HLANLIO Israel mi hna cu Pathian biakammi ram lei kal awk Jordan Tiva tan dingin an i timh lioah mi cheukhat nih an rak tlawng hna. Khual pawl cu ramdang nu pawl an si i annih nih pa pawl kha rawldanghnak puai ah an sawm hna. Mah puai cu a nuam tukmi le aa thleidang tukmi a lo men lai. Hawikom thar i ser, laam le rawl thawthaw ei cu a nuam tuk ko lai. Mah nu hna i an phungphai le an ziaza cu Pathian Nawlbia a cawngmi Israel mi hna he an i lo lo. Asinain Israel pa cheukhat nih ‘annih cu kan cungah huham an ngei kho lai lo. Ralring tein kan um ko lai’ tiah an ruah men lai.

 Zeidah a rak cang? Baibal nih “Moab fanu hna he khan hlawh an hlangṭi” tiah a ti. A tak ti ahcun mah nu hna nih Israel pa pawl kha a hmaan lomi pathian biakter an duh hna. Cutin an biakter taktak hna. Mah tikah “BAWIPA thinhunnak cu Israel cungah a alh.”—Nam. 25:1-3.

Mah Israel mi nih Pathian Nawlbia kha lam hnih in an buar: Annih nih siasal kha an biak i nupa sualnak an tuah. Mi thong tampi cu Pathian nawl an ngaih lo caah an thi. (Ex. 20:4, 5, 14; Deut. 13:6-9) An tuahsernak cu zeicah ngaihchiat tuk awk a si? Mah Israel mi pa thong tampi hna nih Pathian Nawlbia kha an zulh ahcun a rauhhlan ah Jordan kha tan in Biakammi Ram ah an lut cang lai.—Nam. 25:5, 9.

Mah thil sining kong he aa tlaiin lamkaltu Paul nih hitin a ti: “Hi vialte an cung i a tlungmi hi midang nih i zohchunh awk caah a si i kan i ralrinnak ding caah ṭial an si. Zeicahtiah kannih kan caan hi donghnak a phak dengmangnak caan a si.” (1 Kor. 10:7-11) Israel mi cheukhat nih sualnak ngan an tuah ruangah Biakammi Ram luh awkah sining an tlinh lo caah Satan aa nuam tuk lai ti cu a fiang ko. Vawlei thar luh awkah Satan nih a kan kham khawh ahcun aa nuam tuk lai ti kha kan hngalh caah an palhnak in kan cawn a hau.

Satan nih tuchan Khrihfa hna kha rap ah i foih hna seh ti a duh i an i foih nakhnga hlanah a rak hmanmi lam hna kha a hman. A hmasa ah kan hngalh cang bantukin Satan nih Israel mi kha foih awkah nupa sualnak kha a rak hman. Kan chan zongah nupa sualnak cu ṭih a nungmi rap a si peng rih. Nupa sualnak rap ah a kan tlakter khotu lam khat cu a thurhnawmmi hmanthlak zohnak a si.

Tuchan ah mi pakhat nih a thurhnawmmi hmanthlak kha ahohmanh nih hngalh loin a zoh khawh. Hlanlio ah a thurhnawmmi hmanthlak zoh a duhmi pakhat nih aa tlak lomi video zoh awkah baisikup piahnak inn ah a kal a hau men lai asiloah a thurhnawmmi hmanthlak aa telmi cauk cawk awkah dawr ah a kal a hau men lai. Mi tampi cu midang nih an kan hmuh sual lai ti an phan caah mah hmun hna ah an kal men lai lo. Asinain atu ahcun mi pakhat nih a thurhnawmmi hmanthlak kha rian asiloah mawṭaw chung hmanhah Internet in a zoh khawh. Ram tampi ah pa asiloah nu nih a thurhnawmmi hmanthlak kha inn ah a zoh khawh.

Mah lawng a si rih lo. Smartphone le tablet hna in a thurhnawmmi hmanthlak kha fawi tein zoh khawh a si. Mi nih lam cung an kal asiloah mawṭaw le tlanglawng hna an i cit tikah kut put thilri [phone ti bantuk] in ziaza rawhralnak hna kha an zoh khawh.

Mi pakhat nih a thurhnawmmi hmanthlak zoh le a zohmi thuh cu a fawi tuk caah hlan nakin tuchan ah a thurhnawmmi hmanthlak nih mi tampi kha harnak a pek deuh hna. A thurhnawmmi hmanthlak a zohmi tampi nih an innchungkhar, anmahle anmah an i upatnak le an chiaṭha thleidannak lungthin hna kha an hrawh. A ṭhalo chinmi cu Pathian he an i pehtlaihnak kha an hrawh. A thurhnawmmi hmanthlak nih a zohtu hna harnak a pek khawh hna ti kha na zumh khawh. Thil sining tampi ah mah nih lungthin chungah hma a umter. Mah hma cu duhsah tein a dam ko lai nain a hmape cu caan saupi tiang a um men lai.

Asinain Jehovah nih mah Satan rap in huhphenhnak a kan pek ti kha kan hngalh awk a si. Jehovah huhphenhnak hmuh kan duh ahcun hlanlio Israel pa hna bantuk si loin Jehovah nawl kha ‘kan ngaih’ a hau. (Ex. 19:5) Pathian nih a thurhnawmmi hmanthlak a huat tuk ti kha kan hngalh a hau. Zeicah cutin kan chim khawh?

Mah hi ruathmanh: Pathian nih Israel miphun a pekmi hna nawlbia cu mah lio caan i zei bantuk miphun nawlbia he hmanh aa lo lo. Vanpang bantukin nawlbia nih Israel mi kha a huhphenh hna. Cun an pawngkam mi hna bantukin fih a nungmi  thil an tuah awk a si lo ti kha a cawnpiak hna. (Deut. 4:6-8) Mah nawlbia nih a biapi tukmi mah biatak hi a langhter: Jehovah nih nupa sualnak kha a huat.

Jehovah nih Israel mi hna sinah an pawngkam mi hna nih an tuahmi ziaza rawhralnak kong kha a chim i hitin a ti hna: “Kaan kalpi hna lainak ram, Kanaan ram i an tuah bantuk zongin nan tuah lai lo. . . . Ram cu a thurhnawm cang i cucaah a ṭhatlonak kha dan ka tat.” A thiangmi Israel Pathian nih Kanaan mi hna an nunning cu fih a nun tuk caah an ram kha a thiang lomi le a thurhnawm tukmi in a hmuh.—Lev. 18:3, 25.

Jehovah nih Kanaan mi kha dan a tat ko nain mi cheukhat nih nupa sualnak kha an tuah peng rih. Kum 1,500 leng hnuah Paul nih Khrihfa hna lakah a ummi miphun hna cu “ningzah zeihmanh an hngal lo” tiah a ti. “Sualnak kha an tuah lengmang, cun i sum loin aa dawhcah lomi thil phun zakip kha an tuah.” (Efe. 4:17-19) Tuchan zongah mi tampi nih nupa sualnak kha an tuah i an i porhlaw. Cucaah a hmaanmi Khrihfa hna nih hi vawlei mi hna nih an tuahmi ziaza rawhralnak kha a si khawh chungin kan hrial a hau.

A thurhnawmmi hmanthlak nih Pathian kha a ralchanh. Pathian nih minung kha amah he i loin a kan ser. A hmaan le hmaanlo hngalh khawhnak a kan pek. Fim ngaiin Pathian nih nupa umṭinak he aa tlaiin ri a chiah. Nupa umṭinak cu nuva hna nih pakhat le pakhat nuamhnak an i pek khawh nakhnga caah a timhmi a si. (Gen. 1:26-28; Ptb. 5:18, 19) Asinain a thurhnawmmi hmanthlak a chuahtu asiloah a hlorhmi hna nih zeidah an tuah? Pathian i ziazalei phunglam kha zei ah an rel lo. A thurhnawmmi hmanthlak a hlorhmi hna nih Jehovah thang an chiatter. Nupa sualnak aa telmi thilri an chuahnak thawngin asiloah an hlorhnak thawngin a phunglam zei ah a rel lomi hna kha Pathian nih bia a ceih hna lai.—Rom 1:24-27.

A thurhnawmmi kong a relmi le a zoh hramhrammi hna tah zeitin? Cheukhat nih mah cu ṭih a nung lomi nuamhsaihnak a si tiah an ruah men lai. Asinain a tak ti ahcun Jehovah phunglam zei ah a rel lomi hna an bawmhmi hna a si. A thurhnawmmi hmanthlak an hun zoh tikah mah cu an i timhmi a si men lai lo. Asinain Baibal nih a hmaanmi Pathian a biami hna nih a thurhnawmmi hmanthlak kha an huat tuk awk a si tiah a ti. Cun Baibal  nih “ṭhatlonak a huami kha BAWIPA nih a dawt hna” tiah a ti.—Salm 97:10.

A thurhnawmmi hmanthlak zoh hrial a duhmi hna hmanh nih cutin tuah a har kha an hngalh. Mitling lo kan si caah a thiang lomi nupa sual duhnak kha kan doh a hua men lai. Mah lengah a thurhnawmmi hmanthlak zoh cu a palh lo tiah kanmahle kanmah i ti awkah kan i zuam men lai. (Jer. 17:9) Asinain Khrihfa a hung simi mi tampi nih mah dohnak ah teinak an hmu. Mah kong hngalhnak nih a thurhnawmmi hmanthlak zohnak kha ka doh khawh ve lai timi zumhnak aan ngeihter khawh. Satan rap a simi a thurhnawmmi hmanthlak kha hrial awkah Baibal nih aan bawmh khawh ning kha i cinken.

A hmasa ah kan hngalh cang bantukin Israel mi tampi nih a ṭhalomi an duhnak kha ṭih a nungmi thil an tuah hlan tiang an ṭhanter. Tuchan zongah cu bantuk thil kha a cang kho. Jesuh a nau Jeim nih ṭih a nunnak kha hitin a langhter: “Kan duhnak a ṭhalomi khan a kan pialpi i rap ah a kan foih . . . Cu tikah thilṭhalo duhnak nih cun sualnak kha a pawi i a hrin.” (Jeim 1:14, 15) Mi pakhat nih a ṭhalomi a duhnak kha a ṭhanter ahcun sualnak a tuah kho. Cucaah a ṭhalomi thil kong ruah kha ngol awkah fakpi in kan i zuam a hau i mah kong kha kan ruah peng awk a si lo.

A ṭhalomi thil kong na ruah peng kha na hngalh ahcun a ṭhami thil kong kha ruat colh. Jesuh nih hitin a ti: “Nan kut nih siseh, nan ke nih siseh aan pialter hna ahcun tan u law hlonh ko hna u. . . . Cun nan mit nih aan pialter hna ahcun khoih u law hlonh ko hna u.” (Matt. 18:8, 9) Jesuh nih kan pum cheubang kha kan tan taktak awk a si tiah a chimmi a si lo. A ṭhalomi thil kong kan ruahnak a ruang hngalh awkah i zuam in thlennak tuah colh a herh kha kan hngalhthiam nakhnga mah tahchunhnak kha a hmanmi a si. A thurhnawmmi hmanthlak zohnak he aa tlaiin mah ruahnak cheuhnak kha zeitindah kan zulh khawh?

A thurhnawmmi hmanthlak na hmuh sual ahcun ‘ka tawnghtham khawh ko lai’ tiah ruat hlah. Kaa danglei ah zoh colh. TV kha phit colh. Computer, phone asiloah tablet hna kha phit colh. A thiangmi thil kong kha ruat. Cutin tuahnak nih a ṭhalomi duhnak kha i ukter loin na ruahnak kha uk khawh awkah aan bawmh khawh.

A thurhnawmmi hmanthlak zoh kha hlawhtling tein na ngol khawh, asinain a caan ah na rak zohmi kha na hun i cinken ṭhan ah tah zeitin? A thurhnawmmi hmanthlak asiloah ruahnak hna cu mi pakhat lungthin chungah caan saupi a cam kho. Mah cu zei caan paohah a chuak ṭhan kho. Cutin a chuah ṭhan tikah mah tein di i riamternak ti bantuk kha tuah na duh men lai asiloah a tuah hmanh na tuah men lai. Cucaah cu bantuk ruahnak kha ruahlopi in ka ngei kho ti kha hngal law mah kha doh awkah i timtuah.

Pathian duhmi lam in ruah awk le tuah awkah bia na khiahmi kha fehter. Lungtho tein ‘a pum a hrem i fek tein a ukmi’ lamkaltu Paul bantuk kha si hna u sih. (1 Kor. 9:27) A thiang lomi duhnak kha i ukter hlah. “Chunglei in Pathian nih nan lungthin kha a dihumnak in in thleng hna seh. Cu tikah a ṭhami thil le Pathian nih a lawmhmi thil le a tlingmi thil kha [nangmah theng nih] nan hngalh khawh lai, cucu Pathian duhmi an si.” (Rom 12:2) A ṭhalomi thil na tuah ahcun naa nuam lai lo, asinain Pathian duhmi lam in na ruah i na tuah ahcun naa nuam lai ti kha philh hlah.

Baibal caang cheukhat kha cinken khawh i zuam. Cun a ṭhalomi ruahnak kha na hun ngeih ahcun mah Baibal caang hna kha ruat. Salm 119:37; Isaiah 52:11; Matthai 5:28; Efesa 5:3; Kolose 3:5 le 1 Thesalon 4:4-8 ti bantuk Baibal caang hna nih a thurhnawmmi hmanthlak kha Jehovah bantukin hmuh ve awk le Jehovah nih na sinin aa ruahchanmi kha hngalhthiam awkah aan bawmh lai.

A ṭhalomi thil zoh asiloah ruah kha ka do kho lai lo tiah na ruah ahcun zeidah na tuah awk a si? Kan caah Zohchunhawk Ṭha Bik Jesuh keneh kha naih tein zul. (1 Pet. 2:21) Jesuh tipil a in hnuah Satan nih a tukforh peng. Mah tikah Jesuh nih zeidah a tuah? A doh peng. Jesuh nih Baibal caang tampi hmangin Satan tukforhnak kha a doh. Hitin a ti: “Satan, va kal cang.” Mah tikah Satan cu a kal. Jesuh nih Satan doh kha zeitikhmanh ah a ngol lo bantukin nang zong na ngol awk a si lo. (Matt. 4:1-11) Satan le a vawlei nih na lungthin kha a ṭhalomi ruahnak in khahter awkah an i zuam zungzal ko lai, asinain lung dong loin do peng. A thurhnawmmi hmanthlak zoh dohnak ah teinak na hmu kho. Jehovah bawmhnak thawngin na ral kha na tei khawh.

Jehovah sinah thlacam zungzal law bawmhnak hal. Paul nih hitin a ti: “Bawipa cu nan herhmi kha hal u law . . . Pathian daihnak, minung hngalhnak a lonhtu nih cun, Khrih Jesuh chungah nan lungthin le nan ruahnak cu him tein a chiah lai.” (Fil. 4:6, 7) Pathian nih thil ṭhalo kha doh khawh awkah lungdaihnak aan pek lai. Jehovah kha na naih ahcun ‘aan naih ve lai.’—Jeim 4:8.

Van le vawlei ah Cungnung Bik a simi he pehtlaihnak ṭha kan ngeih peng ahcun Satan rap in huhphenh kan si lai. Jesuh nih hitin a ti: ‘Hi vawlei uktupa [Satan] cu a ra dengmang cang . . . Ka cungah nawlngeihnak cu zeihmanh a ngei lo.’ (Johan 14:30) Jesuh nih zeicah cutin a chim khawh? Hitin a rak ti: “A ka thlahtu cu ka sinah a um i a duhmi kha ka tuah zungzal caah a ka kaltak bal lo.” (Johan 8:29) Nang zong Jehovah lung a lawmhtermi thil kha na tuah ahcun Jehovah nih zeitikhmanh ah aan kaltak lai lo. A thurhnawmmi hmanthlak zohnak rap kha hrial law Satan nih aan foih kho lai lo.