LER bann Izraelit dan lepase ti pe prepare pour travers Larivyer Zourden e antre dan sa later ki Bondye ti’n promet zot, zot ti ganny bann viziter. Sa bann viziter ti bann madanm etranze e zot ti’n vini pour envit bann msye pour en festen. I ti rar ki zot ti ganny en lenvitasyon koumsa, alor i ti kapab byen atiran pour al sa festen pour fer bann nouvo zanmi, pour danse e manz en bon repa. Menm si sa bann madanm etranze pa ti pe viv dapre menm standar ki bann Izraelit ti’n aprann dan Lalwa Bondye, i kapab ki serten zonm Izraelit ti panse: ‘Nou pou oke nou. Nou pou fer atansyon.’

 Me ki ti arive? Labib i dir: “Bann dimoun ti konmans komet imoralite seksyel avek bann fiy Moab.” (NWT) An realite, sa bann madanm ti pe servi imoralite seksyel pour fer bann zonm Izraelit ador bann fo bondye. Sanmenm sa ki sa bann zonm ti fer! Alor nou kapab konpran akoz Zeova “ti ankoler kont zot.”​—Nom. 25:1-3.

Sa bann Izraelit ti kas Lalwa Bondye dan de fason: Zot ti ador zidol e zot ti komet imoralite seksyel. Sa ti fer ki plizyer milye Izraelit ti mor akoz zot ti dezobei Bondye. (Egz. 20:4, 5, 14; Det. 13:6-9) Pli pir ankor, se ki si zot pa ti’n kas Lalwa Bondye, plizyer milye Izraelit pa ti pou’n mor e zot ti pou’n kapab travers Larivyer Zourden e antre dan Later Promiz.​—Nom. 25:5, 9.

Zapot Pol ti ekri konsernan sa ki ti arive. I ti dir: “Sa ki ti arive avek zot i en legzanp e i’n ganny ekrir konman en lavertisman pour nou ki pe viv dan sa bann letan lafen.” (1 Kor. 10:7-11) Nou kapab asire ki Satan ti vreman kontan ler serten Izraelit ti fer en pese grav ki ti fer ki Zeova pa ti permet zot antre dan Later Promiz. Nou bezwen aprann avek fot bann Izraelit akoz nou konnen ki Satan ti pou vreman kontan si i kapab anpes nou antre dan sa nouvo lemonn ki Bondye in promet.

Ozordi, Satan i anvi fer ditor bann Kretyen e i fer sa par servi bann taktik ki i’n deza servi lo plizyer dimoun. Parey nou’n aprann avek bann Izraelit, Satan ti servi imoralite seksyel konman en taktik. Ozordi, imoralite seksyel i ankor en latrap ki danzere. En fason ki nou kapab tonm dan sa latrap i atraver pornografi.

Ozordi, en dimoun i kapab get pornografi san ki okenn dimoun i konnen. Plizyer lannen pase, sa pa ti posib. Si en dimoun ti anvi get pornografi, i ti bezwen al dan en sinema kot i zwe bann film ki pa apropriye oubyen dan bann landrwa kot i vann bann liv ki montre bann keksoz ki annan pour fer avek sèks. I tre probab ki bokou dimoun pa ti frekant sa bann landrwa akoz zot ti kanmi ki lezot dimoun ti pou vwar zot. Me ozordi, en dimoun ki ganny akse avek Enternet i kapab get pornografi dan son travay oubyen menm dan son loto. Dan bokou landrwa, en msye oubyen en madanm i kapab get pornografi san ki i bezwen kit son lakour.

Pa zis sa. Konmela avek mobayl ek tablet, i pli fasil pour dimoun get pornografi. Dimoun i kapab get bann portre imoral lo zot lekipman elektronik ler zot pe marse lo semen oubyen ler zot dan bis ouswa tren.

Vi ki i pli fasil pour get pornografi san ki dimoun i konnen, pornografi i afekte bokou plis dimoun ki oparavan. En kantite dimoun ki get pornografi i gat zot maryaz, zot perdi respe pour zot lekor e zot nepli annan en konsyans kler. Pli pir ki sa, zot kapab gat zot lanmitye avek Bondye. Ou kapab asire ki pornografi i annan en move lefe lo tou bann ki get pornografi. Dan bokou ka, bann move lefe ki pornografi i annan lo lemosyon e fason panse en dimoun i parey en blesir. Ptitapti sa bann blesir i kapab geri me i kit en sikatris.

I bon pour konnen ki Zeova i kapab protez nou kont sa latrap Satan. Si nou anvi ki Zeova i protez nou, nou bezwen “vreman obei” li e pa fer parey bann zonm Izraelit. (Egz. 19:5, NWT) Nou bezwen rekonnet ki Zeova i ay pornografi. Akoz nou dir sa?

Mazinen ki lalwa ki Bondye ti donn nasyon Izrael ti diferan avek lalwa ki tou lezot nasyon ti annan sa letan. Sa bann lalwa ti  protez bann Izraelit kont bann dimoun otour zot e ansenny zot pour pa fer bann keksoz degoutan ki bann nasyon otour zot ti pe fer. (Det. 4:6-8) Sa bann lalwa ti fer resorti en laverite enportan: Zeova i ay imoralite seksyel.

Ler Zeova ti pe dir nasyon Izrael konsernan bann keksoz degoutan ki bann nasyon otour zot ti pe fer, i ti dir: “Pa imit bann pratik . . . ki ganny pratike dan pei Kanaan kot mon pe anmenn zot. . . . Pei osi in vin enpir. Mon’n pini li akoz son bann fot.” Dapre Bondye bann Izraelit ki en Bondye sen, fason viv bann Kananeen ti sitan degoutan ki i ti konmsi later kot zot ti viv ti’n vin enpir.​—Lev. 18:3, 25.

Menm si Zeova ti pini bann Kananeen, lezot dimoun ti kontinyen pratik imoralite seksyel. Plis ki 1,500 an pli tar, Pol ti dir ki dimoun dan bann nasyon kot bann Kretyen ti pe viv ti’n “perdi tou sans moral.” Anfet, zot ti “napa okenn kontrol lo zot lekor e zot pratik tou sort kalite vis ek lenpirte avek vorasite.” (Efe. 4:17-19) Ozordi, bokou dimoun i viv en lavi imoral e zot pa ni menm onte. Bann vre adorater i devret fer zot mye pour evit bann pratik imoral ki dimoun dan sa lemonn i fer.

Tou sa ki annan pour fer avek pornografi i ofans Bondye. I ti kree bann imen dan son resanblans e avek sa abilite pour santi si en keksoz i byen oubyen mal. Bondye ti vreman saz ler i ti donn bann lalwa konsernan relasyon seksyel. Bondye ti anvi ki relasyon seksyel i en keksoz gou ant en msye ek en madanm marye. (Zen. 1:26-28; Prov. 5:18, 19) Me ki bann dimoun ki fer pornografi oubyen ki ankouraz dimoun pour get pornografi pe fer? Zot pe inyor bann standar moral Bondye. Bann dimoun ki ankouraz lezot pour get pornografi napa respe pour Zeova. Bondye pou ziz bann ki inyor son bann standar e fer pornografi oubyen ankouraz dimoun pour get pornografi.​—Rom. 1:24-27.

Me ki nou kapab dir lo bann dimoun ki lir oubyen get pornografi par ekspre? Serten i kapab krwar ki napa nanryen mal avek sa. Par kont, ler zot swazir sa kalite detant, zot pe pran kote avek bann ki inyor bann standar Zeova. Petet sa pa ti zot lentansyon  letan zot ti konmans get pornografi. Me Labib i fer kler ki bann adorater sa vre Bondye i devret ay pornografi. Labib i ankouraz nou: “Ou ki kontan [Zeova]! Deteste lemal.”​—Ps. 97:10.

Menm bann ki pa anvi get pornografi i kapab vwar li difisil pour pa fer li. Nou enparfe e i kapab ki nou bezwen lager avek nou bann dezir imoral. Deplis, vi ki nou enparfe, nou kapab esey anbet nou lekor pour krwar ki napa nanryen mal avek pornografi. (Zer. 17:9, NWT) Me bokou ki’n vin Kretyen in reisi aret get pornografi. Si ou pe lager avek sa menm move dezir, i kapab ankourazan pour konnen ki lezot in reisi sirmont sa bann dezir. Annou vwar ki mannyer Parol Bondye i kapab ed ou evit pornografi, sa latrap Satan.

Parey nou ti vwar pli boner, bokou Izraelit ti les bann move dezir devlope dan zot leker ziska ki zot ti fer en keksoz ki ti anmenn bann move konsekans. Sa i kapab arive avek nou ozordi. Disip Zak ki ti demi frer Zezi, ti dir: “En dimoun i ganny . . . atire e anbete par son prop dezir. Apre sa, ler sa dezir i vin pli for, i fer sa dimoun fer pese.” (Zak 1:14, 15) Enn fwa ki en dimoun in les en move dezir devlope dan li, i tre probab ki avek letan sa dimoun pou fer pese. Alor, nou bezwen aret mazin bann keksoz imoral.

Si ou realize ki ou pe kontinyelman mazin bann keksoz imoral, fer en keksoz deswit. Zezi ti dir: “Si ou lanmen oubyen ou lipye i fer ou fer pese, koup li e zet li lwen avek ou. . . . Osi, si ou lizye i fer ou fer pese, aras li e zet li lwen avek ou.” (Mat. 18:8, 9) Zezi pa ti pe dir ki nou devret literalman koup en parti nou lekor. I ti servi sa legzanp pour ed nou konpran ki nou bezwen rode akoz nou pe kontinyelman mazin bann move keksoz e apre ki nou’n konnen akoz, nou bezwen fer bann sanzman vitman. Me ki mannyer nou kapab aplik sa konsey ler i annan pour fer avek pornografi?

Si ou vwar en keksoz ki annan pour fer avek pornografi, pa bezwen mazinen ki sa pa pou annan en lefe lo ou. Get en lot keksoz deswit. Tenny televizyon deswit. Tenny  ou konpiter oubyen ou lekipman elektronik deswit. Konsantre lo en lot keksoz ki apropriye. Sa i kapab ed ou kontrol sa ki ou mazinen dan plas les bann move dezir kontrol ou.

Ki ou kapab fer si ou’n reisi aret get pornografi, me tanzantan ou rapel sa ki ou’n vwar? Bann portre oubyen panse ki annan pour fer avek pornografi i kapab reste dan lespri en dimoun pour en kantite letan. Nenport ki ler sa bann keksoz i kapab revin dan lespri. Si sa i arive, ou kapab ganny sa lanvi pour fer en keksoz enpir, petet pour konmans zwe avek ou lekor. Alor, gard antet ki sa bann move keksoz i kapab revin dan ou lespri en sel kou e ki ou bezwen pare pour lager kont zot.

Ou bezwen vin pli determinen pour mazin e azir dan sa fason ki Bondye i anvi. Fer parey zapot Pol ki ti pare pour ‘tret son lekor dir e kontrol li parey en lesklav.’ (1 Kor. 9:27) Pa les ou ganny kontrole par ou bann move dezir. O kontrer, ‘transform ou par sanz ou fason panse, pour ki ou menm ou fer sir ki sa i lavolonte Bondye, ki bon, akseptab e parfe.’ (Rom. 12:2) Gard antet ki ou pa pou ere si ou fer bann keksoz imoral, me ki ou pou ere si ou mazin e fer sa ki Bondye i anvi.

Esey aprann serten verse Labib parker. Koumsa, ler ou annan en move panse, ou kapab fors ou lekor pour mazin sa bann verse. Bann verse parey Psonm 119:37; Izai 52:11; Matye 5:28; Efezyen 5:3; Kolosyen 3:5 ek 1 Tesalonisyen 4:4-8, i kapab ed ou pour annan menm pwennvi avek Zeova lo pornografi e pour konpran ki i oule ou fer.

Me ki ou kapab fer si parfwa ou santi ki i tro difisil pour reziste get oubyen mazin bann keksoz imoral? Swiv legzanp Zezi fidelman. (1 Pyer 2:21) Apre ki Zezi ti’n batize, plizyer fwa Satan ti esey tant li. Ki Zezi ti fer? I ti kontinyen reziste Satan. Zezi ti sit plizyer verse pour reziste bann tantasyon Satan. I ti dir: “Sorti la ale Satan!” e Satan ti kit li. Zis parey Zezi ti kontinyen reziste Dyab, ou osi fer parey. (Mat. 4:1-11) Satan ek son lemonn pou kontinyelman esey fer ou mazin bann keksoz imoral, me pa zanmen bes lebra. Ou kapab aret get pornografi! Zeova i kapab ed ou ranport laviktwar lo ou lennmi.

Kontinyen priy Zeova e sipliy li pour ed ou. Pol ti dir: “Fer Bondye konn zot bann demann dan lapriyer . . . e ki lape Bondye ki depas tou sa ki nou kapab konpran i protez zot leker ek lespri par Kris Zezi.” (Fili. 4:6, 7) Bondye pou donn ou lape lespri ki pou ed ou reziste fer sa ki mal. Si ou vin pros avek Zeova, “i pou vin pros avek [ou].”​—Zak 4:8.

Nou pou ganny proteze kont bann latrap Satan si nou gard en bon relasyon avek Souvren liniver. Zezi ti dir: “Sef sa lemonn [Satan] pe vini e i napa kontrol lo mwan.” (Zan 14:30) Akoz Zezi ti asire ki sa i leka? En fwa i ti dir: “Sa Enn ki’n anvoy mwan i avek mwan, i pa’n les mwan tousel parski mon touzour fer sa ki fer li plezir.” (Zan 8:29) Si ou osi ou fer ou mye pour fer plezir Zeova dan tou sa ki ou fer, ou kapab asire ki i pa pou zanmen abandonn ou. Pa get pornografi e Satan pa pou kapab met ou dan latrap.