mboan ôte wo liti na ba su’u besiñe be Yéhôva. Éko éziñ sa ke nne nsôñane wop ô mbe nalé éyoñ be taté’ na ba yen pornographie. Teke bisô na benya bebo bisaé be Yéhôva ba kôme vini pornographie évini awu. Kalate Zambe a jô bia na: “A mia bôte mia nye’e Yéhôva, vina’an abé.”​—Bs. 97:10.

E ne bo ayaé na môt a sa’ale pornographie to’o a bili mbamba nkômban. Mbôle bi nga bialé abé été, e ne bo ayaé ya wosane mbia minkômban. Ane ô vaa nalé, nleme wongane fe ô ne du’u bia na pornographie a nji bo bo abim abé ete. (Jr. 17:9) Ve abui Bekristen e nga kui na é dañe ndum  ete. Nalé a ne ve bia ngule nyôl nge bia fe bia wosane mbia minkômban. Tame ñhe yen avale Bible a ne volô wo na ô sa’ale beta ôlam ba loone na pornographie.

Avale bia te yene yôp, abui bone ya Israël e nga sem amu be nji yeme jôé mbia minkômbane miap. Nalé a ne fe kui bia den. Jacques, monyañe Yésus ya nyia wua a nga kobô ajô ete a jô’ô na: “Môt ase a yene meve’ele éyoñ a dutuban a mbia nkômbane wé émien, a du’uban. Wônaa mbia nkômban, éyoñ a nyoñeya abum, a biaé abé.” (Jc. 1:14, 15) Nge môt a jô’é na mbia minkômbane ya bisôk mi faa nye nlem, nalé a ne su’ulane tindi nye nsem. Jôm ete nje bia yiane juan a mbia minkômban, bi nji yiane yale mie.

Nge mbia minkômbane mia so wo nlem, jika’a titane mie été été. Yésus a nga jô na: “Nge wo wôé nge abo dôé jia ja kolé wo ôbak, tyi’i je, a wua je fé. . . . Nge dise dôé da kolé wo ôbak, va’a de a wua de fé.” (Mt. 18:8, 9) Yésus a nji kômbô jô na bi nyoñ ôvôn a tyi’i bibu’a bi nyule biangan. Ve a mbe a kômbô liti na e ne nya mfii ya kandane mam mese me ne bo na bi sem teke jañele éyoñ. Aval avé bi ne toñe melebe mete a lat a pornographie.

Nge wo tem mbia bive’ela bi ntele wo ôsu, te jô na ‘Aa’! Jôm ete é vo’o ndeñele ma.’ Va’a mise môé été été. Jika’a dime télé. Dimi’i ordinateur nge téléphone teke yange. Jeñe’e na ô bindi mam me ne mfuban. Nge bia bo de, bia ye kui na bi jôé asimesane dangan a wosane mbia minkômban.

Jé ke ô ne bo nge ô teléya ñyenane pornographie ve mam ô nga yen me ngenan me za’a wo ôsimesan. Éyoñ môt a nga yen pornographie, mbia bive’ela a nga yen bi ne tabe nye ôsimesan mimbu mimbu. Bi ne bo bi beta so nye nlô atemetem. Éyoñe nalé a kui, a ne bi mbia minkômban, a ne kômbô taté na a mieneke soé jé. Ajô te tabe’e nkômesane na aval asimesan ete e ne bo e so’o, fase’e fe avale wo ye wosane de.

 Tuka’a yemete ntyi’ane wôé ya bo na asimesane dôé a mimboane miôé mi lu’an a asimesane Zambe. Jeñe’e na ô vu nlômane Paul ñwô ô nga “bôme nyule [jé] a bo je é wô’ô [nye].” (1 Bec. 9:27) Te me’ete na mbia b’asimesan be bi wo minkôm. “Veñesa’an ñveñesane ya bo [nsisime wôé mfefé], nde [wo] ye ve’ele mve’elane ya bo mam me ne nkômbane ya Zambe, mam me ne mvaé, ma nyoñeban, a me ne mvo’é ésese’e.” (Bero. 12:2) Te ve’ele vuane na éyoñ bia simesan a bo aval ane nkômbane Zambe ô né, bia ye bi beta bibotan a mevak a dañe éyoñ bia jô’é na minkômbane ya minsôn mmie mi jôé bia.

Jeñe’e na ô ba’ale bifuse ya Kalate Zambe biziñe nlô. Éyoñ mbia b’asimesan ba so wo nlem, simesa’ane bifuse bite. Bifuse bi bi ne volô wo éyoñ ô tele avale été ete: Besam 119:37; Ésaie 52:11; Matthieu 5:28; Beéphésien 5:3; Becolossien 3:5; a 1 Bethéssalonicien 4:4-8.

Jé ke ô ne bo nge wo kate dañe nkômbane ya yene pornographie a wu ya wosane mbia b’asimesan? Bo’o ane Yésus, nliti zen wongan. (1 P. 2:21) Éyoñe Yésus a nga mane duban, Satan a nga zu ve’ele nye. Nde, Yésus a nga bo aya? Yésus a nji ve’ele kañese na Satan a kpwé nye. A nga belane mejô me Zambe biyoñ biyoñ asu na a dañe meve’ele Satan a nga telé nye ôsu. A nga jô na: “A Satan kôlô’ô”! Ane Satan a nga ke. Fo’o ve aval Yésus a nji sili mo si, bia fe bi nji yiane tek. (Mt. 4:1-11) Satan a émo jé ba ye ke ôsu a jeñe mezene ya jalé asimesan dôé a mvite mame ya bisôk, ve te ve’ele sili mo si. Ô ne ngule ya wosane pornographie ô dañe fe nye. Yéhôva a ne volô wo na ô dañ nsiñ ate.

Kele’e ôsu a ye’elane Yéhôva na a volô wo. Paul a nga jô na: “Mam mia sili me kateba’ane be Zambe a meye’elan a nja’an a mvean akéva. A mvo’é Zambe nje ete ja dañe fe’ ése, ja ye ba’ale minlem mienan a minsimesane mienan be Krist Yésus.” (Beph. 4:6, 7) Mvo’é Zambe éte ja ye volô wo na ô bi ngule ya sa’ale mbia mboan. Nge wo subu Yéhôva bebé, nye fe “a ye subu [wo] bebé.”​—Jc. 4:8.

Bia ye kui na bi dañe melam me Satan mese nge bia tu’a yemete élate jangan a Zambe ya ngul ése. Yésus a nga jô na: “Njôô ya si nyô a nga zu. Ve a nji bi jam éziñ be ma.” (Jean 14:30, Mfefé Nkôñelan) Amu jé Yésus a mbe a bili ndi nlem éte? Émien a yalane na: “Môt a nga lôme ma a ne be ma; a nji li’i ma étam; amu ma bo mam a nye’e melu mese.” (Jean 8:29) Nge wo jeñ a ngule jôé ése na ô bo avale Yéhôva a nye’e, ô ne tabe ndi na a ye ke ôsu a bi wo wo. Tubu’u pornographie, ndembene wo ye bo te timbi ôlame Satan.