DI DEN Islayelisama be e teke seeka fu abaa a Yordaan Liba fu go aini a kondee di Gadu be paamisi den, wantu taa kondee uman di á be e dini Yehofa kon luku den. Den uman ya be kon kai den man fu Islayeli fu go a wan fesa. Kande den man ya be si a sani ya enke wan okasi fu meke nyun mati, fu dansi, piisii, anga fu nyan switi nyanyan. A fasi fa den uman ya be e libi á be e kai anga a Weiti di Gadu be gi den Islayelisama. Kande son wan fu den man be e pakisei taki: ’U ná o du sani di wi á mu du. U sabi a Weiti.’

 Ma fa sani waka? Beibel taki: „Den go hulu anga den Moab uman.” Den uman ya be wani den man fu Islayeli dini falisi gadu. A dati den du tu. Neen meke „Yehofa ati boon a den Islayelisama”.​—Num. 25:1-3.

A tu fasi den Islayelisama pasa a Weiti fu Gadu: Den dini falisi gadu. Boiti dati den hulu. A omen dunsu sama dede fu di den ná aliki Gadu (Ek. 20:4, 5, 14; Deit. 13:6-9). Saide a sani ya a be wan tyali sani? A fu di den be de koosube fu a Paamisi Kondee. Efu den man ya á be pasa a Weiti fu Gadu, den be o abaa a Yordaan Liba go aini a Paamisi Kondee.​—Num. 25:5, 9.

Pawlesi be sikiifi fu a sani di pasa ya taki: „Den sani di pasa anga den, sikiifi fu leli u wan sani. Den sikiifi fu wasikoi wi di e libi aini den lasiti dei ya” (1 Kor. 10:7-11). A be musu switi gi Saatan di son wan fu den Islayelisama taangayesi Yehofa, bika den sama di du a sani ya á be go aini a Paamisi Kondee. U mu leli wan sani fu a sani di miti den, bika a o switi gi Saatan efu u du wan sani di o tapu u fu go aini a nyun goontapu.

Aini a ten ya Saatan wani kisi Kelesten anga denseefi beti di a koboloiki fu koli omen sama. U be si kaba taki a be koli den Islayelisama fu hulu. Aini a ten ya hululibi a wan fu den sani di e meke omen sama gwe fika Yehofa. Wan fu den fasi fa Saatan sa kisi u fu go hulu, na a luku di sama e luku sekisi felon.

Aini a ten ya, sama sa luku sekisi felon sondee taawan sabi. Fosi, te wan sama be wani luku sekisi felon efuso buku, a be mu go a den peesi pe den be e daai den sowtu felon ya efuso a be abi fu go a den wenkii pe den e seli sekisi buku. A gei sen be e kisi omen sama fu go a den peesi ya, fu di den be e si enke sama o si den wan fasi. Ma nownow solanga wan sama abi internet a sa luku sekisi felon winsi a wooko a de efuso te a de aini en wagi. Aini son kondee, wan man efuso uman sa luku sekisi felon a osu.

Ma dati a ná ala. Nownow sama sa luku sekisi felon a den telefon efuso tablet tu. Te den e waka a sitaati, te den de aini loko efuso besi, den sa luku sekisi felon efuso fowtow a den telefon.

A kon moo makiliki gi sama fu luku sekisi felon sondee taawan sabi. Neen meke sama e moo luku sekisi felon aini a ten ya. A sani ya e meke omen toow booko, sama e fii enke den á bun, den kosensi e fon den. San moo ogii, na a gwe di a sani ya e meke sama gwe fika Yehofa. A omen takuu bakapisi a abi te sama e luku sekisi felon. Gaanse leisi a wan hii pisiten den e fii den bakapisi fu a sani ya. Son sama a den hii libi den e fii a bakapisi fu a luku di den be e luku sekisi felon.

U mu holi a pakisei taki Yehofa e kibii u fu Saatan á fende u kisi anga a beti ya. Efu u wani Yehofa kibii wi, u mu du san den Islayeliman be mu du. U mu aliki Yehofa anga u hii ati (Ek. 19:5). U mu holi a pakisei taki Yehofa e buuse sekisi buku efuso felon. Saide u sa taki a sani ya?

Pakisei a sani ya: Den weiti di Gadu be gi den Islayelisama á be de enke den weiti fu den taa kondee sama. Den weiti ya be de enke wan sikotu di be e kibii den Islayelisama fu den á teke den takuu gwenti fu den taa kondee sama (Deit. 4:6-8). Den weiti ya be e soi kiin taki Yehofa e buuse hululibi.

Yehofa be taigi den Islayelisama sowtu ogii den taa kondee sama e du. Bakadati a taigi den taki: „Wi á mu tyai useefi enke den sama fu a kondee Kaana-an pe mi o  tyai u go. . . . A hii kondee tyobo. Mi o sitaafu den fu den ogii di den e du.” Fu di Yehofa, a Gadu fu Islayeli santa, meke a be si enke den Kaana-ansama be tyobo a hii kondee anga a tyobo libi fu den.​—Lef. 18:3, 25.

Winsi fa Yehofa be sitaafu den Kaana-ansama, tokuso den sama fu den taa kondee be e libi wan hululibi ete. Baka wan sani fu 1500 yali, Pawlesi be sikiifi taki den sama fu a ten fu den Kelesten ’á be sabi moo san bun anga san á bun’. ’Sen á be e kisi den sama ya fu den ogii di den be e du. Den be e du omen molusu sani fu di den be abi takuudu’ (Efe. 4:17-19). Aini a ten ya, a omen sama e libi wan molusu libi tu. Sen nai kisi den fu den sani di den e du. Ma tuu Kelesten e du ala san den poi fu den á luku den molusu sani di den sama fu a goontapu ya e du.

Sama di e meke sekisi felon efuso buku e soi taki den nai lesipeki Gadu. Gadu meke libisama enke fa enseefi de. A meke wi anga a fii fu sabi san bun anga san á bun. A wan koni sani Gadu du di a soi u fa u mu si sekisi. Beibel taki a siibi di man anga uman di toow e siibi anga denseefi a wan piisii sani (Gen. 1:26-28; Odo 5:18, 19). Ma san den sama di e meke sekisi felon anga den sama di e gi taawan taanga-sikin fu luku den sowtu felon ya e du? Den e soi taki den nai lesipeki den weiti fu Gadu. Den sama ya nai lesipeki Yehofa tu. Gadu o sitaafu den sama di e meke sekisi felon anga den sama di e gi taawan taanga-sikin fu luku den sowtu felon ya.​—Rom. 1:24-27.

Ma fa a de anga den sama di e luku sekisi felon? Kande son wan e si enke a wan kowownu sani. Ma te sama e luku den sowtu sani ya, den e holibaka gi den sama di nai lesipeki den weiti fu Yehofa. Kande den á be denki go na a se de, di den bigin luku sekisi felon. Ma Beibel e soi kiin taki sama di e dini Gadu mu e buuse sekisi felon efuso buku. Beibel taki: „Efi i lobi Yehofa, i mu buuse ogii.”​—Ps. 97:10.

Winsi wan sama á wani luku sekisi felon, tokuso a á makiliki fu wai pasi gi a sani ya. Fu di wi abi sondu, meke wi abi fu feti anga den sondu fii fu u di sa meke u du sani  di Yehofa á lobi. Boiti dati, fu di wi abi sondu meke son leisi wi e koli useefi taki a ná wan ogii fu luku sekisi felon efuso buku (Yel. 17:9). A omen sama wini a feti ya di den toon Kelesten. A sani ya e gi u taanga-sikin taki efu wi abi a polobelema ya, useefi poi wini. Meke u luku fa a Wowtu fu Gadu sa yeepi u fu Saatan á kisi u fu luku sekisi felon.

Enke fa u be luku a fesi, u be si taki a omen Islayelisama be meke takuu fii basi den te den du sani di tyai ogii gi den. Na aseefi sani sa miti wi aini a ten ya. Yakowbesi, wan fu den baala fu Yesesi be taki: „Tesi e miti wan sama fu di den fii fi en e koli en. Te a kweki a fii, da ai tyai sondu te fu kaba” (Yak. 1:14, 15). Te wan sama e kweki takuu fii aini en ati, a sani ya sa meke a sondu. Neen meke u mu puu takuu pakisei aini wi ati.

Efi i si taki i lobi pakisei sani di á fiti, yu á mu daaidaai fu du wan sani. Yesesi taki: „Efi yu ana efuso i futu e meke i sondu, koti en puu da i fiingi en towe. . . . Efi yu ain e meke i sondu, tokoo en puu, da i fiingi en towe” (Mat. 18:8, 9). Yesesi á be wani taki a koti u mu koti u sikin tuutuu. A be wani soi u taki wi á mu daaidaai fu wai pasi gi den sani di e meke u pakisei sani di á fiti. Fa u sa du a sani ya te a abi fu du anga sekisi felon efuso buku?

Te i si sekisi felon efuso fowtow, yu á mu denki taki a ná o poli i denki. I mu daai i fesi wanten. Kii a TV, a computer, telefon efuso tablet wanten. Poti pakisei a wan bun sani. A sani ya o yeepi i fi yu á pakisei sani di á fiti.

Kande i meke moiti tapu anga a luku di i be e luku sekisi felon efuso buku. San i mu du efi yu á poi feegete den sani di i be si? A á makiliki fu feegete sekisi felon efuso fowtow te i si en kaba. Den sani ya sa kon a  yu pakisei sondee i wani. Te a sani ya pasa, i sa fii fu du wan sani di á bun. Kande yu e fii fu pee anga i senpeesi efuso du moo gaan sani di Yehofa á lobi. Neen meke i mu holi a pakisei taki efi i be e luku sani di á fiti, na ala yuu den sowtu denki ya sa kon ai pakisei. Yu á mu daaidaai fu puu den sowtu denki ya a yu ede.

Du ala san i man fu denki enke fa Gadu wani. U mu meke moiti fu waka na apostel Pawlesi baka. A be e ’naki en sikin anga kofu, a be e basi en enke wan saafu tu’ (1 Kor. 9:27). Wi á mu meke takuu denki basi u, „ma u mu kengi a fasi fa wi e denki, da u libi seefi o kengi. Da wi o sabi san na a pasi fu Gadu di bun, di e meke a piisii, di ná abi nawan fowtu” (Rom. 12:2). Holi a pakisei taki efi i meke takuu fii basi i, neen i du sani di Yehofa á lobi, i ná o piisii. Ma efi i meke moiti fu du sani enke fa Yehofa wani, yu o piisii.

Meke moiti fu leli wantu Beibeltekisi a ede. Da te takuu pakisei kon a yu ede, pakisei den tekisi di i be leli a ede. Wantu tekisi di i sa leli a ede a Psalm 119:37; Yesaya 52:11; Mateyesi 5:28; Efeisesama 5:3; Kolosesama 3:5; anga 1 Tesalonikasama 4:4-8. Den tekisi ya o yeepi i fu si sekisi felon enke fa Yehofa e si en. Den o yeepi i tu fu du sani enke fa Yehofa wani.

San i mu du efu ai taanga gi i son leisi fi yu á luku efuso pakisei sani di á bun? Waka a Yesesi baka (1 Peit. 2:21). Di Yesesi dopu, Saatan tesi en omen leisi. San Yesesi du? A á gi abaa. Ala yuu a be e koboloiki Beibel fu toto futu gi Saatan. A taigi Saatan taki: „Gwe komoto ya!” A so Saatan fika en. Leti enke fa Yesesi á gi abaa di Didibii be e tesi en, a so iseefi á mu gi abaa (Mat. 4:1-11). Saatan anga a goontapu fi en o du ala san den man fu poli i denki anga takuu pakisei, ma i mu tan feti. I poi tapu anga a luku di yu e luku sekisi felon efuso buku. Yehofa o yeepi i fu wini a ogii feyanti ya.

Begi Yehofa naamo fu a yeepi i. Pawlesi taki u mu „taigi Gadu ala sani te wi e begi. Gi en daa, begi en fayafaya. Da a freide fu Gadu di libisama á poi fusutan o kibii wi ati anga u fusutan anga yeepi fu Yesesi Kelestesi” (Filip. 4:6, 7). A freide fu Gadu sa yeepi i fu tapu anga takuu gwenti di Gadu á lobi. Efi i kon koosube a Yehofa, „enseefi o kon koosube a yu”.​—Yak. 4:8.

A sani di o yeepi u fu Saatan á fende u kisi, a te wi anga Yehofa a bun mati. Yesesi be taki: „[Saatan] a tiiman fu a goontapu e kon, ma a á poi anga mi” (Yoh. 14:30). Saide Yesesi be e biibi taki Saatan á be o poi kisi en? A be taki: „A sama di sende mi kon, de anga mi. Noiti a gwe fika mi, bika ala yuu mi e du san a lobi” (Yoh. 8:29). Efi yu e du sani enke fa Yehofa wani, iseefi sa biibi taki noiti a o gwe fika i. Efi i nai luku sekisi felon efuso buku, Saatan ná o poi kisi i.