MURUSUNRÜGAALI meha dan lun hánhiñuraguni ísüraelina duna Hordán lun hebelurun lidoun Fulasu Füramasewati. Luagu aban weyu aba hachülürün fiu würiña terenchana agunbirahaña wügüriña lidoun aban adineruni o fedu. Genegeti ariha hamani wügüriña katei le kei aban chansi móubati lun hadügün iseri umadagu, habinahan luma lun heigin éigini semeeti. Lau sun meha múaran lan hechun luma ligaburi hawinwandun würiña hagía luma Lúrudu le líchugubei Bungiu houn ísüraelina, másiñati samina hamá fiu wügüriña duáribaña lan ani masuseredunbei lan giñe ni kata houn.

 Kati asuseredubei? Ariñagatu Bíbülia: “Aba hagumeserun wügüriña agadeiragua lau hádaragun houngua hamoun würiña Moábüna”. Le linarün katei, busentiña meha würiña hagía lun háhuduraguba lan ísüraelina houn habungiutegu. Ani ligía asuseredubei. Ligíati lagañidunbei Heowá hama ísüraelina (1 Lur. 25:1-3).

Dürügua hamuti ísüraelina hagía Lilurudun Bungiu lidan bián igaburi: lau háhuduragun houn búngiugu mama inarünitiña luma lau hadügün magíaguni. Hilaguatiña saragu milu ladüga hamaganbadin (Afu. 20:4, 5, 14; 2 Lur. 13:6-9). Ka uagu weiri lubéi luriban katei le hadügübei? Ladüga meha dan le ídanbei hawinwanda. Lun hamuga madüraagun hamani wügüriña hagía Lilurudun Bungiu, murusunrügaali yebe dan houn lun hánhiñuraguni duna Hordán luma lun hebelurun lidoun Fulasu Füramasewati (1 Lur. 25:5, 9).

Bürǘ lumuti apostolu Pábulu eweridihani le, lau laritaguni sügǘ le: “Susereti sun le houn wagüchagu, aba labürüdǘn tidan Lererun Bungiu keisi arufudahani woun, wagía le wínwanbei lidan lagumuhóun dan le” (1 Ko. 10:7-11). Chóuruti gunda lan meha Satanási lau héiguadun ísüraelina lidoun figóu wéiriti le, luma lau mebelurun hamá lidoun Fulasu Füramasewati. Lunti wafurendeirun lídangiñe le asuseredubei houn, subudi wamuti luagu lagundaaruba lan hamuga giñe Satanási lun mebelurun wamá lidoun iseri ubóu le füramase láalibei Bungiu woun.

Lun ladügün lun hafigounhan kristiánugu, yúsuti Satanási sádara to subuditi tuáguti lun buidu, ani buiti lidin lun lau layusurunu houn saragu gürigia. Kei warihini, adügati lun héiguadun ísüraelina lidoun magíaguni. Uguñe weyu, yúsumeme lágili Mafia magíaguni kei sádara. Ka gayaraabei lanügüniwa éiguada lidoun? Aban emei le buiti lidin lun lau layusurun: iyawaü o bidéu lánina agamariduni.

Uguñe weyu ménrengunhali haríagun gürigia iyawaü o bidéu lánina agamariduni sin híchugun amu fe. Luagu meha aban dan, anhein meha busén lubéi aban gürigia laríagun iyawaü o bidéu lánina agamariduni mosu meha lidin tidan sine, lagañeihan garüdia o líburu lidan somu fulasu. Háfuga madügün hamuti saragu gürigia katei le ladüga meha nibusigari hamá luéi harihín lidan burí fulasu ligía o yarafa ñein. Gama lumoun, uguñe weyu, ménrenguntimahali houn furumiñeguarügü gürigia haríagun iyawaü o bidéu lánina agamariduni luéigiñe Internet lidan burí hawadigimari o tidan karü. Lidan saragu ageiraü ménrengunhali giñe haríagunu dandu wügüriña kei würiña sin háfuridun hábiñegiñe.

Ani mámarügüñein le, ménrenguntimahali giñe tadarirúniwa lidan burí gágamuru o tidan konputadora. Gayaraati éibugeina liña lan gürigia, laweiyasuhaña lan tidan busu o íngiini ani anihán aríagua iyawaü o bidéu lánina agamariduni lídangiñe ligagamurun o lani konputadora.

Kei ménrenguntima haali lan lun taríawagun iyawaü o bidéu lánina agamariduni sin híchugun amu fe, hanarimetima haali dañu le tadügübei sádara to uguñe weyu. Adügaaru lun lagadeirun habagari saragu maríeitiña, lun lagadeirun ligaburi hasandiragun gürigia houngua luma lun lagadeirun hasaminan. Ani létima hírubei, ru tumuti lumadagua gürigia luma Bungiu lidoun denchaü. Gayaraati wachoururuni adüga tan iyawaü lánina agamariduni dañu houn gürigia ha aríagubarun. Liibe-agei dan, adügatu lun hasandirun gürigia igarigu. Lau sun gayara lan tagidarun iyawaü to lídangiñe lisaminan gürigia murusun murusun, rédeiti makü o tárigirugu luagu saragu irumu.

Gama lumoun mabulieida waméi gayara lan lóunigiruniwa Heowá tuéi lisadaran Satanási. Anhein busén wabéi ladouragun Heowá wau, mosu wadügüni le madügün habéi ísüraelina: gaganbadi wamá lun le lubeibei lidan sun katei (Afu. 19:5). Mosu gunfuranda wamani iyereegu tan iyawaü o bidéu lánina agamariduni lun Bungiu. Ka uagu wariñagei?

Samina wamá luagu le: móubati meha lúrudu le líchugubei Bungiu houn ísüraelina. Ítara liña meha kei aba baríeiru houn ísüraelina le adügübei lun fánreinguañu hamá luéi lahahürüha hagaburi néchanigu ha yarafabaña houn (2 Lur. 4:6-8).  Arufudati meha lúrudu le aban inarüni súdiniti: iyereegu lan magíaguni lun Heowá.

Lárigiñe layanuhan Heowá luagu lahahürüha hagaburi néchanigu ha yarafabaña houn ísüraelina, aba lariñagun houn: “Mafalara huméi igaburi le Kananbei, fulasu le ñéinhinba lubéi nanügaün, [...] rédeiti giñe hageira gürigia hagía wíyeñu; gama lumoun aguseragüda numutiña luagu hariban”. Ariha lumuti meha Bungiu sánduti, le Lubungiute Ísüraeli, ligaburi hawinwandun kananna kei aban katei le ahahürühati ani ariñagati luagu fulasu le ñein lubéi hawinwanda wiye lan (Fad. 18:3, 25).

Lau sun bei lániña Heowá kananna, magumuchunti ladügǘn magíaguni. Lóugiñe 1,500 irumu lárigiñe, ariñagati Pábulu hawagu lílana fulasu le meha ñein lubéi hawinwanda kristiánugu “féridi hamaali habusigari” ani “deregeguaaña houngua lun féridiguaü, adügatiña sun luwuyeri iwiyei lau ugundani” (Efe. 4:17-19). Uguñe weyu, wéiritimahali giñe mabusigari hamá saragu gürigia hadügün magíaguni. Lunti hadügüni kristiánugu inarünitiña sun hayaraati lun háguruni harihin luéi katei lánina magíaguni le hadügübei gürigia ha lánina dan le.

Arufudatu iyawaü o bidéu lánina agamariduni menebenehabuni lun Bungiu. Adüga lumutiwa Bungiu lenegeguanarügü, luma lau iarani lun wasubudiruni le buídubei lumoun le wuribabei. Lau lichú au, ruti lúrudu luáguti agamariduni ani ru lumuti giñe lun gayaraabei lan hagundaarun maríeitiña hámagua (Agu. 1:26-28; Ari. 5:18, 19). Ha adügübaña iyawaü o bidéu lánina agamariduni, ínchaha hagía amu aríaguoun, harufuduña menebenehabuni lun lúrudu lánina laruma ibagari le líchugubei Bungiu. Ligía laguseragüdübaña lubéi Bungiu gürigia burí ha (Rom. 1:24-27).

Agia gürigia ha aliihabaña o aríagubaña iyawaü o bidéu lánina agamariduni chuñu hau? Háfuga hariñagun fiu luagu aba lan isebáhari le maribanti. Gama lumoun hídehaña hama ha arufudubaña menebenehabuni lun lilurudun Bungiu. Háfuga mama lan anihán le habusenrunbei dan le hagumeserunbei aríagua iyawaü o bidéu lánina agamariduni. Íbini ítara, furanguti, ha busenbaña heseriwidun lun Bungiu le inarüniti mosu iyereegu lan katei le houn. Ariñagatu Bíbülia: “Hínsiñehabuti Aburemei houn ha iyereehabúbaña lun wuribati” (Sal. 97:10).

Háfuga ru hamá ha busenbaña hígiruni taríawagun iyawaü o bidéu lánina agamariduni fe hénrengu lan lun méiguadunbaña lan lidoun taríawagun. Kei le gafigoun wabéi, háfuga wageindaguña lan  luma ayumahani lánina magíaguni. Lanwoun lira, gayaraati tadügün wanigi to gafigounboun lun wasaminarun mariban lan lun maganbadi wamá lun lilurudun Bungiu (Her. 17:9). Gama lumoun saragu ha kristiánuhaña uguñe weyu gañei hamaali wuribu le. Lasubudiruniwa le, gayaraati línchahaniña ha áfaagubaña lun hígiruni taríawagun iyawaü o bidéu lánina agamariduni. Ariha waméi ida liña lan gayara lan tíderaguniwa Lererun Bungiu lun wóunigiragun woungua tuéi lisadaran Satanási.

Kei warihini lidan lagumeseha arütíkulu le, adügati luriban ayumahani lun hábürühan saragu ísüraelina lidoun günringuaü. Ligiaméme asuseredubei uguñe weyu. Ayanuhati Santiagu le lamulen Hesusu tuéigiñe lúguchu luagu luriban katei le, ariñagati: “Dan le lachawahani luriban layumahan gürigia, ligía lábürühan lidoun ladügǘn le wuribabei. Lídangiñe burí luriban ayumahani le, liabin figóu” (Sant. 1:14, 15). Dan le lígirun aban gürigia lun láhüchün luriban saminaü tidan lanigi, ménrengunbei lun lafigounhan. Ligíati, meredera wamá asaminara luagu katei lánina magíaguni, sagá waméi lídangiñe wasaminan.

Ánhawa ariha máfuridun lan luriban saminaü lídangiñe wasaminan, adüga wamá somu katei lau lóufudagun. Ariñagati Hesusu: “Ligía anhein lubéi lafigougüdübadibu lubéi búhabu o bugudi lan, dürübei, fuibei dise buáriua [...]. Anhein bagu lubéi afigougüdübadibu, sagabei, fuibei dise buáriua” (Mat. 18:8, 9). Mama layanuhaña Hesusu ya luagu lumegegun úgubu. Busenrügüti lafuranguagüdüni súdini lan lun wagidaruni lau lóufudagun katei le gayaraabei lachugeraguagüdüniwa. Ida luba wafalaruni adundehani le lidan wabagari lidan tuáguti iyawaü o bidéu lánina agamariduni?

Samina wamá aban lan warihin aban iyawaü o bidéu lánina agamariduni sódini. Masaminara wamá masuseredunbei lan ni kata woun. Fuí waméi warihin lau lóufudagun. Ñéguwamoun bigibigitu, konputadora o gágamuru lau lóufudagun. Samina wamá luagu katei buiti. Líderagubadiwa wadügüni katei le lun wagumadiruni wasaminan, lubaragiñe wígirun lun lagumadiruniwa.

Gayaraati terederun iyawaü o bidéu lánina agamariduni lidan lisaminan gürigia luagu saragu  irumu, ñǘbuingua tuguya sódini. Dan lasuseredun katei le, gayaraati liábingua lun gürigia lun lamulidaagun lungua. Anhein ígira humaali lubéi taríawagun iyawaü o bidéu lánina agamariduni ani anihein dan aba liabin lidoun hisaminan iwiyei le meha harihibei, líderagubadün gabaroun humani lasusereduba lan katei le hun luma lun haranserun lun hageindagun luma saminaü mabuidunti le.

Áfaagua humá lun ítara lan hisaminan luma hóuserun según lugundan Heowá. Falá huméi lani apostolu Pábulu hénpulu le ariñagubei: “Bei numuti núgubu, fosunéi lun laganbunina” (1 Ko. 9:27). Mígira humá lun lamudiragunün luriban saminaü. Falá huméi le lariñagubei Rómana 12:2: “Sansi huméi ligaburi hisaminan, sansi láamuga giñe ligaburi habagaridun. Ítara luba hiabin lun hasubudiruni le lugundanbei Bungiu hun le buídubei, le úaraguabei”. Mabulieida huméi ánhawa lan asaminara ani adüga wameime katei úara luma lugundan Bungiu wagundaaruba sügǘ luéi wígiraguagüdün woungua lun figóu.

Áfaagua humá hafurendeirun fiu bérusu tídangiñe Bíbülia le lunbei líderagunün asaminara kei Heowá libügürü taríawagun iyawaü o bidéu lánina agamariduni luma lun gunfuranda humani ka lan labusenrubei lun hadügüni. Ítarati, danme le liábingua saminaü wíyeti lidoun hisaminan, áfaagua humá lun hasaminarun luagu burí bérusu ligía. Anihán fiu lídangiñe bérusu ligía: Isaíasi 52:11, Amosu 5:15, Matéu 5:28, 2 Korintuna 6:17, Éfesuna 5:3, Kolosana 3:5 luma 1 Tesalónikana 4:4-8.

Ánheinti lau lubéi lásügürün dan aba laganwoundun ayumahani lánina magíaguni lidan hisaminan? Falá huméi hénpulu le lígirubei Hesusu woun (1 Fe. 2:21). Lárigiñebei labadiseirun, hóuchagua lumuti Satanási saragu wéiyaasu. Ka ladügübei Hesusu? Mígiraguagüdünti lungua lun. Méiguadunti lidoun lóuchaguni Mafia, súnwandan meha layusurun Hesusu bérusu tídangiñeti Bíbülia lun lóunabuni. Ariñagati lun: “Disebá nuéi, Mafia!”, ábati ladisedun luéi. Ítara kei mígiraguagüdün lan Hesusu lungua lun Mafia, gayaraati giñe mígiraguagüdün ban bungua lun (Mat. 4:1-11). Lasigiruba Satanási luma ubóu le lábugiñebei lubafu áluga lun labuinchun wasaminan lau katei lánina magíaguni, gama lumoun, mábürüha lan warüna! Gayaraati wadisedun luéi taríawaguniwa iyawaü o bidéu lánina agamariduni. Lau lídehan Heowá, gayaraabei wagañeiruni wágani.

Sigí wamá afurieida lun Heowá ani amuriaha wamá ídemuei luma. Ariñagati Pábulu: “Ariñagarügü huméi sun katei lun Bungiu súnwandan dan le hafurieidun [...]. Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan, ladüga lídanñadün aban luma Kristu Hesusu” (Fili. 4:6, 7). Líchugubei Heowá darangilaü le wemegeirubei woun lidan wáfaagun wígiruni figóu. Ánhawa ayarafada lun Bungiu, layarafaduba giñe woun (Sant. 4:8).

Yarafañu wamá lun Bungiu Suntigabafu ligíatima gayaraabei lóunigiruniwa luéi furumiñeguarügü katei wuribati. Ariñagati Hesusu luagu Satanási: “Aniteeli le agumadihabei lidan ubóu le. Lau sun mabafu lan nuagu” (Huan 14:30). Ka meha uagu chouru lubalin Hesusu katei le? Luagu aban weyu ariñagati: “Ladüga númañein le óunahabalina; mígirun lágidina Núguchi nábugua, ladüga adüga nani le aubei lagundaara súnwandan” (Huan 8:29). Ánhawa adügei le aubei lagundaara Bungiu, mígirun lubadiwa giñe wábuguarügü. Dise wamá tuéi sádara lánina taríawagun iyawaü o bidéu lánina agamariduni, ánhawa adügei ítara, magañeirun lubadiwa Satanási.