SAMTANG nangandam ang mga Israelinhon sa pagtabok sa Suba sa Jordan ngadto sa yuta nga gisaad sa Diyos kanila, dihay nangabot nga mga bisita. Ang mga bisita maoy langyawng mga babaye nga nangimbitar sa Israelinhong mga lalaki sa usa ka kombira. Morag talagsaon ug makapadani kaayo kadto nga kahigayonan. Makakita silag bag-ong mga higala, makasayawsayaw, ug makakaon ug lami nga mga pagkaon. Ang mga kostumbre ug moralidad niining mga bayhana lahi gayod sa giingon sa Balaod sa Diyos, pero ang ubang Israelinhong lalaki tingali naghunahuna: ‘Dili ra mi madala. Mag-amping lang mi.’

 Unsay nahitabo? Ang Bibliya nag-ingon: “Ang katawhan naghimog seksuwal nga imoralidad uban sa mga babaye sa Moab.” Ang tinuod, gusto sa mga babaye nga simbahon sa mga Israelinhon ang bakak nga mga diyos. Ug mao gyod toy nahitabo! Maoy hinungdan nga “si Jehova nasuko pag-ayo sa Israel.”​—Num. 25:1-3.

Gisupak sa maong mga Israelinhon ang Balaod sa Diyos sa duha ka paagi: Sila miyukbo sa mga idolo ug mihimog seksuwal nga imoralidad. Linibo ang nangamatay tungod sa ilang pagsupak sa Diyos. (Ex. 20:4, 5, 14; Deut. 13:6-9) Nganong makaguol kaayo kadto? Kay hapit na silang motabok sa Jordan. Kon wala pa nila supaka ang Balaod sa Diyos, makatabok unta kadtong linibo ka Israelinhon paingon sa Yutang Saad.​—Num. 25:5, 9.

Bahin niadtong hitaboa, si apostol Pablo misulat: “Kining mga butanga nahitabo kanila ingong mga pananglitan, ug kini gisulat ingong pasidaan kanato nga nagkinabuhi sa kataposan sa mga sistema sa mga butang.” (1 Cor. 10:7-11) Seguradong nalipay gyod si Satanas nga ang maong mga Israelinhon nakahimog seryosong sala ug wala pasudla sa Yutang Saad. Maalamon gyod nga seryosohon nato ang maong pasidaan, kay nahibalo ta nga gusto gyod ni Satanas nga dili ta makasulod sa bag-ong kalibotan!

Gusto ni Satanas nga lit-agon ang mga Kristohanon pinaagig mga taktika nga na-master na kaayo niya ug misaler sa daghan. Sa ato nang nahibaloan bahin sa mga Israelinhon, iyang gigamit ang imoralidad. Sa atong panahon, ang imoralidad maoy peligroso gihapon nga lit-ag. Ang usa ka epektibong paagi nga malit-agan ta niini mao ang pornograpiya.

Karon, ang usa ka tawo makatan-awg pornograpiya nga dili ra mahibaloan sa uban. Kaniadto, kon gusto sa usa nga motan-awg pornograpiya, kinahanglan pa siyang moadto sa sinehan aron motan-awg law-ay nga mga salida o sa mga bookstore aron mopalit ug pornograpikong mga magasin. Tingali daghan ang mapugngan sa pag-adto sa maong mga lugar kay maulaw silang makit-an sa mga tawo. Pero karon, kon ang usa dunay Internet, makatan-aw na siyag pornograpiya diha sa trabahoan o bisan diha sa giparking nga sakyanan. Ug sa daghang lugar, ang usa ka lalaki o babaye makatan-awg pornograpiya bisag naa ra sa balay.

Pero dili kay kana ra. Sayon na kaayo ang pagtan-awg pornograpiya diha sa gadyet. Samtang maglakaw sa dalan o magsakay sa bus o tren, ang mga tawo makatan-awg law-ay nga mga letrato o video diha sa ilang gadyet.

Kay mas sayon na man ang pagtan-awg pornograpiya nga dili mahibaloan sa uban, mas grabe karon ang kadaot nga mahimo niini. Tungod sa ilang pagtan-awg pornograpiya, gibungkag nila ang ilang kaminyoon ug gidaot ang ilang dignidad ug konsensiya. Mas grabe pa, gipameligro nila ang ilang relasyon sa Diyos. Makaingon gyod ka nga ang pornograpiya makadaot niadtong nagtan-aw niini. Sagad, makahatag nig grabeng kadaot sa emosyon. Ang kadaot nga resulta niini magpabilin sa dugay kaayong panahon, ug usahay dili gyod bug-os mawala.

Pero angay tang mahibalo nga si Jehova naghatag natog proteksiyon batok niini nga lit-ag ni Satanas. Aron maprotektahan ta ni Jehova, kinahanglan natong himoon ang wala himoa sa mga lalaking Israelinhon​—kinahanglang “sundon gyod” nato siya. (Ex. 19:5) Angay natong ilhon nga gidumtan sa Diyos ang pornograpiya. Nganong makaingon ta niana?

Hunahunaa ni: Ang mga balaod nga gihatag sa Diyos ngadto sa Israel lahi kaayo sa mga balaod sa ubang nasod niadtong panahona. Sama kinig paril nga naglain sa Israel gikan sa palibot  nga mga nasod ug sa ilang daotang mga buhat. (Deut. 4:6-8) Giklaro niini nga mga balaod ang importanteng kamatuoran: Gidumtan ni Jehova ang seksuwal nga imoralidad.

Dihang gihisgotan ni Jehova ang imoral nga mga butang nga ginahimo sa silingang mga nasod, iyang giingnan ang mga Israelinhon: “Ayawg sundoga ang ginahimo sa mga tawo sa Canaan, nga akong papuy-an kaninyo. . . . Hugaw ang yuta, ug silotan nako ang mga namuyo niini tungod sa ilang sala.” Para sa balaang Diyos sa Israel, ang pagkinabuhi sa mga Canaanhon luod kaayo ug ang yuta nga ilang gipuy-an nahimong hugaw.​—Lev. 18:3, 25.

Bisag gisilotan ni Jehova ang mga Canaanhon, ang uban padayong naghimog seksuwal nga imoralidad. Kapig 1,500 ka tuig sa ulahi, si Pablo miingon nga ang mga nasod nga gipuy-an sa mga Kristohanon ‘wala na makaila kon unsay maayo ug daotan.’ Gani, “sila nagpatuyang sa walay kaulaw nga paggawi, nga nagbuhat sa tanang matang sa kahugawan uban ang kahakog.” (Efe. 4:17-19) Karon, daghan sab ang imoral kaayo ug wala nila ni ikaulaw. Busa, maningkamot gyod ang tinuod nga mga magsisimba nga dili motan-aw sa imoral nga mga buhat sa kalibotan.

Ang pornograpiya dakong insulto sa Diyos. Iyang gihimo ang tawo nga kaamgid niya​—sumala sa iyang larawan—​ug gihatagan tag katakos sa pag-ila kon unsay husto ug sayop. Maalamon gyod ang Diyos sa paghatag ug mga balaod bahin sa seksuwal nga relasyon. Katuyoan niya nga ang seksuwal nga relasyon makahatag ug kalipay sa magtiayon. (Gen. 1:26-28; Prov. 5:18, 19) Pero unsay ginabuhat niadtong naghimo o nagpakaylap ug pornograpiya? Ilang gisalikway ang moral nga sukdanan sa Diyos. Oo, ang mga tawo nga nagpakaylap ug pornograpiya nagpasipala kang Jehova. Hukman sa Diyos kadtong nagsalikway sa iyang mga sukdanan​—kadtong naghimo o nagpakaylap ug imoral nga mga materyal.​—Roma 1:24-27.

Pero komosta ang mga tawo nga tinuyong mobasa ug motan-aw ug pornograpiya? Para sa uban, dili ra ni makadaot nga kalingawan. Pero ang tinuod, sila nagsuportar niadtong nagsalikway sa mga sukdanan ni Jehova. Tingali, dili kini ang ilang tuyo dihang misugod silag tan-aw ug  pornograpiya. Pero giklaro sa Bibliya nga kinahanglan gyong dumtan sa mga magsisimba sa matuod nga Diyos ang pornograpiya. Ang Bibliya nag-ingon: “Oh kamong nahigugma kang Jehova, dumti ninyo ang daotan.”​—Sal. 97:10.

Bisan kadtong gustong molikay sa pagtan-aw ug pornograpiya malisdan tingali sa paghimo niini. Dili ta hingpit, ug tingali kinahanglan tang makigbisog aron masuklan ang hugaw nga seksuwal nga mga tinguha. Dugang pa, ang atong dili hingpit nga kasingkasing mangita tingalig paagi nga dili masunod ang balaod sa Diyos. (Jer. 17:9) Pero daghan niadtong nahimong Kristohanon ang nagmadaogon niini nga pakigbisog. Busa makasalig ka nga masuklan sab nimo ang pornograpiya. Matikdi kon sa unsang paagi ang Pulong sa Diyos makatabang nimo nga malikayan kini nga lit-ag ni Satanas.

Sa ato nang nahisgotan, gitugotan sa daghang Israelinhon nga maugmad ang sayop nga tinguha hangtod nga miresulta kini sa kadaot. Puwede sab nang mahitabo karon. Gihisgotan ni Santiago, nga igsoon ni Jesus sa inahan, ang kapeligrohan: “Ang matag usa . . . ginadani ug ginahaylo sa iyang kaugalingong tinguha. Unya ang tinguha, dihang kini manamkon na, manganak ug sala.” (Sant. 1:14, 15) Kon tugotan sa usa nga motubo ang sayop nga tinguha, lagmit makasala siya sa ngadtongadto. Busa wad-on gyod nato ang imoral nga mga hunahuna ug dili magpadayon sa paghunahuna niana.

Kon imong maamgohan nga nagsige ka nag hunahunag imoral nga mga butang, lihok dayon. Si Jesus miingon: “Busa kon makasala ka tungod sa imong kamot o tiil, putla kini ug isalibay. . . . Dugang pa, kon makasala ka tungod sa imong mata, lusoka kini ug isalibay.” (Mat. 18:8, 9) Wala magpasabot si Jesus nga daoton nato ang atong lawas. Giilustrar lang niya nga kinahanglang wad-on dayon ang hinungdan sa pagpakasala. Unsaon nato kana pagpadapat kon bahin sa pornograpiya?

Kon makakita kag pornograpiya, ayaw paghunahuna, ‘Dili ra ko maapektohan ani.’ Lingiw dayon. Patya dayon ang TV. Palonga dayon ang computer o gadyet. Pagpokus sa mga butang nga hinlo. Makatabang ni nga makontrolar nimo ang  imong hunahuna imbes ikaw ang kontrolahon sa sayop nga tinguha.

Komosta kon nahunong na nimo ang pagtan-awg pornograpiya pero usahay mahinumdoman gihapon nimo ang imong nakita? Ang law-ayng mga hulagway mahimong magpabilin sa hunahuna sa taas nga panahon. Kalit ra nimo ning mahinumdoman. Kon mahitabo nâ, tingali makahunahuna ka sa paghimog law-ay nga buhat, sama sa masturbasyon. Busa timan-i nga posibleng motunghag kalit ang maong hunahuna, ug magmaandam sa pagsukol niana.

Palig-ona ang imong determinasyon nga ipahiuyon ang imong hunahuna ug mga buhat sa kabubut-on sa Diyos. Sundoga si Pablo, kinsa andam nga ‘momakmak sa iyang lawas ug mohimo niini nga samag ulipon.’ (1 Cor. 9:27) Ayawg paulipon sa sayop nga tinguha. “Pag-usab mo pinaagi sa pagbag-o sa inyong hunahuna, aron mapamatud-an ninyo sa inyong kaugalingon ang maayo ug dalawaton ug hingpit nga kabubut-on sa Diyos.” (Roma 12:2) Hinumdomi: Ang paghunahuna ug pagbuhat uyon sa kabubut-on sa Diyos moresultag mas labawng kalipay kay sa pagpadala sa sayop nga tinguha.

Sulayi ang pagmemoryag mga teksto. Dayon dihang makahunahuna kag sayop nga mga butang, pugsa ang imong kaugalingon sa pagpamalandong sa maong mga teksto. Ang mga teksto sama sa Salmo 119:37; Isaias 52:11; Mateo 5:28; Efeso 5:3; Colosas 3:5; ug 1 Tesalonica 4:4-8 makatabang nimo sa pagpahiuyon sa imong hunahuna sa panglantaw ni Jehova bahin sa pornograpiya ug sa iyang gidahom kanimo.

Komosta kon may panahon nga lisod gyod pugngan ang tinguha nga motan-aw o maghunahunag imoral nga mga butang? Sundoga pag-ayo ang atong Ehemplo, si Jesus. (1 Ped. 2:21) Human sa iyang bawtismo, gisigehan siyag tental ni Satanas. Unsay gihimo ni Jesus? Nagsige pod siyag sukol. Gamit ang mga teksto, iyang gisuklan ang mga tentasyon ni Satanas. Siya miingon: “Pahawa, Satanas!” ug mipahawa si Satanas. Si Jesus wala gyod mosurender sa pagsukol sa Yawa, busa ayaw pog surender. (Mat. 4:1-11) Si Satanas ug ang iyang kalibotan padayong maningkamot nga pun-on ang imong hunahuna ug imoral nga mga butang, pero ayawg surender. Makadaog ka batok sa pornograpiya. Sa tabang ni Jehova, imong mapildi ang imong kaaway.

Pag-ampo pirme kang Jehova ug hangyoa siya nga tabangan ka. Si Pablo miingon: “Ipahibalo sa Diyos ang inyong mga hangyo pinaagi sa pag-ampo ug pangamuyo uban ang pagpasalamat; ug ang kalinaw nga gikan sa Diyos, nga labaw sa tanang pagsabot, magbantay sa inyong kasingkasing ug hunahuna pinaagi ni Kristo Jesus.” (Filip. 4:6, 7) Hatagan ka sa Diyos ug kalinaw sa hunahuna nga makatabang nimo nga masuklan ang daotang mga buhat. Kon moduol ka kang Jehova, ‘siya moduol kanimo.’​—Sant. 4:8.

Ang pinakamaayong proteksiyon nato batok sa bisan unsang lit-ag ni Satanas mao ang atong suod nga relasyon sa Soberano sa uniberso. Si Jesus miingon: “Ang magmamando niining kalibotana [si Satanas] nagsingabot na, ug siya dili makaimpluwensiya kanako.” (Juan 14:30) Nganong segurado si Jesus niini? Siya miingon: “Ang Usa nga nagpadala kanako nagauban kanako; wala ko niya biyai kay kanunay nakong gibuhat ang mga butang nga makapahimuot kaniya.” (Juan 8:29) Kon himoon nimo ang makapalipay kang Jehova, dili sab ka niya biyaan. Likayi ang pornograpiya, ug dili ka malit-agan ni Satanas.