ANA Izrayel ahiroma ovisasanyedha wila aabuwe Mwinje wa Jordau osogorhowa agahivolowa mu elabo yolibeliwa yafuna wavaha Mulugu, awene ahattambirha aleddo. Aleddoya ali ayana adhile wawoba alobwana wi adhowe omattangani. Mwa awene ejile yali gari enddimuwa vaddiddi. Vowi agahikaana amarho aswa, otxetta, na oja dhoja dhapama. Dhilemelelo na mweddelo wa ayana abale wahittiyana vaddiddi na Malamulo avahile Yehova nlogo na ana Izrayel, txino alobwana ena muizrayel awubuwela dhahi: ‘Ottiyana oku kunddipatta. Miyo ddinele oviyang’anela.’

 Txini epadduwile? Bibilia ononaddela: “Wenewo ajeya murima na ayana a o Mowab.” Ayana abale afuna wi alobwana ana Izrayel awebedhege amilugu awa ottambi. Nanda awene awebedha-wene! Txibarene, “avitatamulela owali wa Nabuya.”—Oleb. 25:1-3.

Ana Izrayel ahilupa Malamulo a Mulugu mwa mpaddi minli: Awene aawebedha amilugu osemiwa vina akosa mararuwo. Sabwa ya ohimwiwelela Mulugu matxikwi menjene a ana Izrayel ahikwa. (Obud. 20:4, 5, 14; Olib. 13:6-9) Txini enkosiha nipadduwo ntti okala n’okubanyiha? Mudhidhiya. Matxikwi menjene alobwana abale a ana Izrayel kowiwelela Malamulo a Mulugu, mohigoneela agahabuwa mwinje Jordau mpaka ofiya Mwilaboni Yolibeliwa.—Oleb. 25:5, 9.

Na yopadduwa ejile, Paulo wahileba dhahi: “Dhetene esi dhàpadduwele awene, dhireyele osunza wehu, dhilebeliwe onitxenjeriha iyo oliwo masaka abano omariha.” (1 Kor. 10:7-11) Kavali waganyedha, Satana wahagalala vaddiddi na ana Izrayel abale asakulile wira dhottega nanda ahivolowa Mwilaboni Yolibeliwa. Ninofwanyela otxenjerha na yopadduwa eji, sabwani ninoziwa wila efunelo ya Satana ja oniyeleliha elabo eswa enanivahe Mulugu!

Satana onfuna wila Akristu apupuruwe, nona onolabihedha mirega dhaye wi aputtulena attu enjene. Ninga moonelihu, walabihedhi mararuwo wi apupurutxena ana Izrayel. Masaka abano, mararuwo murega wawopiha omputtula. Mmodhaya omputtula mobuwelo wehu ja okana efunelo ya wawona attu bali yovi.

Ovano, attu anowodha wona moviteyani mavidiyu a attu bali yovi. Vyaka dhinjene mundduni muttu wafuna wona mavidiyu a attu bali yovi akosaga mararuwo adhowa mu filimini obe ogula manivuru alagiha attu bali yovi. Dila dhina, attuya kafuna odhowawo sabwani ankaana manyazo na attu ena. Ovanene attu kantabuwa wedda, agafuna wawona attu bali yovi anvolowa mu internetini agakala omabasani obe vego-vegovi valani. Dhilabo dhinjene, attu anowodha wona mavidiyu a attu bali yovi mmatakuluni mwawa.

Kahiyo ejuwenevi. Mittitto dhottiyana-ttiyana dhinowodha woniha mavidiyu a attu bali yovi. Eddaga murampani obe mburo onfunani attu anowodha wona mafoto onyakuwa na epano-epanovi yovavihana eli mmadani mwawa.

Wona mavidiyu a attu bali yovi ovanene kinrutxa, nona mavidiyu aba anowaputtula attu enjene opitta yapadduwa wale. Enjiya anona mavidiyu aba anoputtula matelo awa, kanwodha ovittittimiha vina mubuwelo wawa onokumuwa. Yottabwaya, anowobaniha mandano awa na Mulugu. Txibarene onoona mavidiyu a attu bali yovi onoputtuleya. Mavidiyu aba, anotota elodda mmirimani mwa attu enjene. Eloddaya enovola na mudhidhi, mbwenye malebaya anorutxa ofudheya mmirimani.

Iyo ninoziwa wi Yehova onowodha onibarela wila ninamageye na mirega dha Satana. Mbwenye akala ninofuna wi Yehova anibarele, ninofwanyela okosa elobo ekooddile wira alobwana abale a ana Izrayel—‘omwiwelela’ Yehova. (Obud. 19:5) Ninofwanyela ononelamo wi Mulugu onowidda mararuwo. Ninlogelani dhawene?

Kobuwela: Malamulo abale Mulugu wavahile ana Izrayel bahi. Malamulo abale ali ninga ngome yabarela ana Izrayel na mweddelo wonyakuwa wakosa anamwanddamani awa. (Olib. 4:6-8) Malamulo abale ahoniha elobo yattima: Yehova onowidda mararuwo.

Voonile Yehova merelo abure akosa anamwanddamani awa, wahapanga ana Izrayel dhahi: “Kamurave meddelo a mwilaboni y’o Kanaá munuvelelani miyo. . . . Awene amala  okwaruliha elabo na obure okosilani; jijuwene yawonihedhe miyo goi.” Vamentoni va Mulugu, mweddelo na mburoya wa akadda Kaná wali onyakuwa.—Onam. 18:3, 25.

Yehova wahagwihedha ntowa akadda Kaná, masiki dhahene malogo mena ankosavi mararuwo. Vavirile vyaka 1.500 murumiwi Paulo wahiloga wi malogo amwilaboni mwakala Akristu “arimeliwa thima y’omuthu wawa.” Malogo abale “avilevela dhovutha dhetene, eddagana mikalelo dha obure wetene ahifiriyeliwaga.” (Ef. 4:17-19) Masaka abano, attu anokosa mararuwo nanda anovittukulela na dhinkosani. Ovanene attu kankaana manyazo a wona mavidiyu a attu bali yovi, anamebedha ebaribari anofwanyela orabela merelo aba abure.

Mavidiyu anoniha attu bali yovi anomusilidha Mulugu. Yehova wattanddile attu woladdana iyene vina ohinivaha ewodhelo yottiyaniha obure na opama. Na eziwelo, Mulugu wahavaha attu malamulo mwaha wa ogonihana. Iyene wafuna wi ogonihana okale nipara na wagalala wa attu eeli bahi vamateloni. (Wita 1:26-28; Gano 5:18, 19) Koddi abale anvaviha mavidiyu a attu bali yovi anubuwela ninga mwafunela Yehova? Awene anoviriganiha monelo wapama wa Mulugu mwaha wa ogonihana. Attu anvaviha mavidiyu aba anonveyiha Yehova. Iyene onele wattonga otene anvaviha mavidiyu onyakuwa.—Rom. 1:24-27.

Kito abale anawoona attu bali yovi n’ofuna? Ena anubuwela wila wona mavidiyu obe mafoto a attu bali yovi kahiyo yabure. Mbwenye, awene anowakamihedha abale anveyiha monelo wapama wa Yehova mwaha wa ogonihana. Txino kiyali efunelo yawa varomilani wang’ana. Bibilia onotonyihedha wi abale animwebedha Mulugu anofwanyela widda mavidiyu a attu bali yovi . Bibilia ononitxenjerhiha: “Nabuya onowakwela anrabela obure.”—Masal. 97:10.

Abale anrabela wona mavidiyu a attu bali yovi, dila dhina enowarutxa orabela. Iyo nili attu ohiligana, nona ninowana na efunelo ya okosa mararuwo. Dila dhina murima wehu wohiligana ononittukulela wubuwela wi wona  mavidiyu aba kahiyo yabure. (Jer. 17:9) Mbwenye Akristu enjene ahiwodha opemberha. Akala weyo onowanana efunelo eji, kudduwale wi attu ena ahiwodha opemberha. Mazu a Mulugu anowodha wukamihedha wila onamageye na murega wa Satana.

Ana Izrayel enjene ahunuwiha dhifunelo dhawa dhonyakuwa, yodhelavoya yali yokubanyiha. Yakakene enopadduwa masaka abano. Tiago ohileba: “Muthu-muthu onehiwa na vidhivi-dhivi . . . dhinimukwekwetha, dhinimugwihedha vamuregani. Dhahene mónlelo abure anobala yothega.” (Tia. 1:14, 15) Muttu onunuwiha efunelo yonyakuwa mmurimani mwaye, osogorhowa ongomelana okosa yottega. Nona, nigakaana dhubuwelo dhabure—ninofwanyela okutxamo mmirimani mwehu.

Ogakaana mubuwelo wonyakuwa ovisasanyedhe mohigoneela. Yezu wahiloga: “Nlada nawo peno nnyalo nawo nigauthegiha, gwadda , rahilela uddayi. . . . Ninto nawo nigauthegiha, korhovorha, rahilela uddayi.” (Mt. 18:8, 9) Yezu kalogile wi ninofwanyela ogwadda-wene yano yehu. Iyene walogile musibo wila ninofwanyela otxatxama dhubuwelo dhonyakuwa momaguva. Ninalabihedhe dhavi malago aba mwa mpaddi wa wona mavidiyu obe mafoto a attu bali yovi?

Akala weyo onowawoona attu bali yovi, kuwubuwele wi: ‘Esi kadhinddipatta.’ Mudhidhene obule wang’ane wego wina. Ottimihe televizauya mohigoneela. Ottimihe komputadori obe muttittoya momaguva-mwene. Ozuzumela dhilobo dhapama. Ogakosa dhawene enele wukamihedha owodha wang’anela dhubuwelo dhawo, ottiya wang’aneliwa na dhubuwelo dhonyakuwa.

Akala weyo owodha opemberhe emanya ya wawona attu bali yovi, mbwenyi mafotoya anowela muyubuweloni mwawo onakose eni? Mokubanyiha-mwene, mafoto na dhubuwelo  dhonyakuwa dhinomala mudhidhi mwinjene mmurimani mwehu. Masiki nihifunaga dhubuwelo esi dhonyakuwa dhinovira muyubuweloni mwehu. Dhawene, txino ondaga okana efunelo ya wira dhilobo dhabure, ninga otxatxela. Kanidduwale wi dhubuwelo dhonyakuwa dhinowela muyubuweloni nona nivisasanyedhe wila niwodhe owanana.

Ovilibihedhe wubuwela ninga munfunela Mulugu. Okale ninga murumiwi Paulo walogile wi “ddinowanana mwili waga, ddinokurumutxa okale mudhari waga.” (1 Kor. 9:27) Kukale mudhari wa dhubuwelo dhonyakuwa. Bibilia onologa: “Vithiyení osadduliwa na Mulugu muthukulaga mobuwelo maswa wi muwodhe ononelamo enufunanina Mulugu, eli yapama, enimuzivela, eli yawakwana.” (Rom. 12:2) Katanalela: Wubuwela mowiwanana na efunelo ya Mulugu enodhana wagalala.

Katamela okaya malebo a Bibilia muyubuweloni mwawo. Dhubuwelo dhonyakuwa dhigawela mmirimani mwawo, wubuwelege maleboya abo. Motagiha malebo ninga aba Masalmo 119:37; Izaiya 52:11; Mateu 5:28; Éfeso 5:3; Kolosi 3:5; na 1 Tesalónika 4:4-8 anele wukamihedha wogola dhubuwelo dhawo mowiwanana na efunelo ya Yehova.

Koddi akala weyo onokaana yubuwelo yorutxa wang’anela, onakose dhavi? Kasanza ttarho dha Yezu oli tagiha yehu. (1 Ped. 2:21) Vamaliliye obatiziwa, waheyiwa na Satana. Txini yakosile Yezu? Iyene wali wolibene. Alabihedhaga malebo ottiyana-ttiyana, wahivanya dhoweha dha Satana. Yezu wahiloga: “Kadduwonevo, satana wé!” nanda Satanaya wahidhowa. Yezu txipo kattiyile onvanya Ddiabo, weyo vina txipo kukumuwe. (Mt. 4:1-11) Satana na elabo yaye onele ofuna ozuzumiha mubuwelo wawo na dhubuwelo dhonyakuwa, mbwenye kanelá ntidi owanana. Kuwobane onele owodha orabela. Na nikamihedho na Yehova onele ompemberha mwiddani oddu.

Kuttiye omulobelela Yehova. Paulo wahiloga: “Makathamiho enyu, mumperekele Nabuya na malobelo, mmunlelaga, mmutamalelaga. Dhahene murenddele wa Mulugu, onpitha thontho ya muthu, onere okoya mirima na mobuwelo enyu, vowi muli mumodhani na Yezu Kristu.” (Fil. 4:6, 7) Mulugu onele wuvaha murenddele wi owodhege owanana yottega. Akala weyo onomususela Yehova, ‘iyene onele wususela.’—Tia. 4:8.

Nipara nobarelana mirega dhotene dha Satana ku okana mandano ofiyedheya na Muttanddi wa Elabo yotene. Yezu wahiloga: “Satana, mwene wa elabo ejino, onfuna ofiya. Iyene kanna owodha woddithongana miyo.” (Jo. 14:30) Txini yamuttukulele Yezu okana nikuluvelo ntti? Iyene wahiloga dhahi: “Ole oddirumile, onokalavi na miyo, kanddithiya meka, vowi ddinowiravi dhinimuzivela.” (Jo. 8:29) Weyo ogavilibihedha wira enimuzivela Yehova, iyene kanawuttiye. Karabela efunelo ya wona mavidiyu obe mafoto a attu bali yovi, kudduwale Satana kana kopolo ya wumagelela wira dhilobo dhabure.