WEN di Izrelait dehn mi bowt fi kraas di Jaadn Riva fi goh eena di lan weh Gaad mi pramis dehn, sohn peepl mi kohn vizit dehn. Di peepl weh mi kohn vizit dehn da-mi sohn uman weh da neva Izrelait, ahn dehn mi invait di man dehn tu wahn paati. Ih kuda mi luk laik wahn wandaful apachooniti. Fi mek nyoo frenz, fi daans, ahn fi eet sohn gud food mosi mi song reeli gud. Di uman dehn kostom ahn moaralz da neva laik di wan weh di Izrelait dehn mi laan eena Gaad Laa, bot stil som a di Izrelait man mosi mi tink: ‘Wee noa weh rait ahn rang. Wee wahn bee kyaaful.ʼ

 Weh mi hapm? Di Baibl tel wi dat towznz a man fahn monks di Izrelait dehn “mi komit sekshwal imoraliti wid di uman dehn fahn Moawab.” Akchwali, di uman dehn mi waahn di Izrelait man dehn wership faals gaadz. Ahn dat da egzakli weh mi hapm! Now wi si wai “Jehoava mi geh beks wid di Izrelaits.”—Num. 25:1-3.

Di Izrelait dehn mi brok Gaad Laa eena too way: Dehn mi bow dong tu aidolz, ahn dehn mi komit sekshwal imoraliti. Towznz mi ded kaaz a weh dehn neva obay Jehoava. (Ex. 20:4, 5, 14; Deut. 13:6-9) Bot da wai fi dehn akshan mi reeli sad? Da bikaaz a di taimin. Dehn towznz a Izrelait mi wahn soon kraas di Jaadn intu di Pramis Lan if dehn Izrelait man neva brok Gaad Laa.—Num. 25:5, 9.

Di apasl Paal, mi rait bowt weh mi hapm, ih mi seh: “Dehn ting mi hapm fi mek wi noa weh wahn hapm tu wee tu, if wee du weh dehn du. Aala dis don rait dong eena di Skripcha fi waan wi, kaa wee di liv eena di laas dayz.” (1 Kor. 10:7-11) Wi ku bee shoar dat Saytan mi reeli hapi dat som a dehn Izrelait mi komit wahn seeryos sin gens Jehoava ahn dehn neva gaahn eena di Pramis Lan. Wi need fi laan fahn fi dehn mistayk bikaaz wi noa dat Saytan wuda bee reeli hapi if hihn kuda stap wee fahn goh eena Gaad nyoo werl!

Saytan waahn chrap Kristyanz tudeh, ahn fi du dis, hihn di yooz chriks weh ih noa reeli gud ahn weh ih noa werk wid lata peepl aredi. Laik weh wi jos laan, Saytan mi yooz wan a dehn chriks wid di Izrelait dehn; hihn mi yooz imoaral seks. Eena fi wee taim, imoraliti kantinyu fi bee wahn daynjaros chrap. Wahn powaful way imoraliti ku kreep een ahn chrap wi da chroo poarnografi.

Tudeh, wahn persn ku luk pahn poarnografi widowt enibadi els noa ih di du it. Meni yaaz agoa, if wahn persn mi waahn luk pahn poarnografi, ih wuda mi haftu goh da wahn tayta fi si wahn moovi er goh da wahn shap weh sel dehn kaina buks. Wahn lata peepl praabli neva gaahn da dehn kaina plays bikaaz dehn mi shaym fi mek peepl si dehn. Bot now, wahn persn weh ga akses tu di Intanet ku luk pahn poarnografi da werk er eniway wehpaat ih deh. Fi egzampl, eena lata konchri, wahn man er wahn uman ku luk pahn poarnografi widowt eevn lef dehn hows.

Bot dat da noh aal. Di teknalaji weh wi ga tudeh mek it eeziya fi luk pahn poarnografi. Peepl ku wach imoaral pichaz er veedyo pahn dehn foan, tablet, er laptap, weda dehn di waak dong di schreet, di raid di bos, er deh pahn di chrayn.

Sins ih geh eeziya fi mek sombadi wach poarnografi widowt ada peepl noa, wahn lat moa peepl di geh hert bai poarnografi tudeh. Wahn lata peepl weh wach poarnografi damij dehn marij, dehn repyutayshan, ahn dehn kanshans. Bot wers dan dat, dehn damij dehn frenship wid Gaad. Soh ih sayf fi seh dat poarnografi hert di persn weh wach it. Wahn lata taim ih kaaz deep imoashanal payn. Da payn da laik wen yu get wahn kot. Eevn doa di kot mait heel, ih lef wahn skaar weh mait laas fi wahn lang taim.

Ih komfertin fi noa, doh, dat Jehoava ku gi wi protekshan fahn dis chrap weh Saytan set. If wee waahn Jehoava protekshan, wi need fi “obay onli” hihn. Dat da sohnting weh di Izrelait man dehn neva du. (Ex. 19:5) Wi need fi rekonaiz dat Gaad hayt poarnografi. Wai wi seh dat?

Tink bowt dis: Di laa dehn weh Gaad mi gi di nayshan a Izrel mi difrent fahn di laa dehn weh di ada nayshan dehn mi ga bak den. Wi ku kompyaa di laa dehn weh Gaad mi gi Izrel tu wahn  waal weh mi protek dehn fahn geh afektid bai di rang tingz weh di nayshanz rong dehn mi-di du. (Deut. 4:6-8) Dehn laa mi mek wahn impoatant chroot klyaa: Jehoava hayt sekshwal imoraliti.

Jehoava mi menshan di imoaral tingz weh di nayshanz rong Izrel mi-di du, den ih tel dehn: “Yu noh fi du weh dehn du eena di lan a Kaynan, wehpaat Ai di bring yoo. . . . Di lan doti, an Ai wahn ponish evribadi deh fi weh dehn du.” Tu di hoali Gaad a Izrel, di Kaynanait dehn way a laif mi soh disgostin an imoaral dat hihn mi vyoo di lan wehpaat dehn mi-di liv az doti ahn korop.—Lev. 18:3, 25.

Eevn doa Jehoava mi ponish di Kaynanait dehn, ada peepl mi kantinyu fi praktis sekshwal imoraliti. Oava 1,500 yaaz mi paas, ahn Paal mi seh dis bowt di nayshan dehn wehpaat Kristyanz mi liv: “Dehn noh ga no shaym bowt notn nohmoh. Dehn du aal kaina eevl ting weh dehn main tel dehn fi du. Dehn sleep rong ahn liv bad laif kyaahn don.” (Ifee. 4:17-19) Eevn tudeh, lata peepl imoaral ahn dehn prowd bowt it; dehn noh shaym ataal. Az moch az pasabl, chroo Kristyanz fi avoid luk pahn di imoaral tingz weh di peepl eena dis werl promoat.

Poarnografi da wahn big disrispek tu Gaad. Hihn kriyayt hyoomanz wid di sayhn kaina kwalitiz laik hihn, soh wi ku noa weh rait ahn rang. Hihn mi waiz wen ih gi wi laaz bowt sekshwal rilayshanz. Jehoava mi waahn sekshwal rilayshanz fi bee sohnting weh wahn marid kopl ku injai tugeda. (Gen. 1:26-28; Prov. 5:18, 19) Bot da weh peepl weh promoat poarnografi, er put it eena veedyo er magazeen reeli di du? Dehn di kompleetli ignoar Gaad moaral standadz. Yes, peepl weh promoat poarnografi di disrispek Jehoava. Ahn Gaad wahn joj dehn fi disrispek fi hihn moaral standadz.—Roam. 1:24-27.

Bot how bowt peepl hoo mek it wahn habit fi reed er wach poarnografi? Dehn mait feel laik da jos fon an dat ih noh di hert nobadi. Bot reeli, dehn di akchwali sopoat dehn wan weh di ignoar Jehoava moaral standadz. Maybi dis da neva weh dehn mi gat in main wen dehn staat wach poarnografi. Bot di Baibl mek it klyaa dat dehn wan weh wership di chroo Gaad fi hayt  poarnografi. Di Baibl tel wi: “Oa yoo hoo lov Jehoava, hayt weh bad.”—Ps. 97:10.

Eevn dehn wan weh noh waahn luk pahn poarnografi ku fain dis haad fi du. Wi noh perfek, ahn soh wi mait haftu fait gens dehnya sekshwal dizaiya weh noh kleen. Aalso, bikaaz wi noh perfek, wi mait chrai fi tel wiself dat ih noh rang fi luk pahn poarnografi. (Jer. 17:9) Bot wahn lata peepl hoo kohn fi bee wahn Kristyan don win di fait. Bikaaz wi noa dis, ih ku mek yu feel kanfident dat yoo ku aalso win di fait oava dehnya dizaiya weh noh kleen. Mek wi luk pahn sohn wayz how Gaad Werd di Baibl ku help yu fi avoid Saytan chrap a poarnografi.

Laik weh wi mi menshan eena di biginin a dis aatikl, wahn lata di Izrelait dehn mi mek rang dizaiyaz groa eena dehn haat til dehn du sohnting weh mi ga bad rizolts. Di sayhn ting ku hapm tudeh. Jaymz mi diskraib di daynja wen ih seh: “Temtayshan kohn tu evri wan a wi wen fi wee oan wikid haat haal wi wan said ahn sweet-taak wi fi sin. Afta wi wikid haat don los ahn geh pregnant, ih baan sin.” (Jay. 1:14, 15) Wans di rang dizaiya groa tu wahn sertn point eena wahn persn haat, den moa dan laikli, ih wahn du weh ih waahn du. Soh wi need fi foas wiself fi stap tink bowt eni imoaral dizaiya.

If yu fain owt dat yu kip di tink bowt imoaral tingz, tek akshan; du sohnting bowt it rait away. Jeezas mi seh: “If yu han er yu fut di mek yu sin, den chap it aaf ahn dash it weh. . . . Ahn if wan a yu aiy di mek yu sin, den dig it owt ahn dash it weh.” (Mach. 18:8, 9) Jeezas neva mi-di seh mek wi akchwali du dat tu wiself. Hihn mi-di yooz it az wahn iloschrayshan fi help wi andastan dat wi need fi fain owt wai wi di tink rang tingz ahn mek di nesiseri chaynjiz. How wi ku aplai da kongsl wen ih kohn tu poarnografi?

If yu en op di kohn kraas poarnografi, noh tink, ‘Ai schrang inof, ih noh wahn bee wahn chrap fi mi.ʼ Ton weh kwik-wan. Ton aaf di TV, di kompyoota, di tablet, er di foan rait away. Foakos pahn sohnting kleen. If yu du dis, ih ku help yu fi kanchroal yu tinkin insteda mek rang dizaiyaz kanchroal yu.

Wat if yu stap wach poarnografi aredi, bot sohntaim yu memba weh yu mi si eena di paas? Dehnya picha er taats ku stay eena wahn persn main fi wahn lang taim. Dehnya memriz ku kom op sodn-wan. If dat hapm, yu mait feel di dizaiya fi du sohnting weh noh kleen, laik maastabayt. Soh kip in main dat yu ku ga dehn taats sodn-wan, ahn bee redi fi fait gens dehn.

Mek op yu main fi tink an ak di way Gaad waahn. Bee laik di apasl Paal, hihn mi wilin fi “chreet [ih] badi rof, ahn kip it anda kanchroal.” (1 Kor. 9:27) Noh mek rang dizaiyaz kanchroal yu. “[Yu] mos mek Gaad chaynj di way [yu] tink soh dat evriting weh [yu] du wahn chaynj. Den dat wahn mek [yu] noa weh Gaad waahn, weh gud, ahn weh wahn pleez hihn, ahn yu wahn noa egzakli how yu shuda liv.” (Roam. 12:2) Aalwayz memba dis: Yu noh wahn bee hapi if yu du imoaral tingz, bot yu wahn bee hapi if yu tink an ak di way Gaad waahn.

Chrai fi memoraiz sertn Baibl vers. Den wen di rang taats kom op eena yu main, foas yuself fi tink bowt dehn skripchaz. Skripchaz laik Psalm 119:37; Isaiah 52:11; Machyu 5:28; Ifeezhanz 5:3; Koloashanz 3:5; ahn 1 Tesaloanyanz 4:4-8 wahn help yu fi tink di way Jehoava tink wen ih kohn tu poarnografi, ahn fi andastan how hihn waahn wi bihayv.

Weh yu ku du if yu fain it haad fi stap tink bowt er luk pahn tingz weh imoaral? Fala Jeezas egzampl kloas-wan. (1 Peet. 2:21) Afta Jeezas mi geh baptaiz, Saytan mi kip di temp ahn. Weh Jeezas mi du? Ih neva giv een. Hihn yooz skripcha afta skripcha fi rijek Saytan temtayshan dehn. Hihn seh: “Goh fahn ya, Saytan!” Ahn Saytan lef ahn loan. Jos laik how Jeezas neva giv op eena ih fait gens di Devl, yoo noh fi giv op needa. (Mach. 4:1-11) Saytan ahn fi hihn werl wahn kip di chrai fi mek yu tink bowt imoaral tingz, bot noh giv op di fait. Wid Jehoava help, yoo ku win di fait gens poarnografi.

Kantinyu fi pray tu Jehoava an aks ahn fi help yu. Paal mi seh: “Ahn unu mos tank ahn tu wen unu di aks ahn fi weh unu need. Den Gaad wahn gi unu wahn kaina pees weh nobadi kyaahn andastan. Ih wahn mek da sayhn pees wach oava unu haat ahn unu main bikaa unu da wan wid Krais Jeezas.” (Fil. 4:6, 7) Gaad wahn gi yu di pees a main fi help yu fait gens di rang dizaiya. If yu jraa kloas tu Jehoava, “hihn wahn kohn [er, “jraa,” NW] kloas tu yoo.”—Jay. 4:8.

If wi kip wi rilayshanship wid di Sovrin a di yoonivers schrang, wi wahn geh protekshan fahn Saytan chrap dehn. Jeezas mi seh: “Ah noh wahn taak wid unu soh moch afta dis, kaa Saytan, weh da di wan weh di rool dis werl, di kohn. Hihn noh ga no powa oava mee.” (Jan 14:30) Wai Jeezas mi shoar a dis? Hihn mi seh: “Di wan weh sen mee deh wid mi. Hihn noh lef mi bai miself, kaa Ai aalwayz du di ting dehn weh hihn laik.” (Jan 8:29) If yoo aalso chrai fi pleez Jehoava eena evriting weh yu du, yu ku bee shoar shoar dat hihn noh wahn abandan yu. Du yu veri bes fi stay weh fahn poarnografi, ahn Saytan wahn kyaahn chrap yu ataal.